Bung 12
Thlarau Suaksualhote Chu Do Tlat Rawh
1. Thlarau suaksualte nên an intawh khân Isua’n engtin nge a lo tihlêt?
BAPTISMA a chan zawh veleh Isua Krista chu Judai ram thlalêrah ṭawngṭai tûr leh ngun taka thil chhût tûrin a kal a. Chutah chuan Diabol-Setana’n Pathian dân bawhchhiattîr a tum a. Mahse, Isua chuan Diabola tawktarh chu a hnâwl a, a thangah chuan a âwk ta lo a ni. Isua’n leia rawng a bâwl chhûng pawh khân thlarau suaksual dangte pawh a hmachhawn a. Chuti chung chuan, Isua’n anni chu vawi engemaw zât a hauvin a do tlat zêl a ni.—Luka 4:1-13; 8:26-34; 9:37-43.
2. Eng zawhnate nge kan ngaihtuah dâwn?
2 Chutiang thil tawn chanchin Bible-in a sawite hian thlarau suaksualhote chu an awm ngei a ni tih min awihtîr tûr a ni. Mite hruai bo an tum a. Amaherawhchu, hêng thlarau suaksualte hi kan do tlat thei a ni. A nih leh thlarau suaksualte chu khawi aṭanga lo awm nge an nih? Engvângin nge mihringte hi bum an tum? An thil tumte tihlawhtling tûrin eng kawngte nge an hman? Hetiang zawhnate chhânna chuan thlarau suaksualhote do tlat tûrin a ṭanpui ang che.
THLARAU SUAKSUALTE—AN LO CHHUAHNA LEH AN THIL TUM
3. Diabol-Setana hi engtin nge a lo awm?
3 Pathian Jehova chuan mihringte a siam hma daihin thlarau mi tam tak a siam tawh a. (Joba 38:4, 7) Bung 6-naa hrilhfiah tawh angin, hêng vântirhkohte zînga pakhat hian mihringten Pathian Jehova be lovin amah be zâwk se tih duhna rilru a lo nei ta a. Chu a thil tum chu bawhzuiin he vântirhkoh sual hian Siamtu chu dodâlin a sawichhe ta a, hmeichhe hmasa ber hnênah Pathian chu dâwt sawi hmangah a puh hial a ni. Tichuan, inâwm takin, he hel hmang thlarau mi hi Diabola (sawichhetu), Setana (dodâltu) tia hriat a lo ni ta a ni.—Genesis 3:1-5; Joba 1:6.
4. Nova hun laiin vântirhkoh ṭhenkhatten engtin nge thil an tihsual?
4 A hnuah, vântirhkoh dangte pawh chu Diabol-Setana lamah an ṭang ta a. Mi fel Nova hun laiin, an zînga ṭhenkhatte chuan vâna an rawngbâwlna kalsanin, leia hmeichhiate mipat hmeichhiatna hmanpui an châkna chu tipuitling tûrin mihringahte an chang a. Setana’n chûng vântirhkohte chu thuawih lohna kawng zawh tûrin a thunun a ni tih chu rinhlelh rual a ni lo. Tichuan thlah pawlh fa, Nephilim tia kohte chu an lo piang a, anni chu tharum thawh leh mi sawisak chîng tak an lo ni ta a ni. Jehova’n Tuilêt nasa tak a awmtîr khân, mi suaksualte leh dân pangngai lo taka vântirhkoh thuawih lote thlah zawng zawng chu an boral vek a. Vântirhkoh helhote erawh chuan an mihring taksa chu paihin thlarau ramah an kîr leh a, boralna chu an pumpelh ta a ni. Mahse, Pathian chuan hêng ramhuaite hi khuahkhirhin thlarau lam thim hnuaiah a awmtîr a ni. (Genesis 6:1-7, 17; Juda 6) Chuti chung pawhin “ramhuai lal,” Setana leh a vântirhkoh suaksualte chuan an helna chu an la chhunzawm zêl a ni. (Luka 11:15) Eng nge an thil tum ber?
