“Thlemnaa In Luh Loh Nan”
“Thlêmnaa in luh loh nân inring rengin ṭawngṭai rawh u.”—MATTHAIA 26:41.
ISUA KRISTA, Pathian fapa nêksâwrna tawrh chu a hmaa a lo tawn tawh zawng zawng aiin a nasa zâwk a. Ani chuan a lei lam nun chu a hmang zo ṭêp tawh a ni. Isua chuan man a, thi tûra thiam loh chantîr a, nghaisakna bana khaikân a ni thuai dâwn tih a hria a. A thutlûkna leh a thiltihte chuan a Pa hming a chawimawiin, a tichhe thei bawk tih a hre reng a ni. Tin, mihringte nakin nun beiseina pawh bûk mêk a ni tih a hre bawk. Chûng nêksâwrna zawng zawngte a tuar laiin eng nge a tih?
2 Isua chu a zirtîrte nên Gethsemane huanah an kal a. Chu hmun chu Isua hmun ngainat tak mai a ni. Chutah chuan a zirtîrte hnên ata hla vak lovah a kal hrang a. Amah chauhva a awm veleh, a Pa vâna mi hnênah chakna a dîl a, tih tak zeta ṭawngṭaiin a thinlung a leihbua a—vawikhat mai ni lo, vawithum lai a ṭawngṭai a ni. Ṭha famkim mah ni se, Isua chuan nêksâwrna chu amaha hmachhawn theiah a inngai lo a ni.—Matthaia 26:36-44.
3 Tûn laiah, keini pawh nêksâwrna hnuaiah kan awm a. He brochure hma lamah khân, he khawvêl suaksual tâwpna huna kan awm tawhzia târ lannate kan ngaihtuah tawh kha. Setana khawvêl thlêmna leh tihhrehawmnate chu a zual tawlh tawlh a. Pathian dik rawngbâwl nia inchhâl kan zînga tute pawh thutlûknate leh thiltihte hian Pathian a tihmingṭhain, a tihmingchhe thei a, a khawvêl thara nun kan inbeiseina chungchângah nghawng thui tak a nei bawk a ni. Jehova chu kan hmangaih a. Kan nun emaw, he khawvêl emaw a enga pawh tâwp hmasa se, ‘a tâwp thlenga chhel’ chu kan duh a ni. (Matthaia 24:13) Mahse, engtin nge hmanhmawhna rilru chu kan vawn reng ang a, kan ngaihven reng theih ang?
4 Hmân lai leh tûn laia a zirtîrte chuan nêksâwrna an tuar dâwn tih hriain, Isua chuan heti hian a fuih a ni: “Thlêmnaa in luh loh nân inring rengin ṭawngṭai rawh u,” tiin. (Matthaia 26:41) Chûng thute chuan tûn laiah kan tân eng awmzia nge a neih? Eng thlêmna nge i tawh? Engtin nge “inring rengin,” a nih loh leh ngaihven rengin i awm theih ang?
Eng Ti Tûra Thlêmna Nge?
5 Kan vai hian nî tin “Diabola thang” laka tlâwm tûra thlêmna chu kan tâwk ṭheuh va. (2 Timothea 2:26) Bible chuan Setana’n Jehova betute chu a tum bîk tih min hrilh a ni. (1 Petera 5:8; Thu Puan 12:12, 17) Eng atân nge a tum bîk? Kan nunna la tûrin a ni kher lo. Pathian laka rinawm chunga kan thih chuan, chu chu Setana tân hnehna a ni lo. Jehova’n Ama hun têah chuan thawhlehna hmangin thihna a tichhe vek dâwn tih Setana chuan a hre si a.—Luka 20:37, 38.
6 Setana chuan tûna kan nunna aia hlu zâwk thil engemaw—Pathian laka kan rinawmna—chu tihchhiat a duh a. Ani chuan Jehova lak aṭangin min la pêng thei tih finfiah chu a tum ngar ngar a ni. Chuvângin, rinawm lo tûra thlêm theih kan nih a, chanchin ṭha hrilh kan bânsan emaw, Kristian tehnate kan kalsan emaw mai chuan, chu chu Setana tân hnehna a ni dâwn a ni! (Ephesi 6:11-13) Chuvângin, “Thlêmtu” chuan kan hmaah thlêmna a dah tlat a ni.—Matthaia 4:3.
