Mosia leh Aronan Pharaoa An Hmu

AIGUPTA-a Mosia a kir lehin thilmak chanchin zawng zawng a unaupa Arona a hrilh a. Tin Mosia leh Aronan chuan thilmakte chu Israel-mite an hmuhtir chuan, mipuite chuan an vaiin an hnenah Jehova a awm tih an awih a.

Tin Mosia leh Arona chu Pharaoa hmu turin an kal a. ‘Irael Pathian Jehova chuan, “Thlalerah mi biak theih nan ka mite hi ni thum kaltir rawh,“ a ti,’ tiin an hrilh a. Mahse Pharaoan: ‘Jehova ka ring lo. Tin Israel ka kaltir lo vang,’ tiin a chhang a.

Mipuiin Jehova biak nan an hnathawh atanga hun awl neih an duh vangin Pharaoa a thinur a. Chuvang chuan a thawhrim luih zualtir sauh va. Tha lo taka sawisak an ni chu Israel-mite chuan Mosia an mawhchhiat a, Mosia chu a lungngai ta a. Mahse lungkham lo turin Jehovan a hrilh a. Jehova chuan: ‘Pharaoa chu ka mite ka chhuahtir ang,’ a ti a.

Mosia leh Arona chu Pharaoa hmu turin an kal leh a. He mi tum hi chuan thilmak an ti a. Arona chuan a tiang a paih a, rul lian puiah a chang a. Mahse Pharaoa mi fingte pawhin an tiangte an han paih ve a, rulte an lo lang a. Mahse en teh! Arona rul chuan mi fingte rul a ei zo ta a. Pharaoa chuan Israel-mite a kaltir dawn rih chuang lo va.

Tichuan Jehovan Pharaoa thil a zirtir hun a thleng a. A tihdan i hria em? Aigupta chunga hri emaw buaina nasa tak thlentirin a ni.

Hri tam tak hnuah Pharaoan Mosia a ko va, ‘Hri titawp rawh, Israel ka kaltir ang e,’ a ti a. Mahse hri a tawp hnu chuan Pharaoan a rilru a thlak leh a. Mipui a kaltir dawn lo. Mahse a tawpah, hri 10-na hnuah Pharaoan Israel-mite a kaltir ta a.

Hri 10-te chu i hre vek em? A phek keu la, a chanchin i zir ang u.