Josia Chuan Ṭhian Ṭha A Nei

Thil dik leh ṭha tih chu a harsa i ti em?— Mi a tam zâwk chuan harsa an ti a ni. Bible chuan mipa naupang, Josia tân a harsa zual bîk tih min hrilh a. Mahse ṭanpuitu ṭhian ṭha a nei a ni. Josia leh a ṭhiante chanchin chu i lo zir belh ang u.

Josia pa chu Juda lal Amona a ni a. Ani chu mi sual tak leh milem betu a ni. Josia chu a pa a thih chuan Juda lal a lo ni ta a. Mahse, chutih lai chuan kum riat mi lek zu nia! Ani chu a pa ang bawka a sual i ring em?— A sual ve miah lo!

Naupang tê a la nih lai aṭangin Josia chuan Jehova thu âwih chu a duh a. Chuvângin, Pathian Jehova hmangaihtute chauh ṭhianah a siam a. Anni chuan Josia chu thil ṭha ti tûrin an ṭanpui a ni. Josia ṭhiante zînga ṭhenkhat chu tute nge?

A ṭhiante zînga pakhat chu Zephania a ni. Zephania chu zâwlnei a ni a, Judate’n milem an biak chuan an chungah thil ṭha lo a thleng ang tia vaukhântu a ni. Josia chuan Zephania thusawi chu a ngaithla a, milem be lovin, Pathian Jehova chauh a bia a ni.

Josia ṭhian dang pakhat chu Jeremia a ni. An kum a inrualin, an awmna pawh a inhlat vak lo va. An inṭhian ṭhat êm avângin Jeremia chuan Josia a thih chuan a ngaihzia hlaah a phuah hial a. Jeremia leh Josia chu thil dik leh ṭha ti tûr leh Jehova thu zâwm tûrin an inṭanpui tawn ṭhîn a ni.

Josia entawn tûr siam aṭangin eng nge i zir theih?— Josia chuan a naupan lai aṭangin thil dik leh ṭha tih chu a duh a. Jehova hmangaihtute chu ṭhianah a siam tûr a ni tih a hria a ni. Jehova hmangaihtu leh thil dik leh ṭha ti tûra ṭanpui theitu tûrte chauh chu ṭhianah siam ṭhîn ang che!