Bung 13
Pathian Ngaihsaka Nunin Hlimna A Thlên Chhan
1. Jehova kawngin hlimna a thlen tih engvângin nge kan sawi theih?
JEHOVA chu “Pathian hlim” a ni a, nuam ti taka nung tûrin a duh che a ni. (1 Timothea 1:11, NW) A kawng i zawh zêl chuan i hlâwkpui ang a, lui luang reng ang maiin hahdamna thûk tak leh daih rei tak i nei thei a ni. Pathian kawng zawhna chuan “tuifinriat fâwnte ang maiin” felna thil ti zêl tûrin mi a chêttîr bawk a. Hei hian hlimna tak tak a thlen a ni.—Isaia 48:17, 18.
2. Kristianten a chânga tihduhdahna an tuar ṭhîn chung pawhin engtin nge an hlim theih?
2 Mi ṭhenkhat chuan, ‘A chângin miten thil dik an tih avângin an tuar phah ṭhîn si a,’ tiin an hnial mai thei a. A dik a ni, chutiang chu Isua tirhkohte chungah pawh khân a thleng a ni. Amaherawhchu, tihduhdah an ni chungin an lâwm êm êm a, “Isua chu Krista a ni” tih chanchin ṭha chu an puang zui zêl a ni. (Tirhkohte 5:40-42) Heta ṭang hian thil pawimawh tak kan zir thei a. Pakhat chu Pathian ngaihsaka kan nun hian eng lai pawhin miten ṭha takin min cheibâwl reng dâwn lo, tih hi a ni. Tirhkoh Paula chuan, “A ni, tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin a ziak a. (2 Timothea 3:12) Hei hi a chhan chu Setana leh a khawvêlte hian Pathian ngaihsaka nungte chu an do tlat vâng a ni. (Johana 15:18, 19; 1 Petera 5:8) Nimahsela hlimna tak tak chu pawn lam thilah a innghat lo va. Thil dik kan tih avângin Pathian pawhin min pawm a ni tih rin nghehna aṭangin a lo awm zâwk a ni.—Matthaia 5:10-12; Jakoba 1:2, 3; 1 Petera 4:13, 14.
3. Jehova biakna chuan engtin nge mi nun a khawih danglam ang?
3 A châng chânga Pathian rawng bâwl a, hun dangah amah chu theihnghilh leh mai ṭhîn chunga Pathian duhsakna dawng thei nia inngai an awm a. Pathian Jehova biakna dik tak chu hetiang hi a ni lo. Mi nundân zawng zawng chu a dam chhûngin, ni tin, kum tin a khawih danglam zâwk a ni. Chuvângin “Kawng” tia vuah a ni bawk. (Tirhkohte 19:9; Isaia 30:21) Pathian Thu nêna inmila thu sawi tûr leh thil ti tûra min phûttu Pathian ngaihsaka nun kawng hi a ni.
4. Pathian kawng nêna inmila nung tûra inthlâkthleng hi engvângin nge a ṭangkai?
4 Bible zir ṭantîrten Jehova tilâwm tûrin an nundân ṭhenkhat thlâk a ngai tih an han hriat chuan, ‘Pathian ngaihsaka nun hi a manhla tak tak dâwn em ni?’ tiin an ngaihtuah mai thei a. Manhla tak a ni tih hi i chiang thei a ni. Engvângin nge? A chhan chu “Pathian chu hmangaihna” a nih vâng a ni a, chuvângin a kawngte chu kan hlâwkna tûra ruahman vek a ni. (1 Johana 4:8) Pathian chu fing tak a nih bawk avângin kan tâna ṭha ber tûr pawh a hria a. Pathian Jehova chu engkimtithei a nih avângin, thil chîn ṭha lo bânsana amah tihlâwm kan duhna hi tipuitling tûrin min tichak thei bawk a ni. (Philippi 4:13) Pathian ngaihsaka nunin a kaihhnawih thu bul ṭhenkhatte lo ngaihtuah ila, chûng chu a taka hmannain hlimna a thlen dân i lo en ang u.
