Ṭhen 1
Pathian Hian Min Ngaihsak Tak Tak Em?
1, 2. Eng zawhna nge miten Pathian chungchângah an zawh a, engvâng nge?
I NUN hun eng emawti laiah khân: ‘Min ngaihsak tak taktu Pathian hi a awm a nih chuan, engvângin nge tuarna nasa tak awm hi a phal?’ tiin i zâwt a ni thei e. Kan zavai hian hrehawm lo tuar tawh emaw mi tuemaw chutiang tuar tawh hria emaw chu kan ni vek a ni.
2 Dik chiah chuan, hun kal tawh chhûng zawng zawng khân miten indona, nunrâwnna, dân bawhchhiatna, dik lo taka rorêlna, retheihna, natna leh an hmangaih takte thihna avângtein rilru nâ leh hrehawm an lo tuar tawh ṭhîn a. Kan kum zabi 20 naah ringawt pawh hian, indona avângin mihring vaibêlchhe sâwm aia tam an boral a ni. Vaibêlchhe tam tak dangte chu hliam tuar emaw in leh lo leh an thil neih chânte an ni thung. Thil râpthlâk tam tak dang pawh keini hunah hian a thleng a, chu chuan mipui chhiarsên lohte lungngaihna nasa tak thlenin mittui tam tak a sêntîr a, beisei bo ngawih ngawihin an inhre bawk a ni.
3, 4. Pathianin tuarna awm a phalna chungchâng hi mi tam takin engtin nge an ngaih?
3 Ṭhenkhat chu an lungni lo êm êm a, Pathian hi awm pawh ni se, min ngaihsak tak tak lo niin an ngai a. Pathian awm lo ang hialin emaw an ngai mai thei bawk. Entîr nan, pa pakhat Khawvêl Indopui Pakhatnaa Juda hnam tihduhdahna tuar leh chumi avânga a ṭhiante leh a chhûngte thi chuan: “Kan mamawh lai khân khawiah nge Pathian a awm?” tiin a zâwt a ni. Midang pakhat, Khawvêl Indopui Pahnihnaa Nazi hovin a nuai têla mi an thah laia dam khawchhuak chu, tuarna a hmuh khân a tilungngai êm êm a: “Ka lung hi liak thei ula chuan, a tikhawlo vek ang che u,” tiin a sawi hial a ni.
4 Chutiang chuan, mi tam takte chuan Pathian ṭha tak maiina thil ṭha lo lo thlen a phalna chhan hi an hrethiam thei lo a ni. Min ngaihsak tak tak leh tak tak loh emaw, a awm tak tak leh tak tak loh emaw an zâwt ṭhîn. Tam tak phei chuan tuarna hi mihring awm chhûng chuan a awm ve reng tûr ni tein an ngai bawk.
[Phêk 2, 3-naa milem]
Tuarna awm tawh lohna khawvêl thar a hnai em ni?
Entîrna pêk chauh lo chu, heta Pathian Thu châng târlante hi Bible, Pathian Lehkhabu Thianghlim aṭanga lâk an ni.