Bung 1
Hmabak Hlimawm I Nei Thei!
1, 2. I Siamtuin eng nge a duhsak che?
I HMANGAIH tak tuin emaw lâwm takin a lo pawm che a. Ṭhian duhtakte nên chawhlui kîla hlim taka nuihho dar dar te. I fate hlim taka an infiam lai lo thlîr te. Hêng hun rei lo tête hi nuna hun hlimawm laite chu a ni. Amaherawhchu, mi tam tak tân chuan nun hian harsatna chi hrang hrang rawn her chhuahpui zêl niin a lang a. Chutiang harsatnate i lo tawng a nih pawhin beidawng suh ang che.
2 Pathian duhzâwng chu dinhmun ṭha ber hual vêlna hnuaia chatuana hlim taka i awm hi a ni. Hei hi duhthusâm thil mai a ni lo, a chhan chu chutiang hmabâk hlimawm tak atân chuan Pathianin kawng a kawhhmuh che avângin. Chu kawng chu hriatna a ni.
3. Eng hriatna nge hlimna kawng chu ni a, Pathianin chu hriatna chu min pe thei a ni tih engvângin nge kan hriat chian theih?
3 Tûnah hian mihringte remhriatna aia chungnung zâwk daih hriatna danglam bîk tak chungchâng kan sawi a. Chu chu “Pathian hriatna” hi a ni. (Thufingte 2:5) Tûn hma kum sânghnih dâwn lai kal taah khân, Bible ziaktu pakhat chuan: “Chhûng tin hian puipa tu emaw tal an nei ṭheuh si a; engkim puipa erawh chu Pathian a ni,” tiin a lo sawi a. (Hebrai 3:4) Engkim Siamtuin hriatna a neih chungnun dân tûr chu han ngaihtuah teh! Pathianin arsite khi a chhiarin an hming a vuah ṭheuh a ni, tiin Bible chuan a sawi. Kan awmna arsi rualah hian arsi tlûklehdingâwn za tam tak a awm avâng leh, arsi thiammite chuan arsi rual dang tlûklehdingâwn za vêl a la awm an tih bawk avângin chu chu ngaihtuahna lu tihai tham tak a va ni êm! (Sâm 147:4) Pathian chuan kan chanchin engkim a hre vek bawk a, chuvângin nunna chungchânga zawhna pawimawh tak takte hi amah lo tu dangin nge chhânna ṭha zâwk pe thei ang?—Matthaia 10:30.
4. Engvângin nge Pathian chu min kaihruai tûra inzirtîrna min pe tûrin kan beisei ang a, he thil mamawh hi eng lehkhabuin nge phuhru?
4 Mi pahnih an car siam ṭhat tum han mitthla la. Pakhat zâwk chuan beidawngin a hmanruate chu a paih a. Pakhat ve thung chuan buai lovin a siam ṭha mai a, chabi chu a han herh a, a khâwl chu ṭha taka a nun theih tâkah chuan a nui ta var var a. He mite pahnihah hian tu zâwkin nge car siam chhuaktute hnên aṭanga inzirtîrna lehkhabu nei tih chu ngaihtuah buai lovin i ring dik thei mai ang. Chutiang bawkin Pathianin kan nun kawnga min hruai tûrin kaihhruaina min pe ang tih chu a âwm hle a ni lâwm ni? I lo hre tawh mai thei a, Bible hian min Siamtu hnên aṭanga zirtîrna leh kaihhruaina, Pathian hriatna pe thei tûra ruahman lehkhabu chu niin a inchhâl a ni.—2 Timothea 3:16.