THINLUNG THAIN HLIMNA A THLEN
5. Dâwt sawi leh rûk rûk chungchângah Bible-in eng nge a sawi?
5 Jehova chu “thutak Pathian” a ni a. (Sâm 31:5) Rinhlelh rual lohvin, amah entawn chu i duhin miten mi dik tia an hriat che pawh i duh ngei ang. Thinlung ṭha chuan mahni inzahna leh ngaihṭhatna a siam a. Amaherawhchu, he khawvêl sualah hian rinawm lohna hi a lâr êm avângin, Kristiante chuan he hriat nawntîrna hi an mamawh a ni: “Mahni ṭhenawm hnênah thu dik tak sawi ṭheuh rawh u . . . Rûk hmang chuan ru tawh suh sela; tlachham hnênah chuan pêk tûr a neih theihna tûrin a kuta . . . thawkin rim zâwk rawh se,” tih hi. (Ephesi 4:25, 28) Kristian inhlawhfate chuan rinawm takin ni khat hna an thawk zêl ṭhîn. Anmahni ruaituin phalna a pe a nih ngawt loh chuan, a thil neih an la mai mai ngai lo. Hnathawhnaah a ni emaw, sikulah a ni emaw, inah a ni emaw, Jehova betu chu ‘engkimah a fel’ tûr a ni. (Hebrai 13:18) Dâwt sawi hmang emaw, rûk hmang emaw rêng rêngin Pathian duhsakna an dawng thei lo.—Deuteronomy 5:19; Thu Puan 21:8.
6. Pathian ngaihsak mite rinawmna chuan engtin nge Jehova ropuina a thlen theih?
6 Thinlung ṭhatna chuan malsâwmna tam tak a thlen ṭhîn. Selina-i chu Africa mi hmeithai rethei tak, Pathian Jehova leh a thu bul felte ngaina êm êmtu a ni a. Ni khat chu, pawisa tam tak leh bank-a pawisa lâk chhuah theihna lehkhabu awmna ip khai a chhar a. Telephone neitute hming leh an chênna hmun inziahna lehkhabu hmangin ip khai neitupa—rûkruten a hmaa an lo suam dâwrkai chu a zawng chhuak thei ta a. Selina-in dam lo chung chunga a va tlawh a, a ip khai chhûnga thil awm zawng zawng a han pêk kîr leh vek chuan, chu pa chuan a mitvai emaw a ti hial a ni. “Hetiang mi thinlung ṭha hi lâwmman pêk tûr a ni,” tiin pawisa tam tham tak a pe a ni. A pawimawh zâwk chu, he pa hian Selina-i sakhua a fak êm êm chu a ni. Thinlung ṭha thil tih chuan Bible zirtîrna a chei mawiin, Pathian Jehova a chawimawi a, amah betu rinawmte hnênah hlimna a thlen bawk a ni.—Tita 2:10; 1 Petera 2:12.
THILPHALNAIN HLIMNA A THLEN
7. Pawisaa inkhêlh hi eng nge a dik lohna?
7 Mi thilphal nih hi hlimna a ni a, mi duhâmte erawh chuan “Pathian ram an luah” lo vang. (1 Korinth 6:10) Duhâmna chi khat lâr tak mai chu pawisaa inkhêlhna hi a ni a, hei hi mi dangte pawisa hloh aṭanga sum hmuh tuma beihna a ni. Jehova chuan “hlêpna bawlhhlawha duhâm” mite chu a pawm lo. (1 Timothea 3:8) Pawisaa inkhêlhna hi dânin a phalna hmunah miin intihhlim nân mai mai pawh khêl mah se, a chîng dawklak thei a, mi tam tak nun tichhe thei chîn dân a tilâr tihna a ni. Pawisaa inkhêlhna chuan a khêltute chhûngkuaah harsatna a thlen ṭhîn a, chaw ei tûr leh thawmhnaw leina tûr pawh nei mang lovin an awm ṭhîn a ni.—1 Timothea 6:10.