7 Setana chuan “bum dân kawng hmang” chi hrang tam tak a hmang a. (Ephesi 6:11, Jewish New Testament) Sum leh pai lam âtchilhna te, hlauhna te, rinhlelhna te, a nih loh leh nawmsipbâwl ûmna te hmangin min thlêm thei a ni. Mahse, a hmanraw hman ṭangkai ber zînga pakhat chu lunghnualna hi a ni. Hun remchâng zawng rân mi verther tak a nih angin, ani chuan beidawnnain thlarau lamah min tichak lo theiin, thlêm awl takah min siam thei tih a hre kar a. (Thufingte 24:10) Chuvângin, a bîk takin rilru lama kan “sil ûrh” châng hian, rawngbâwlna bânsan tûrin min thlêm ṭhîn a ni.—Sâm 38:8.
8 Tâwpna kan hnaih deuh deuh hian, lunghnual chhan tûr pawh a pung deuh deuh niin a lang a, chûng aṭanga humhim kan ni lo. (“Lunghnualna Thlentu Thil Ṭhenkhatte” tih bâwm en rawh.) A chhan chu eng pawh ni se, lunghnualna chuan min tichak lo thei a ni. Tisa lam, rilru lam, leh thinlung lama i chauh chuan Bible zirna neih te, Kristian inkhâwmnaa tel te, leh rawngbâwlnaa telte pawh tiamin thlarau lam thil tih nâna “remchânnate lei zêl” chu a harsa hle thei ang. (Ephesi 5:15, 16) Thlêmtu chuan i rawngbâwlna bânsan tûrin a duh che tih hre reng ang che. Mahse, kan chênna hun ngaihtuahin tûn hi chak loh hun emaw, hmanhmawhna rilru hloh hun emaw a ni lo! (Luka 21:34-36) Engtin nge thlêmna chu i dovin, ngaihven renga i awm theih ang? Min ṭanpui thei thil palite i lo ngaihtuah ang u.
“Ṭawngṭai Rawh”
9 Ṭawngṭaiin Jehova rinchhan rawh. Gethsemane huana Isua tih dân kha ngaihtuah chhuak leh teh. Thlaphâng êm êma a awm lai khân eng nge a tih? Jehova ṭanpuina a dîl a, a ṭawngṭai nasat avângin “a thlan chu thi far lian tak angin leiah a far” hial a ni. (Luka 22:44) Han ngaihtuah teh. Isua chuan Setana chu a hre chiang êm êm a. Pathian chhiahhlawhte man tuma a thlêm dân zawng zawng chu vân aṭangin a lo hmu vek bawk a. Mahse, Isua chuan Thlêmtuin amah thlêm nâna a hman apiang chu awlsam têa hneh thei tûrah a inngai lo. Chutianga Pathian Fapa ṭha famkim tân pawha Pathian ṭanpuina leh chakna dîla ṭawngṭai a ngaih chuan, keini tân phei chuan a va ngai nasa lehzual dâwn êm!—1 Petera 2:21.
10 Isua chuan, a zirtîrte “ṭawngṭai” tûra a fuih hnuah: “Thlarau zawngin a peih a, tisa erawh chu a chak lo a ni,” a tih zawm bawk tih hre reng la. (Matthaia 26:41) Isua’n tu tisa nge a sawi? Ama tisa chu a ni lo ngei mai; a tisa ṭha famkimah chuan chak lohna rêng a awm loh avângin. (1 Petera 2:22) Mahse, a zirtîrte chu amah ang an ni ve lo. Ṭhat famkim lohna an rochun leh sual tih duhna rilru an neih avângin, thlêmna do tûrin ṭanpuina an mamawh zual a ni. (Rom 7:21-24) Chuvângin anni—leh an hnua Kristian dik zawng zawngte—chu thlêmna do tûra ṭanpuina dîl tûrin a fuih a. (Matthaia 6:13) Jehova chuan chutiang ṭawngṭaina chu a chhâng a ni. (Sâm 65:2) Engtin nge a chhân? A lo berah kawng chi hnihin a chhâng a ni.
