I Thawhrimna Zârah Rilru Nuam Takin Awm Rawh
1. Engin nge rawngbâwlnaa kan ṭhahnemngaihna tikiam thei?
1 Mihringte hi ‘an thawhrimna zâra rilru nuam taka awm’ tûra siam an ni. (Thur. 2:24) Amaherawhchu, kan rawngbâwlnain rah ṭha a chhuah loh hian, lunghnualna chuan kan hlimna a ru bovin, kan ṭhahnemngaihna pawh a tikiam thei a ni. Chutiang chu pumpelh tûrin engin nge min ṭanpui ang?
2. Engvângin nge kan rawngbâwlna chhân lêt dân chungchângah beisei sâng lutuk tûr kan nih loh?
2 Beisei Sâng Lutuk Suh: Hei hi hre reng rawh: Isua rawngbâwlna chu mi tlêm tê chauhvin chhâng lêt mah se, a hlawhtling tih rinhlelh rual a ni lo, tih hi. (Joh. 17:4) Buh chi thehtu tehkhin thu-ah, Isua chuan buh chi ang Lalram thuchah chu mi tam zâwkte thinlung hian a dawng sawng dâwn lo tih a sawi a. (Mt. 13:3-8, 18-22) Mahse, taima taka ṭan kan lâkna chuan thil tam tak a hlen chhuak a ni.
3. Kan thu hrilhna mite’n an chhân lêt ṭhat loh pawhin engtin nge kan “rah” theih?
3 Tam Taka Kan Rah Chhuah Dân: Isua tehkhin thu-in a sawi angin, thu chah pawmtute chu an “rah ngei” ang. (Mt. 13:23) Buh chi a lo ṭiah a, a lo puitlin hnu chuan, buh kûng ni lovin, buh chi thar a rah chhuak ṭhîn. Kristian hlawhtling takte rah chhuah chu zirtîr thar siam ni kher lovin, a lêt tam taka pung buh chi—Lalram chungchâng kan sawi chhuahna—hi a ni. Hei hian mite’n an chhâng lêt emaw, chhâng lêt lo emaw pawh ni se, lungawina min neihtîrtu ‘rilru nawmna’ nasa tak a awmtîr a. Jehova hming kan tithianghlim tihna a ni a. (Is. 43:10-12; Mt. 6:9) Pathian hnathawhpuite nihna chanvo chu kan nei tihna a ni bawk. (1 Kor. 3:9) Chutiang “hmuite rah” chuan Pathian Jehova a tilâwm a ni.—Heb. 13:15, 16.
4. Kan rawngbâwlna chuan kan hriat lohin eng nge a rah chhuah theih?
4 Chu bâkah, kan thawhrimna chuan kan hmuh lohvin rah a chhuah thei a ni. Isua thu hrilh hretute zînga ṭhenkhat chu leia a rawngbâwlna a zawh hnuah chauh a zirtîrte an lo ni a. Chutiang bawkin, Lalram chi kan theh chuan mi thinlungah zung a kaih nghâl lo thei a; mahse, rei tak hnuah zung kaihin, kan hriat lohvin thutakah a rawn awm thei a ni. Dik takin, kan rawngbâwlna chuan thil ṭha tam tak a hlen chhuak a ni. Chuvângin, ‘tam taka rahin’ Isua zirtîrte kan nihzia i lantîr ang u.—Joh. 15:8.