ZIR TUR THUZIAK 51
HLA 132 Pumkhat Kan Ni Ta
Jehova Chawimawitu Inneihna Ruahman Dân
“Engkim mawi tak leh felfai taka tih ni rawh se.”—1 KOR. 14:40, NWT.
A TUM BER
Kristian innei tûrte’n an inneih nîa Jehova an chawimawi theih dân.
1-2. Engtin nge Jehova’n inneihna a thlîr?
NUPUI pasal nei mai tawh tûr i ni em? I nih chuan, kan lawmpui tak zet a che! In inneihna atâna ruahmanna siamin i buai hle ngei ang. Jehova chuan in inneihna chu a ngaihven a. Inneiha nî hlimawm tak in neih a, nupa hlim tak in nih chu a duh a ni.—Thuf. 5:18; HTK. 3:11.
2 Jehova chuan in inneihnaah chawimawi a phû a. Engvângin nge chutianga kan sawi theih a, engtin nge kan tih theih ang? He thuziak hi innei mai tawh tûrte tâna a bîk taka buatsaih ni mah se, heta târ lan thu bulte hian kan zavaiin inneihnaa kan tel hunah emaw, inneihna ruahmannaa ṭanpui tûra tih kan nih hunah emaw Jehova chawimawi thei tûrin min ṭanpui ang.
ENGVANGIN NGE JEHOVA KAN CHAWIMAWI ANG?
3. Inneih tum Kristiante chuan eng nge an ngaihtuah tel ang a, engvângin nge?
3 Kristian innei tûrte chuan Jehova’n a Thua a chhinchhiah thu bulte nêna inmilin an inneihna chu an ruahman tûr a ni. Engvângin nge? Jehova chu inneihna Bul Ṭantu a nih vâng a ni. Ani chu inneihna hmasa ber, Evi leh Adama te inneihna ruahmantu a ni a. (Gen. 1:28; 2:24) Chuvângin, inneih tumte chuan ruahmanna an siam hunah Pathian ngaih dân chu an dah pawimawh ber tûr a ni.
4. Innei tûrte chuan an inneih nîah Jehova chawimawi tûrin eng chhan ṭhate nge an neih?
4 In inneihnaah Jehova thlîr dân ngaih pawimawh nachhan tûr ṭha tak i nei a: Ani chu i Pa vâna mi leh i Ṭhian ṭha ber a nih vâng a ni. (Heb. 12:9) Ṭhian ṭha bera neih chhunzawm zêl chu i duh ngei ang. In inneih nî pawh tiamin, eng lai mahin i Ṭhian ṭha ber tih nat chu i duh ngai lo vang. (Sâm 25:14) Jehova’n i tâna a tih tawhte leh a la tih tûrte i ngaihtuah hian, ani chuan in inneih nîah chawimawi a phû tih i pawm a ni lâwm ni?—Sâm 116:12.
JEHOVA I CHAWIMAWI THEIH DAN
5. Engtin nge Bible-in innei tûrte chu a ṭanpui theih?
5 Bible chuan Kristiante inneihna leh lawmna (reception) chungchângah dân leh dûn siam a nei lo va. Chuvângin, innei tûrte chuan an dinhmun, hnam dân leh, duh zâwngte milin ruahmanna an siam thei a ni. Ni e, betu dikte chuan sawrkâr dânte chu an zâwm tûr a ni ngei mai. (Mt. 22:21) Chutih rualin, Bible thu bulte nêna inmila ruahman inneihna chuan Jehova a chawimawiin a ti hlim ngei ang. A nih chuan, eng thu bulte nge kan hriat reng ngai?
