Pioneer Thawkin

Thlarau lam thiltumte kan insiam hian kan chakna chu fing takin kan hmang a. (1 Kor. 9:26) Thiltumte chuan he kalhmang tâwp hmaa hun tlêm tê la awm chu a ṭha thei ang bera hmang tûrin min ṭanpui a ni. (Eph. 5:15, 16) Chhûngkuaa Pathian biakna neih laiin engvângin nge rawngbâwl kum lo kal tûr atân thiltumte in insiam loh vang? Nangmah ṭanpui tûr chein, tûn ṭum chhuak inzirna lehkhabu-ah hian ṭawngṭaina nêna ngun taka ngaihtuah ngai i tih theih tûr thiltum chi hrang hrang chuanna thuziakte a tel a ni.—Jak. 1:5.

Entîr nân, in chhûngkuaa mi zawng zawngte ṭangrualin mi pakhat talin regular pioneer in thawk thei ang em? Dârkâr phût zât i tlin thei ang em tih i chiang lo a nih chuan i dinhmun anga ding pioneer-te bia ang che. (Thuf. 15:22) A nih loh leh, chhûngkuaa Pathian biakna in neih hunah pioneer pakhat biangbiakna in nei thei bawk ang. Tichuan, hman theih tûr hun duante ziak chhuak ang che. Hun kal tawhah pioneer i lo thawk tawh a nih chuan tûna i dinhmunah hian i thawk leh thei ang em tih ngaihtuah rawh.

In chhûngkuaa mi ṭhenkhatin thla khat emaw, a aia tam emaw auxiliary pioneer an thawk thei ang em? Taksa lamah i chak tâwk lo a nih chuan nî tin rawngbâwlnaah hun tlêm tê tê hmangin auxiliary pioneer i thawk thei mai thei a. Hunbi kima hnathawk, a nih loh leh school kal lai i nih avânga chawlhkâr chhûng rawngbâwlnaa tel tûra hun i nei mang lo a nih chuan thla khata chawlh awmna, a nih loh leh chawlhkâr tâwp vawi nga awmnate chu i thlang thei ang. Calendar-ah auxiliary pioneer thawh i tum hun leh i hun duante chu chhinchhiah ang che.—Thuf. 21:5.

HUAISEN RAWH U . . . PIONEER-TE U TIH VIDEO EN HNUAH, HE ZAWHNA HI CHHANG ANG CHE:

• Unaunu Aamand-i thiltawn chuan pioneer thawk tûra inpêkna neite Jehova’n a hmangaiha a ngaihsak dân chungchângah eng nge min zirtîr?