Thu Hrila I Chhuah Hmain I Zawn Hmasak A Ngai Mai Thei

1. Engvângin nge ṭawng hrang hrang hmanna bialtea thu hrilhna nei kohhran chu ṭawng hman azira ṭhen hran a nih?

¹ C.E. 33 Pentikost nîa thlarau thianghlim an dawn hnu khân, Isua zirtîrte chu khawvêl hmun hrang hrang aṭanga lo kalte hnênah “ṭawng dangin an lo ṭawng ta a.” (Tirh. 2:4) Chuvâng chuan mi 3,000 vêlin baptisma an chan phah ta a ni. Ngaihvenawm takin, mikhual tam zâwk pawhin chutih laia an ṭawng hman tlânglâwn, Hebrai ṭawng emaw, Grik ṭawng emaw chu an hmang a nih hmêl a. Mahse, Jehova chuan Lalram thuchah chu anmahni hnam ṭawng ngeia hrilh an nih chu a duh a ni. Chutiang a nih chhan pakhat chu mite’n mahni ṭawng ngeia chanchin ṭha an han hriat hian an chhânlêt ṭhat lehzual ṭhin vâng a ni ngei ang. Chuvângin, tûn laiah hian ṭawng hrang hrang hmanna bialtea thu hrilhna nei kohhran chu ṭawng hman azira ṭhen hran a ni a. (km 2/07 p. 9, 10, par. 5-6) Ṭawng dang hmang group-te tân thawhna tûr bial bîk siam a ni lo, mahse, an awmna kohhran leh a bul vêla kohhran dangte thu hrilhna bial chhûnga an ṭawng hmangte hnênah thu an hril ṭhîn a ni.

2. (a) Zawn chhuah hna chu eng nge ni a, eng dinhmunah nge chutianga tih chu a ngaih mai theih? (b) Engtin nge ṭawng hrang hrang hmanna biala thawhnaah kohhrante chu an inṭanpui tawn theih? (c) Ṭawng dang hmang tuina lantîr tuemaw kan hmuh chuan eng nge kan tih ang?

² Ṭawng chi khat chauh hmanna hmunah i awm a nih chuan in tinah awlsam takin thu i hril thei a. Mahse, ṭawng chi hrang hrang hmanna hmun khawpuiah i awm a nih chuan chutiang chu a ni kher lo thei. Ṭawng dang hmang kohhrante chuan bial hmun khatah thu an hril pawh a ni thei a. Bial chhûngah kohhran danga mite ṭawng hman ang hmang an tam viau a nih chuan, kohhran hrang hrangte chu thu hrilhna biala an inthawh chhâwk theih dân service overseer-te chuan an ngaihtuah ang. Kawng leh lamah chuan, kohhran emaw, group emaw hman ṭawng chu mi tlêm tê chauhvin an hmang a nih chuan zawng chhuak tûra ruahmanna siam a ngai mai thei bawk. Kohhrante chuan i ṭawng hmanpuite an hmuh chu an hriattîr che pawh a ni thei a, mahse thu hrilh theih tûrte zawn chhuah chu i awmna kohhran emaw, group emaw mawhphurhna a ni. (“In Ṭanpui Tawn Rawh U” tih bâwm chu en rawh) Chuvângin, ṭawng hman bîk neite awmna hmun i hriat theih nâna zâwt kualin, zawn chhuah hna i thawh a ngai thei a ni. Engtin nge chu chu tih theih a nih ang?

3. Kohhran emaw, group emawin an zawnna hmun tûr chu engah nge a innghah a, chu mi atân chuan engtia rei nge hun hman a nih?

³ Zawn Chhuah Hna Ruahmanin: Ṭawng hrang hrang awmna biala zawn chhuah hna atâna hun hman rei zâwng chu tualchhûng dinhmunah a innghat a ni. Entîr nân, vêngchhûnga mi engzâtin nge chu ṭawng chu hmang? Thuchhuahtu eng zât nge awm? Kohhran emaw, group emaw chuan address eng zât nge an neih tawh? Kohhran chuan vêng tin chu in ang veka a zawn chhuah a ngai kher lo va, mahse, thu hrilhna bial chhûnga mite tamna hmun emaw, bial hlat vak lohna hmun emaw chu a thlang thei a ni. Mahse, a tam thei ang berin Jehova hming an lam theihna hun remchâng pêk a nih theih nân zawn chhuah hna chu ṭha taka ruahman a pawimawh a ni.—Rom 10:13,14.

