Zâwlneite Chu Entawn Atân Hmang Rawh—Amosa
1. Engvângin nge Amosa entîrna chu kan tân mi tichak thei tak a nih?
1 Lehkha zir sân loh vâng leh i dinhmun hniam avângin thu hril tûra tling lo nia inhriatna i nei ngai em? I nei ngai a nih chuan, Amosa entîrna aṭangin huaisenna i nei thei a ni. Ani chu ran rual vêngtu leh kut hnathawk mi a ni a; mahse, Jehova chuan thu pawimawh tak puang tûrin a tichak a a ni. (Amos. 1:1; 7:14, 15) Chutiang bawkin kan hun laiah pawh Jehova chuan mi tlâwmte leh mi hnuaihnungte chu a hmang a ni. (1 Kor. 1:27-29) Kan rawngbâwlna chungchângah zâwlnei Amosa hnên aṭangin thil dang eng nge kan zir theih?
2. Engvângin nge rawngbâwlnaa dodâlna kan tâwk chung pawha kan dinngheh theih?
2 Dodâlna Hmachhawn Hunah Ding Nghet Rawh: Hmâr lam hnam sâwm Israel rama bâwng no biakna chungchângah puithiam Amazia’n Amosa thu hrilh lâwk a hriat chuan thinur takin hetiang deuh hian a chhâng lêt a ni: “Hawng rawh! Min tlawh suh! Sakhaw vawn lai kan nei si a!’ tiin (Amos. 7:12, 13) Amazia chuan Amosa rawngbâwlna khapsak tûra Lal Jeroboama hmin a tumna lamah zâwlnei thusawi chu a lâk kawisak a. (Amos. 7:7-11) Mahse, Amosa chuan a hlau chuang lo. Tûn laiah pawh, sakhaw hruaitu ṭhenkhat chuan Jehova mite tihduhdah an nih theih nân politics lam ṭanpuina an zawng a. Nimahsela, Jehova chuan min dona tûra hriam chher rêng rêng chu a hlawhtling ngai lo vang tih min tiam a ni.—Is. 54:17.
3. Tûn laia kan thu chah ken hmêlhmang pahnihte chu engte nge ni?
3 Pathian Rorêlna leh Nakina Lo Awm Tûr Malsâwmnate Puang Rawh: Amosa chuan Israel hnam sâwm lalram chungah rorêlna thu puang mah se, a hming pu hrilh lâwkna lehkhabu chu din thar tûr leh malsâwmna tam tak vûr tûra Jehova thutiam nên chuan a tlip a ni. (Amos. 9:13-15) Keini pawhin lo thleng tûr Pathian ‘rorêlna nî’ chungchâng sawi mah ila, chu chu kan puan chhuah tûr “ram chanchin ṭha” pêng pakhat mai a ni a. (2 Pet. 3:7; Mt. 24:14) Jehova’n Armageddon-a mi suaksualte a tihboral hnuah lei hi paradis-ah a chang ang.—Sâm 37:34.
4. Jehova duhzâwng kan hlen chhuak thei tih tiamkamna eng nge kan neih?
4 Dodâlna tam tak awmna khawvêla Lalram chanchin hrilhna chuan Jehova duhzâwng tih kan tumna leh kan inpumpêkna thutiam mila nun kan tumna chu a fiah a. (Joh. 15:19) Mahse, Jehova chuan Amosa hnêna a pêk angin a duhzâwng hlen chhuah theih nâna kan mamawhte min pe zêl ang tih a chiang a ni.—2 Kor. 3:5.