5. Bible-in hriatna a pai hi engtiang khawpa hlu nge a nih?
5 Bible inchhâlna hi a dik a nih chuan, chu lehkhabuin hriatna ro hlû a pai tam tûrzia chu han ngaihtuah teh! Thufingte 2:1-5-ah finna zawng tûrin, ro phûm rûk anga lai chhuak tûrin min fuih a—chu chu mihringte ngaihtuahnaah ni lovin Pathian Thuah zawn zâwk tûr a ni. Chuta kan zawn chuan “Pathian hriatna” chu kan chhar chhuak ang. Pathian chuan kan tlin lohnate leh kan mamawhte a hriat thiam avângin, nun muanawm leh hlimawm tak nei tûra min ṭanpui tûrin kaihhruaina min pe a. (Sâm 103:14; Isaia 48:17) Chu bâkah, Pathian hriatna chuan chanchin ṭha phûrawm tak min pe bawk a ni.
CHATUANA NUNNA!
6. Isua Krista’n Pathian hriatna chungchângah eng tiamkamna nge a pêk?
6 Mite hriat lâr tak mai, a tak taka awm, Isua Krista chuan he Pathian hriatna zia hi chiang takin a hrilhfiah a. “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi a ni. (Hawrawp kan tihâwn a ni.) (Johana 17:3) Han ngaihtuah teh—chatuan nunnaa hruaitu hriatna chu!
7. Kan thih hi Pathian tum dân a ni lo tih fiahna eng nge awm?
7 Chatuana nunna chu duhthusâm thil ang leka ngaiin rang takin hnâwl mai suh ang che. Mihring taksa siam a nih dân hi ngaihtuah zâwk rawh. Thil tuina hre thei tûr te, ri hre thei tûr te, rim hre thei tûr te, hmu thei tûr te, leh pangti deh hre thei tûr tea ṭha chungchuang taka siam a ni a. Leiah hian kan hriat theihnate tilâwmtu tam tak a awm a—ei tûr tui tak te, sava hrâm ri mawi tak te, pangpâr rimtui tak te, ram mawi tak te, leh ṭhiante nêna hlim taka inkawmna te hi a ni! Chu bâkah, kan thluak mak tak mai hi khâwl thluak nei ṭha ber chi ai pawhin a ṭha chungchuang zâwk a, a chhan chu kan thluak hian hêng thil zawng zawngte hi ngaihlu thei tûr leh hlimpui thei tûra min siam avângin a ni. Min Siamtu chuan thi tûr leh hêng zawng zawng hi chân vek tûrin min duh i ring em? Hlim taka nunga chatuana nun chên tûrin min duh a ni tia ngaihdân siam chu a âwm hle zâwk lo vang maw? Chu chu Pathian hriatnain i tâna awmzia a neih theih dân chu a ni.
PARADIS-A NUN
8. Mihringte hmabâk chungchângah Bible-in eng nge a sawi?
8 Leilung leh mihringte hmabâk chungchâng Bible-in a sawi hi thu mal pakhatin a khai khâwm theih a—Paradis tiin! Isua Krista’n a bula thi mai tûr hnênah : “Ka hnênah Paradis-ah i awm ve ang,” tia a hrilh khân hemi chungchâng hi a sawi a ni. (Luka 23:43) Paradis sawilanna chuan rinhlelh rual lohvin chu mi chu kan nu leh pa hmasa ber Adama leh Evi-te dinhmun hlimawm tak kha a hriat chhuahtîr ngei ang. Pathianin a siam zawh chuan ṭha famkim an ni a, Siamtuin a lo duan leh a lo ruahman huan mawi takah chuan an chêng a. Chu huan chu inâwm takin Eden huan tia koh a ni a, a hming awmzia chu hlimna tihna a ni.
