Rawngbâwltu I Nih Angin Hma Sâwn Zêl Rawh
1. Kum zabi khatnaa eng entîrnate hian nge rawngbâwltu kan nih anga hma sâwn tûr kan nihzia târ lang?
1 Kristiante chuan rawngbâwlna lamah hma an sâwn tûr a ni a. Chuvângin, Isua chuan a hnungzuitute chu thu hrilh rawngbâwlnaa thiam tak ni tûrin zirtîrna a pe a ni. (Lk. 9:1-5; 10:1-11) Chu chu Priskilli leh Akuila-te’n Appollova chu an ina hruaia ‘a hnêna Pathian kawng thu fel lehzuala an hrilhfiah’ chhan pawh a ni. (Tirh. 18:24-26) Chu mi avâng bawkin, Paula chuan chanchin ṭha hriltu thiltawn ngah tak, Timothea chu “mi zawng zawng hnêna” hma a sâwnna a lan theih nân, a thu hrilhna bei uar reng tûrin a fuih a. (1 Tim. 4:13-15) Chanchin ṭha hriltu angin eng ang khawpa rei pawh Lalpa rawng lo bâwl tawh mah ila, thu hrilhna kawnga kan thiamna kan tah hriam zêl a ngai a ni.
2. Engtin nge mi dangte hnên aṭanga kan inzir theih?
2 Mi Dangte Hnên Aṭangin Inzîr Rawh: Kan thiamna tah hriam theih dân kawng khat chu mi dangte hnên aṭanga inzir hi a ni a. (Thuf. 27:17) Chuvângin, i kawppuiin thu a sawi hunah ngun takin ngaithla ang che. Chanchin ṭha hriltu thiam takte chu thu hrilhna kawnga a engemaw bîk atân rawtnate inpêktîr la, an thusawi chu ngun takin ngaithla ang che. (Thuf. 1:5) Tlawhkîr neih dân te, Bible zirpui ṭan dân te, a nih loh leh rawngbâwlna pêng danga tel dânte chungchângah hriat chian loh i nei em? Mi dangin an rawn pan nghâk lovin, in group overseer emaw, tawn hriat ngah thuchhuahtu emaw chu zirtîr tûr chein sâwm ang che. Jehova thlarau thianghlim chuan kan thiamnate a belhchhah thei tih hriain, thlarau thianghlim a hnênah dîl ang che.—Lk. 11:13.
3. Kan dîl vâng pawh ni lova thurâwn pêk kan nih chuan engtin nge kan chhân lêt ang?
3 Hma i sâwnna tûra thurâwn pêk i nih chuan, i dîl loh pawh ni se, lungnih loh nân hmang suh. (Thur. 7:9) Apollova angin, chu ṭanpuina chu inngaitlâwm tak leh lâwm takin dawngsawng ang che. Chutianga tih chu a finthlâk a ni.—Thuf. 12:15.
4. Isua chuan chanchin ṭha hriltu hmasâwn tak nih chhan tûr ṭha eng nge a sawi?
4 Hma Sâwnna Chuan Pathian A Chawimawi: Isua chuan tehkhin thu hmangin a hnungzuite chu rawngbâwltute an nih anga hma sâwn tûrin a fuih a. Ani chuan grêp hrui nên intehkhinin, hriak thih a hnungzuitute chu grêp hrui pêngte nên a tehkhin a ni. Ani chuan a Pain a rah chhuahtu a pêng tinte chu “a rah tam lehzual nân” a tithianghlim tih a sawi. (Joh. 15:2) Grêp huan neitu chuan a grêp hrui pêngte’n rah tam tak a chhuah chu a duh a; chutiang bawkin, Jehova chuan “hmuite rah” chhuah tûra thiamna lama hmasâwn chho zêl tûrin min duh a ni. (Heb. 13:15) Chanchin ṭha hriltu anga hma kan sâwn hian, a rah chhuah lungâwithlâk tak chu eng nge ni? Isua chuan heti hian a chhâng a ni: “Ka Pa chu chawimawiin a awm ṭhîn, tam taka in rah hian,” tiin.—Joh. 15:8.