Bung 7
Mihringte Chhandam Nâna Pathian Thiltih
1, 2. (a) Rom sipai za hotu pakhat khân Pathian Fapa chu tu nge a nih tih engtin nge a lo hriat thiam? (b) Jehova’n engvângin nge Isua thih a phal?
KUM 2,000 dâwn lai kal taa nipui lai tlai khat chu, Rom sipai za hotu pakhat hian na tak tuar chunga zawi muanga mi pathum thi lai hi a thlîr reng a. Chu sipai chuan an zînga mi pakhat—Isua Krista chu a chhinchhiah deuh bîk a. Isua chu thing bana khenbeh a ni. A thih dâwn ṭêpin chhûn lai takah khua a thim ta vek mai a. A han thih chuan lîr nasa takin a nghîng a, chu sipai chu: “He mi hi Pathian Fapa a ni ngei mai,” tiin a au chhuak a ni.—Marka 15:39.
2 Pathian Fapa! Chu sipai chuan a sawi dik a ni. Ani chuan khawvêla thil thleng tawh zawng zawnga la pawimawh ber chu a hriatpui zo chiah a ni. A hmate pawhin Pathian ngeiin Isua chu a Fapa duhtak a ni tiin a lo sawi tawh a. (Matthaia 3:17; 17:5) Engvângin nge Jehova’n a Fapa thih a phal? A chhan chu hei hi Pathianin mihringte sualna leh thihna laka a chhandamna kawng a nih vâng a ni.
THILTUM BIK ATANA THLAN
3. Mihringte chungchânga thil tum bîk atâna Pathian Fapa mal neih chhun thlan chhuah a ni hi engvângin nge a inâwm?
3 He lehkhabu hma lama kan zir tawh angin, Isua chu mihring a nih hma pawhin a awm tawh a. Jehova’n amah ngeia a siam a nih avângin “Pathian Fapa mal neih” tia koh a ni. Chu mi hnuah chuan Pathianin Isua chu thil dang zawng zawng siamtu atân a hmang a. (Johana 3:18; Kolossa 1:16) Isua’n mihringte hi a bîk takin a ngaina êm êm a ni. (Thufingte 8:30, 31) Thi tûra thiam loh chantîrna hnuaia mihringte an han awm chuan, Jehova’n a bîka a thil tum thawk tûra a Fapa mal neih chhun a thlang pawh hi a mak lo ve!
4, 5. Isua he leia a lo kal hmain Chi Thlah Messia chungchângah Bible-in eng nge a târlan?
4 Eden huana Adama, Evi, leh Setanate chunga rorêlna thu a puan khân, Pathian chuan Chhan Chhuaktu lo awm tûra chu “chi thlah” tiin a sawi a. He Chi Thlah emaw, fa emaw hian “rûlpui tar,” Diabol-Setana’n chhiatna râpthlâk tak a thlentîr hi a rawn sût vek dâwn a ni. Dik takin, thutiam Chi Thlah chuan Setana leh a hnungzuitute zawng zawng chu a tikehsawm vek dâwn a ni.—Genesis 3:15; 1 Johana 3:8; Thu Puan 12:9.
5 Kum zabi tam tak chhûngin, Pathian chuan Chi Thlah, Messia tia koh bawk, chungchâng chu zawi zawiin a târlang chho zêl a. Phêk 37-a chart-a entîr ang hian, hrilh lâwkna tam tak chuan leia a nun hman dân tûr chungchâng kimchang takin a lo sawi a ni. Entîr nân, Pathian thil tuma a chanvo tipuitling tûrin ani chuan tihduhdahna râpthlâk tak chu chhel taka a tuar chhuah a ṭûl dâwn a ni.—Isaia 53:3-5.
