‘Chipchiar Takin Thu Hril Rawh’
1. Tirhkoh Paula chuan rawngbâwlnaah entawn tûr ṭha eng nge a siam?
1 “Chipchiar takin rawngbâwl rawh.” (2 Tim. 4:5, Byington) Tirhkoh Paula chuan Timothea hnênah he fuihna hi huai takin a hrilh thei a ni. Dik tak chuan, C.E 47 aṭanga 56 inkârah missionary-in ṭum thum ngawt a zin chhuak a. Bible-a Tirhkohte bu chuan Paula’n chipchiar takin ‘thu a hriattîr’ tih hi sawi nawn ṭhin a ni. (Tirh. 23:11; 28:23) Engtin nge tûn laiah chipchiar taka thu kan hrilh ve theih?
2. In tina kan kal hunah engtin nge chipchiar taka thu kan hrilh theih?
2 In Tin Kalnaah: Chanchin ṭha la hre ngai lo in neitute be pawp tûr chuan, kan tlawh hun leh nîte kan thlâk danglam pawh a ngai mai thei a. In neitupa ber chu tlai lamah emaw, chawlhkâr tâwpah emaw inah a awm pawh a ni thei. Kan biala thu hrilh ngai lohna hmuna thu hrilhna aṭangin tuina nei tharte chu kan hmu thei a. In tinah mi tuemaw biak chu kan tum tûr a ni a, ina awm ngai lote pawh kan tlawh nawn leh ṭhîn tûr a ni. Mi tuemaw hnêna thu hrilh tûra i ṭanlâkna chu hlawhchham ta se, engtin nge ni ang? Lehkha thawn emaw, telephone-a biak emaw chuan rah ṭha a chhuah mai thei a ni.
3. Vântlâng zîngah leh tawn chawpa thu hril tûrin eng hun remchângte nge kan neih?
3 Vântlâng Zîngah leh Tawn Chawpin: Tûn laia Jehova rawngbâwltute chuan a ngaithla duh apiangte hnênah “finna” thu an hriattîr a. A châng chuan “kawtthlêrah” a nih loh leh “kawtthlêr ṭhuamahte” chuan hriattîr a ni bawk. (Thuf. 1:20, 21) Nî tina kan thiltih ṭhînte kan tih hunah thu hrilh chu kan tum em? “Thu hril chauh” ngaihtuah tia sawi theih kan ni ang em? (Tirh. 18:5) Kan nih chuan, ‘chipchiar taka thu hril’ tûra kan mawhphurhna kan hlen tihna a ni.—Tirh. 10:42; 17:17; 20:20, 21, 24.
4. Engtin nge ṭawngṭaina leh rilrua chhût ngunna chuan chipchiar taka thu hrilhna a awmtîr?
4 A châng chuan, mi mal chak lohna emaw, zahzumna emaw avângin, thu hrilh kan hreh mai thei a. Dik takin, Jehova chuan kan tlin tâwkte a hre chiang hle a ni. (Sâm 103:14) Amaherawhchu, chutiang hunah chuan ṭawng chhuak thei tûra huaisenna dîlin kan ṭawngṭai thei a. (Tirh. 4:29, 31) Mahnia inzirna leh Pathian Thu chhût ngunna kan neih hunah pawh chanchin ṭha ṭhat chungnunna ngaihhlutna neih chu ka tum thei bawk a ni. (Phil. 3:8) Hêng hian chanchin ṭha ṭhahnemngai taka puang chhuak tûrin min chêttîr ang!
5. Engtin nge Joela hrilh lâwkna thlen famkimnaa kan tel theih?
5 Joela hrilh lâwkna chuan Jehova ni ropui tak leh râpthlâk tak a lo thlen hmain Pathian mite chu “mahni kawngah kal ṭheuh va,” an thu hrilhna chu eng mahin a dâl thei lo tih a târ lang a. (Joel. 2:2, 7-9) Engtikah mah thawh nawn leh ngai tawh loh tûr he thu hrilh rawngbâwlnaah hian theih tâwp chhuahin i tel ṭheuh vang u!