4. (a) Eng angin nge zawn chhuah hna chu ruahman tûr a nih? (b) I ṭawng hmanpuite hmuh chhuah dân kawng ṭhenkhat chu eng nge ni?

⁴ Zawnna tûr hmuna ṭûl lo taka inzawn thuah a nih loh nân, upa hote, a bîk takin service overseer chuan zawn chhuah hna chu ruahmanin, a enkawl tûr a ni. (1 Kor. 9:26) Ṭawng dang hmang group-ah chuan a bul tumtu kohhrana upahote’n an ruat unaupa tling tak, a theih chuan upa emaw, kohhranho rawngbâwltu emaw chuan a kaihruai thei a. Kohhran leh group tam takte chuan zawn ṭan nân ruahmanna fel tak an nei a, directory emaw, Internet emaw aṭangin ṭawng hrang hmangte hming chu an la khâwm thei a ni. Tichuan, an telhna tûr bial chhûng hriat theih nân zawn chhuah hna chu phone-a biakna emaw, tlawh chhuahna emaw hmangin thawh a ni a. A ṭangkai chuan, kohhrana mite chu zawn chhuah hnaa a châng chânga an tel ṭheuh theih nân a bul tumtu kohhrana upahote chuan ruahmanna an siam thei a ni.—“I Ṭawng Hmanpuite Zawn Chhuah Dân” tih bâwm chu en rawh.

5. (a) Zawn chhuah hna thawk thuchhuahtute tâna rawtna ṭhenkhat chu eng nge? (b) Zawn chhuah hna thawh laiin mite hnênah eng nge kan sawi theih?

⁵ Zawn chhuah hnaa kan tel hun apiangin thil tum chiang tak kan nei tûr a ni a. He thiltih hi rawngbâwlna pêng pakhat a nih avângin, rawngbâwltu angin inâwm takin kan inthuam tûr a ni. Ṭawng hrang hmangtute zawn chhuah laia an ṭawng hmanna chuan phûrna nei tûr leh ṭawng thiam lehzual tûrin mi tam takte chu a ṭanpui a. Thlawhhma rawngbâwlna bial map leh list siam nâna hun hman zât ni lovin, zawn chhuah nâna hun hman zât chu kan report thei a ni. Ṭawng dang hmang tuemaw kan hmuh chuan chanchin ṭha hrilh kan tum tûr a ni a, a hnuah thu hrilhna bial chhinchhiah a nih theih nân service overseer emaw, amahin a ruat tuemaw hnênah kan hrilh nghâl tûr a ni. Mi chuan tuina a lantîr emaw, lantîr lo emaw pawh ni se hrilh tûr a ni. Zawn chhuah hna chu pawimawh hle mah se, rawngbâwlna hrang hrangah telin, inbûk tâwk takin kan awm tûr a ni.—“Zawn Chhuah Hna Thawhnaa Thusawi Dân” tih bâwm chu en rawh.

6. Bengngawngte zawn chhuahnaah chuan eng harsatna danglam takte nge awm?

⁶ Bengngawngte Zawn Chhuahna: Bengngawngte zawn chhuahnaah chuan harsatna danglam tak a awm ṭhin avângin, nasa taka beih fan fan a ngai a. Mi chu hming te, a mizia te, a thawmhnaw hâkte aṭangin bengngawng a ni tih a hriat theih loh. Chu bâkah, chhûngkua leh ṭhiante chuan venhim an duh avângin an chanchin chu a hre duh thuchhuahtute hnênah chuan an hrilh hreh ṭhîn. Bengngawngte zawn chhuahna atâna a hnuaia rawtna siamte hi bengngawng lote zawn chhuahnaah pawh a ṭangkai thei bawk a ni.

7. (a) Mite chênna hmuna bengngawngte zawn chhuahna nei tûrin eng thilte nge zawh theih a nih? (b) Engtin nge in neitu rinhlelhna chu kan tih reh theih?