MESSIA THIH A TUL NACHHAN
6. Daniela 9:24-26-a ziak angin, Messia’n eng nge a hlen chhuah ang a, engtin nge a hlen chhuah ang?
6 Daniela 9:24-26-a chhinchhiah hrilh lâwknain Messia—Pathian Hriak Thiha—chuan thil tum ropui tak pakhat a tipuitling dâwn tih a lo sawi lâwk a. Ani chu chatuan atâna “bawhchhiatna tikin tûr te, sualna titâwp tûr te, khawlohna thianfai tûr te, chatuan felna la lût tûr” tein he leiah hian a lo kal dâwn a ni. Messia chuan mihring rinawmte lak ata thi tûra thiam loh chantîrna chu a la bo bawk ang. Mahse hei hi engtin nge a tih ang? Hrilh lâwkna chuan ani chu “tihbo” emaw, tihhlum emaw a ni dâwn tih a lo sawi a ni.
7. Engvângin nge Juda-te kha rana an inthawi a, hêngte hian eng nge a lo entîr lâwk?
7 Hmasâng Israel mite chuan khawlohna then fai chungchâng hi chu an hre chiang a. Pathianin Mosia hmanga Dân a pêk angin amah an biaknaah rana inthawina an hlân ṭhîn. Hêng inthawinate hian mihringten an sual then fai nân emaw, khuh nân emaw thil engemaw an mamawh a ni tih Israel mipuite chu a hriat nawntîr ṭhîn a ni. Tirhkoh Paula chuan hetiang hian thu bul chu a lo khai khâwm a: “Thisen chhuah lovin ngaihdamna rêng a awm lo,” tiin. (Hebrai 9:22) Kristiante chu Mosia Dânin a phût inthawina hlan tûr ang chi hnuaiah an awm tawh lo va. (Rom 10:4; Kolossa 2:16, 17) Rana inthawina chuan sual ngaihdamna hlun leh famkim a pe thei lo tih an hria a ni. Hêng inthawinate hian a aia nasa taka hlu zâwk—Messia emaw, Krista emaw inthawina chu a lo entîr zâwk a ni. (Hebrai 10:4, 10. Galatia 3:24 khaikhin rawh.) Chuti chung chuan, ‘Messia thih kher hi a ṭûl tak tak em ni?’ tiin i zâwt mai thei e.
8, 9. Adama leh Evi-ten eng thil hlu tak nge an hloh va, an thiltih chuan an thlahte engtin nge a nghawng?
8 Ṭûl e, mihringte hi chhandam ni tûr chuan Messia hi a thih a ṭûl a ni. A chhan hre thiam tûrin Eden huan kha ngaihtuah lêt leh ila, Pathian laka an hel avânga Adama leh Evi-ten an hloh nasatzia hriat thiam kan tum a ngai a ni. An hmaah chuan chatuan nunna chu dah a ni a! Pathian fate an nih angin amah nêna inlaichînna tlang tak an nei bawk. Mahse Jehova rorêlna an han hnâwl chuan chûng thil zawng zawng chu an hloh ta vek a, mihringte chungah sualna leh thihna an thlen ta a ni.—Rom 5:12.
9 Kan nu leh pa hmasa berte chu ro sum tam tak khawh ral mai maiin, leibatna nasa takah an inbarh lût ta ang hi an ni. Adama leh Evi-te chuan chu leibâ chu an fate hnênah an hlân chhâwng ta zêl a. Ṭha famkim leh sual tel lova piang kan nih loh avângin, tute pawh hian sual kan neiin kan thi ta a ni. Kan dam loh chângin emaw, lo sawi lo zâwk ila kan tih ngawih ngawih thu thin khei tak kan sawi chângte hian emaw, kan leiba rochun—mihringte ṭhat famkim lohna chu a takin kan tawng ṭhîn a ni. (Rom 7:21-25) Kan beiseina awm chhun chu Adama hloh tawh hnu hmuh kîr lehna chauh hi a ni a. Amaherawhchu, mihring nun ṭha famkim chu kan hlawh chhuak thei tawh lo. Mihring ṭha famkim lo zawng zawngin an zavaia thil sual an tih vek avângin, kan zavai hian nunna ni lovin thihna kan hlawh chhuak ta zâwk a ni.—Rom 6:23.