8. Thilphalna chungchângah Isua’n engtin nge entawn tûr ṭha tak a lo siam a, engtin nge kan thilphal ve theih ang?
8 Hmangaih taka thilphalna an neih avângin Kristiante chuan mi dangte, a bîkin an rinpui retheite an ṭanpuinaah hlimna an hmu a ni. (Jakoba 2:15, 16) Isua leia a lo kal hma khân mihringte chunga Pathian thilphalzia a lo hmu tawh a. (Tirhkohte 14:16, 17) Isua ngei pawhin a hunte, a thiamnate, leh a nunna hial pawh mihringte tân a pe a ni. Chuvângin: “Englo lâk aiin pêkin lukhâwng a nei zâwk,” tia sawi tûr hian a tling êm êm a ni. (Tirhkohte 20:35) Isua’n Pathian biak in thawhlâwm bâwma dâr tangka dere pahnih phal taka thlâktu hmeithai rethei tê chu a fak hle bawk a, a chhan chu “a intunnunna tûr zawng zawng” a thawh vek avângin a ni. (Marka 12:41-44) Hmasâng Israel mite leh kum zabi pakhatnaa Kristiante khân kohhran leh Ram rawngbâwlna hna ṭanpui nân hmanruate pein, thilphalna kawngah entawn tûr an lo hnutchhiah a. (1 Chronicles 29:9; 2 Korinth 9:11-14) Hêng thil atâna hmanruate chu an pêk bâkah, tûn lai Kristiante hian hlim takin Pathian hnênah fakna an hlân a, an nun pawh a rawngbâwl nân an hmang a ni. (Rom 12:1; Hebrai 13:15) Biakna dik thlâwp tûr leh khawvêl pumpuia Ram chanchin ṭha hril hna ṭanpui tûra an hun te, an tha leh zung te, leh thil dang dang, an sum leh pai te pawh an hman avângin anni chu Jehova’n mal a sâwm a ni.—Thufingte 3:9, 10.
HLIMNA THLENTU THIL DANGTE
9. Zu lam chi rêng rêng a lutuka in hi eng nge a dik lohna?
9 Hlim taka awm tûrin Kristianten ‘an ngaihruat thiamna an vawng’ ṭha tûr a ni. (Thufingte 5:1, 2) Hetianga ti tûr chuan Pathian Thu leh Bible hrilhfiahna lehkhabu ṭhate an chhiar a, ngun taka an chhût a ṭûl a. Mahse pumpelh tûr thil ṭhenkhat a awm. Entîr nân, zu lam chi rêng rêng a lutuka miin a in chuan a ngaihtuahna a thunun thei lo vang. Chutiang dinhmunah chuan mi tam tak chu hurna lam kawngah te an inhnamhnawih a, râwng takin an khawsa a, thihna khawp hial chêtsualnate pawh an thlen ṭhîn. Zu ruih hmangten Pathian ram an luah lo vang tia Bible-in a lo sawi pawh hi a mak lo ve! (1 Korinth 6:10) “Rilru fel tak” pua awm reng tum tlatin, Kristian dik takte chuan zu ruihna hi an pumpelh a, hei hian an zîngah hlimna awm tûrin a ṭanpui a ni.—Tita 2:2-6.
10. (a) Kristianten engvângin nge vaihlo hi an hman loh? (b) A ngawl vei bânsanna aṭangin eng hlâwknate nge awm?
10 Taksa thianghlimna hian hlimna a thlen bawk a. Chuti chung chuan mi tam takin taksa khawih pawi thei thilte chu a ngawl an vei a ni. Entîr nân, vaihlo hman dân hi han ngaihtuah la. The World Health Organization chuan, mei zûk hian “kum tin mi maktaduai thum a tihlum a ni” tiin a report a ni. Vaihlo tûr lût ṭhîn a han tâwp tâk avânga rei vak lo chhûng taksain a tuar avângin mei zûk chu bânsan a har hle thei a. Kawng leh lamah, mei zûk bânsantu tam tak chuan hrisêlna ṭha zâwk an neiin, inchhûng khur mamawh atân pawisa tam lehzual an nei bawk tih an hria a ni. Mei zûk kan bânsan emaw, min tichhe thei thil dang ngawl kan veite kan bânsan chuan, taksa thianghlimna te, chhia leh ṭha hriatna thiang tak te, leh hlimna dik tak te kan nei dâwn a ni.—2 Korinth 7:1.
