Zirlai 8
Pathian Tilâwm Chhûngkaw Nun
Chhûngkuaa pasal dinhmun eng nge ni? (1)
Engtin nge pasalin a nupui a cheibâwl ang? (2)
Pa berin eng mawhphurhnate nge a neih? (3)
Chhûngkuaa nupui chanvo eng nge ni? (4)
Nu leh pate leh naupangte lakah Pathianin eng nge a phût? (5)
Nupa awm hranna leh inṭhenna chungchâng Bible thlîr dân hi eng nge ni? (6, 7)
1. Bible chuan pasal chu chhûngkaw lû a nih thu a sawi a. (1 Korinth 11:3) Pasal chuan nupui pakhat chauh a nei tûr a ni. Tin, dân anga mumal taka innei an ni tûr a ni bawk.—1 Timothea 3:2; Tita 3:1, 2.
2. Pasal chuan amah a inhmangaih angin a nupui chu a hmangaih tûr a ni a. Isua’n a zirtîrte a cheibâwl angin a cheibâwl ve tûr a ni. (Ephesi 5:25, 28, 29) A nupui chungah kut a thlâk ngai tûr a ni lo va, eng kawng mahin a cheibâwl khaw lo tûr a ni lo. Chawimawina leh zahna a lantîr zâwk tûr a ni.—Kolossa 3:19; 1 Petera 3:7.
3. Pa ber chuan a chhûngkaw enkawl nân a thawk rim tûr a ni. A nupui fanaute tân ei leh bâr, silh leh fên, leh chênna tûr in a pe tûr a ni a. A chhûngte thlarau lam mamawh pawh a phuhru tûr a ni bawk. (1 Timothea 5:8) Tin, Pathian leh A thiltum chungchâng hre tûra a chhûngkua a ṭanpuinaah pawh hma a hruai tûr a ni bawk.—Deuteronomy 6:4-9; Ephesi 6:4.
4. Nupui chu a pasal tân ṭanpuitu ṭha a ni tûr a ni a. (Genesis 2:18) An fate zirtîrna leh sâwizawina kawngah a pasal a ṭanpui tûr a ni. (Thufingte 1:8) Jehova chuan nupui chu hmangaih taka a chhûngkua enkawl tûrin a phût a. (Thufingte 31:10, 15, 26, 27; Tita 2:3-5) A pasal zahna thûk tak a nei tûr a ni.—Ephesi 5:22, 23, 33.
5. Pathian chuan naupangte chu nu leh pate thu awih tûrin a phût a. (Ephesi 6:1-3) Nu leh pate pawh an fate zirtîr tûr leh zilh tûrin a beisei a ni. Nu leh pate chuan an fate nêna hun hmangho leh Bible zirhovin, an thlarau lam leh thinlung lam mamawhte an ngaihtuahsak a ngai bawk a ni. (Deuteronomy 11:18, 19; Thufingte 22:6, 15) Nu leh pate chuan an fate chu râwng tak leh hrehawm takin an thunun ngai tûr a ni lo.—Kolossa 3:21.
6. Nupa inkâra inrem lohna a chhuah hunah chuan, Bible thurâwn nunpui chu an tum tûr a ni a. Bible chuan hmangaihna lantîr tûr leh ngaihdam peih tûrin min fuih a ni. (Kolossa 3:12-14) Pathian Thu chuan harsatna tê tham tak takte tihven nâna awm hran chu a sawi mawi lo. Mahse, nupui chuan hêngte avâng hian a pasal chhuahsan chu a thlang thei a ni, (1) a pasalin luhlul taka a chhûngkua a chhawmdâwl duh loh tlat chuan, (2) tharum a thawh nasat avânga a hrisêlna leh a nunna atâna a hlauhawm chuan, a nih loh leh (3) nasa taka a dodâl avânga Jehova a biak theih loh phah chuan.—1 Korinth 7:12, 13.
7. Nupate chu an rinawm tawn tûr a ni a. Uirêna hi Pathian laka sual leh mahni kawppui laka sual a ni. (Hebrai 13:4) Inneihna pâwn lama mipat hmeichhiatna hman hi mi dang nei leh thei tûra Pathian Lehkha Thu anga inṭhenna awmchhun a ni. (Matthaia 19:6-9; Rom 7:2, 3) Pathian Lehkha Thu ang ni lova mi an inṭhen a, mi dang an neih leh hi Jehova huatzâwng tak a ni.—Malakia 2:14-16.
[Phêk 16, 17-naa milemte]
Hmangaihna nei pa ber chuan tisa lam leh thlarau lama a chhûngkaw mamawh a phuhru
[Phêk 17-naa milem]
Pathianin nu leh pate chu an fate zirtîr tûr leh zilh tûrin a beisei