Engtin Nge Inkhâwmna Atâna Kan Inpuahchah Ṭhat Ber Theih Ang?

Jehova Thuhretute zînga tuemaw nên Bible in zir a nih chuan, in zir tûrte chu i lo en lâwk ngei a rinawm a. Kohhran inkhâwmnaa i tel hmain, i hlâwkpui tak zet theih nân chutiang bawka lo inpuahchah lâwk chu a ṭha hle a ni. Hun duan ṭha tak kan neih hian, chu chuan rah ṭha tak a chhuah ṭhîn.

Zir hun tûr leh a zirna hmun tûr ruatin. Eng hunah nge i rilru i pêk ṭhat ber theih? Hna thawh ṭan hma zîng kârah nge ni a, naupangte mut hnu zan lamah zâwk? Rei tak chhûng i zir thei lo a nih pawhin, i zir theih chen tûr chu ruat la, chu chu engmah tihbuaitîr suh ang che. Hmun reh lai thlang la, mi tibuai thei tûr radio te, TV te, leh cell phone te chu off vek ang che. Zirna i ṭan hmaa ṭawngṭaina chuan Pathian Thu ngun taka i ngaihtuah theih nâna chhûn lama i rilru hahnate engto lo tûrin a ṭanpui ang che.—Philippi 4:6, 7.

A thu pawimawh laite rîn a, chhânna pe tûra inpuahchahin. A hmasain, a thu tlângpui chu hriat thiam tum la. Chutah, thuziak thupui chu ngaihtuahin, a thupuitê tinte leh a thupui inkûngkaih dân chu ngaihtuah leh la, thu pawimawh zualte târ langtu milemte leh ennawnna zawhnate chu bih chiang ang che. Tichuan, paragraph tinte chu chhiarin, zawhna chhut chhuahte chhânna tûr chu zawng ang che. Bible châng târ lante chu keuvin, chhiar vek la, chûng Bible chângte’n kan thu zir lai a thlâwp dân chu ngaihtuah bawk rawh. (Tirhkohte 17:11) A chhânna i hriat hnu chuan, chhânna i pêk dâwn huna hriat chhuahtîr tûr che thu malte emaw, ṭawngkauchhehte emaw ṭhenkhat chu i rîn emaw, i chhinchhiah emaw tûr a ni. Chutah, inkhâwmnaa chhân i duh chuan bân pharin, mahni irâwm chhuaka chhânna tawi fel tak chu pe ang che.

Chawlhkâr tin inkhâwmnaa kan sawiho ṭhin thu chi hrang hrangte ngun taka endik zêlna hmangin, i Bible hriatna ‘ro bâwmah’ chuan hriat thiamna thar i thun belh zêl dâwn a ni.—Matthaia 13:51, 52.

• Inkhâwm atâna inpuahchah nân eng ang hun duan nge i insiam theih?

• Engtin nge inkhâwmnaa chhâng thei tura i inpuahchah theih?