Chhûngkuaa Tel Kim Theih Nâna Thawhho Dân—Bible Zirnaah
1 Thutak chuan chhûngkaw nunah awmze dik leh thil tum dik tak a belhchhah a, mahse, Jehova rawngbâwlnaa hlawhtlinna chu amaha lo awm mai a ni lo. Thlarau lama chak chhûngkua din nân hun leh thawh rim a ngai a ni. He mi atân hian chhûngkuaa mite tân inpawh taka thawhho chu a ngai hle. He thuziak hian chhûngkuate’n zirna ṭha tak nei tûra an thawhho theih dân a bih chiang ang.
2 Nî Tina Bible Chhiarin: Thufingte 24:5, [NW] chuan “hriatna nei mi chuan chakna a thuam nghet ṭhîn,” a ti a. Pathian Thu chhiar ziahna aṭanga neih hriatna chuan mi chu thlarau lama Setana beihna do nâna a mamawh tak, chhûng lama chakna a pe a ni. (Sâm 1:1, 2) Chhûngkua anga nî tin Bible chhiarhona in nei em? Theocratic Rawngbâwlna School Hun Duan chuan kum khat chhûnga chawlhkâr tin atân “Bible Chhiar Hun Duan” chu a târ lang a. Chu mi zâwm tûr chuan nî tin chhûngkuaa kan hun neih aṭangin minute sâwm vêl lek pêk a ngai a ni. Bible chhiar nân leh Nî Tina Pathian Lehkha Thu Belh Chianna tih aṭanga ni châng ngaihtuah nâna a remchan hun zîng chaw ei lai te, tlai chaw ei khamah te, a nih loh leh zân mut hma hun angte chu thlang chhuak la, chu chu in chhûngkaw nî tin hun duanah telh ang che.
3 Chawlhkâr Tina Zirhona Hmangin: Chhûngkuaa Pathian Biakna neih zân chu chawlhkâr khat chhûnga chhûngkaw thiltih pawimawh ber a ni tûr a ni a. Chu zirna chu chhûngkuaa mi tinin phûr taka tel vena hmangin an thlâwp tûr a ni. Chhûngkaw lû chuan zir tûr te, a nî leh a hun te, zir hun tûr a rei zawng te a thlân hunah chhûngkaw mamawhte ngaihtuah tel chu a duh ngei ang. Chhûngkuaa zirna chu chawlhkâr hun duanah dah pawimawh ber rawh. Thil pawimawh lo zâwkte’n a tihbuai chu phal suh ang che.—Phil. 1:10, 11.
4 Ina awm laia sumdâwnna chungchânga telephone dawng ṭhîn pa pakhat chuan chhûngkuaa zirna an neih laiin phone tlang theih loh tûrin a dah ṭhîn a. Miin in lama an rawn pan chuan an zirnaa tel ve tûr emaw, an zir zawh thleng nghâk tûr emawin a sâwm ṭhîn a ni. Pa ber chuan an chhûngkaw zirna chu engmah tihbuaitîr loh a tum tlat a. Hei hian a fate chungah nghawng thûk tak a nei a, sumdâwnna lamah pawh a tiṭha hle tho a ni.
5 Chhûngkuaa mi tinte’n thlarau lam thiltihte atâna an thawhho hian a va hlimawm tak êm! Chhûngkuaa Bible zirnaah tel kim tûra rinawm taka ṭan kan lâkna chuan Jehova malsâwmna a thlen ang.—Sâm 1:3.