10. Adama hloh tawh hnu nei lêt leh tûrin eng nge ṭûl?
10 Chuti chung chuan, Adama’n nun a lo hloh tawh thleng nân thil engemaw a pêk theih ang em? Pathian rorêl dikna tehna chuan inbûk tâwk chiah, “nun aiah nun” a phût a. (Exodus 21:23) Chuvângin nun hloh tawh aiah chuan nun vêk hlan a ngai ta a ni. Nunna engpawh hlan mai chu a tâwk dâwn lo va. Sâm 49:7, 8 chuan mihring ṭha famkim lote chungchâng chu: “Tuman an unau pawh an tlan thei tawp lo vang a, Pathian hnênah tlanna an pêksak thei hek lo vang: (An nun tlanna tûr chuan thil nasa tak sên tûr a ni a, kumkhua pawha atina tin loh mai tûr a ni:),” tiin a sawi. Chuti a nih chuan kan dinhmun chu beiseibo a ni tihna em ni? Ni teh suh e.
11. (a) Hebrai ṭawngah “tlanna” tih thu mal hian eng nge a entîr? (b) Tu chauhvin nge mihringte tlan thei a, engvâng nge?
11 Hebrai ṭawngah chuan, “tlanna” tih thu mal hian sal tâng tlan nâna pawisa pêk a entîr a, intlukna tih a kâwk tel bawk. Mihring nun ṭha famkim neitu chauhvin Adama hloh tawh hnu tlukpui chiah chu a pe thei a ni. Adama hnuah chuan, leia mihring ṭha famkima piang awm chhun chu Isua Krista kha a ni a. Chuvângin, Bible-in Isua chu “Adama hnuhnûng zâwk” a ti a, Krista chu “mi zawng zawng tlan nâna [“a tlukpui tlanna ni tûra,” NW] inpea” a ni tih min hrilh chiang bawk a ni. (1 Korinth 15:45; 1 Timothea 2:5, 6,) Adama’n a fate hnênah thihna a hlan chhâwn laiin, Isua erawh chuan chatuan nunna a hlân chhâwng thung a ni. Korinth Lehkha Thawn Pakhatna 15:22 chuan: “Adama-ah chuan mi zawng zawng an thi ṭhîn ang hian Krista-ah chuan mi zawng zawng tihnunin an awm bawk ang,” tiin a lo sawifiah a. Chuvângin, inâwm takin, Isua chu “Chatuan Pa” tia koh a ni.—Isaia 9:6, 7.
TLANNA PEK A NIH DAN
12. Engtikah nge Isua kha Messia a lo nih a, chu mi hnuah eng nun kawng nge a zawh tâk?
12 C.E. 29 favâng laiin Isua chu baptisma chang tûrin a laichînpa Johana hnênah a kal a, chutiang chuan Pathian duhzâwng hlen chhuak tûrin a inhlân a ni. Chumi ṭum chuan Jehova’n Isua chu thlarau thianghlimin hriak a thih a. Chutiang chuan Isua chu Pathian hriak thih, Messia emaw, Krista emaw a lo ni ta a ni. (Matthaia 3:16, 17) Chumi hnuah Isua’n a kum-thum-leh-a-chanve rawngbâwlna chu a ṭan ta a. Pathian Ram chanchin hrilin leh hnungzuitu rinawmte la khâwm zêlin, a chênna ram chu a fang chhuak a. Amaherawhchu, sawi lâwk tawh angin, rei lo têah amah dodâlna chu a sosâng ta hle a ni.—Sâm 118:22; Tirhkohte 4:8-11.
