Pathian Chungchâng I Zir Theih Dân

Bible chhiarna aṭangin Jehova chungchâng i zir thei a ni. Hun rei tak kalta khân, Pathianin a ngaihtuahnate ziak chhuak tûrin mi tute emaw chu a thlang a. Chûng an thuziakte chu Bible tia koh a ni. Tûn laiah Bible chhiarin Pathian chungchâng kan zir a. Bible-ah hian Jehova thu emaw, a thuchah emaw a awm avângin Pathian Thu tia koh a ni bawk. Bible sawi apiang chu kan ring thei a ni; Jehova chu daw thei lo a ni si a. ‘Pathian chu daw rual a ni lo.’ (Hebrai 6:18) Pathian Thu chu thutak a ni.​—⁠Johana 17:17.

Bible hi Pathian thilpêk hlu ber berte zînga pakhat a ni. Chu chu hmangaihnaa khat Pa berin a fate hnêna lehkha a thawn ang a ni a. Chu chuan Pathianin he lei hi chênna hmun nuam tak, paradis-a chantîr a tiam thu min hrilh a ni. A fa rinawmte tâna tûn hmaa thil a lo tih tawh te, tûna a tih mêk te, leh nakina a la tih tûr te chu min hrilh a. Tin, kan buainate chingfel tûr leh hlimna nei tûrin min ṭanpui bawk.​—⁠2 Timothea 3:​16, 17.

Jehova Thuhretute chu Pathian ṭhian an ni a; anni chuan Bible thu zirtîrte hre thiam tûrin an ṭanpui ang che. An hnênah Bible zir i duh thu hrilh ringawt rawh. Chu mi atân pawisa an dîl ngai lo a ni. (Matthaia 10:⁠8) Chu bâkah, Kristian inkhâwmnaahte i tel thei a. Chûng inkhâwmte chu Pathian biakna hmun, Kingdom Hall tia kohvah an nei ṭhîn. Kristian inkhâwmnaa i tel chuan, Pathian hriatna kawngah i ṭhang chho vat ang.

A thil siamte aṭangin Pathian chungchâng i zir thei bawk a. Entîr nân, Bible chuan: “Pathianin lei leh vân a siam a,” a ti a. (Genesis 1:⁠1) Jehova’n “vân” a siamin, nî pawh a siam a. Chu chuan Pathian chungchâng eng nge min hrilh? Jehova’n thiltihtheihna nasa tak a neihzia min hrilh a ni. Nî anga thiltithei chu amah chauhvin a siam thei a ni. Chu chuan Jehova finzia min hrilh bawk; êng leh sâ pe chhuaka kâng ral thei bawk si lo siam chuak tûr chuan finna neih a ngaih avângin.

Jehova thil siamte chuan min hmangaihzia a târ lang a. Leia thei rah chi hrang hrangte hi han ngaihtuah teh. Jehova chuan thei chikhat chauh min pe thei reng a ni a​—⁠pakhatmah min pe lo thei pawh a ni. Mahse, thei chi hrang hrang a pian hmang, a lenzâwng, a rawng, leh a tuizâwng inang lo tak takte min pe zâwk a. Chu chuan Jehova chu hmangaihna chauh ni lovin, thil phal tak, mi ngaihsak tak, leh ngilnei tak a nihzia a târ lang bawk a ni.​—⁠Sâm 104:⁠24.