Bible Zirna Hlawhtling Tak Kaihruai Rawh
1. Bible zirna kaihruaitu thuchhuahtute chuan eng mawhphurhna nge an neih?
1 Jehova’n “a hîp” loh chuan tumahin Pathian rawng an bâwl thei lo va. (Joh. 6:44) Chutichung pawhin, Bible zirna kaihruaitu thuchhuahtute chuan mite chu an Pa vâna mi hnaih tûra ṭanpui tûrin an thawkrim tûr a ni. (Jak. 4:8) Chu mi atân chuan inpuahchah a ngai a. Kan Bible zirpuite’n a awmzia hre thiama hma sâwn tûra ṭanpui tûr chuan paragraph chhiar hnua zawhna chhut chhuahsate zawh mai chu a tâwk lo.
2. Bible zirna hlawhtling tak chuan eng nge a hlen chhuah ang?
2 Bible zirna hlawhtling tak kaihruai tûrin thuchhuahtute chuan an zirpuite chu (1) Bible zirtîrna hre thiam tûr, (2) Bible zirtîrna pawm tûr, leh (3) Bible zirtîrna nunpui tûrin an ṭanpui tûr a ni. (Joh. 3:16; 17:3; Jak. 2:26) Hêng rahbite zawh tûra mi tuemaw ṭanpui tûr chuan, thla tam tak a ngai thei a ni. Chutichung pawhin, he rahbi tinte hian Jehova nêna an inlaichînna leh a hnêna inpumpêkna lam pana hma a sâwnzia a entîr a ni.
3. Engvângin nge zirtîrtu thiam takte chuan ngaih dân phawrh chhuak thei zawhnate chu an zawh?
3 Bible Zirlai Chuan Eng Nge A Ngaihtuah?: Kan Bible zirpuiin a zirte hre thiamin, a pawm a ni tih chian tûr chuan, thusawi chuh lovin, i zirpui chu a ngaih dân sawi tûrin fuih zâwk ang che. (Jak. 1:19) Kan zirlai thu chungchânga Bible sawi chu a hre thiam em? A thu zir chu a irâwm chhuakin a hrilhfiah thei em? A thu zir chu engtin nge a ngaih? Bible zirtîrna hi a inâwm tih a ring em? (1 Thes. 2:13) A thu zirte chuan a nunah inthlâkthlengna a thlen tûr a ni tih a hre thiam em? (Kol. 3:10) Hêng zawhnate chhânna hre tûr chuan, a ngaih dân phawrh chhuak thei tûr zawhnate thiam taka kan zawh a ngai a, tichuan, a thusawi kan ngaithla tûr a ni.—Mt. 16:13-16.
4. Bible zirpui chuan Bible aṭanga a thu zirte hriatthiam harsa a ti emaw, nunpui harsa a ti emaw a nih chuan eng nge kan tih ang?
4 Thil chîn leh thil ngaihtuah dân phungte chuan nghet takin zung a kaih fo va, chûngte paih bo tûr chuan hun a duh rei a ni. (2 Kor. 10:5) Kan Bible zirpui chuan a thil zirte chu a pawm lo emaw, a nunpui lo emaw a nih chuan engtin nge ni ang? Pathian Thu leh thlarau thianghlimin Bible zirpui chunga hna a thawh theih nâna hun tam tâwk tak pe tûr chuan dawhtheih a ngai a. (1 Kor. 3:6, 7; Heb. 4:12) Zirlaiin Bible zirtîrna pakhat hriatthiam emaw, nunpui emaw harsa a tihte pawm tûr leh nunpui tûra nawr luih ai chuan, thu dang zirtîr chu a ṭha zâwk a ni. Bible aṭanga dawhthei tak leh hmangaihna nêna kan zirtîr zawm zêl chuan, a hnuah insiamrem ngaite insiamrem tûra chêttîrin a awm thei a ni.