6. Engvângin nge innei tûrte tân dân thil phûtte zawm chu a pawimawh?
6 Dân thil phûtte chu zâwm rawh. (Rom 13:1, 2) Ram tam takah chuan innei tûrte chuan an inneih hmain dânin a phûtte chu an tih hmasak a ngai a. Chutianga ti thei tûr chuan, an chênna ram dânte chu an hriat a ngai a ni. Chumi chungchângah zawhnate i nei a nih chuan, kohhran upate hnênah ṭanpuina dîl hreh suh ang che.b
7. Inneihnaah eng ang boruak nge a awm ngai?
7 Boruak zahawm tak siam rawh. (1 Kor. 10:31, 32) Khawvêl rilru put hmang ni lovin, Pathian thlarau rah hmêlhmang lantîrtu boruak zahawm tak siam tum ang che. (Gal. 5:19-26) Chhûngkaw lû nihna thu bul nêna inmilin, mopa chuan an inneihna chu hlimawm tak leh zahawm tak a ni tih chian tûrin mawhphurhna a nei a ni. Chutiang ni thei tûrin engin nge ṭanpui ang? Hmangaihna nei tak, hlimawm tak leh, zahawm taka sawi Bible ṭanchhan thusawi chuan inneihna chungchânga Pathian ruahmanna chungah ngaihhlutna a lantîr a. Chu thusawi chuan inneihna pawimawhzia a lantîr avângin, chuta lo tel zawng zawngte pawhin an hlâwkpui thei a. Kristian innei tûr a tam zâwkte chuan, a rem a nih chuan, Kingdom Hall-a inneih an thlang a. Kingdom Hall hman i duh a nih chuan, upate hnênah a hma aṭangin dîlna i theh luh a ngai a ni.
8. Inneih lawmnaa boruak zahawm tak a awm theih nân engin nge ṭanpui thei che? (Rom 13:13)
8 Rom 13:13 chhiar rawh. Inneih lawmna neih i tum a nih chuan, engtin nge khawvêl mite ang lo taka i tih theih? “Hlimhlawp bâwlnate,” tia lehlin Grik thu malah chuan zân tlai tak tak thlenga a lutuka zu inte leh rimawi tih rîkte a tel a. Zûte i chhawp dâwn a nih chuan, tu man a lutuka an in loh nân inbuatsaih lâwk ang che.c Rimawi a tel dâwn a nih chuan, lo kal khâwmte tîtîna ti dâl khawpin ti ring suh la. I rimawi chhuah tûr leh a hla thute chuan tu mah a tih tlûk loh nân fîmkhur takin thlang ang che.
9. Innei tûrte’n an inneih lawmnaa thusawina tâwi leh intih hlimna chungchângah eng nge an hriat reng ang?
9 In inneih lawmnaah chuan mi dangte hnên aṭanga thusawina tâwi te, slideshow te, video te leh, intih hlimna dangte i ruahman dâwn em? Chûngte chuan boruak a ti hlimawm lehzual ṭhîn ngei mai. Amaherawhchu, mi dangte ti chak thei thilte chauh telh ang che. (Phil. 4:8) Heti hian inzâwt rawh: ‘Hei hian mi dangte zahna a lantîr ang em? Inneih ruahmanna a ti zahawm ang em?’ tiin. Chu aia pawimawh zâwk chu: ‘Jehova a chawimawi ang em?’ tih hi a ni. Fiamthu ṭhenkhat thawh chu inâwm thei mah se, zahmawh rawngkai lam fiamthu rêng rêng chu pumpelh ang che. (Eph. 5:3) Thusawina tâwi nei tûr i chhûngte leh ṭhiante an awm a nih chuan, sawi tûra i duh loh thilte chu hrilh lâwk ang che.
10. Engvângin nge innei tûrte chuan an inneihna an ruahman hunah thuhnuairawlhna an neih a ngaih? (1 Johana 2:15-17)
10 Thuhnuairawlh tak ni rawh. (1 Johana 2:15-17 chhiar rawh.) Jehova chu a mite’n inâwm lo taka mahni lama mi dangte ngaihvenna lâk tum lo va, amah chawimawi an tum hian a lâwm a. Chuvângin, Kristian mi thuhnuairawlh takte chuan an ‘chapopui’ theih tûr khawpa a lutuka sum hman ang chite chu an pumpelh dâwn a ni. Engtin nge in inneihna pângngai taka ruahmanna chu i hlâwkpui theih? Norway rama unau Mike-a thiltawn hi han ngaihtuah teh. Ani chuan: “Leibâ kan neih loh avângin pioneer kan thawk zawm thei a. Kan inneihna chu pângngai tak ni mah se, a nuamin a hlimawm tak zet a ni,” tiin a sawi. India rama unaunu Tabitha-i pawhin: “Kan inneihna chu pângngai takin kan buatsaih a. Ruahman tûr leh sawiho tûr a tlêm avângin rilru hah lutukin kan awm lo,” tiin a sawi bawk.
