Tuina Neite Chu Bawhzui Nghâl Rawh
1 “Vawiina i tih theih chu naktûka tihah khêk suh.” Thil tih tûr ti zo nghâl ṭhîn tûra fuihna he thufing hi mi tam tak chuan an hre bel hle a. Kan rawngbâwlnaa chu thu bul kan hman theih dân chu a hnuaia thiltawn hian a târ lang a ni.
2 Kan unaunu chuan pa pakhat hnênah lehkhabu pakhat pein, tlawhkîr leh a tiam a. Unaunu dang pakhat chuan a hnu dârkâr khat vêlah tihpalh thilthuin chu in vêk chu a va tlawh a ni. Chu pa chuan lehkhabu keng chungin kawngkâ a va hawn a: “I rawn kal leh tûr thu i sawi khân, tûna i rawn kal nghâl mai chu ka lo ring lo va, mahse, lo lut rawh, zirna nei tûrin ka inpeih e,” tiin a hrilh a ni. Chutianga tlawhkîr leh nghâl mai chu thil tih dân pângngai ni lo mah se, chu thiltawn chuan kan rawngbâwlnaa kan hmuh tuina neite chu bawhzui nghâl a ngai a ni tih a târ lang a ni.
3 Mite Chuan Ṭanpuina An Mamawh Belh: Mite’n kan thu leh hla chhuaha thute chu hre thiam tûr leh tûna an nun leh an nakin hun atâna a pawimawhna hre thiam tûr chuan ṭanpui an ngai a, chu mi atân tlawhkîr leh tûra ruahmanna kan siam a ngai a, chu chu kan va tlawh hmasak ber aṭanga ni tam a ral hma ni thei se a duhawm a ni. Chu chu engtin nge kan tih ang? A hnêna i tlawhkîr leh tûr thu hrilhna chuan tuina a neih dân hre tûrin a ṭanpui ang che.
4 Tlawhkîrna Atân Kawng Sial Rawh: Tûn lai khawvêlah hian hun engemaw bîka inhmu leh tûra intiamna neih chu thil awlsam a ni lo va, in neitu chuan in intiam hun chu a hre reng lo pawh a ni thei. Mahse, tlawhkîr leh hun tûr chu ṭha taka i chhinchhiah a, i va tlawhkîr leh ngei chuan—a theih phawt chuan ni rei lo têah ni thei se—hun tiam ngaih pawimawhnaah i mawhphurhna chu i hlen a ni ang. Mi chu ina a lo awm lo a nih chuan, amah biak pawh chu tum zawm zêl ang che. Ina amah hmuh leh i tum tlatna chuan i va lênna chu la thutak tûrin a ṭanpui mai thei a ni.
5 Kan va tlawh hmasak ber ṭumah miin tuina a neih chen chiah chu kan hriat theih ngai dâwn loh avângin, ngaihsakna tlêm tê chauh a lantîr a nih pawhin va tlawhkîr leh ngei tûrin chhinchhiah ang che. Chutianga tuina neite bawhzui nghâl chu a ṭangkai a ni. Miin tuina a neih chu i chawh thawhsak pawh a ni thei a, i tlawh leh hunah ṭha taka a lo dawnsawn che avângin mak i ti hle pawh a ni thei a ni. Chuvângin, tuina neite chu bawhzui nghâl ang che!