INNEIHNAA HLIMNA
11. Dân ang thlapa inneihna leh chawimawi tlâk inneihna daih rei tak nei tûrin eng nge ṭûl?
11 Nupui pasal anga khawsate chuan an inneihna chu tualchhûnga thuneitute hnênah an ziak lût ngei tûr a ni a. (Marka 12:17) Inneihna hi mawhphurhna urhsûn takah an ngai bawk tûr a ni. A dik takin, nupui fanaute enkawl duh loh thu-ah te, a lutuka insawisakna thu-ah te emaw, thlarau lama hlauhthâwnawm lutuk thil thu-ah te emaw chuan inṭhen chu a ṭûl thei a ni. (1 Timothea 5:8; Galatia 5:19-21) Mahse 1 Korinth 7:10-17-a tirhkoh Paula thusawi hian nupate chu awm dûn reng tûrin a fuih a ni. Hlimna dik tak nei tûr chuan nupate chu an rinawm tawn tûr a ni. Paula chuan: “Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se; inngaite leh uirête chu Pathianin a ngaihtuah dâwn si a,” tiin a ziak a ni. (Hebrai 13:4) “Khum” tih thu mal hian mipa leh hmeichhia dân ang thlapa innei tawhten mipat hmeichhiatna an hman dun hi a kâwk a ni. Mipat hmeichhiatna hmanna dang rêng rêng, nupui pakhat aia tam neihna angte hi, “mi zawng zawng zîngah chawimawi” a ni tiin a sawi theih loh. Chubâkah, Bible hian inneih hmaa mipat hmeichhiatna hman te leh mawngkawhurna te hi a hnâwl a ni.—Rom 1:26, 27; 1 Korinth 6:18.
12. Inngaihna rah chhuah ṭha lo ṭhenkhat chu engte nge ni?
12 Inngaihna chuan rei lo te chhûng chu tisa hlimna a thlen mai thei a, mahse hlimna dik tak a thlen lo. Pathian a tilâwm lovin, chu mi chu a chhia leh ṭha hriatna pawh a tihmêlhem thei a ni. (1 Thessalonika 4:3-5) Dân lo anga mipat hmeichhiatna hmanna chuan rah ṭha lo tak, AIDS te leh inpâwlna aṭanga inkai chhâwn theih natna dang dang te a thlen thei a ni. “Khawvêl pumpuiah hian kum tin mi maktaduai 250 aia tamin dadu natna an kai a, maktaduai 50 vêlin saihri natna an kai bawk niin chhût a ni,” tiin damdawi lam report pakhat chuan a sawi. Duh lo chunga nau pai hi harsatna dang chu a ni. The International Planned Parenthood Federation-in a report dânin, khawvêl pumpuiah tleirâwl kum 15 leh 19 inkâr maktaduai 15 aia tamin kum tin nau an pai a, an zînga hmun thuma ṭhena hmun khat chuan an nau pai an titla bawk a ni. Africa ram pakhatah chuan, tleirâwl thite zînga za zêla 72-te chu nau tihtlâk avânga natna dangin a tlâkbuak avângin an thi a ni tih hemi chungchâng chhuina pakhat chuan a târlang bawk. Inngaih hmang mi ṭhenkhatin natna leh nau pai chu an pumpelh hlauh mai thei a, mahse an ngaihtuahna tla chhe tûr erawh chu an pumpelh thei lo. Mi tam tak chuan mahni inzahna an neih pawh an hloh va, anmahni leh anmahni an inhaw hluah hluah ṭhîn a ni.