Khawi ramah pawh awm mah ila, Kristiante inneihna chu zahawm tak, mawi tak leh, hriat reng tlâk a ni thei (Paragraph 10-11-na en rawh)
11. Engtin nge monu leh mopa chuan an thawmhnaw hâk dân leh inchei dânah thuhnuairawlhna an lantîr theih? (Milem en bawk rawh.)
11 I thawmhnaw hâk tûrte chu i thlang fel tawh em? A nalh thei ang bera lan chu i duh ngei ang. Bible hun lai pawhin, monu leh mopa chuan an lan dân chu an ngai pawimawh hle ṭhîn. (Is. 61:10) Ni e, in inneih nîa i thawmhnaw hâkte chu ṭum danga i hâkte nên a inang lo ngei ang; mahse, a zahawm lo bîk tûr a ni lo. (1 Tim. 2:9) In inneih nîa i thawmhnaw hâk emaw, i inchei dân emaw chu thil pawimawh ber nihtîr suh ang che.—1 Pet. 3:3, 4.
12. Engvângin nge innei tûrte chuan an chênna hmuna Bible thu bul nêna inmil lo hnam dânte chu an hnâwl a ngaih?
12 Bible thu bulte nêna inmil lo hnam dânte chu hnâwl rawh. (Thup. 18:4) Setana kalhmang chuan inneihnate chu sakhaw dik lo thil tih te, dawithiamna te leh, puithuna ang chi thiltein a ti bawlhhlawh a. Jehova chuan chûng thil bawlhhlawhte nêna inhnamhnawihna nei lo tûrin chiang takin min vaukhân a ni. (2 Kor. 6:14-17) I chênna rama inneihnaa thil tih dân ṭhenkhatte chu rinhlelh kai a nih chuan, thu tlûkna i siam hmain chûng thil tih dân ṭobulte chu hriat tum la, Bible thu bulte nêna a inmil leh mil loh chian hmasa ang che.
13. Engtin nge innei tûrte chuan thil pêkna kawnga Jehova thlîr dân chu an entawn theih?
13 I chênna hmunah chuan innei tûrte tâna thilpêk ken chu tih dân ṭhin a ni em? An sum dinhmunte azirin mite thilpêkte chu a inang lo thei a. Ni e, Kristiante chu kan thil neihte mi dangte pe tûra fuih kan ni a, chutianga tihna chuan min ti hlim a ni. (Thuf. 11:25; Tirh. 20:35) Mahse, kan mi sâwmte chu thilpêk pe ngei ngei tûra inhriatna neihtîr emaw, an thilpêk tlâwm tak chu kan hlut dâwn lo nia inhriatna neihtîr emaw chu kan duh ngai lo vang. Mi dangte chu an tlin tâwk leh an duh dân anga an thilpêk eng pawh ngaihhlutsakna hmangin, Jehova thlîr dân kan entawn thei a ni.—2 Kor. 9:7.
HARSATNATE PUMPELH A, HNEH THEIH DAN
14. Eng harsatnate nge innei tûr ṭhenkhatte’n an hmachhawn?
14 Jehova chawimawitu inneihna i ruahman hunah harsatnate i hmachhawn mai thei a. Entîr nân, inneihna pângngai taka ruahman chu harsa i ti thei a ni. Solomon Islands-a awm unau Charlie-a chuan: “Inneih lawmnaa kan mi sâwm tûr zât bithliah chu a harsa hle a. Ṭhian tam tak kan neih bâkah, kan hnam dânah chuan mi tin hian sâwm an inbeisei ṭheuh a ni,” tiin a sawi. A chunga târ lan tâk unaunu Tabitha-i chuan: “Ka chênna hmunah chuan inneih lawmna hi ropui taka hman ṭhin a ni a. Mi 100 vêl sâwm tûra kan thu tlûkna siam chu kan nu leh pate’n an pawm thei lawk lo,” tiin a sawi ve bawk. India rama unaunu Sarah-i pawhin: “Mi ṭhenkhat chuan sum leh pai an neih zât leh mi dangte thlîr dân chu an ngai pawimawh hle a. Ka chhûngte zînga ṭhenkhatte’n an inneihna chu ropui taka an hman avângin, chu aia ropui zâwka ti tûra beisei ni hian ka inhria,” tiin a sawi. Engtin nge chûngte leh harsatna dangte chu i hneh theih ang?