⁷ Sign-language kohhrante leh group-te chuan mite chênna hmuna bengawngte zawn chhuahna neih chu an hlawhtling hle a. In neitu chuan sign language hmang a ṭhenawm te, hnathawhpui te, a nih loh leh school kalpui hriat a nei mai thei a ni. Ṭhenawmte hnêna naupang bengngawng an awm tih hriattîrna, kawng sîra chhinchhiahna târ chhuah chu a hmu thei a. Bengngawng chhûngkhat a nei pawh a ni thei bawk. I va tlawh chhan chu an lo ringhlel mai thei tih hre reng ang che. Mahse, nêlawm taka i awmna leh tawi fel, dik tak, leh zahawm taka thil i hrilhfiahna chuan in neitu chu rilru nuam takin a awmtîr thei a ni. Mi ṭhenkhat chuan in neitu’n bengngawng tuemaw a hriat leh hriat loh an zawh laiin Bible leh sign language DVD dangte an hmuhtîr ṭhîn a, chu chuan rah ṭha tak a chhuah a ni. Tichuan, chutiang mite hnêna Bible-a beiseina hrilh an duh thu an hriattîr a. In neituin chûng mite chu a sawi hreh chuan, i address inziahna card emaw, kohhran inkhâwm sâwmna emaw chu a chhûngte, a nih loh leh a ṭhian bengngawngte hnêna pêk erawh a hreh lo mai thei a ni.

8. Engtin nge sign-language kohhran chu a bul hnaia awm kohhran chuan a ṭanpui theih?

⁸ Sign-language kohhrante chuan khawpui chhûnga an thu hrilhna bial zau taka zawn chhuah hna thawhpui tûrin kum khatah ni khat emaw, ni hnih emaw an bul hnaia ṭawng hrang hmang kohhran chu an sâwm thei a. Sign-language kohhran chuan rawngbâwlna atâna inkhâwm a neihah chuan he thiltih atâna kaihhruaina leh lemchan chu an telh thei a ni. Car pakhata kal zîngah chuan sign-language kohhrana thuchhuahtu pakhat tal teltîr a, an zawn chhuahna hmun tûr tak târ lanna map chu kentîr theih a ni.

9. Engtin nge bengngawngte thiltih khâwmna leh intihhlimna hmunah emaw, vêngchhûngin an tâna ṭangkai hna thawh tûr a siamsakna hmunah emaw zawn chhuahna chu neih theih a nih?

⁹ Bengngawngte thiltih khâwmna leh intihhlimna hmunah emaw, vêngchhûngin an tâna ṭangkai hna thawh tûr a siamsakna hmunah emaw zawn chhuahna chu neih theih a ni bawk. Thuchhuahtute chu an kalna tûr hmun nêna inmilin an inthuam tûr a ni. An vaia hmaa thu hrilh ai chuan fimkhur taka mi pakhat emaw, pahnih emaw biak chu a ṭha ber thei a. Ṭha taka inbiak theih a nih chuan, address pawh inpêk theih a ni ang.

10. Engtin nge thuchhuahtute chuan tualchhûng sumdâwnna hmuna an zawn theih?

¹⁰ Tih theih dân dang leh chu tualchhûng sumdâwnna hmunte târ lanna map buatsaih a, a hun taka va tlawh hi a ni a. Map pakhatah chuan petrol pump tam tak pawh a tel mai thei a. A dangah chuan dry cleaning-na te, puan sûktîrna te, restaurant te, hotel te, leh sumdâwnna hmun dangte pawh telh theih a ni bawk. Map tinah chuan sumdâwnna inang chiah a awm a nih chuan thuchhuahtute chuan mite biak ṭan dân inang an hmang thei a, thiltawn an ngahin, thiamna an nei dâwn a ni. Entîr nân, hotel-ah chuan mikhual bengngawngte an thlen tlângpui ṭhin avângin, hotela mikhualte lo dawngsawngtu (receptionist) hnênah chuan kan hnathawh chu tâwitêin kan hrilh thei a, DVD tawitê buatsaihsa hmuhtîrin, hotel-a bengngawng mikhualte hnêna kohhran inkhâwm sâwmna an lo pêk tûr chu hnutchhiah theih a ni. Sumdâwnna ṭhenkhatah chuan hnathawktu emaw, anmahni dâwr ṭhîn tute zîngah sign language hmang an awm leh awm loh kan zâwt mai thei bawk. Thu hrilhna bialah bengngawngte tâna school a awm a nih chuan library-a an kawlah kan DVD ṭhenkhat chu kan pe thei a ni.

