Zawhna Bâwm

◼ Kan thih hnuah kan thil neih ṭhenkhat emaw, a vai emaw chu Jehova inawpna pâwl tâna pêk kan duh chuan eng nge kan ngaihtuah ang?

vMihringte hian an thih hnu hian an thil neihte chungah thu an nei thei tawh lo. (Thur. 9:5, 6) Chuvângin, mi tam tak chuan an ro sem dân tûr chungchângah an duh dân târ lanna will emaw, trust emaw an siam lâwk a ni. (2 Lal. 20:1) Chu lehkha pawimawhah chuan thurochhiah siam anga bawhzuitu tûr trustee emaw, executor emaw hming pawh târ lan a ni tlângpui ṭhîn. Chutiang lehkha siam a nih loh chuan, ram tam takah chuan sawrkâr thu neitute’n mitthi ta rote chu an sem mai ṭhîn a ni. Chuvângin, kan ro sem dân tûr chungchânga duh dân kan neih a, kan ro ṭhenkhat emaw, a vai emaw chu Jehova inawpna pâwl tâna pêk kan duh chuan, kan duh dân târ langtu lehkha siam a, kan duh anga bawhzuitu tûr fîmkhûr taka kan thlan chu a pawimawh hle.

Trustee emaw, executor emaw chuan mawhphurhna a nei sâng hle a. Ro sem tûr a tam dân azirin, a lâk khâwmna leh a sem chhuahnaah thil tam tak a telin, hun tam tak pawh hman ral a ngai mai thei. Chu mai bâkah, sawrkâr thu neitute chuan chutiang kawnga kan zui tûr dân tam tak an zam ve ṭhîn bawk. Chuvângin, kohhran chhûnga mi tupawh chu chutiang thil atâna rin tlâk leh ruat tlâk an ni kher lo. Kan mi thlan chu chutiang thil ti tûra tling tak, rin tlâk tak, leh kan duh dân ziah chhuah zui duh mi a ni tûr a ni.—“The Wisdom and Benefits of Estate Planning,” tih thuziak Awake! December 8, 1998-a chhuak chu en rawh.

Trustee Emaw, Executor Emaw Ni Tûra Tih I Nih Chuan: Miin a thih hnua a thurochhiah anga a thil neihte enkawl tûra a tih che chuan, chhût hmasa phawt la, chu mawhphurhna chu i hlen chhuah theih dâwn leh dâwn loh ngun takin ngaihtuah hmasa ang che. (Lk. 14:28-32) Mi a thih hnu chuan, ro khâwmtu atâna a ziah chhuahte chu i hriattîr a ngai dâwn a. Chutianga thu neihna i neih hnu chuan, dân ang leh will emaw, trust emaw inziak chhuak ang chiaha mitthi thil neihte sem darh chu i tihtûr a ni. Trustee emaw, executor emaw chuan mitthi thil neih chu a tlêm emaw, a tam emaw pawh ni se, ama duh angin a siam danglam thei lo tih a hre tûr a ni. Dân anga Jehova Thuhretute hman pâwl engemaw hnêna thilpêk rêng rêng chu Jehova inawpna pâwl hman atâna pêk a ni.—Lk. 16:10; 21:1-4.