13. Rinawmna vawngtu nia Isua thihna thlentu thil kha engte nge ni?
13 Isua chuan huaisen takin sakhaw hruaitute vervêkna chu a lailang a, chuvângin thah an tum ta a. A tâwpah chuan phatsanna te, dik lo taka manna te, dân ang lova thurêlna te, leh hel tûra mite fuih anga dik lo taka puhna te keng tel phiarrûkna tenawm tak an ngaihtuah chhuak ta a ni. Isua chu an bêng a, chil an chhâk khum a, an nuihsawh a, a taksa tikak hlawih hlawih thei tûra siam hruihrualin an vaw bawk a. Chumi hnuah Rom mi ram awptu pakhat Pontia Pilata chuan nghaisakna bana thi tûrin a chung thu a rêlsak ta a. Thing banah an khêngbet a, khaikânin a awm ta a ni. A thâwk lâk tin mai chu hrehawm tak a ni a, a thih nân pawh dârkâr engemaw zât a duh a. Chu fiahna hrehawm tak a tuar chhûng zawng chuan Isua’n Pathian lakah rinawmna ṭha famkim a vawng tlat a ni.
14. Engvângin nge Pathianin a Fapa chu hrehawm a tuar leh a thih a phal?
14 Chutiang chuan, Isua’n C.E. 33, Nisan 14-ah “mi tam tak tlan nân” a nun a lo pe ta a ni. (Marka 10:45; 1 Timothea 2:5, 6) Vân aṭangin Jehova chuan a Fapa duhtak hrehawm tuar lai leh thi lai chu a hmu thei reng a. Chutiang thil râpthlâk tak chu Pathianin engvângin nge a thlen a phal? Mihringte a hmangaih avângin a phal a ni. Isua chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” a ti a. (Johana 3:16) Isua thihna hian Jehova chu rorêl dikna ṭha famkim Pathian a nihzia min zirtîr bawk a ni. (Deuteronomy 32:4) Mi ṭhenkhat chuan Pathianin nun aiah nun phûttu a rorêl dikna thu bulte a hnâwl mai loh nachhan leh, Adama sual man pêk tûr a hawisan mai loh nachhan hi an hre lo mai thei a. A chhan chu Jehova hian nasa taka ama tawrhna tûr pawh ni se, a dânte chu englai pawha a zawm leh a kenkawh ṭhin vâng a ni.
15. Isua nun tâwp hlentîr a phal chuan thil dik a nih dâwn loh avângin Jehova’n eng nge a tih?
15 Jehova rorêl dikna chuan Isua thihna hian rah hlimawm tak nei tûrin a phût tlat a. Chuti chung chuan, mi rinawm Isua chu thihnaa chatuana mutthilhtîr a nih chuan rorêlna dik a ni dâwn em ni? Hnai lo ve! Hebrai Pathian Lehkhathu chuan Pathian mi rinawm chu thlânah a awm reng dâwn lo tih a lo sawi lâwk a ni. (Sâm 16:10; Tirhkohte 13:35) Ni thum pumhlûm lo thihnaah a muhîl a, chumi hnuah chuan Pathian Jehova’n thlarau ropui takah a kai tho ta a ni.—1 Petera 3:18.
16. Vâna a kîr leh khân Isua’n eng nge a tih?
16 A thihnaah khân Isua chuan a mihring nun chu chatuan atân a hlân a. Vân nunnaa kaihthawh leh a han nih khân nunna petu thlarau a lo ni ta a ni. Chubâkah, lei leh vâna hmun thianghlim bera a lâwn chhoh khân, a Pa duhtak nên inhmu lehin A hnênah chuan dân pangngai angin a mihring nun ṭha famkim hlutna chu a hlân a. (Hebrai 9:23-28) Tichuan chu nun hlu tak mai man chu mihring thuawihte tân a hman theih ta a ni. Chu chuan i tân eng awmzia nge a neih?