13. Uirênain eng harsatnate nge a siam belh a, sim duh lo inngaih hmangte leh uirê hmangten eng nge an hmabâk?
13 Uirêna hi ngaihdam theih ni mah se, a thiam zâwk chuan a kawppui chu Pathian Lehkhathu ṭanchhanin a ṭhen thei a ni. (Matthaia 5:32. Hosea 3:1-5 khaikhin rawh.) Dik lo taka mipat hmeichhiatna hman avânga nupa inṭhenna a lo awmin, a thiam zâwk leh naupangte thinlungah ril takin ser a siam thei a ni. Mihring chhûngkuate ṭhatna tûrin, Pathian Thu chuan sim duh lo inngaih hmangte leh uirê hmangte chungah phuba a la dâwn tih a sawi a. Chubâkah, dik lo taka mipat hmeichhiatna hmangtute chuan “Pathian ram an luah lo vang” tih chiang takin a târlang bawk a ni.—Galatia 5:19, 21.
“KHAWVELA MI . . . NI LO”
14. (a) Pathian ngaihsak miin a pumpelh ṭhin milem biakna chi hrang ṭhenkhat chu engte nge ni? (b) Johana 17:14 leh Isaia 2:4-te hian eng kaihhruaina nge min pêk?
14 Jehova tihlâwm duhtute leh Ram malsâwmna chên duhtute chuan milem biakna chi rêng rêng chu an hnâwl vek a. Bible chuan Krista lim emaw, Isua nu Mari lim emaw pawh tiamin, milim rêng rêng siam leh biak chu a dik lo tih a târ lang. (Exodus 20:4, 5; 1 Johana 5:21) Chuvângin, Kristian dikte chuan milemte, kraws-te, leh milimte chu an be ve lo. Milem biakna hriat thiam harsa lehzual deuh chi, puanzâr (flag) chibai bûkna ang chi te leh hnam chawimawina hla sak ang chi te hi an pumpelh bawk a ni. Chutiang thil ti tûra nawr luih an nih chuan, Setana hnêna Isua thusawi: “Lalpa [“Jehova,” NW] i Pathian chibai bûk la, ama rawng chauh bâwl rawh,” tih hi an hre chhuak leh ṭhîn. (Matthaia 4:8-10) Isua’n a hnungzuitute chu “khawvêla mi an ni lo” a ti a. (Johana 17:14) Hei hi a awmzia chu politic thila tualdawiha awm leh Isaia 2:4 mila inrem taka nung tihna a ni a, he lai châng hian: “Ani [Pathian Jehova] chuan hnam tin kârah ro a rêl ang a, chi tam tak pawh a zilhhau vang: tin, an khandaihte chu leilehna hmâwr zumahte an chher ang a, an feite chu theikûng ahchhumna chem kawmahte an chher ang: hnam dangin hnam dang chungah khandaih an lek tawh lo vang a, indo dân pawh an zir tawh hek lo vang,” tiin a sawi a ni.
15. Babulon Khaw Ropui hi eng nge ni a, a chhûng aṭanga chhuak tûrin Bible zir thar tam takten eng nge an tih?
15 “Khawvêla mi . . . ni lo” tih awmzia chu “Babulon Khaw Ropui,” khawvêl sakhaw dik lo nêna inkûngkaihna zawng zawng chhut chah vek hi a ni bawk. Biakna thianghlim lo chu hmasâng Babulon aṭangin a rawn inṭan a, lei pumpuia mite chungah thlarau lama thununna ṭha lo tak a neih thlengin a darh zau ta a ni. “Babulon Khaw Ropui” chuan Pathian hriatna nêna inkalh thurinte leh chîn dânte awmna sakhua zawng zawng hi a huam vek a ni. (Thu Puan 17:1, 5, 15) Jehova betu rinawm tumah sakhaw hrante biaknaah tel vein emaw, Babulon Khaw Ropui pêng eng ber emaw nên thlarau lama inkawmhona neiin emaw, rinpawlh thil tihah an inhnamhnawih lo vang. (Numbers 25:1-9; 2 Korinth 6:14) Hemi avâng hian Bible zir thar tam takte chuan an lo awmna sakhaw pâwlah bânna lehkha te an theh lût a. Hei hian Pathian dik chu a hnaihtîr lehzual a ni: “‘An zîng ata lo chhuak ula, ahrangin awm rawh u, thil bawlhhlawh rêng rêng pawh dek suh u,’ Lalpan a ti,’ chutichuan, ‘Ka lâwm ang che u,’” tia a lo tiam ang hian. (2 Korinth 6:17; Thu Puan 18:4, 5) Chutianga vâna kan Pa pawmna chu i duh êm êm a ni lâwm ni?
