Pathian Chu I Ṭhian Neih Theih Zînga Ṭhian Ṭha Ber A Ni

Pathian ṭhian nih chu i chunga thil lo thleng thei zînga thil ṭha ber a ni. Pathian chuan hlim theih dân leh him theih dân a zirtîr ang che a; rinna dik lo leh mi tichhe thei chîn dân tam tak aṭangin a tizalên ang che. I ṭawngṭainate chu a ngaithlâksak ang che a. Inrin tâwkna leh chhûng lam thlamuanna nei tûrin a ṭanpui ang che. (Sâm 71:5; 73:28) Pathian chuan harsatna i tawn hunah a ṭanpui ang che a. (Sâm 18:18) Tin, a thilthlâwnpêk chatuan nunna chu a pe bawk ang che.​—⁠Rom 6:23.

Pathian i hnaih hian, Pathian ṭhiante pawh i hnaih ve ang. Anni chu i ṭhiante an lo ni ve ang a, i pianpui unaute ang an lo ni ang. Anni chuan Pathian chungchâng lâwm takin an zirtîr ang che a, an ṭanpui chein, an fuih ang che.

Pathian nên chuan kan intluk lo va. Chuvângin, Pathian ṭhian nih i tum rualin, he thu pawimawh tak hi i hre thiam tûr a ni. Pathian nêna inṭhianna chu intlukpuite inkâra inṭhianna ang a ni lo va. Ani chu kan aia upa zâwk, fing zâwk, leh thiltithei zâwk a ni. Kan Rorêltu tûr dik tak a ni bawk. Chuvângin, a ṭhian nih kan duh chuan, a thu kan ngaithlain, ti tûra min hrilhte chu kan ti ngei ngei tûr a ni. Chutianga tih chu kan ṭhatpui reng ang.​—⁠Isaia 48:⁠18.