Chin Insiam Suh—Hun Nei Lo Khawpa Buaina Hmachhawn Rawh
1. Engvângin nge mi ṭhenkhate’n Bible zirpui tûra mite sâwm chu an hreh?
1 Mi ṭhenkhat chuan hun nei lo khawpa buai nia an inhriat avângin Bible zirpui tûra mi dangte sâwm chu an hreh phah ṭhîn. Bible zirlai ngaihsak tûr chuan hun pêk a ngai a. Zirna kaihruai tûra inbuatsaih nân te, kaihhruai nân te, leh zirlaite mi mal harsatna tawh hma chhawn tûra ṭanpui nânte hian hun a ngai a ni. Tirhkoh Paula chuan Thessalonica khuaa mite chu Jehova hre tûra ṭanpui nân a nun hial pawh a pe phal tih a sawi. (1 Thes. 2:7, 8) Hman lo hle chung pawhin, engtin nge Bible zirna kan kaihhruai theih?
2. Engtin nge Jehova kan hmangaihna chuan kan hun hman dân a nghawng?
2 Pathian Biak Nân Hun Pêk A Ngai: Pathian biak nân hun pêk a ngai tih chu thudik awmsa a ni a. Entîr nân, Inkhâwm nân te, rawngbâwlnaa tel nân te, Bible chhiar nân te, leh ṭawngṭai nân te hian hun kan hmang ṭhîn a ni. Kawppui nei mi buai thei tak chuan a nupui emaw, pasal emaw nêna hun hmang tûr chuan hun remchâng ṭha lâwm takin a insiam ngei ang. Jehova kan hmangaih avângin amah be tûrin lâwm takin ‘hun remchâng kan lei’ lehzual tûr a ni. (Eph. 5:15-17; 1 Joh. 5:3) Isua sawi dânin, zirtîr siam hi Pathian kan biakna pêng pawimawh tak a ni a. (Mt. 28:19, 20) He mi chungchâng ngaihtuahna hian Bible zirna kaihruai tûra mawhphurhna la lova awm lo tûrin min ṭanpui ang.
3. Rawngbâwl nâna kan hun duan chu thil dangin a tihbuai hunah pawh engtin nge kan Bible zirpui chu kan ngaihsak theih?
3 Mahse, hnathawh vâng te, hun rei tak chhûng hrisêlna ṭhat loh vâng te, a nih loh leh theocratic mawhphurhna chelh vâng tein kan hun duan a tihbuai chuan engtin nge ni ang? A khât tâwka zin bo ngai ṭhîn thuchhuahtu ṭhenkhat chuan phone hmangin emaw, computer-a inbiakna hmangin emaw Bible zirna chu an kaihruai a. Hun rei tak chhûng hrisêlna ṭhat loh avânga hun duan anga kal thei lote chuan an Bible zirpuite chu in lama lo kal tûrin ruahmanna an siam a ni. Ṭhenkhat chuan an tihtheih loh huna zirna lo kaihruai tûrin thuchhuahtu rin tlâk takte nên inrem siamna an nei bawk.
4. Bible zirna kaihhruaina aṭangin eng malsâwmnate nge kan dawn theih?
4 Paula chuan mi dangte thutak hre tûra ṭanpui nân a hun leh a tha a sên avângin hlimna nasa tak a nei a. (Tirh. 20:35) Ani chu Thessalonika khuaa a thawh rimna rah chhuah a ngaihtuah hian Jehova hnêna lâwmthu hril tûra chêttîrin a awm a ni. (1 Thes. 1:2, 3) Hun nei lo khawpa buaina kan tâwk chung pawha Bible zirtîrna hnaa kan tel chuan rawngbâwlnaah hlimna leh lungawina kan nei lehzual ang.