5. Setana leh a ramhuaihoten an tum ber chu eng nge ni a, mite an thanga awhtîr tûrin eng nge an hman?
5 Setana leh ramhuaihote thil tum sual tak mai chu mihringte Pathian Jehova laka heltîr hi a ni a. Chuvângin, hêng mi suaksualte hian mihringte chanchin pumpuiah mite an hruai bo va, an tithlabârin an bei ṭhîn a ni. (Thu Puan 12:9) Tûn laia thilthlengte hian ramhuaiin mi a dona chu a hma zawng aiin tûnah hian a râwng lehzual a ni tih a nemnghet bawk. Mite an thanga awhtîr tûrin ramhuaihote chuan thlarau zâwlna chi hrang hrang an hmang a. Ramhuaihoten he tawktarh hi engtin nge an hman a, engtin nge i invên theih ang?
THLARAU SUAKSUALTEN HRUAI BO CHE AN TUM DAN
6. Thlarau zâwlna hi eng nge ni a, a chi hrang ṭhenkhat chu engte nge ni?
6 Thlarau zâwlna hi eng nge ni? Hei hi mahni ngeiin ramhuaihote emaw, thlarau suaksualte emaw nêna inkûngkaihna neih emaw, ramhuai zâwl hmanga inkûngkaihna neih emaw hi a ni. Sapêl mite tân sa chah a ṭangkai ang bawkin, thlarau zâwlna pawh hi ramhuaihote tân a ṭangkai êm êm a: An sa pêla chu a hîp tlat a ni. Sapêl miin a thang kama âwk tûra ransa thlêm nân tawktarh chi hrang hrang a hmang ṭhîn angin, thlarau suaksualte pawhin mihringte chu an duh duha an thunun theihna tûrin thlarau zâwlna chi hrang hrang hi an hmang a ni. (Sâm 119:110 khaikhin rawh.) Hêng zînga ṭhenkhatte chu thil lo thleng tûr sawi lâwkna te, mitdawivaih te, hun lo thleng tûr entîrna zawn te, dawi lam thiamna te, dawi hla chham te, ramhuai zâwl râwn te, leh mitthi biak te hi a ni.
7. Thlarau zâwlna hi engtianga darh zau nge a nih a, Kristian ram tia vuahahte ngei pawh engvângin nge a hluar êm êm?
7 A tawktarh chu a hlawhtling hle mai, a chhan chu thlarau zâwlna hian khawvêl pumpuiah mite a hîp êm êm a ni. Ramhnuai khaw têa chêngte chuan dawi hmanga mi tidam thei puithiamte an râwn ṭhîn a, khawpuia chêng office hnathawkte chuan arsi hmanga ai en thiamte an râwn ṭhîn bawk. Kristian ram tia vuahahte ngei pawh thlarau zâwlna hi a hluar êm êm a ni. Hetiang lam chhuina chuan United States-ah ringawt pawh thlarau zâwlna chi hrang hrang ziakna chanchinbu 30 vêl a awm a, chûngte chu bu 10,000,000 aia tam sem chhuah a ni ṭhîn tih a târlang. Brazil ram mipuite chuan thlarau zâwlna lam thil lei nân kum tin dollar maktaduai 500 chuang an hmang ral ṭhîn bawk. Chuti chung pawhin, chumi rama thlarau biakna hmuna kal ṭhîn zaa 80-te chu baptisma chang tawh Catholic mi, kohhran Mass-ahte pawh tel ṭhîn te an ni. Sakhaw hruaitu ṭhenkhatten thlarau zâwlna lam thil an chîn ve avângin, sakhaw mi tam tak chuan chutiang tih chu Pathianin a pawm tho tûrah an ngai a ni. Mahse chu chu a dik em?
