RAMHUAITE AIIN ISUA’N THIL A TITHEI ZAWK

PATHIAN vântirhkoh pakhat Diabol-Setana a rawn nih chhan kha i la hria em?—Mite biak nih a duhna, mahni hmasialnain ani chu Pathian chungah a heltîr a ni. A nih leh, vântirhkoh dangte chuan Setana chu an thlâwp em?—Aw, thlâwp e. Bible chuan anni chu ‘Setana tirhkohte,’ a nih loh leh ramhuaite tiin a ko a ni.—Thu Puan 12:9.

Vântirhkoh sualte, a nih loh leh ramhuaite chuan Pathian an ring em?—Bible chuan ‘ramhuaiten Pathian a awm tih an rin’ thu a sawi a. (Jakoba 2:19) Mahse, tûnah chuan anni chu hlauvin an awm a ni. An thil sual tihte avângin Pathianin a la hrem dâwn tih an hriat vâng a ni. A nih leh, eng thil sual nge an tih?—

Bible chuan an awmna hmun pângngai vân chu kalsanin, leiah mihringte angin an rawn khawsa tih a sawi a. Leia hmeichhe hmêl ṭha tak takte chu mipat hmeichhiatna hmanpui an duh avânga chutianga khawsa chu an ni. (Genesis 6:1, 2; Juda 6) Mipat hmeichhiatna chungchâng eng nge hriat i neih?—

Mipat hmeichhiatna hmang tih chu mipa leh hmeichhia chu kawng danglam takin inzawmna an nei hi a ni a. Chutianga inzawmna neih hnu chuan, nu chhûlah nausên a lo insiam thei a ni. Mahse, vântirhkohte tân chuan chutianga mipat hmeichhiatna hman chu thil sual a ni. Pathian chuan innei tawh mipa leh hmeichhiate chauh mipat hmeichhiatna hmang tûrin a duh a. Chutiang kawnga fa an nei a nih chuan, nu leh pate chuan ṭha takin an enkawl thei ang.

Vântirhkohte’n mihring taksa pu-a leia hmeichhiate an pâwl tâkah chuan, an fa lo piangte chu mi hrawl tak niin an rawn ṭhang chho va. An nun a râwngin, mite an tina fo a ni. Chuvângin, Pathianin chûng mi hrawlte leh mi suaksual zawng zawngte chu tui tilêtin a tiboral vek a ni. Mahse, thil dik titu Nova leh mi tlêm tê chu lawng tuktîrin a chhandam a. Zirtîrtu Ropui chuan Tuilêta thilthlengte hriat reng a pawimawhzia a sawi a ni.—Genesis 6:3, 4, 13, 14; Luka 17:26, 27.

Tui a lêt khân, vântirhkoh suaksualte chungah eng thil nge thleng i hria em?—An mihring taksa chu kalsanin, vânah an kîr leh a. Mahse, Pathian vântirhkohte zînga an tel theih tawh loh avângin, Setana tirhkohte, a nih loh leh ramhuaite an rawn ni ta a ni. A nih leh, an fa mi hrawl tak takte chungah khân eng thil nge thleng?—Tuilêtah an thi vek a. Pathian thuawih lotu zawng zawngte pawh an thi vek a ni.

Tuilêt hnu aṭangin, Pathianin ramhuaite chu mihring anga an awm a phal tawh lo. Anni chu hmu thei lo mah ila, mite chu thil ṭha lo tihtîr an la tum reng a. Tûn hma zawng aiin buainate an thlen nasa zâwk bawk. Chutiang a nih chhan chu vân aṭanga leia paihthlâk an nih vâng a ni.

Ramhuaite kan hmuh theih loh chhan hi i hria em?—Thlarau thil siam an nih vâng a ni. Mahse, an awm ngei tih erawh kan chiang thei thung. Bible chuan Setana chu “khawvêl zawng zawng bumtu” a nih thu leh a ramhuaiho pawhin an puih thu a sawi a ni.—Thu Puan 12:9, 12.

A nih leh, Diabola leh a ramhuaihote chuan min bum ve thei em?—Kan fîmkhur loh chuan keini pawh min bum thei a ni. Mahse, kan hlauh a ngai lo. Zirtîrtu Ropui Isua chuan: ‘Diabolan ka chungah thu eng mah a nei lo,’ tiin a sawi si a. Pathian kan hnaih tlat chuan, Diabola leh a ramhuaihote lakah min vênghim ang.—Johana 14:30, C.L. Re-edited.

