Zirlai 11
Pathian Tilâwm Lo Thurin leh Thil Chînte
Eng ang chi thurin leh thil chînte nge dik lo? (1)
Kristiante’n Pathian hi Trinity niin an ring tûr em ni? (2)
Engvângin nge Kristian dikte’n Krismas te, Kum Thar te, Easter te, leh pian chamte an lawm ve loh? (3, 4)
Mitthite’n mi nungdamte an tina thei em? (5)
Isua hi kraws-ah a thi em? (6)
Pathian tihlâwm hi eng ang taka pawimawh nge? (7)
1. Thurin leh thil chîn zawng zawng hi a ṭha lo vek lo va. Mahse, sakhaw dik lo aṭanga lo chhuak emaw, Bible zirtîrna kalh emaw a nih chuan Pathianin a pawm lo a ni.—Matthaia 15:6.
2. Trinity: Jehova hi Trinity—Pathian pakhata mi pathum—zînga mi a ni em? Ni lo! Pa Pathian, Jehova chu, “Pathian tak chauh [“Pathian dik awmchhun,” NW]” a ni. (Johana 17:3; Marka 12:29) Isua hi A Fapa piang hmasa ber a ni a, Pathian thu hnuaiah a intulût a ni. (1 Korinth 11:3) Pa chu Fapa aiin a ropui zâwk a. (Johana 14:28) Thlarau thianghlim chu mi ni lovin, Pathian chakna chevêl reng hi a ni.—Genesis 1:2; Tirhkohte 2:18.
3. Krismas, Kum Thar, leh Easter: Isua chu December ni 25-ah a piang lo. Berâmpute’n phûla berâm an riahpui theih lai hun, October ni 1 vêlah a piang a ni. (Luka 2:8-12) Isua chuan Kristiante chu a pian cham lâwm tûrin thu a pe ngai lo. A thihna hre reng tûrin a zirtîrte chu a chah zâwk a ni. (Luka 22:19, 20) Krismas, Kum Thar, leh a hman dânte chu hmân lai sakhaw dik lo biakna aṭanga lo chhuak a ni a. Chutiang bawkin Easter hman huna artui leh sazupui lem an hmante pawh hi sakhaw dik lo aṭanga lo chhuak tho a ni. Kristian hmasate’n Krismas emaw, Kum Thar emaw, Easter emaw chu an lâwm ngai lo va, tûn laia Kristian dikte lahin an lâwm ngai hek lo.
4. Pian Cham: Bible-a pian cham lawm chungchâng sawi awmchhun pahnihte hi Jehova betu ni lote lawm a ni a. (Genesis 40:20-22; Marka 6:21, 22, 24-27) Kristian hmasate’n pian cham an lâwm ngai lo. Pian cham lawm hi hmân lai sakhaw dik lote aṭanga lo chhuak a ni. Kristian dikte chuan kum khat chhûnga hun dangah thilpêkte inpein hun hlimawm tak tak an hmangho zâwk a ni.
5. Mitthi Hlauhna: Mitthite’n engmah an ti thei lo va, engmah an hre thei bawk hek lo. Kan ṭanpui thei lo va, min tina thei lo bawk. (Sâm 146:4; Thuhriltu 9:5, 10) Mihringah hian thih hnua la dam zui zêl thil engmah a awm lo. Mahse, a châng chuan ramhuai kan tih vântirhkoh sualte chu mitthi tawhte thlarau angah an chang der ṭhîn a. Mitthi hlauhna emaw, mitthi biakna emaw nêna inzawmna nei thil chîn engpawh chu a dik lo a ni.—Isaia 8:19.
6. Kraws: Isua hi kraws-ah a thi lo. Ban emaw, thing tlâwn emawah a thi zâwk a ni. Bible tam taka “kraws” tia lehlin Grik thu mal hi thing tlâwn pakhat sawina a ni a. Kraws chhinchhiahna hi hmân lai sakhaw dik lote aṭanga lo chhuak a ni. Kristian hmasate’n kraws hi an hmang lo va, an be ngai hek lo. Chuvângin, Pathian biaknaa kraws hman chu a dikin i ring em?—Deuteronomy 7:26; 1 Korinth 10:14.
7. Hêng thurin leh thil chîn ṭhenkhatte hi bânsan a harsa viau mai thei a ni. Chhûngkhatte leh ṭhiante chuan i thurin chu thlâk lo tûrin hmin che an tum thei a. Mahse, Pathian tihlâwm chu mihring tihlâwm aiin a pawimawh zâwk daih a ni.—Thufingte 29:25; Matthaia 10:36, 37.
[Phêk 22-naa milem]
Pathian chu Trinity a ni lo
[Phêk 23-naa milem]
Krismas, Kum Thar, leh Easter-te hi hmân lai sakhaw dik lote aṭanga lo chhuak a ni
[Phêk 23-naa milem]
Mitthi biak chhan tûr emaw, hlauh chhan tûr emaw a awm lo