Ṭhen 8
Pathian Thiltum Chuan Puitlin Lam A Pan Zêl
1, 2. Engtiangin nge Pathianin tuarna tibo tûrin ruahman lâwkna a lo siam?
HELHMANG mite leh ramhuaihote rorêlna chuan mihring chhûngkua hi kum za tam tak chhûngin a hnûk hniam a. Mahse, Pathian chuan kan tawrhna te hi a ngaihthah mai lo va. Kum za tam tak chhûng zawng khân, mihringte sualna leh tuarna aṭanga chhuah tîrna tûrin ruahman lâwkna a lo siam zâwk a ni.
2 Eden huana helna awm hun lai khân, Pathian chuan he lei hi mihringte tâna chênna in nuam êm êm (paradis) - a siamtu tûr sawrkâr din a tum thu a puangzâr a ni. (Genesis 3:15) Chumi hnuah, Pathian aiawha thu sawitu lû ber a nih angin, Isua chuan he Pathian sawrkâr lo thleng tûr hi a zirtîrna thupui berah a hmang ta a. Mihringte beisei tûr awmchhun a nih thu a sawi a ni.—Daniela 2:44; Matthaia 6:9, 10; 12:21.
3. Lei tâna sawrkâr lo thleng tûr kha Isuan eng nge a hming a vuah a, engvâng nge?
3 Isua chuan chu Pathian sawrkâr lo thleng tûr chu, vân aṭanga ro rawn rêl tûr a nih avângin, “Vân ram” tiin a vuah a. (Matthaia 4:17) Pathian chu a Dintu a nih dâwn avângin “Pathian ram” tiin a vuah bawk. (Luka 17:20) Kum za tam tak chhûng Pathian chuan chu sawrkârna siamtu tûrte leh chu sawrkârin a hlenchhuah tûr chungchâng thu hrilhlâwknate ziak tûrin a ziaktute chu a thlarauvin a thuam a ni.
Lei Lal Thar
4, 5. Pathianin Isua hi Lalber atâna a pawm tawh a ni tih engtin nge a lantîr?
4 Kum 2,000 dâwn lai kal taa Pathian Rama Lalber ni tûr chungchânga zâwlnei hrilhlâwkna tam tak rawn hlenchhuaktu chu Isua hi a ni. Mihringte chunga vân sawrkâra Rorêltu tûra Pathian thlan a nihzia a rawn tichiang a. A thih hnuah chuan, Pathianin Isua chu vânah thi thei lo thlarau mi, thiltithei takin a kaitho leh ta a ni. A thawhlehna hriatpuitu tam tak an awm a ni.—Tirhkohte 4:10; 9:1-9; Rom 1:1-4; 1 Korinth 15:3-8.
5 Chumi zawhah Isua chu “Pathian ding lamah a ṭhu ta a.” (Hebrai 10:12) Chutah chuan vân Pathian Rama Lalber a nih anga che tûra Pathianin thuneihna a pêk hun a nghâk ta a ni. Hei hian Sam 110:1-a zâwlnei hrilhlâwknaa Pathianin: “I hmêlmate i ke nghahchhana ka siam hma loh zawng ka ding lamah ṭhu rawh,” tia a hrilh kha a tithleng famkim a ni.
6. Pathian ram Lalber atâna a tlinzia kha Isuan engtin nge a lantîr?
6 Leia a awm laiin Isua chuan chutiang dinhmun atâna a tlinzia a tilang a. Tihduhdahna kârah pawh Pathian laka a rinawmna vawn ngheh zêl a thlang a ni. Chutianga a tih chuan, Setanan fiahna hnuaiah mihring tumah Pathian lakah an rinawm lo vang tia a chhâl khân a daw a ni tih a tilang a ni. Isua, mi ṭha famkim, “Adama pahnihna” chuan, Pathian hian mihring ṭha famkim a siam kha a tisual lo a ni tih a rawn tilang a ni.—1 Korinth 15:22, 45; Matthaia 4:1-11.
7, 8. Leia a awm laiin Isuan eng thil ṭhate nge a tih a, eng nge a thiltiha a entîr?
7 Eng rorêltu hian nge Isuan a rawngbâwl chhûng kum reilotêa thil ṭha tam tak a tih ang kha tizo ve? Pathian thlarau thianghlim thuneihna pêkin, Isua chuan damlo, kebai, mitdel, bengngawng, ṭawngtheilote a tidam a. Mitthite ngei pawh a kaitho nia! Ram thuneihna a chan huna khawvêl pumpuia a la tih tûr tlêm azâwng a rawn entîr a ni.—Matthaia 15:30, 31; Luka 7:11-16.
