Rawngbâwlnaah Fîmkhur Rawh
1. Engvângin nge rawngbâwlnaah fîmkhur hle a ngaih?
1 Pathian chhiahhlawhte chuan “chinghne zînga berâm awm angin” ‘chhuan bengtla lo leh tihmawhte zîngah’ thu an hril a ni. (Mt. 10:15-17; Phil. 2:14-17) Chanchin thara kan hmuh fo tualchhûng buaina te, mipui tharum thawhna te, leh râwng taka mihring inrûkbona te chuan min tirâlṭi hle a, chûng chuan mi suaksualte chu “an sual zual deuh deuh” a ni tih a târ lang a ni. (2 Tim. 3:13) Eng Bible thu bulte nunpuinain nge rawngbâwlnaah “rûl anga fing,” a nih loh leh fîmkhur tûrin min ṭanpui ang?—Mt. 10:16.
2. Eng ang dinhmunte hian nge thu hrilhna bial kalsan a, hmun danga rawngbâwl chu tihâwm tak nihtîr?
2 Hmanghre Takin Thil Ti Rawh: Thufingte 22:3 chuan thil ṭha lo ‘bihrûksan’ a finthlâkzia a târ lang a. Harhvâng takin awm rawh! Bial râlmuang takte pawh rin lo takin a inthlâk thut thei a ni. Police veivâk an tam zual emaw, kawnga mipui pung khâwm emaw chu i hmu mai thei a. A châng chuan in neitu ngilnei tak chuan a vaukhân mai thei che bawk. Chutih hunah chuan thil chinchâng hriat châk avânga tawi khaw muan ai chuan, chu mi hmun kalsan nghâl a, hmun danga rawngbâwl chu a remhriatthlâk a ni.—Thuf. 17:14; Joh. 8:59; 1 Thes. 4:11.
3. Engtin nge Thuhriltu 4:9-a kan hmuh Bible thu bul chu rawngbâwlnaah kan hman theih?
3 Thawk Tlâng Rawh U: Thuhriltu 4:9 chuan: “Pahnih chu pakhat ai chuan an ṭha zâwk,” a ti a. Rawngbâwlnaah thawhpui nei lovin, him takin lo thawk ṭhîn pawh i ni thei a; mahse, tûnah chutianga mahni chauhva thawh chu a him tâwk em? Hmun ṭhenkhatah chuan a him tâwk pawh a ni thei. Mahse, hmun dangah chuan unaunu emaw, naupang emawte tân mahni chauhva thawh chu a him tawh lo va, a bîk takin ni tlâk hnuah phei chuan a him lo lehzual a ni. Thawhpui harhvâng tak neih chu a hlu hle a ni tih kan thiltawn chuan a târ lang. (Thur. 4:10, 12) Thu hrilhnaah in thawhpuite chu mitmei reng rawh. Thu hrilhna bial i chhuahsan hian mi dang hriattîr ṭhîn bawk rawh.
4. Engtin nge kohhran chhûnga mi zawng zawngte vênhimna lam chu kan thawh theih?
4 Upate chuan ‘kan thlarau min vênsak ṭhîntu’ an nih angin, tualchhûng dinhmun azira kaihhruaina min pe tûrin mawhphurhna an nei a. (Heb. 13:17) Kristian inngaihtlâwmna lantîr a, an kaihhruaina kan zawm chuan Jehova malsâwmna chu kan dawng ngei ngei ang. (Mik. 6:8; 1 Kor. 10:12) Pathian chhiahhlawh zawng zawngte chuan fîmkhur taka thawk chungin, kan rawngbâwlna bial chhûngah hian thu hrilhna ṭha tak i nei ṭheuh ang u.