Tute Nge Pathian Hmêlmate Chu?

Pathian hmêlma lian ber chu Diabol-Setana a ni. Ani chu Jehova laka hel, thlarau thil siam a ni a. Setana chuan Pathian a la do zêl a, mihringte tân buaina namên lo a siam a ni. Setana chu suaksual tak a ni a. Dawheh tak leh tualthattu a ni bawk.​—⁠Johana 8:44.

Pathian laka Setana helna chu thlarau thil siam dangte’n an thlâwp a. Bible-in anni chu ramhuaiho tiin a ko. Setana ang bawkin, ramhuaiho chu mihringte hmêlma an ni a. Mite tihnat chu an duh a ni. (Matthaia 9:​32, 33; 12:22) Jehova chuan Setana leh a ramhuaihote chu chatuan atân a la tiboral ang. Mihringte tihbuai nân hun rei lo tê chauh an nei tawh a ni.​—⁠Thu Puan 12:12.

Pathian ṭhian nih i duh chuan, Setana’n ti tûra a duh che chu i ti tûr a ni lo. Setana leh ramhuaihote chuan Jehova chu an hua a. Pathian hmêlma an ni a, Pathian hmêlma ni tûra siam che an duh a ni. Jehova nge Setana tihlâwm i duh tih chu i thlan tûr a ni a. Chatuana nunna i duh chuan, Pathian duhzâwng tih chu i thlang ngei tûr a ni. Setana chuan mite bum dân kawng tam tak a nei a. Mi tam zâwk chu a bumin an awm a ni.​—⁠Thu Puan 12:⁠9.