9. Atîra Paradis-a chên kha eng nge a an?
9 Chu huan han nawmzia chu aw! Paradis dik tak a ni. A chhûnga thingkûng mawi tak tak zîngah chuan rah tuihnai tak tak neite a awm bawk a. Adama leh Evi-ten an chênna hmun ngun taka an fan kuala, a tui tui takte an han ina, a kûnga mi thei rahte an han lo va, an tân rilru nawm lohna emaw, hlauhthâwnna tûr chhan emaw engmah a awm lo. Ransate ngei pawh an tân chuan hlauhawm an ni lo, a chhan chu Pathianin mipa leh a nupui chu an vaia chunga thuneihna pein hmangaih taka enkawl tûrin a dah a ni. Chubâkah, nupa tuak hmasa berte chu sawisêl bovin an hrisêl a. Pathian thu an zawm chhûng chuan chatuana hlimnain anni chu a hmuak reng a ni. An chênna in, Paradis mawi tak enkawlna hna lungawithlâk tak chu pêk an ni a. Chubâkah, Pathianin Adama leh Evi chu, “leilung hi luah khat ula, in thu thuin awmtîr rawh u,” tiin thu a pe bawk a ni. Anmahni leh an thlahte chuan kan lei pumpui hi hmun mawi leh lâwmna hmun a nih thlengin Paradis chu an zauh zêl tûr hi a ni a.—Genesis 1:28.
10. Isua’n Paradis thu a sawi khân a rilruah eng nge awm?
10 Amaherawhchu, Isua’n a bula thi mai tûr hnênah Paradis thu a han sawi khân, hun rei tawh taka thil thlengte chu ngaihtuah tûrin a ti lo. Isua chuan nakin hun tûr a sawi zâwk a ni! Kan chênna in leilung pumpui hi paradis a lo ni dâwn tih a hria a. Chutiang chuan Pathianin leilung leh mihringte tâna atîra a thil tum chu a hlen ngei dâwn a ni. (Isaia 55:10, 11) Ni e, Paradis chu din thar leh a ni dâwn! Chu chu eng ang nge a nih ang le? Pathian Thu, Bible Thianghlim, hian chhâng rawh se.
PARADIS DIN THAR LEHA NUN
11. Paradis din thar lehah chuan natna, tarna, leh thihna te chungah eng nge thleng ang?
11 Natna, tarna, leh thihna a awm tawh lo vang. “Chumi hnuah chuan mitdelte mit chu tihmenin a awm ang a, bengngawngte beng chu tihvârin a awm ang. Chumi hunah chuan ke baite chu sakhi angin an zuang ang a, ṭawngtheilote lei chu hlim takin a zai ang.” (Isaia 35:5, 6) “Pathian ngei chu an [mihring] hnênah a awm ang a, . . . an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.” —Thu Puan 21:3, 4.
12. Engvângin nge kan hmaa Paradis lo awm tûrah hian dân bawhchhiatna, tharum thawhna, leh suahsualna a awm tawh lo vang tih kan chian theih?
12 Dân bawhchhiatna, tharum thawhna, leh suahsualna te chatuanin a bo tawh ang. “Thil ṭha lo titute chu tihboralin an awm dâwn si a . . . Rei lo tê achinah mi suaksual chu a awm tawh dâwn si lo . . . A awm tawh lo vang. Thuhnuairawlhte erawh chuan ram hi an luah ang.” (Sâm 37:9-11) “Mi suaksualte erawh chu leilung ata tihboral an ni ang a vervêk taka titute chu tihboral phiar an ni ang.”—Thufingte 2:22.
13. Engtin nge Pathianin remna a rawn thlentîr ang?
13 Leilung pumpui hi remnain a khat ang. “Ani [Pathian] chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a.” (Sâm 46:9) “A dam lai chuan mi felte chu an duah hluah hluah ang a, thlamuanna nasa tak chu a duah hluah hluah bawk ang, thla awm loh hmâ loh chuan.”—Sâm 72:7.
14, 15. Paradis din thar leha chênna in, hnathawh tûr, leh ei leh bâr chungchângah Bible-in eng nge a sawi?