THLARAU ZAWLNA BIBLE-IN A HNAWL CHHAN
8. Pathian Lehkhathuin thlarau zâwlna hi eng angin nge a ngaih?
8 Thlarau zâwlna chi ṭhenkhat chu thlarau ṭhate nêna inbiak pawhna kawng a ni tia zirtîr ṭhin i nih chuan, thlarau zâwlna chungchâng Bible-in a sawi hi mak i ti hle mai thei a ni. Jehova mite chu: “Ramhuai aienthiam zâwlte chu pan suh ula, dawithiamte pawh in bawlhhlawh phahna tûrin anni chu zawng chhuak suh u,” tiin vaukhân an ni. (Hawrawp kan tihâwn a ni.) (Leviticus 19:31; 20:6, 27) Bible-a Thu Puan lehkhabu chuan “dawithiamte” tâwpna chu “mei leh kâta kâng dîlah chuan a awm ang; chu chu [chatuan] thih hnihna chu a ni,” tiin a lo vaukhân a ni. (Thu Puan 21:8; 22:15) Thlarau zâwlna chi zawng zawng hi Pathian Jehova’n a pawm lo vek a ni. (Deuteronomy 18:10-12) Chu chu engvâng nge ni ang?
9. Thlarau khawvêl aṭanga tûn laia thuchah lo kalte hi Jehova hnên ami a ni lo tih engvângin nge kan sawi theih?
9 Bible ziak zawh a nih hmain mihring ṭhenkhatte biak pawh nân Jehova’n thlarau ṭhate emaw, vântirhkoh felte emaw a tîr ṭhîn a. Bible ziak zawh a nih aṭang khân, mihringten pawm tlâka Jehova rawng an bâwl theih nân Pathian Thu chuan an mamawh kaihhruaina a pe a ni. (2 Timothea 3:16, 17; Hebrai 1:1, 2) Ani chuan ramhuai zâwlte hnênah a Thu thianghlimte a pe lo. Tûn laia chutiang thuchah thlarau khawvêl aṭanga lo kal zawng zawng chu thlarau suaksualte hnên aṭanga lo kal vek a ni. Thlarau zâwlna lam thil kan chîn chuan ramhuaiin min tibuai thei a, thlarau suaksualten min ta neih hial thei bawk a ni. Chuvângin, thlarau zâwlna chi rêng rêngah inhnamhnawih lo tûrin Pathian chuan hmangaih takin min vaukhân a ni. (Deuteronomy 18:14; Galatia 5:19-21) Chubâkah, Jehova’n chutiang thil a thlîr dânte kan hriat tawh hnua thlarau zâwlna lam thil kan chîn zawm zêl chuan, hel hmang thlarau suaksualte lama ṭang kan ni ang a, Pathian hmêlma kan ni bawk ang.—1 Samuela 15:23; 1 Chronicles 10:13, 14; Sâm 5:4.
10. Thil lo thleng tûr sawi lâwkna hi eng nge ni a, engvângin nge kan pumpelh ang?
10 Thlarau zâwlna chi khat lâr tak chu thil lo thleng tûr sawi lâwkna—thlarau ṭanpuinaa hma lam hun emaw, thil hriat loh chungchâng emaw, hriat chhuah tuma beihna hi a ni. Thil lo thleng tûr sawi lâwkna chi hrang ṭhenkhatte chu arsi hmanga ai en thiamna te, dârthlalang mûm fîm hmanga ai en te, mumang hrilh fiah te, kutze en te, leh aien nâna an siam bîk lehkhaden hmanga ai en te hi a ni. Mi tam tak chuan thil lo thleng tûr sawi lâwkna hi infiamna pawisawi lo takah an ngai a, mahse Bible chuan aienthiamte leh thlarau suaksualte hi an inkawp tlat tih a târlang. Entîr nân, Tirhkohte 16:16-19 chuan nula tu emaw, “ramhuai aienthiam zâwl” a nih avânga “ai en” thiam chungchâng a sawi a. Mahse, ramhuai hnawh chhuah a han nih chuan thil lo thleng tûr sawi lâwk theihna a neih chu a bo ta a ni. Thil lo thleng tûr sawi lâwkna hi ramhuaihoten mite an thanga âwk tûra an tawktarh hman a ni tih a chiang hle a ni.