KUM TINA NI SERH THINTE KHAIKHININ
16. Engvângin nge Kristian dikten Krismas an hman loh?
16 Pathian ngaihsaka nunna chuan phurrit thlen ṭhîntu khawvêl mite ni lawm ṭhin lak aṭang hian min zalêntîr a ni. Entîr nân, Bible hian Isua pian nî chiah a târlang lo va. Mi ṭhenkhat chuan, ‘Isua hi December 25-ah a piang niin ka lo ngai a!’ an ti mai thei. Kum 33 1/2 mi niin, C.E. 33 nipui laia thi a nih avângin hei hi thil theih a ni lo. Chubâkah, a pian hun lai hian berâmputen “zânah an berâmho an vêng a, phûlah an riah chilh” a ni. (Luka 2:8) Israel ramah chuan December thla tâwp lam chu a vâwtin fûr lai a ni a, berâmte chu thlasik khawvâwt laka an him theihna tûrin zankhuain hulhliap hnuaiah an dah ṭhîn a ni. A dik takin, December 25 hi Rom miten an ni pathian pian nî atâna an ruat bîk a ni a. Isua leia a awm hnu kum zabi tam takah, Kristian thurin dik phatsantute chuan hemi nî hi Isua lo pian lawm nân an hmang zui ta zêl a ni. Hemi avâng hian, Kristian dikte chuan Krismas emaw, sakhaw dik lo thurina innghat ni dang rêng rêng pawh an hmang ngai lo. Chu bâkah, suala piang mihringte emaw, hnamte emaw chawisânna nîte pawh an serh ve ngai lo, Jehova hnênah inpêk bîkna an hlan avângin.
17. Pathian ngaihsak miten engvângin nge piancham an lawm loh va, chuti chung chuan Kristian naupangte chu engvângin nge an hlim tho?
17 Bible hian piancham lawm chungchâng bîk chu vawi hnih chiah a sawi a, a lâwmtute chu Pathian rawngbâwltu an ni lo ve ve bawk. (Genesis 40:20-22; Matthaia 14:6-11) Mi ṭha famkim Isua Krista pian nî hi Pathian Lehkhathuin a târlan loh avângin, engvângin nge mihring ṭha famkim lote pian nî chu kan ngaihsak bîk ang? (Thuhriltu 7:1) Pathian ngaihsak nu leh pate chuan an fate an hmangaihzia lantîr tûrin ni engemaw bîk an nghâk kher ngai lo va. Kum 13 mi Kristian hmeichhe naupang pakhat chuan: “Kei leh ka chhûngte chuan hlimna tam tak kan nei a . . . Ka nu leh pate hi ka pawh êm êm a, naupang dangten ni serh bîkte hi ka lawm ve ngai loh nachhan min zawh chângte hian, ni tin ka lâwm ziah alâwm tiin ka hrilh ṭhîn,” a ti. Kristian tleirâwl kum 17 mi chuan: “Kan inah chuan kum tluanin thilpêk kan inpe ṭhîn,” tiin a sawi bawk. Thilpêkte chu mahni rilru puak chhuak ngeia pêk a nih hian hlimna a nasa lehzual a ni.
18. Isua’n a zirtîrte hnêna kum tin vawi khat hmang ṭhîn tûra thu a pêk kha eng nge ni a, chu chuan eng nge min hriat nawntîr ṭhin?
