Nêlawm Taka Inbiakna Chuan Thinlung A Thlen Thei
1 Inbiakna hi “ṭawngkama ngaih dân inhrilh tawnna” tia hrilhfiah theih a ni a. Mi dangte ngaihven thu pakhat chungchânga nêlawm taka inbiak ṭanna chuan an tuina a chawktho theiin, Lalram thuchah an thinlung thlentîr tûrin min ṭanpui thei a. Nêlawm tak leh boruak zâng taka mite biak chu sermon khum aiin a sâwt zâwk tih thiltawnte chuan a târ lang a ni.
2 Nêlawm Taka Inbiakna Neih Ṭan Dân Tûr: Mi dangte nên kan inbe pawp thei tih awmzia chu ngaih dân kan sawi chhuah ropui takte leh Bible kan thlunzawm tûr tihna lam a ni lo. Mi dang chu min be tûrin kan chêttîr thei tihna mai a ni. Entîr nân, kan ṭhenawmte nêna innêl taka kan inbiak hian, a boruak a zâng hle a. Kan thusawi leh tûr ngaihtuah rênrûn lovin, a thusawi chhuah chu pângngai takin kan chhâng mai zâwk a ni. A thusawite ngaihvensakna chuan min biak zêl châkna a neihtîr thei ang. Mi dangte hnêna thu kan hrilhnaah pawh chutiang chu a ni tûr a ni.
3 Dân bawhchhiatna te, ṭhalaite harsatna te, tualchhûng chanchin te, khawvêl dinhmun te, a nih loh leh sik leh sa chanchin ang chite chu nêlawm taka inbiakna ṭan nân a hman theih a. Mite nun khawihtu thute chu an tuina chawhthawhsak nân a ṭangkai hle. Inbiakna kan ṭan tawh hnu chuan, zawi zawiin Lalram thuchah lam kan sawipui thei a ni.
4 Boruak zâng taka inbiakna neih tûr tih avângin inbuatsaih lâwk a ngai lo tihna a ni lo. A ngai a ni. Mahse, a ngai ngaia sawi tûr outline siam emaw, thusawi dân tûr a ziak en lova sawi theih tum emaw chu a ngai lo; chu chuan inbiakna chu dinhmun azira siam rem theih loh leh sâwi danglam theih lohvah a siam si a. (1 Korinth 9:20-23 nên khaikhin rawh.) Inbuatsaih dân ṭha tak chu an thil ngaihven zâwngte sawipui nâna Bible aṭanga lâk chhuah thupui pahnih khat vêl thlan chhuah hi a ni.
5 Nêlawm Taka Inbiak Theih Nâna Pawimawh Miziate: Mi dangte nêna kan biak hian, nêlawm tak leh rilru tak zetin kan be tûr a ni. Hêng miziate lantîr tûr hian nui hmêl leh hlim hmêl putna chuan min ṭanpui ang. Khawvêla thuchah ṭha ber kan nei a, chu chu mi rilru ṭha pute tâna chanchin duhawm tak a ni. Anmahni kan ngaihsak chhan chu chanchin ṭha hrilh kan duh tak zet vâng a ni tih an hriat chuan, an ngaithla duh mai thei a ni.—2 Kor. 2:17.
6 Inbiakna neih chu an tân thil nuam tak a ni tûr a ni a. Chuvângin, Lalram thuchah kan sawi hunah ngilnei tak leh remhre tak kan ni tûr a ni. (Gal. 5:22; Kol. 4:6) Mi chu ngaih dân ṭha tak neia kalsan tum tlat rawh. Chutiang chuan atîrah a thinlung kan thleng ṭha thei lo a nih pawhin, Thuhretu dangin a va biak leh hunah chuan a rilru a inhawng zâwk thei ang.
7 Nêlawm taka inbiakna neih ṭan chu thu chipchiar takte sawi thiamna a ni lo. Mite ngaihven thu pakhata an tuina chawhthawhsakna mai a ni. Kan lo inbuatsaih lâwk chuan, mite nêna nêlawm taka inbiakna nei tûrin kan inpeih thei ang. Chanchin zawng zawng zînga ṭha ber, chatuan Lalram malsâwmnate chu hrilhin, kan hmuh apiangte thinlung thlen chu i tum ṭheuh vang u.—2 Pet. 3:13.