11. Mitthi biak pawh tumna hian engtin nge mite thangah a awhtîr theih?
11 I hmangaih tak mai in chhûngkaw zînga mi emaw, i ṭhian ṭha tak emaw thihna avânga lungngaia awm i nih chuan, tawktarh dangin awlsam takin a hîp thei che a ni. Ramhuai zâwl pakhatin thuchah engemaw bîk a pe mai thei che a, a nih loh leh mitthi tawh aw ni âwm tak pawhin a ṭawng mai thei bawk. Fîmkhur ang che! Mitthi biak pawh tumna chuan thangah a hruai lût a ni. Engvângin nge? Mitthite chu an ṭawng theih tawh loh avângin a ni. I hre chhuak leh ngei ang a, mi a thih chuan “leilungah a kîr leh a; chu mi nî ngei chuan a ngaihtuahnate chu a bo nghâl a ni,” tiin Pathian Thuin chiang takin a sawi a ni. Mitthite chuan “engmah an hre lo.” (Sâm 146:4; Thuhriltu 9:5, 10) Chubâkah, ramhuaihote hi mitthite aw ang taka ramhuai zâwlte hnêna mitthi chanchin hriattîrtute chu an ni a. (1 Samuela 28:3-19) Chuvângin “mitthi biak chîng mi” rêng rêng chu thlarau suaksualte thangah an âwk a, Pathian Jehova duh dân kalhin thil an ti a ni.—Deuteronomy 18:11, 12; Isaia 8:19.
THLEMNA ATANGIN BEIHNAAH
12, 13. Ramhuaihoten mite an thlêmna leh an zar buaina hi an bei zui fan fan zêl a ni tih finfiahna eng nge awm?
12 Thlarau zâwlna chungchânga Pathian Thuin thurâwn a pêk che hi i zawm chuan, ramhuaihote tawktarh chu i hnar thla tihna a ni. (Sâm 141:9, 10; Rom 12:9 khaikhin rawh.) Hei hi thlarau suaksualten thunun che tumin an bei tawh dâwn lo tihna em ni? Ni teh suh e! Isua kha vawi thum a thlêm hnuin, Setana chuan “a remchân hun atân a kalsan” chauh a ni. (Luka 4:13) Chutiang bawkin, thlarau luhlul takte hian mite chu an thlêm chauh ni lovin an bei tel bawk a ni
13 Setana’n Pathian chhiahhlawh Joba a beih dân chungchâng a hmaa kan ngaihtuahho tawh kha han hre chhuak leh la. Diabola chuan a ran rualte a tihhlumsak vek a, a chhiahhlawh tam zâwkte pawh a tihhlumsak a. Joba fate ngei pawh Setana chuan a tihlum a ni. A dawt lehah amah Joba ngei pawh chu natna hrehawm tak a veitîr ta a. Nimahsela Joba chuan Pathian laka a rinawmna chu a vawng tlat a, malsâwmna nasa tak pawh a dawn phah a ni. (Joba 1:7-19; 2:7, 8; 42:12) Chuta ṭang chuan, ramhuaite hian mi ṭhenkhat chu ṭawng thei lovin emaw, mitdelin emaw an siam a, mihringte tuarnaah hian nuam an la chên zêl a ni. (Matthaia 9:32, 33; 12:22; Marka 5:2-5) Tûn laiah pawh, report-in a târlan dânin ramhuaite chuan mi ṭhenkhat chu zahmawh lam zâwngin an zar buai a, mi dangte chu ât phah hial khawpin an tibuai bawk. Mi dang lehte chu tualthat tûr leh mahni intihlum tûr tein an fuihpawrh a, chûng chu Pathian laka sual a ni. (Deuteronomy 5:17; 1 Johana 3:15) Hêng thlarau suaksualte thanga lo âwk tawh mipui sâng tam takte chu an chhuak leh thei tho a ni. Engtin nge an chhuah theih? Rahbi pawimawh tak tak zawhin an chhuak thei a ni.
THLARAU SUAKSUALTE DO TLAT DAN
14. Kum zabi pakhatnaa Ephesi khuaa Kristiante tih dân nêna inmilin, engtin nge thlarau suaksualte chu i do tlat theih ang?