15. Engvângin nge inneihna kan ruahman hunah ṭawngṭai chu a pawimawh?
15 In inneih ruahmanna chungchângah ṭawngṭai fo rawh. Harsatna i hmachhawn te, a nih loh leh i rilrua awmte chu Jehova hnênah ṭawngṭaiin i hrilh thei a. (Phil. 4:6, 7) Thu tlûkna ṭha siam tûr te, rilru hahdamna nei tûr te leh, a ṭûl huna huaisenna pe tûr chein ṭanpuina i dîl thei a ni. (1 Pet. 5:7) Jehova’n i tâna a tihsak che i hmuh hunah chuan amah i rinna chu a nghet lehzual ang. Kan târ lan tâk Tabitha-i chuan: “Ka pasal tûr nên kan pahnih inkâr leh kan chhûngte inkârah rilru inhmuh lohna a awm kan hlau hle a. Chuvângin, kan inneihna ruahman dân tûr kan sawiho dâwn apiangin, ṭawngṭainain kan ṭan ṭhîn a. Jehova ṭanpuina kan dawng tak zetin, boruak muanawm tak kan nei a ni,” tiin a sawi.
16-17. Engtin nge inbiak pawhna ṭha chuan inneihna kan ruahman hunah min ṭanpui theih?
16 Tlang tak leh fing thiam takin inbiak pawhna nei rawh. (Thuf. 15:22) In inneihna tûr chungchângah nupa angin thu tlûkna tam tak in siam a ngai ang a. Chutah chuan in inneih nî te, sênso zât tûr te, mi sâwm zât tûr te leh, thil dang tam tak a tel thei a. Thu tlûkna in siam hmain, in ruahmanna siam tûrte chu ennawn ula, Bible thu bul nêna a inmil leh mil loh bâkah, tawn hriat ngah Kristian puitling takte hnên aṭanga thurâwn in dawn eng pawh chu sawi dûn ang che u. In duh zâwngte in sawi chhuah hunah, ngilnei tak, a âwm tâwk hre tak leh, insiamrem thei tak ni ula. In nu leh pate pawh tiamin, in chhûngkhat hnaite ngenna chu a sual lo a nih chuan, an duh angin tihsak tum hrâm ang che u. He hun hi an tân pawh hun pawimawh tak a ni a. An duh anga in tihsak thei dâwn lo a nih chuan, in tih theih loh chhan chu fing thiam takin hrilh ula. (Kol. 4:6) In tum ber chu Jehova chawimawitu hun hlimawm tak neih a ni tih in chhûng leh kuate chu ṭha takin hrilh ang che u.
17 In nu leh pate chu thutaka awm an nih loh chuan, in thu tlûkna siamte hrilh hriat chu a awlsam lo thei a; mahse, in hlawhtling thei a ni. India rama awm unau Santhosh-a chuan, “Kan chhûngte chuan Hindu tih dân hrang hrangte telh tûrin min duh a. Ka nupui tûr nên kan thu tlûkna siamte an hriatthiam theih nân hun rei tak chhûng kan hrilhfiah a. Keimahni lamah pawh, ti tûra min duh ṭhenkhatte chu Jehova lawm loh zâwng a nih loh phawt chuan, insiamremna neiin ka tihsak a ni. Entîr nân, inneih lawmnaa kan chhawp tûr ei leh inte chu an duh zâwng angin kan tihsak a; chutih rualin, zai leh lâmte chu an tih ṭhin a nih loh avângin kan telh ta lo a ni,” tiin a sawi.
