Zirlai 6
Pathian Ram Hi Eng Nge Ni?
Khawiah nge Pathian Ram hi a awm? (1) Tunge a Lalber? (2)
Lalber rorêlnaah mi dangin chanvo an nei ve em? An neih chuan, mi eng zâtin nge? (3)
Engin nge ni hnuhnûngah kan awm tih târ lang? (4)
Pathian Ramin mihringte tân eng nge a la tih dâwn? (5-7)
1. Leia a awm lai khân, Isua’n a hnungzuitute chu Pathian Ram dîla ṭawngṭai tûrin a zirtîr a. Lalram chu Lalberin a kaihhruai sawrkâr hi a ni. Pathian Ram chu sawrkâr danglam bîk tak a ni a. Vânah din a ni a, leiah hian ro a rêl ang. Chu chuan Pathian hming a tithianghlim ang a. Pathian duhzâwng chu vâna an tih angin leia mite pawh a tihtîr dâwn a ni.—Matthaia 6:9, 10.
2. Pathianin Isua chu A Lalrama Lalber ni tûrin thu a lo tiam tawh a. (Luka 1:30-33) Isua chuan leia a awm lai khân, Rorêltu ngilnei tak, dik tak, leh ṭha famkim a ni dâwn tih a lo finfiah tawh a ni. Vâna a kîr leh chuan, Pathian Rama Lalber ni tûrin lalṭhutthlêngah a ṭhu nghâl mai lo. (Hebrai 10:12, 13) Kum 1914-ah, Jehova chuan A lo tiam tawh thuneihna chu Isua hnênah a pe ta a. Chu mi aṭang chuan, Jehova ruat Lalber angin Isua chuan vânah ro a rêl ta a ni.—Daniela 7:13, 14.
3. Jehova chuan vâna kal tûrin he leia mipa leh hmeichhe rinawm ṭhenkhat chu a thlang bawk a. Anni chuan lalte, rorêltute, leh puithiamte angin Isua nên mihringte chungah ro an rêl ang. (Luka 22:28-30; Thu Puan 5:9, 10) Isua chuan hêng a rama a rorêlpui tûrte hi “pâwl tlêmte” tiin a ko va. An vaiin mi 1,44,000 an ni.—Luka 12:32; Thu Puan 14:1-3.
4. Lalber a nih veleh, Isua chuan Setana leh a vântirhkoh sualte chu vân aṭangin leiah a paih thla a. Chu mi avâng chuan kum 1914 aṭangin he lei awm dân hi a ṭha lo tial tial a ni. (Thu Puan 12:9, 12) Indote, ṭâmte, hrilêngte, dân bawhchhiatna lo pung zêlte—hêng zawng zawng hi Isua’n vânah ro a rêl mêk tih leh he khawvêl hi ni hnuhnûngah a awm tawh tih entîrtu “chhinchhiahna” zînga mi a ni.—Matthaia 24:3, 7, 8, 12; Luka 21:10, 11; 2 Timothea 3:1-5.
5. Isua’n ro a rêl thuai ang a, berâmpuin kêl zîng ata berâmte a hlîr angin mite chu a hlîr ang. “Berâmte” chu a khua leh tui rinawm an nihzia finfiahtute an ni ang a. Leiah chatuana nunna an chang ang. “Kêlte” erawh chu Pathian Ram hnâwltute an ni ang a. (Matthaia 25:31-34, 46) Nakin lawkah, Isua chuan kêl ang zawng zawngte chu a tiboral vek ang. (2 Thessalonika 1:6-9) Isua “berâmte” zînga pakhat nih ve i duh chuan, Lalram thuchah i ngaithlain, i thu zirte i nunpui tûr a ni.—Matthaia 24:14.
6. Tûnah chuan lei hi ram tam takah a inṭhen hrang a. Ram tin chuan mahni sawrkâr a nei ṭheuh a ni. Hêng ramte hi an indo fo ṭhîn. Mahse, mihring sawrkâr zawng zawngte hi Pathian Ramin a rawn thlâk dâwn a. Lei pum pui chunga sawrkâr awmchhun niin ro a rêl ang. (Daniela 2:44) Tichuan indona te, dân bawhchhiatna te, tharum thawhna te a awm tawh lo vang a. Mi zawng zawng chu inrem leh lungrualin an chêng za tawh ang.—Mika 4:3, 4.
7. Isua Kum Sâng Rorêl chhûngin, mi rinawmte chu ṭha famkim an lo ni ang a, lei pum pui hi paradis a lo ni bawk ang. Kum sâng tâwpah chuan, Isua chuan Pathianin ti tûra a tih zawng zawng chu a tizo vek tawh ang a. Tichuan, a Pa hnênah Lalram chu a pe kîr leh ang. (1 Korinth 15:24) Pathian Ramin a tih tûrte hi engvângin nge i ṭhiante leh i hmangaihte i hrilh loh vang?
[Phêk 13-naa milem]
Isua rorêlna hnuaiah chuan, inhuatna emaw, inpâwngpaw ngeina emaw a awm tawh lo vang