18 Pathian ngaihsaka nun tumte tân chuan a bîk taka hman tûr ni khat kum tinin a awm ziah a. Chu chu Lalpa Zanriah, Krista thih Hriatrengna tia sawi ṭhin chu a ni. Hemi chungchângah hian, Isua’n a zirtîrte chu: “Mi hriat reng nân hei hi ti ṭhîn rawh u,” tiin thu a pe a ni. (Luka 22:19, 20; 1 Korinth 11:23-25) C.E. 33 , Nisan 14 zâna Isua’n he zanriah hi a siam khân, dawidim telh loh chhang leh uain sen a hmang a, chu chuan a mihring taksa sual tel lo leh a thisen ṭha famkim a entîr a ni. (Matthaia 26:26-29) Hêng entîrnate hi Pathian thlarau thianghlima hriak thih Kristiante chauhvin an eiin an in ṭhîn. Anni chu thuthlung thar leh Ram thuthlungah lâkluh an ni a, vân lam beiseina an nei a ni. (Luka 12:32; 22:20, 28-30; Rom 8:16, 17; Thu Puan 14:1-5) Nimahsela, hmân lai Juda calendar-a Nisan 14 nêna inmil chiah ni tlaia tel zawng zawngte chuan an hlâwkpui vek a ni. Pathian duhsakna changtute tâna chatuana nun theihna siamtu sual ngaihdam nâna tlanna inthawina chu buatsaiha, Pathian Jehova leh Isua Krista’n hmangaihna an lo lantîr hi a hriat nawntîr ṭhîn a ni.—Matthaia 20:28; Johana 3:16.
HNATHAWH LEH INTIHHLIMNA
19. Ei zawnna kawngah Kristianten eng chona nge an tawh ṭhin?
19 Kristian dikte chuan nasa taka thawka an mamawhte phuhrûk tûrin mawhphurhna an nei a. He mawhphurhna hi hlen chhuah a nih chuan chhûngkuaa lû berten lungawina an nei ṭhîn. (1 Thessalonika 4:11, 12) Dik takin, Kristian pakhatin Bible nên a inkalh hna a thawh chuan a hlimna a tibo ang. Mahse, Bible tehnate nêna inmil hna hmuh chu Kristiante tân a châng chuan a harsa hle ṭhîn a. Entîr nân, hnathawktu ṭhenkhatte chu anmahni dâwrtute lo bum tûra phût an ni ṭhîn. A lehlamah, mi ruaitu tam tak chuan hnathawktu rin tlâk takte an hloh duh loh avângin, hnathawktu rinawmte chhia leh ṭha hriatna milin an ngaihdân an thlâk ṭhîn bawk. Amaherawhchu, eng thil pawh lo thleng se, chhia leh ṭha hriatna thiang neihtîr thei tûr che hna hmuh tuma i beihna chu Pathianin mal a sâwm ngei ang tih hi i chiang thei a ni.—2 Korinth 4:2.
20. Intihhlimna kan thlan hian engvângin nge kan duhtui ang?
20 Pathianin a chhiahhlawhte chu hlim tûra a duh avângin, rim taka hnathawh hun hi intihharh nâna intihhlimna hun leh hahchawlhna hun nên inbûk tâwka kan hman a ṭûl a ni. (Marka 6:31; Thuhriltu 3:12, 13) Setana khawvêl hian Pathian lâwm lohzâwng intihhlimna chite a vawrh lâr êm êm a. Mahse Pathian tilâwm tûr chuan kan lehkhabu chhiar tûrte, rimawi leh radio kan ngaihthlâk tûrte, leh kan concert en tûrte, kan film en tûrte, kan lemchan en tûrte, television leh video kan en tûrte hi kan duhtui tûr a ni. Tûn hmaa intihhlimna kan lo thlan ṭhinte chu hêng Pathian thu châng, Deuteronomy 18:10-12 te, Sâm 11:5 te, leh Ephesi 5:3-5-a vaukhânnate nên a inkalh thei a, chumi mîla kan insiam rem chuan Jehova kan tilâwm ang a, keimahni pawh kan hlim lehzual ang.
NUNNA LEH THISEN ZAHNA
21. Nunna zahna chuan nau tihtlâk chungchânga kan ngaihdân te, kan chîn ṭhan thilte leh kan nungchang te engtin nge a khawih danglam ang?