14 Chênna in hmun a nghetin hna pawh lungawithlâk tak a ni ang. “Inte an sa ang a, chûngah chuan an awm reng bawk ang . . . Mi dang awmna tûrin in an sa tawh lo vang a, mi dang eiah grêp huan an siam tawh lo vang: thing dam chhûng nîte ang hian ka mite dam chhûng nîte chu a awm dâwn si a, ka mi thlante chu rei tak an thawh chhuah chungah chuan an lâwm dâwn a ni. Athlâwnin an thawk rim lo vang a, vânduaina mai tûrin fa an hring hek lo vang.”—Isaia 65:21-23.
15 Chaw ṭha ei tûr hnianghnâr takin a awm ang. “Leiah, tlâng chungahte hian, buh tam tak a awm ang.” (Sâm 72:16) “Lei hian a thil ṭo chu a pe a: Pathian, keimahni Pathian ngei chuan, mal min sâwm ang.”—Sâm 67:6.
16. Paradis-a nun chu engvângin nge hlimawm tak a nih ang?
16 Lei paradis-a chatuana nun chu hlimawm tak a ni ang. “Mi felte chuan ram hi an luah ang a, a chhûngah hian kumkhuain an awm ang.” (Sâm 37:29) “Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.
HRIATNA LEH I HMABAK
17. (a) Paradis-a nun hi i châkzâwng a nih chuan eng nge i tih ang? (b) Pathianin leilungah danglamna ropui tak a rawn thlentîr dâwn tih engtin nge kan hriat theih?
17 Paradis-a nun hi i châkzâwng a nih chuan, Pathian hriatna nei tûrin eng thil mahin dâl che suh se. Ani chuan mihringte hi a hmangaih a, he lei hi paradis-a siam tûrin a ṭûl ang ang a rawn tidanglam dâwn a ni. Chu chu kan beisei a ni chungin, khawvêla tam êm êm lungngaihna leh rorêl dik lohnate titâwp tûr hian thiltihtheihna nei ta la, i titâwp mai lo vang maw? Chu aia nêp chu Pathianin a tih kan ring tûr em ni? A dik takin, Pathianin he kalhmang buainaa khat hi a tihboral hun tûr leh inawpna fel leh ṭha famkima a rawn thlâk hun tûr pawh Bible-in chiang takin a sawi a ni. (Daniela 2:44) Mahse hêng chanchin zawng zawng min hrilh mai aia tam hi Bible chuan a sawi a. Pathian thutiam khawvêl tharah kan dam khawchhuah theih dân tûr min hrilh bawk a ni.—2 Petera 3:13; 1 Johana 2:17.
18. Pathian hriatnain tûnah i tân eng nge a tih theih?
18 Pathian hriatna chuan tûnah ngei pawh hian thil tam tak a tihsak thei che a ni. Bible hian nunna chungchânga zawhna khirh berte leh mi tibuai thei takte chu a chhâng a. A kaihhruaina che i pawmna chuan Pathian nêna inṭhianna nei thei tûrin a ṭanpui ang che. Chanvo ropui tak a va ni êm! Hei hian Pathian chauhvin a pêk theih remna chu hlim taka chên thei tûrin a siam ang che. (Rom 15:13, 33) He hriatna pawimawh tak hi i neih ṭan aṭangin i nuna hna pawimawh ber leh manhla ber i thawk ṭan tihna a ni. Chatuan nunnaa hruaitu Pathian hriatna i nei chu engtikah mah i inchhîr lo vang.
19. Bung dawt lehah hian eng zawhna nge kan ngaihtuah dâwn?
19 Bible hi Pathian hriatna paitu lehkhabu a ni tih kan sawi tawh a. Mahse, Bible hi mihringte remhriatna maia ziah lehkhabu ni lovin, a aia ropui zâwk daih a ni tih engtin nge kan hriat theih ang? He zawhna hi bung dawt lehah hian kan ngaihtuah dâwn a ni.
I HRIATNA FIAH RAWH
Engvângin nge Pathian hriatna chuan chatuana hlimnaah a hruai theih che?
Lei Paradis lo thleng tûra nun chu eng ang nge ni ang?
Tûna Pathian hriatna i lo neih hi engvângin nge i hlâwkpui ang?