18. In inneihna tluang taka a kal theih nân engin nge ṭanpui thei che? (1 Korinth 14:40) (Milem en bawk rawh.)
18 Ruahmanna ṭha tak siam rawh. Ruahmanna ṭha tak in siam a nih chuan, in inneih nîah rilru hahna in nei tlêm lehzual ang. (1 Korinth 14:40 chhiar rawh.) Taiwan rama awm Wayne-a chuan: “Kan inneih hma ni rei lo têah, inneihnaa min ṭanpuitu tûr zawng zawngte nên inhmuh khâwmna kan nei a. Thil engkim tluang taka a kal theih nân, kan ruahmannate chu kan sawihovin, tih chhinnate kan nei a ni,” tiin a sawi. Mikhualte chunga zahna lantîrin, thilte chu a hun taka ti thei tûrin theih tâwp chhuah ang che u.
Inneih hmaa ruahmanna ṭha tak neihna chuan thil engkim kal tluang tûrin a ṭanpui thei (Paragraph 18-na en rawh)
19. In inneih lawmnaah thil engkim tluang taka a kal theih nân engin nge ṭanpui thei che?
19 Buaina tam tak chu ngaihtuah lâwkna hmanga pumpelh theih a ni a. (Thuf. 22:3) Entîr nân, in chênna hmunah inneih lawmnaa mikhual sâwm lohte lo kal chu thil thleng ṭhîn a nih chuan, chûng thilte thleng lo tûra in tih theihte chu ngaihtuah lâwk ula. Nangmahni ṭanpuitu tûrte nêna in inhmuh khâwmnaah chuan an beisei theihte leh inneihna chungchânga in thlîr dânte chu hrilhfiah ang che u. Kan website jw.org-a “Jehova Thuhretute Inneihnaah Eng Nge Thleng Ṭhîn?” tih thuziak chu in khawhmuh thei a. Inneih lawmnaa thil thlengte fel taka tih a nih theih nân, “fatu hotu” anga ṭanpui tûrin unaupa puitling tak pakhat in ruat thei bawk a ni. (Joh. 2:8, NWT) Ani chu in ruahmanna siamte ṭha taka in hrilh fiah chuan, in inneihna chu zahawm tak leh tluang taka tih a nih theih nân a ṭanpui thei dâwn che u a ni.
20. Innei tûrte chuan an inneihna chungchângah eng nge an hriat reng ngai?
20 In inneihna atâna ruahmanna i siam ngai zawng zawng i han ngaihtuah hian eng emaw chen chu i rilru a hah mai thei a. Mahse, in inneihna chu ni khat chauh a ni tih hre reng rawh. Chu nî chu Jehova chhiahhlawhte nia nun hlimawm tak in hman dunna ni hmasa ber a ni. In inneihna chu pângngai tak leh zahawm tak ni tûrin theih tâwp chhuah la, Jehova rinchhan tlat ang che. A kaihhruainain, inchhîrna awm lova hlim tak leh lâwm taka i thlîr lêt theih tûr inneihna duhawm tak chu i ruahman thei dâwn a ni.—Sâm 37:3, 4.
HLA 107 Entawn Tûr Pathian Hmangaihna
a ṬAWNGKAM HRILHFIAHNA: Hnam dân tam takah, an inneih nîah chuan innei tûrte’n Pathian leh mi dangte hmaah intiamna an nei ṭhîn a. Chumi hnuah, inneih lawmna pawh an hmang thei a. Dân ang taka inneihna, a nih loh leh inneih lawmna nei ngai lo hnam dânahte pawh, innei tûrte chuan an inneih nîah Bible thu bulte ngaihtuahna chu an hlâwkpui thei a ni.
b Inneihna atâna dânin a phûtte chungchânga Kristiante thlîr dân hriat belh nân, Vênnainsâng, 2006, November 1 chhuak “Pathian leh Mihringte Mit Hmuha Chawimawi Tlâk Inneihna,” tih thuziak chu en rawh.
c Kan website jw.org-a Zû Ka Chhawp Ang Em? tih video chu en rawh.