21 Hlimna dik tak nei tûrin, Jehova’n mihring nunna a serh angin keini pawhin kan serh ve a ṭûl a ni. A Thu chuan tualthah min khap tlat a. (Matthaia 19:16-18) Dik takin, Israel-te hnêna pêk Pathian Dân chuan nu pum chhûnga nausên awm nunna pawh a ngaihlu êm êm a—tihboral tûr thil engemaw mai mai a ni lo tih a târlang. (Exodus 21:22, 23) Chumi avâng chuan, vaihlo hmang tein, ruihhlo emaw, zu emaw hmanga kan taksa tikhawlovin, a nih loh leh ṭul lo taka nunna thâpin, nunna hi engemaw hlutna nei lo angin kan cheibâwl tûr a ni lo. Nunna tiderthâwng thei thil rêng rêngah kan inhnamhnawih tûr a ni lo va, rîkrum thila invên lâwknate pawh kan ngaihthah tûr a ni hek lo, thisena thiam loh channa a thlen thei si a.—Deuteronomy 22:8.
22. (a) Thisen leh a hman dân chungchânga Pathian ngaihdân eng nge ni? (b) Tu thisen chauh hi nge nun chhanhimna tak tak chu?
22 Thisen chu nunna (soul) aiawhtu a ni tiin Jehova’n Nova leh a chhûngte chu a hrilh a. Chuvângin, Pathianin thisen rêng rêng an ei a khap tlat a ni. (Genesis 9:3, 4) Keini pawh an thlahte kan nih avângin chu dân chuan kan zavai hian min phuar vek a. Jehova’n Israel mite hnênah thisen chu leia leihbuak tûr a ni tih leh, mihring mamawh atân hman tûr a ni lo tih a hrilh a. (Deuteronomy 12:15, 16) Kum zabi pakhatnaa Kristiante kha: “Thisen ei te . . . bâng ula,” tia hrilh an nih khân, thisen chungchânga Pathian dân chu a sawi nawn leh a ni. (Tirhkohte 15:28, 29) Pathian ngaihsaka awmte chuan nunna thianghlimna hi an zah avângin, mi dangten nun chhanhimna a ni tiin nawrlui mah se thisen thun hi an pawm lo. Jehova Thuhretute pawm theih inenkawlna damdawi dangte chu a ṭha êm êmin, thisen thun avânga hlauhthâwn tûr ang chi pawh a awm ve lo a ni. Kristiante chuan Isua thisen chhuak chauh hi nun chhanhimna tak tak chu a ni tih an hria a. Chumia rinna chuan ngaihdamna leh chatuana nun beiseina a thlen a ni.—Ephesi 1:7.
23. Pathian ngaihsaka nun avânga lâwmman ṭhenkhat chu engte nge ni?
23 Pathian ngaihsaka nung tûr chuan theihtâwpa beih a ngai tih a chiang hle a ni. Chhûngten emaw, hmêlhriatten emaw min nuihzabûr thei a. (Matthaia 10:32-39; 1 Petera 4:4) Mahse chutianga nun avânga lâwmman awm chuan eng hrehawm tawrhna pawh nasa takin a khûm a ni. Chhia leh ṭha hriatna thiang tak min neihtîr a, Jehova kan biakpuite nên pawh inlaichînna ṭha tak min siamsak a ni. (Matthaia 19:27, 29) Chutah, Pathian felna khawvêl thara chatuana nun chu han mitthla bawk la. (Isaia 65:17, 18) Bible thurâwnte zawm avânga Jehova thinlung tihlâwm hi a va hlimawm êm! (Thufingte 27:11) Pathian ngaihsaka nunin hlimna a thlen hi thil mak a ni lo ve!—Sâm 128:1, 2.
I HRIATNA FIAH RAWH
Pathian ngaihsaka nunin hlimna a thlen chhan ṭhenkhat chu engte nge ni?
Pathian ngaihsaka nung tûrin eng inthlâkthlengna nge ngai?
Engvângin nge Pathian ngaihsaka nun i duh?
[Phêk 124, 125-naa Milemte]
Thlarau lam hna thawhna leh chawlh hahdamna hun inbûk tâwka hman hian Pathian ngaihsaka nungte tân hlimna a thlen a ni