14 Thlarau suaksualte i do tlat theih dân leh, nangmah leh i chhûngkuate pawh an thang laka in invên theih dân kawng pakhat chu eng nge ni? Kum zabi pakhatnaa Ephesi khuaa Kristiante, ringtu an nih hmaa thlarau zâwlte chuan rahbi ṭha tak an zawh a. “Dawihmang a ṭhen tam tak pawhin an lehkhabute an rawn la khâwm a, mi zawng zawng mithmuhah an hâl ta,” a ni. (Tirhkohte 19:19) Thlarau i zâwl ve lo a nih pawhin, thlarau zâwlna lama thil hman chi emaw, chutiang lam hawi rêng rêng emaw chu paih bo vek ang che. Hei hian lehkhabute, chanchinbute, video-te, lehkha târ chite, rimawite, leh ramhuai biak nâna bungraw hman chite a huam vek a ni. Milimte, vânduaina lak aṭanga invên nâna thil engemaw kawl chite, leh thlarau zâwltute hnên aṭanga thilpêk dawnte pawh hi a huam tel bawk. (Deuteronomy 7:25, 26; 1 Korinth 10:21) A hrilhfiah nân: Thailand rama nupa tuak khat chu hun rei tak chhûng ramhuaihovin an zar buai a. Tichuan thlarau zâwlna nêna inkûngkaih thil an kawl zawng zawng chu an paih vek a. Eng nge a rah chhuah? Ramhuaihote beihna lak ata chu an fihlîm ta a, chuta ṭang chuan thlarau lamah pawh hmasâwnna tak tak an nei thei a ni.
15. Thlarau suaksualhote do tlatna kawngah rahbi pawimawh tak dang chu eng nge ni?
15 Thlarau suaksualte hi do tlat tûra rahbi pawimawh tak dang chu Pathian pêk thlarau râlthuam famkima inthuam tûra tirhkoh Paula thurâwn zawm hi a ni. (Ephesi 6:11-17) Kristiante chuan thlarau suaksualte laka an invênna chu an thuam ṭha sauh sauh tûr a ni. He rahbi hian eng nge a huam tel? Paula chuan, “Chûng lo pawh chu rinna phaw la ula, chu mi chuan mi sual thal alh thei zawng zawng chu in timit thei ang,” tiin a sawi a. A ni rêng a ni, i rinna chu a chak poh leh thlarau suaksualte i do theihna chu a nasa dâwn a ni.—Matthaia 17:14-20.
16. Engtin nge i rinna i tihchak theih ang?
16 Engtin nge i rinna i tihchak theih ang? Bible zir chhunzawm zêlin leh a thurâwnte i nuna hmangin i tichak thei a ni. Mite rinna chak leh chak loh chu a nghahchhan—Pathian hriatnaa a ngheh leh ngheh lohvah a innghat thui hle a. Bible i han zira hriatna dik tak i lo neih leh i lo ngaih pawimawhna chuan i rinna chu a ṭhan lentîr a ni tih hi i pawm lo vem ni? (Rom 10:10, 17) Chuvângin, he i zirna hi i chhunzawm zêl a, Jehova Thuhretute inkhâwmnaa i tel ve ṭhin bawk chuan, i rinna chu tihngheh lehzual a ni ngei ang. (Rom 1:11, 12; Kolossa 2:6, 7) Ramhuaite beihna lakah pawh kulh chak tak a ni dâwn a ni.—1 Johana 5:5.
17. Thlarau suaksualhote do tlatna kawngah eng rahbi dangte nge ṭûl zêl thei?
17 Thlarau suaksualhote do tum tlattuin eng rahbi dangte nge a la zawh zêl theih ang? Ephesi khuaa Kristiante chuan ramhuai biaknaa khat khawpuia an chên avângin vênhimna an mamawh a. Chuvângin, Paula hian: “Eng hun pawha Thlarauva ṭawngṭai” tûrin a hrilh a ni. (Ephesi 6:18) Ramhuaiin a zar buai khawvêla chêng kan nih avângin, thlarau suaksualte dona kawngah hian Pathian vênhimna dîla ṭhahnemngai taka ṭawngṭai hi a pawimawh tak zet a ni. (Matthaia 6:13) Hemi chungchângah hian Kristian kohhrana upa ruatten thlarau lama min ṭanpuina leh an ṭawngṭainate hi a ṭangkai hle a ni.—Jakoba 5:13-15.