8 Leia a awm laia Isuan thil ṭha tam tak a tih avângin a hnungzuitu Johana chuan: “Hêng lo hi Isua thiltih a dang tam tak a la awm, chûng chu ziak fai vek ni dâwn sela, lehkhabu ziak tûr zawng zawng chu khawvêlah pawh hian lengin ka ring lo,” a ti hial a ni.—Johana 21:25.a
9. Engvângin nge mi thinlung ṭhate kha Isua hnêna an kal khâwm?
9 Isua chu a ngilneiin mi khawngaih thei tak a ni a, mipuite hmangaihna nasa tak a nei a ni. Mi rethei leh hnehchhiahte a ṭanpui a, mahse mite hausakna emaw nihna emaw a thlei hrang chuang lo. Mi rilru tluangte chuan Isuan hmangaih taka a sâwmna: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u, thuhnuairawlh leh rilrua inngaitlâwm tak ka nih hi: tichuan in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tih hi an âwih a ni. (Matthaia 11:28-30) Pathian ṭih mite chu a hnênah kalkhâwmin a rorêlna chu nghâkhlel takin an thlîr a ni.—Johana 12:19.
Rorêlpuite
10, 11. Lei chunga Isua rorêlna tuten nge ṭâwmpui ang?
10 Mihring sawrkârten rorêlpuite an nei ang chiah hian, vân Pathian Ram pawhin a nei ve a ni. Isuan a kawppui hnai tak takte hnênah mihringte chungah lal angin amah nên ro an rêl ang tih a lo tiam tawh avângin, Isua bâkah mi dangte pawhin lei chunga rorêlnaah chan an nei ve dâwn a ni.—Johana 14:2, 3; Thu Puan 5:10; 20:6.
11 Tichuan, Isua rualin mihring nambar bithliah bîkte chu vân nunnaah tihnun leh an ni ve ta a ni. Mihringte hnêna chatuan malsâwmna rawn thlentu tûr Pathian Ram chu an siam ta a ni. (2 Korinth 4:14; Thu Puan 14:1-3) Tichuan kum tam tak chhûng chu Jehova chuan mihring chhûngkaw tâna malsâwmna rawn thlentu tûr rorêlna lungphûm chu a lo phûm tawh a ni.
A Hranga Ro Inrêlna Tâwp Tûr
12, 13. Pathian Ram hi tûnah hian eng ti tûrin nge a inrin tawh?
12 Tûn kum zabi-ah hian Pathian chu lei lam hnaah amah ngei a inrawlh a ni. He lehkhabutê ṭhen 9 nain a la sawifiah tûr ang hian, Krista hnuaia Pathian Ram chu 1914 khân din a ni tawhin tûnah hian Setana khawvêl pumpui tikehsawm tûrin a inring tawh a ni tih Bible-a zâwlnei hrilhlâwkna chuan a târlang. Chu Ram chu “[Isua] dotute zînga rorêl” tûrin a inpeih tawh a ni.—Sam 110:2.
13 Hemi chungchângah hian Daniela 2:44-a zâwlnei hrilhlâwkna chuan: “Chûng lal [tûna awm mêk] te nîah chuan vân Pathianin [vânah] ram a din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang [mihring rorêlna awm phal a ni ngai tawh lo vang]; hêng ram zawng zawngte hi a tikehsawmin a tiral zâwk ang a, kumkhuain a ding reng ang,” a ti a ni.—Revised Standard Version.
14. Mihring rorêlna tâwp avânga hlâwkna lo thleng tûr ṭhenkhatte kha engte nge?
14 Pathian aṭanga a hranga rorêlna zawng zawng lâk bo vek a nih chuan, Pathian Ramin lei chunga ro a rêlna chu a famkim tawh ang. Chu Ram chuan vân aṭanga ro a rêl avângin, mihringte tihbawlhhlawh theih a ni ngai tawh lo vang. Rorêlna thuneihna chu atîra a awmna, vânah, Pathian hnênah a awm tawh ang a. Tin, Pathian rorêlnain lei pumpui a thunun tawh dâwn avângin, mi tumah hi sakhaw dik lo emaw mihring thu bul chhuinate leh ram awp dân kawnga an rin dân lungawithlâk loh tak taktea hruaikawi an ni tawh lo vang. Chûng thil rêng rêng chu an awm phal a ni tawh dâwn lo a ni.—Matthaia 7:15-23; Thu Puan bung 17 aṭanga 19 zovin.
[Footnote-te]
a Isua nunkhua chanchin kimchang chu, The Greatest Man Who Ever Lived tih lehkhabu, 1991 kuma Watchtower Society chhuah en rawh.
[Phêk 18-naa milem]
Leia a awm laiin khawvêl thara a thil la tih tûr entîr nân Isuan damlote a tidamin mitthite pawh a kaitho a ni
[Phêk 19-naa milem]
Vân Pathian Ram chuan a lak aṭanga a hranga rorêlna awm zawng zawng a tikehsawm vek ang