Chin Insiam Suh—Tling Lo Nia Inhriatna Hneh Rawh
1. Engvângin nge mi ṭhenkhat chuan Bible zirpui tûra mite an sâwm loh?
1 Ṭha taka i kaihhruai theih i inrin lohna chu mite Bible zirpui tûra sâwm loh phah nân i hmang em? Hmân laia Pathian chhiahhlawh rinawm, Mosia leh Jeremia te pawhin an mawhphurhna hlen tûrin tling lo nia inhriatna an nei a ni. (Ex. 3:10, 11; 4:10; Jer. 1:4-6) Chuvângin, mi tam tak chuan chutiang ang rilru put hmang chu an nei a ni. Engtin nge chu chu an hneh theih?
2. Engvângin nge Bible zirpui neih chu mi dangte tih tûra ngaiin, in tin kala rawngbâwl mai chu kan duh tâwk loh vang?
2 Jehova chuan kan tihtheih tâwk bâk ti tûrin min phut ngai lo tih kan hre reng tûr a ni. (Sâm 103:14) Chuvângin, ‘zirtîra siam’ tûr leh “zirtîr” tûra kan mawhphurhna neih chu kan hlen chhuak thei a. (Mt. 28:19, 20) Jehova chuan chu mawhphurhna chu kan zînga thiltawn ngahte leh thiam bîkte hnênah chauh a pe lo. (1 Kor. 1:26, 27) Chuvângin, in tin kal mai duh tâwk a, Bible zirpui neih chu mi dangte tih tûrah ngaiin, kan rawngbâwlnaah chin kan insiam tûr a ni lo.
3. Engtin nge Jehova’n Bible zirpui nei tûra min tlintîr?
3 Jehova’n Min Tlintîr: Zirtîr siam tûra min tlintîrtu chu Jehova a ni a. (2 Kor. 3:5) Ani chuan a inawpna pâwl hmangin khawvêla mi thiamte hriat theih loh Bible thutakte chu min zirtîr a ni. (1 Kor. 2:7, 8) Ani chuan kan entawn atân Zirtîrtu Ropui, Isua zirtîr dân chu a lo chhinchiah bâkah, kohhran kal tlangin zirtîrna chhum lo chat lovin min pe reng bawk. Chu bâkah, Jehova chuan Bible zirtîr nâna kan mamawhte chu min pe bawk a. Thutak awlsam taka kan hriatthiam theih nân mumal taka min zirtîr thei Bible Zirtîrna bu ang chi hmanruate min pe bawk a ni. Chuvângin, Bible zirna kaihhruai chu kan rin aiin a awlsam mai thei a ni.
4. Engvângin nge Jehova’n min ṭanpui ang tih kan rin tlat theih?
4 Mosia leh Jeremia-te chuan an mawhphurhnate chu Jehova ṭanpuinain an hlen chhuak thei a. (Ex. 4:11, 12; Jer. 1:7, 8) Keini pawhin Jehova ṭanpuina chu kan dîl ve thei a ni. Tihah chuan, Bible zirna kan kaihhruai hian mi tuemaw chu Pathian Jehova chungchâng thutak kan zirtîr tihna a ni a, chu chu Pathian lâwmzâwng a ni. (1 Joh. 3:22) Chuvângin, rawngbâwlna pêng hlimawm ber leh manhla ber, Bible zirna kaihhruai chu i thiltum nihtîr ang che.