THLARAU SUAKSUALTE I DONA CHU CHHUNZAWM ZEL RAWH
18, 19. Ramhuaihovin an tihbuai nawn leh chuan miin eng nge a tih theih?
18 Amaherawhchu, hêng rahbi bulte hi an zawh hnu pawhin mi ṭhenkhat chu thlarau suaksualten an la tibuai zêl tho mai a. Entîr nân, Cote d’Ivoire rama pa pakhat chuan Jehova Thuhretute nên Bible an zir a, dawi laka invênna thil a kawl zawng zawngte chu a tichhe vek bawk a. Chuta ṭang chuan ṭha takin hma a sâwn chho va, Jehova hnênah a nun pumpêkin baptisma a chang ta a. Mahse baptisma a chan hnu kâr khat lekah ramhuaihote chuan an tibuai ṭan leh ta mai a, a rinna hmuh thar chu bânsan tûrin aw hian a hrilh ṭhîn bawk a ni. Hetiang hi i chungah thleng ve ta sela, Jehova vênhimna i chân ta tihna em ni ang? Ni khêr lo ve.
19 Mi ṭha famkim Isua Krista khân Pathian vênhimna a nei reng chungin, thlarau suaksual tak Diabol-Setana aw chu a hre tho a ni. Chutiang dinhmunah chuan Isua’n tih dân tûr min kawhhmuh a. Diabola chu: “Setan, kal bo daih rawh!” tiin a hrilh a ni. (Matthaia 4:3-10) Hetiang bawk hian, thlarau khawvêl aṭanga aw lo kal rêng rêng chu i ngaithla tûr a ni lo. Jehova chu ṭanpui tûr chea kovin thlarau suaksualte chu do tlat rawh. Pathian hming lamin ring takin ṭawngṭai ang che. Thufingte 18:10 chuan: “LALPA hming chu kulhpui a ni a, mi fel chu a tlân lût ṭhîn a, a him ṭhîn,” a ti a ni. Cote d’Ivoire rama Kristian pa pawh khân hetiang hian a ti a, thlarau suaksualte chuan an tihbuai tawh lo a ni.—Sâm 124:8; 145:18.
20. A tlângpui khai khâwmin, thlarau suaksualte do tlat tûrin eng nge i tih theih?
20 Jehova chuan thlarau suaksualte hi an awm a la phal a, mahse a bîk takin a mite aiawhin a thiltihtheihna a lantîr a, a hming chu lei pumpuiah puan chhuahin a awm mêk a ni. (Exodus 9:16) Pathian hnaiha i awm reng chuan thlarau suaksualte chu i hlauh a ngai lo vang. (Numbers 23:21, 23; Jakoba 4:7, 8; 2 Petera 2:9) An thiltihtheihna chu tâwp chin nei a ni. Nova hun lai khân hrem an ni tawh a, tûn hnai lawkah vân aṭangin paih chhuah an ni a, tûnah tak hian rorêlna hnuhnûng ber chu an nghâk mêk a ni. (Juda 6; Thu Puan 12:9; 20:1-3, 7-10, 14) Dik takin, an chhiatna lo thleng tûr hi an hlau êm êm a. (Jakoba 2:19) Chuvângin thlarau suaksualten tawktarh engemaw hmanga hip che an tum emaw, eng kawng zâwng pawhin an bei che emaw pawh nise, i do tlat thei a ni. (2 Korinth 2:11) Thlarau zâwlna chi rêng rêng chu hawisan vek la, Pathian Thuin thurâwn min pêkte hi zâwm la, Jehova pawm tlâk nih tum bawk rawh. He thil hi muangchâng lovin ti thuai rawh, i nunna tûr chu thlarau suaksualhote i do tlatnaah hian a innghah avangin!
I HRIATNA FIAH RAWH
Thlarau suaksualten engtin nge mite hruai bo an tum?
Engvângin nge Bible-in thlarau zâwlna hi a hnâwl?
Thlarau suaksualhote lak aṭangin engtin nge mi a chhuah theih ang?
Engvângin nge thlarau suaksualte chu i do zui zêl ang?
[Phêk 110-naa milem]
Thlarau zâwlna chi hrang tam takte hi eng angin nge i ngaih?