Diabola’n tihtîr min tum thil ṭha lote hriat chu a pawimawh hle. Han ngaihtuah teh. Leia ramhuaite an rawn kal khân eng thil ṭha lote nge an tih?—Tuilêt hma chuan, hmeichhiate chu nupuiah an nei a, chu chu vântirhkohte tâna thil sual, an tih loh tawp tûr a ni. Tûn laiah pawh, ramhuaite chuan mite’n mipat hmeichhiatna lama Pathian thu an zawm loh chu an duh a ni. A nih leh, tute chauhvin nge mipat hmeichhiatna hmang thei?—Ni e, nupate chauhvin an hmang thei a ni.

Tûn laiah, ṭhalai a hmei a pate chuan mipat hmeichhiatna an hmang ṭhîn a, chu chu an tân sual a ni. Bible chuan mipa leh hmeichhiate chi thlah theihna (an serh) chu Pathian siam a ni tih a sawi a. Jehova chuan mipat hmeichhiatna chu nupa inkâr chauhva hmang turin a siam a ni. Chuvângin, mite’n Jehova dân bawhchhiaa thil an tih hian, chu chuan ramhuaite chu an tihlim hle. Entîr nân, ramhuaite chuan ṭhalai mipa leh hmeichhiate’n an serh an inkhalhsak lai hmuh chu nuam an ti a ni. Ramhuaite tihlâwm chu kan duh lo a ni lâwm ni?—

Ramhuaite ngainat; mahse, Pathian Jehova’n a huat thil dang pawh a awm a. Chu chu eng nge ni i hria em?—Tharum thawhna a ni. (Sâm 11:5) Tharum thawhna tih chu mite’n tum reng vânga mi dangte an tina hi a ni. Chu chu ramhuai fate, mi hrawlte tih dân a ni tih hre reng ang che.

Ramhuaite chuan mite tihhlauh pawh nuam an ti a. A châng chuan, mitthi tawhte angin an inlantîr a. Chûng thi tawhte aw ri ang chiah chuan thute an sawi ṭhîn a ni. Chutiang kawng chuan, mitthite chu an la nung rengin, min la be thei tih ring tûrin mite chu an bum a. Mi tam tak chu thlahrâng a awm tih ring tûrin an bum bawk a ni.

Chuvângin, Setana leh a ramhuaihote buma kan awm loh nân kan invêng reng tûr a ni. Bible chuan: ‘Setana meuh pawh êng tirhkohvah a insiam chawp si ṭhîn a. A rawngbâwltute pawh felna rawngbâwltuah an insiam chawp ṭhîn,’ tiin min vaukhân a ni. (2 Korinth 11:14, 15) Mahse, a nihna takah chuan, ramhuaite chu an sual hle. Anmahni ang ni tûra min thlêm mai theih dân hi i lo en ang u.

Khawi aṭangin nge tite hian tharum thawhna te, mipat hmeichhiat hman sualna te, leh thlarau thil siamte leh thlahrâng chungchângte an hmuh a, an hriat?—TV leh film aṭang te, computer leh video games aṭang te, internet aṭang te, leh an lehkhabu chhiar aṭangte a ni lâwm ni? Chûng thilte chuan Pathian min hnaihtîr lehzual nge ni a, Setana leh a ramhuaite min hnaihtîr zâwk? Eng nge i ngaih dân?—

Thil ṭha lote en tûr leh ngaithla tûra min duhtu chu tu nge a nih i rin?—Ni e, Setana leh a ramhuaihote an ni. Chuvângin, eng nge kan tih ngai?—Kan tâna ṭha tûrte leh Jehova rawng bâwl tûra min ṭanpuitu tûrte chauh kan chhiar a, kan ngaihthlâk a, kan en a ngai a ni. Chûng thil ṭhate zînga ṭhenkhat chu i ngaihtuah chhuak thei em?—

Thil ṭha kan tih chuan, ramhuaite hlauh chhan tûr kan nei lo. Isua chuan ramhuaite aiin thil a tithei zâwk a, anni chuan an hlau hial a ni. Ṭum khat chu ramhuaihote chuan Isua hnênah: “Min tiboral tûrin i lo kal em ni?” tiin an zâwt a. (Marka 1:24) Isua’n Setana leh a ramhuaihote a tihboral hun chuan kan lâwm hle dâwn lâwm ni?—Chumi hun a thlen hma chuan, Isua’n amah leh a Pa vâna mi kan hnaih tlat a nih chuan min vênghim ang tih kan chiang tlat thei a ni.