11 A hmasa berin, Pathian chuan thlêmnate hre thei tûrin min ṭanpui a. Setana thlêmnate chu kawng thim taka thang kam thluah ang a ni a. I hmuh loh vaih chuan, i âwk mai dâwn a ni. Jehova chuan Bible leh Bible ṭanchhan thu leh hla chhuahte hmangin, Setana thangte chu a phawrh chhuak a, chutiang chuan thlêmnaa tlu lût lo tûrin min ṭanpui a ni. Tûn thlengin, thu leh hla chhuah leh inkhâwmpui thusawite chuan thil hlauhawm tak tak mihring hlauhna te, mipat hmeichhiatna lama nungchang bawlhhlawhna te, hausak âtchilhna te, leh Setana thlêmna dang dangte chu min hrilhnawn mawlh mawlh a ni. (Thufingte 29:25; 1 Korinth 10:8-11; 1 Timothea 6:9, 10) Chutianga Setana ngamthlêmnate min hriattîr avângin Jehova chungah i lâwm hle a ni lâwm ni? (2 Korinth 2:11) Chutiang vaukhânna zawng zawngte chu thlêmna do tûra ṭanpuina i dîlte chhânna a ni.
12 A pahnihnaah chuan, Jehova chuan thlêmna do thei tûra chakna min pein kan ṭawngṭaina a chhâng a ni. A Thu chuan heti hian min hrilh: “Pathian . . . chuan in tuar theih ang chauh lo chu thlêmna in tawh a phal lo vang . . . thlêmna rualin tlân chhuahna kawng a siam nghâl zâwk ang,” tiin. (1 Korinth 10:13) Pathian kan rinchhan zêl phawt chuan, ani chuan thlêmna do tûra thlarau lam chakna tlachham khawpa thlêmna nasa chu kan tawrh a phal dâwn lo a ni. A nih leh engtin nge kan tân “tlân chhuahna kawng a siam” ang? Ani chuan ‘a dîltute chu thlarau thianghlim a pe ṭhîn.’ (Luka 11:13) Chu thlarau chuan thil dik tih kan tumna tichak thei tûr leh thutlûkna fing siam thei tûra min ṭanpui thei Bible thu bulte hre chhuak tûrin min ṭanpui thei a ni. (Johana 14:26; Jakoba 1:5, 6) Sual tih duhna hneh tûra kan mamawh tak miziate nei tûrin min ṭanpui thei bawk a. (Galatia 5:22, 23) Pathian thlarau chuan kan rinpuite pawh “mi thlamuantute” ni tûrin a chêttîr thei bawk. (Kolossa 4:11) Ṭanpui dîla i ṭawngṭaina chu Jehova’n chutiang kawng duhawm taka a chhân che avângin i lâwm hle lâwm ni?
Beisei Sâng Lutuk Suh
13 Ngaihven renga awm tûr chuan, kan beisei sân lutuk loh a ngai a ni. Nuna nêksâwrnate avângin kan za hian chauh châng kan nei ṭheuh va. Mahse, Pathianin he khawvêl hluiah hian harsatna fihlîma nun min tiam lo tih kan hre reng tûr a ni. Bible hun laiah pawh, Pathian chhiahhlawhte chuan harsatna chi hrang hrang, tihduhdahna te, retheihna te, lungngaihna te, leh natna te pawh an tâwk a ni.—Tirhkohte 8:1; 2 Korinth 8:1, 2; 1 Thessalonika 5:14; 1 Timothea 5:23.
