Isua Krista Chu Tihhlum A Ni

ISUA chuan kum thum leh a chanve chhûng thu hrilh nân leh zirtîr nâna hun a hman hnuah, leia a nun chu a tâwp hnai tawh tih a hria a. Juda sakhaw hruaitute chuan amah phiara tihhlum an tum a; mahse, zâwlnei a nih ringtu mipui zînga buaina a chhuah an hlau si. Chutih lai chuan, Setana chuan Isua tirhkoh 12-te zînga pakhat—Juda Iskariota—chu Isua phatsan tûrin a hmin a. Sakhaw hruaitute chuan Juda hnênah chuan Isua a phatsan manah dâr tangka 30 an pe a ni.

Isua chuan leia a zân hnuhnûng ber hman tûrah a tirhkohte chu Kalhlên Kût a hmanpui a. Juda a chhuahtîr hnuah chuan, hun serh thar, Lalpa Zanriah chu a hmêlhriattîr a ni. Ani chuan chhang a la a, a ṭawngṭai zawh chuan a la awm tirhkoh 11-te hnênah chuan a sem a. “Hei hi ka taksa, in aia pêk tûra chu a ni; mi hriat reng nân hei hi ti ṭhîn rawh u,” a ti a. Uain no atân pawh chutiang tho chuan a ti a ni: “He no hi ka thisena thuthlung thar chu a ni,” tiin.—Luka 22:19, 20.

Isua chuan chu mi zân chuan a tirhkohte hnênah sawi tûr tam tak a nei a. Mahni hmasialna tel lo hmangaihna an inlantîr tawn tûr a ni tih thupêk thar chu a pe a ni: “In inhmangaih chuan mi zawng zawngin ka zirtîrte in ni tih chu miah chuan an hria ang,” tiin. (Johana 13:34, 35) Thil lo thleng tûr lungchhiatthlâk takte avânga lungngai leh manganga awm lo tûrin a tirhkohte chu a fuih hlawm a. Tin, an tân pawh tih tak zetin a ṭawngṭai bawk. Pathian fakna hlate an sakho hnuah chuan Getsemani huan lam panin an chhuak ta a ni.

Getsemani huanah chuan Isua chu ṭhingṭhiin, tih tak zetin Pathian hnênah a ṭawngṭai a. A hnu rei lo têah chuan, hriamhrei keng sipaite, puithiamte, leh mi dangte chu amah man tûrin an lo thleng ta. Juda chuan Isua chu tu ber nge a nih an hriat theih nân a va fâwp a. Sipaite’n Isua an man chuan, tirhkohte chu an tlânchhe ta hlawm a ni.

Judate rorêlna ina a din lai chuan, Isua chuan Pathian Fapa a nih thu a sawi a. Rorêltute chuan chu chu Pathian sawichhiatna niin an hria a, thi tlâkah an ruat a ni. Tichuan, Isua chu Rom Ram Awptu Pontia Pilata hnênah an hruai a. Pilata chuan Isua’n thil sual engmah a ti lo tih hre mah se, amah tihhluma ngêntu mipuite kutah chuan a hlân ta a ni.

Isua chu Golgotha hmuna hruai a ni a, chutah chuan Rom sipaite chuan banah an khêng bet a. Mak tak maiin chhûn pachan laiin khua a lo thim ta. Chu mi ni chawhnu lamah chuan Isua chu a thi a, lîr nasa takin a lo nghîng a ni. A ruang chu lung ker kuak thlânah chuan zalh a ni a. A tûkah chuan puithiamte chuan thlân kawngkaa lung chu chhinchhiahin, an vên ṭhattîr a ni. Isua chu, chu mi thlâna awm reng tûr chu a ni em? Ni lo ve. Thil mak tih tawhte azawnga la mak ber tûr chu a lo thleng dâwn a ni.

—Matthaia bung 26 leh 27; Marka bung 14 leh 15; Luka bung 22 leh 23; Johana bung 12 aṭanga 19 a ṭanchhan.