KRISTA TLANNA LEH NANGMAH
17. Krista tlanna inthawina avânga ngaihdamna chu engtin nge kan ṭangkaipui theih ang?
17 Krista inthawina chu tûnah ngei pawh i hlâwkpui dân kawng thum hi lo ngaihtuah teh. A hmasa berin, sual ngaihdamna a thlen a. Isua thisen chhuaka rinna kan neih avângin “kan tlanna” kan nei a ni, “kan bawhchhiatnate ngaihdamna chu.” (Ephesi 1:7) Chuvângin sual lian tak kan lo ti a nih pawhin, Isua hmingin Pathian hnênah ngaihdamna kan dîl thei a ni. Kan sim tak zet a nih chuan Jehova’n a Fapa tlanna inthawina man chu kan chungah a hmang a ni. Kan sualnate avânga thihnaa min hrem lovin Pathian chuan min ngaidam a, chhia leh ṭha hriatna thiang tak min pe zâwk a ni.—Tirhkohte 3:19; 1 Petera 3:21.
18. Isua inthawina chuan eng kawngin nge beiseina min pêk?
18 Pahnihnaah chuan, Krista tlanna inthawina chuan hun lo thleng tûr atâna beiseina nghahchhan min pe a ni. Inlârnaah, tirhkoh Johana chuan “mipui tam tak, tuma chhiar sên loh” chu he khawvêl kalhmang tâwpna râpthlâk tak lo thleng tûrah hian an dam khawchhuak dâwn tih a lo hmu lâwk a. Mi dang tam tak Pathianin a tihboral hunah anni chu engvângin nge an dam khawchhuah bîk ang? Vântirhkoh pakhatin Johana hnênah chûng mipui tam takte chuan “an puante Beram No [Isua Krista] thisena suin an tivâr ta a” ni tiin a hrilh a ni. (Thu Puan 7:9, 14) Isua Krista thisen chhuaka rinna kan lantîr chhûng chuan, leh Pathian thil phûtte mila kan nun chhûng chuan, Pathian mithmuhah kan thianghlim ang a, chatuana nun beiseina kan nei thei dâwn a ni.
19. Krista inthawina chuan amah leh a Pain an hmangaih che a ni tih engtin nge a finfiah?
19 Pathumnaah chuan, tlanna inthawina hi Jehova hmangaihna finfiahna chiang ber a ni. Krista thihna chuan lei leh vâna thil thleng chanchina hmangaihna thiltih ropui ber pahnihte chu hmuh theihin a rawn lantîr a: (1) Kan aia thi tûra a Fapa a rawn tirhah hian Pathian hmangaihna chu a lang a; (2) Tlan nâna duh taka a inpêknaah hian Isua hmangaihna chu a lang bawk a ni. (Johana 15:13; Rom 5:8) Rinna kan lantîr tak tak chuan he hmangaihna hi keimahni mi mal ṭheuh tân a hman theih a ni. Tirhkoh Paula chuan: “Pathian Fapa, mi hmangaiha ka aia inpetu” chu, tiin a sawi a ni.—Galatia 2:20; Hebrai 2:9; 1 Johana 4:9, 10.
20. Isua tlanna inthawinaah hian engvângin nge rinna kan lantîr ang?
20 Chuvângin, Pathian leh Krista’n an târlan hmangaihna hi Isua tlanna inthawinaa rinna tilangin kan lâwmzia i lantîr ang u. Chutianga tihna chuan chatuan nunnaah min hruai dâwn a ni. (Johana 3:36) Chuti chung chuan, kan chhandamna hi Isua leia a nun leh a thih chhan pawimawh ber a ni lo va. A ngaih pawimawh ber chu lei leh vân huap, thubuai ropui zâwk a ni. Bung dawt leha kan hriat tûr angin, chu thubuai chuan kan zavaia nun hi a khawih vek a, a chhan chu Pathianin he khawvêla sualna leh hrehawmna rei tak awm a phal chhan hi a târlan avângin a ni.
I HRIATNA FIAH RAWH
Mihringte chhandam nân engvângin nge Isua a thih a ṭûl?
Tlanna chu engtianga pêk nge a nih?
Eng kawngtein nge tlanna chu i hlâwkpui?
[Phêk 67-naa milem]