14 Tûn laiah pawh, keini pawhin buaina kan tâwk ve a. Tihduhdahna te, sum leh pai lama harsatna te, lungngaihna te, natna te, leh kawng dangahte hrehawm kan tuar mai thei. Chûng zawng zawngte laka Jehova’n mak taka min vênhim vek chuan, chûng chuan Setana tân Jehova sawichhiat chhan tûr a pe dâwn lâwm ni? (Thufingte 27:11) Jehova chuan a chhiahhlawhte chu thlêm leh fiaha an awm a remti a, a châng phei chuan dodâltute kuta an boral hial pawh a remti a ni.—Johana 16:2.
15 A nih chuan, Jehova’n eng thu nge min tiam le? A hmasa lama kan sawi tâk ang khân, amah kan rin pumhlûm phawt chuan thlêmna kan tawh rêng rêngte tuar thei tûrin min ṭanpui dâwn tih min tiam a ni. (Thufingte 3:5, 6) Ani chuan a Thu, a thlarau, leh a inawpna pâwl hmangin thlarau lamah min humhim a, amah nêna kan inlaichînna vênghim tûrin min ṭanpui a ni. Chu inlaichînna a chhiat loh phawt chuan, thi mah ila hnehtu chan kan chang tho a ni. Engmahin—thihna hial pawhin—Pathian chu a chhiahhlawh rinawmte lâwmman a pêkna chu a dâl thei lo. (Hebrai 11:6) Tin, khawvêl thar lo thleng thuai tûrah hian, Jehova chuan amah hmangaihtute tâna malsâwmna ropui tak tak a tiam tawh zawng zawngte chu a hlen chhuak ngei ngei dâwn a ni.—Sâm 145:16.
Thu Buai Hre Reng Rawh
16 A tâwp thlenga chhel tûr chuan, Pathianin suahsualna awm a phal chhan thu buai pawimawh tak kan hre reng tûr a ni. Mahni harsatnate’n min chîm hneh lutuk avânga tlâwm mai kan duh châng chuan, Setana chuan lal chungnung ber ni tûra Jehova dikna neih chu a cho a ni tih kan inhrilhnawn ṭhîn tûr a ni. Bumtu chuan Pathian betute Pathian ngaihsakna leh rinawmna pawh a ringhlel bawk a ni. (Joba 1:8-11; 2:3, 4) Chûng thu buaite leh Jehova’n chinfel a tum dân kawngte chu kan nunna aiin a pawimawh zâwk daih a ni. Engtin nge a pawimawh zâwk?
17 Pathianin harsatna engemaw chen a la awm zêl a phalna chuan mi dangte tân thutak pawmna hun a pe a. Hei hi ngaihtuah teh: Isua chuan nunna kan neih theih nân a tuar a ni. (Johana 3:16) Chu mi avâng chuan kan lâwm hle lâwm ni? Mahse, mi dangte pawhin nunna an neih ve theih nân harsatna engemaw chen tawrh belh hlek chu kan inhuam em? A tâwp thlenga chhel tûr chuan Jehova finna chu kan finna aiin a nasa zâwk fê tih kan pawm tûr a ni. (Isaia 55:9) Ani chuan kan chatuan ṭhatna atân leh thu buai chinfel hlen nâna hun ṭha ber a tihah chuan suahsualna chu a titâwp mai dâwn a. Chûng aia chinfel dân ṭha zâwk eng nge awm thei tehrêng ang? Pathianah chuan fel lohna rêng a awm si lo!—Rom 9:14-24.
“Pathian Hnaih Rawh”
18 Hmanhmawhna rilru vawng reng tûr chuan, Jehova kan hnaih reng a ngai a ni. Setana chuan Jehova nêna kan inlaichînna ṭha tihchhiat tumin theihtâwp a chhuah tih hi theihnghilh ngai suh ang che. Setana chuan tâwpna a lo thleng ngai dâwn lo va, chanchin ṭha hrilh emaw, Bible tehnate mila nun emaw chuan awmzia rêng a nei lo tih min rintîr a tum tlat a ni. Mahse, ani chu “dawthei a ni si, dâwt pa pawh a ni.” (Johana 8:44) Chuvângin, “Diabola dodâl” chu kan tum tlat tûr a ni. Jehova nêna kan inlaichînna chu kan hlut lo ngai tûr a ni lo. Bible chuan hmangaih takin heti hian min fuih a ni: “Pathian hnaih rawh u, tichuan anin a hnaih ang che u,” tiin. (Jakoba 4:7, 8) Engtin nge Jehova chu i hnaih lehzual theih ang?