11. Engvângin nge zawn chhuah hna hi rawngbâwlna pêng pawimawh tak a nih?

¹¹ Hna Pawimawh Tak: I ṭawng hmanpui in neitute zawn chhuah chu a hahthlâk hle thei a. Chu bâkah, ṭawng dang hmangte chuan an awmna hmun an sawn kual reng avângin thu hrilhna bial chhinchhiahna dik taka vawn reng chu a harsa a ni. Mahse, mihring pun chakna hmunahte chuan zawn chhuah hna chu rawngbâwlna pêng pawimawh tak a ni. Thu hrilh hna min petu Jehova chuan duhsak bîk a nei lo va. (Tirh. 10:34) “Mi zawng zawng chhandama awmah leh thutak hriaah a duh a ni.” (1 Tim. 2:3, 4) Chuvângin, ṭawng hrang hrang hmang “rilru fel leh ṭha” pute zawng chhuak tûra thawk hovin, Jehova i thawhpui ang u.—Lk. 8:15.

In Ṭanpui Tawn Rawh U

Kohhran emaw, group emawin an ṭawng hman pui, thu an hrilh theihte zawn chhuahnaa puih an duh chuan service overseer chuan a bul hnaia awm ṭawng dang hmang kohhran upate chu a be thei a ni. Hla lutuk lova awm kohhrante chauh biak emaw, chu mi ṭawng hmang an tam tâwk chauhva biak emaw chu a ṭha ber ang. A va biak kohhrante chuan an kohhrana thuchhuahtute a hriattîr thei a, chutiang ṭawng hmang tuemaw an hmuh chuan an address-te chhinchhiahin, kohhran emaw, group emaw ṭanpuina dîltute hnêna pêk chhâwn tûrin service overseer hnênah an pe ang. Kohhran tina service overseer-te chuan ṭawng hrang hrang hmanna bial hrût chhuah theih nâna pawm tlân theih tûr leh tuina lantîrtute ṭawng hmanna kohhran emaw, group emaw kawhhmuh an nih theih nân ruahmannate an siamho thei a ni.

Thuchhuahtute chuan tuina tak tak lantîrtu ṭawng dang hmang tuemaw (a nih loh leh bengngawng tuemaw) an hmuh chuan, Please Follow Up (S-43) form chu an ziak khat nghâl vat ang a, kohhran secretary hnênah an pe tûr a ni. Chu chuan mi chu thlarau lam ṭanpuina rang takin a dâwntîr thei ang.—km 5/11 p. 3-na chu en rawh.

I Ṭawng Hmanpuite Zawn Chhuah Dân

• Mi dangte zâwt rawh—Bible zirpuite, chhûngkuaa mite, hna thawhpuite leh mi dangte pawh.

• Ṭawng hrang hmangte hming chu zawng chhuak tûrin directory chu hmang rawh. Address mila hming chuanna chu Internet emaw, telephone directory emaw aṭangin hmuh theih a ni thei bawk.

• Vêngchhûnga mite tâna siam library-ahte, sawrkâr office-ahte, leh college-ah te chuan fimkhûr takin zâwt rawh.

• Vêngchhûnga mite buatsaih ṭawng dang hmangte thiltih târ lanna tualchhûng chanchin bu te chu en rawh.

• Tualchhûnga dâwr leh sumdâwnna ṭawng dang hmangte kal khâwm duh bîkna chu tlawh rawh.

• Thuneitu remtihnain sumdâwnna hmunahte, university-ahte, a nih loh leh ṭawng dang hmangte motor chânna hmunahte chuan thuneitute remtihnain dawhkân dahin, kan thu leh hla chhuahte chu kan pho lang thei a ni.

Zawn Chhuah Hna Thawhnaa Thusawi Dân

Nêlawm tak, tlang tak, inhawng taka mite biak pawhna chuan an rinhlelhna a tireh ang. An ṭawnga thu leh hla chhuahte hmuhtîr hmasak chu a ṭangkai hle ṭhîn a ni.

Chibai i bûk hnuah heti hian i sawi thei a ni: “․․․․․ ṭawng hmangte kan zawng a. Kan biak theih tûr tuemaw hriat i nei em?”

Bengngawngte zawn hunah heti hian i sawi thei a ni: “Chibai. Thil engemaw ka hmuhtîr thei che ang em? [Awlsam taka ken kual theih video player hmangin New World Translation–On DVD-a Bible châng pakhat chu entîr rawh.] Hei hi American Sign Language-a Bible châng pakhat a ni a. Bible bâkah, bengawngte thlarau lam mamawh phuhru tûra siam, man chawi lova hmuh theih video dang tam tak kan nei a ni. Sign language hmang bengngawng emaw, bengchhêt deuh emaw hriat i nei em?” In neituin hriat a neih loh chuan, bengngawngte hmuh theihna tûr hnathawhna hmun te, school te, a nih loh leh ṭhenawm vêlte chu entîr nâna pêk a ṭha ṭhîn a ni.