Zirlai 5

Lei Atâna Pathian Thiltum Chu Eng Nge Ni?

Engvângin nge Jehova’n lei hi a siam? (1, 2)

Engvângin nge lei hi tûnah paradis a nih loh? (3)

Eng nge mi suaksualte chungah lo thleng dâwn? (4)

Nakinah chuan Isua’n damlote tân, upate tân, leh mitthite tân eng nge a tih dâwn? (5, 6)

Nakina malsâwmna lo thleng tûr chu dawng ve tûrin, eng nge i tih ngai? (7)

1. Mihringte nuam taka chatuana an chên nân Jehova chuan lei hi a siam a. Mi fel leh hlim takte’n lei hi luah reng se a duh a ni. (Sâm 115:16; Isaia 45:18) Lei hi tihchhiat a ni ngai dâwn lo; kumkhuain a awm reng ang.​—⁠Sâm 104:5; Thuhriltu 1:⁠4.

2. Pathianin mihring a siam hmain, leia hmun zau vak lo pakhat chu thlangin, paradis mawi takah A siam a. A hmingah chuan Eden huan a vuah a ni. Hetah hian a ni, mipa leh hmeichhe hmasa ber, Adama leh Evi chu a dah ni. Pathian chuan fate neia lei pum pui luah khahtîr a tum a. Zawi zawiin, lei pum pui hi paradis-ah an siam tûr a ni.​—⁠Genesis 1:28; 2:​8, 15.

3. Adama leh Evi chuan Pathian dân bawhchhe luiin thil sual an ti a. Chuvângin, Jehova chuan Eden huan ata a hnawt chhuak a. Paradis chu hloh a ni ta a ni. (Genesis 3:1-6, 23) Mahse, Jehova chuan he lei atâna a thiltum chu a theihnghilh lo. Mihringte chatuana an chên nân lei hi paradis-a siam tûrin thu a tiam a ni. Chu chu engtin nge a tih ang?​—⁠Sâm 37:29.

4. He lei hi paradis a nih hmain, mi suaksualte chu tihboral vek phawt tûr a ni a. (Sâm 37:38) Hei hi sualna titâwp tûra Pathian indona, Armageddon-ah a thleng ang. Tichuan, Setana chu kum 1,000 chhûng phuar a ni ang. Chu chu lei tichhe tûrin mi sual tumah an awm tawh dâwn lo tihna a ni. Pathian mite chauh chu an dam khawchhuak ang.​—⁠Thu Puan 16:​14, 16; 20:​1-3.

5. Tichuan, Isua Krista chuan Lalber angin kum 1,000 chhûng ro a rêl ang a. (Thu Puan 20:⁠6) Zawi zawiin kan rilru leh taksa aṭangin sual a la bo vang a. Adama leh Evi-te’n thil sual an tih hma ang chiah khân, ṭha famkim kan ni tawh dâwn a ni. Tichuan, natna te, tarna te, leh thihna te a awm tawh lo vang. Damlote tihdam an ni ang a, tarte pawh an vânglai nîah an kîr leh ang.​—⁠Joba 33:25; Isaia 33:24; Thu Puan 21:​3, 4.

6. Isua Kum Sâng Rorêl chhûngin, mi rinawmte chuan lei pum pui hi paradis-a chantîr tûrin hna an thawk ang a. (Luka 23:43) Tin, mitthi maktaduai tam takte chu he leiah hian kaihthawh leh an ni bawk ang. (Tirhkohte 24:15) Pathian thil phûtte an tih phawt chuan, leiah chatuanin an chêng chhunzawm zêl ang a. An tih loh erawh chuan, chatuan atâna tihboral an ni thung ang.​—⁠Johana 5:​28, 29; Thu Puan 20:​11-15.

7. Chutiang chuan, atîra he lei atâna Pathian thiltum chu a hlawhtling tawh dâwn a ni. Chûng malsâwmna lo thleng tûrte chu dawn ve i duh em? I duh chuan, Jehova chanchin i zir zêl leh a thil phûtte i zawm chu a ngai a ni. In vênga Jehova Thuhretute Kingdom Hall-a inkhâwmna chuan, chutianga ti tûrin a ṭanpui ang che.​—⁠Isaia 11:9; Hebrai 10:​24, 25.

[Phêk 10-naa milem]

Paradis hloh chu

[Phêk 11-naa milemte]

Armageddon hnuah chuan, lei hi paradis-a siam a ni ang