19 Ṭawngṭaina nêna chhût ngunna neih a pawimawh hle. Nuna nêksâwrna nasa tak i tawh hunah, Jehova hmaah i thinlung zawng zawng leihbaw rawh. I harsatnate i sawi chian zual poh leh i dîlna a chhânna che hmuh a awl lehzual ang. A chhânna che chu i beisei ang chiah a ni reng kher lo thei; mahse, amah chawimawi leh rinawmna vawn reng chu i duhzâwng a nih phawt chuan hlawhtling taka i tuar chhuah theih nân i mamawh ṭanpuina chu a pe ngei ngei ang che. (1 Johana 5:14) I nuna a kaihhruaina i hmuh hian, amah i hnaih zual sawt ang. Bible-a târ lan a mizia leh a kawng chanchinte chhiar leh ngaihtuah ngun pawh a pawimawh hle. Chutianga ngaihtuah ngunna chuan amah hre chiang lehzual tûrin a ṭanpui che a; i thinlung a tiphûr a, amah i hmangaihna a tizual a ni. (Sâm 19:14) Tin, chu hmangaihna chuan eng dang zawng aiin thlêmna do tûr leh ngaihven reng tûrin a ṭanpui ang che.—1 Johana 5:3.
20 Jehova hnaih reng tûr chuan, kan rinpuite kan hnaih reng a pawimawh bawk a. Chu mi chungchâng chu he brochure tâwpna berah hian sawiho a ni ang.
ZIRLAI ZAWHNATE
• A nun tâwp dâwn hnaiha nêksâwrna nasa tak a tawh khân Isua’n eng nge a tih a, a zirtîrte hnênah eng ti tûrin nge a fuih? (Pars. 1-4)
• Engvângin nge Setana’n Jehova betute chu a tum bîk a, eng kawngtein nge min thlêm ṭhin? (Pars. 5-8)
• Thlêmna do tûrin, engvângin nge kan ṭawngṭai reng ang a (Pars. 9-12), kan beisei sân lutuk loh vang a (Pars. 13-15), thu buaite kan hriat reng ang a (Pars. 16-17), “Pathian [kan] hnaih” ang? (Pars. 18-20)
[Phêk 25-naa bâwm]
Lunghnualna Thlentu Thil Ṭhenkhatte
Hrisêlna/tarna. Natna benvawn emaw, tar avânga duh tâwka thil kan tih theih loh emaw chuan, Pathian rawngbâwlnaa kan thawh tam theih loh avângin kan lunghnual thei.—Hebrai 6:10.
Beidawnna. Theih patâwpa Pathian Thu kan hrilhnain rah a chhuah loh hian kan lunghnual thei.—Thufingte 13:12.
Tlâktlai lova inhriatna. Kum rei tak chhûng râwng taka cheibâwlna tawrh avângin, miin tuma hmangaih tlâk loh, Jehova pawhin a hmangaih theih loh niin a inhre thei.—1 Johana 3:19, 20.
Rilru natna. Mi tuemaw chu a rinpuiin a rilru a tihnat hle chuan, ani chuan a lungngaih êm avângin Kristian inkhâwmnaahte leh thlawhhma rawngbâwlnaahte tel a duh loh phah thei.—Luka 17:1.
Tihduhdahna. I rinna ṭâwmpui lotu mi dangte chuan an dodâlin, an tiduhdahin, an nuihzat mai thei che.—2 Timothea 3:12; 2 Petera 3:3, 4.
[Phêk 26-naa milem]
Isua chuan thlêmna do tûra ṭanpuina dîla “ṭawngṭai,” tûrin min fuih