Mal Châng leh Hlauh Châng I Nei Em?

Milema mipa naupang hi han en teh. Mal hmêl leh hlauh hmêl a pu a ni lâwm ni? Chutiang chuan i awm ve tawh ngai em?— Tupawhin chutianga awm châng chu an nei a ni. Bible chuan mal châng leh hlauh châng nei Jehova ṭhiante chungchâng a sawi a. An zînga pakhat chu Elija a ni. A chanchin i lo zir ang u.

Elija chu Isua pian hma, hmân lai Israel ramah a awm a. Israel lal Ahaba chu Pathian dik, Jehova betu a ni lo. Ahaba leh a nupui, Jezebeli chu pathian dik lo Baala betu an ni. Chuvângin, Israel rama mi a tam zâwkte chuan Baala an be ṭan ta a. Lalnu Jezebeli chu a nunrâwng hle a, Elija pawh tiamin Jehova betu zawng zawng chu thah fai vek a duh tlat mai! Elija’n eng nge a tih i hria em?—

Elija chu a tlân chhe tlat mai le! Thlalêr hmun hla takah tlân chiain, pûkah a biru a. Chu chu engvânga ti nge a nih i rin?— A hlauh vâng a ni. Mahse, Elija tân hlauh a ngai lo. Engvâng nge? Jehova’n a ṭanpui thei tih a hriat avângin. Jehova chuan tûn hmain Elija hnênah a thiltihtheihna a lo hmuh tawh a. Ṭum khat chu, Jehova chuan vân ata mei rawn tîrin Elija ṭawngṭaina chu a chhâng a ni. Chuvângin, tûn ṭumah pawh Jehova chuan a ṭanpui thei tih a chiang hle!

Pûk chhûnga a awm laiin, Jehova chuan: ‘Hetah hian eng nge i tih?’ tiin a zâwt a. Elija chuan: ‘Nangmah betu awmchhun ka ni ta. Ka mal hle a, min thah ka hlau a ni,’ tiin a chhâng a. Elija chuan Jehova betu dangte chu thah vek an ni tawh niin a ngai a. Mahse, Jehova chuan Elija hnênah: ‘Ni lo, chu chu a dik lo. Keimah min betu mi 7,000 dang an la awm a. Huai takin awm rawh. I tân thawh tûr tam tak ka la nei a nia!’ tiin a hrilh a ni. Chu thu chuan Elija a tihlâwm i ring em?—

Elija chunga thilthleng aṭangin eng nge i zir theih?— Eng lai mahin mal tak leh hlau taka i awm a ngai lo rêng rêng. Jehova leh nangmah hmangaihtu ṭhiante i nei a. Chu bâkah, Jehova chuan thiltihtheihna a ngah hle a, engtik lai pawhin a ṭanpui zêl ang che! I mal tak tak ngai lo tih hriat chu i lâwm em?—