Mosia Tlânbo Chhan

AIGUPTA atanga Mosia tlan bo hi en teh. Amah umtu mite i hmu thei em? Engvanginnge Mosia tihhlum an duh i hria em? Kan hre thei emaw i en ang u.

Mosia chu Aigupta awptu Pharaoa inah a seilian a. Mi fing leh ropui deuh a lo ni a. Mosia chuan Aigupta mi a nih loh va, a nu leh pa chu Israel-mi, bawih an ni tih a hria a.

Kum 40-a upa a lo nihin, ni khat chu Mosia chuan a mite engtinnge an awm tih en tura kal a tum a. An sawisak dan a rapthlak. Aigupta-miin Israel-mi bawih a vaw lai a hmu a. Mosia chu a hawi vel a, tumahin an en a hmuh loh veleh Aigupta-mi chu a vua a, Aigupta-mi chu a thi ta a. Mosia chuan a ruang chu tiauvutah a thukru a.

A tukah chuan Mosia chu a mite en turin a kal leh a. Bawih ni tawh lo tura tanpui theiah a inngai a. Mahse Israel mi pahnih insual lai a hmu ta a. Mosia chuan a dik lo zawk hnenah chuan: ‘Engvanginnge i unaupa i velh?’ a ti a.

Chu pa chuan: ‘Tuinnge kan chunga roreltuah siam che? Kha Aiguptami i tihhlum ang bawk khan mi tihlum ve dawn em ni? a ti ta a.

Mosian a hlau ta a. Aigupta-mi chunga a tih chu mipuiin an hre chhuak tawh tih a hria a. Pharaoa meuh pawhin a hria a, Mosia tihlum turin mite a tir a. Chuvang chuan Mosia chu Aigupta ata a tlanbo ta a ni.

Mosian Aigupta a chhuahsan chuan Midian ram hla takah a kal a. Chutah chuan Jethroa chhungkua a hmu a, a fanute zinga pakhat, Zipori chu nupuiah a nei a. Mosia chu berampu a ni ta a, Jethroa beram a enkawl a. Kum 40 chhung Midian ramah a cheng a. Tunah chuan kum 80 a ni ta. Tichuan ni khat chu, Mosian Jethroa beram a ven laiin Mosia nun pumhlum thlaktirtu thil mak tak a lo awm a. A phek hi keu la, chu thil mak chu enge ni i en ang u.