Timothea Chuan Mite Ṭanpui A Duh

Tlangvâl Timothea chu mite ṭanpui nuam ti tak a ni a. Mi dangte ṭanpui tûrin hmun tam takah a zin a ni. Chuvâng chuan, nun hlimawm leh phûrawm tak a nei a. Chu mi chungchâng chu hriat i duh em?—

Timothea chu Lustra khuaa seilian a ni a. Naupangtê a nih lai aṭangin, a pi Loisii leh a nu Euniki chuan Jehova chanchin an zirtîr ṭan a. A lo puitlin chuan Jehova chanchin zir tûra mi dangte ṭanpui chu a duh a ni.

Timothea chu a tlangvâl tirhin Paula chuan hmun danga thu hril tûra a zinnaah a sâwm a. Timothea chuan phûr takin: ‘Aw le!’ a ti nghâl a. Kal chhuak a, mi dangte ṭanpui chu a inpeih a ni.

Timothea chu Paula rualin Makedonia ram, Thessalonika khuaah chuan a zin a. Chuta kal tûr chuan, rei tak kêa an kal hnua lawnga an chuan a ngai a ni. A tâwpa an va thlen chuan, mi tam takte chu Jehova chanchin zir tûrin an ṭanpui a. Mahse, mi ṭhenkhat chu an thinur a, tihnat an lo tum a. Chuvângin, Paula leh Timothea tân chu mi hmun kalsana hmun danga thu hrilh a lo ngai ta a ni.

Thla engemaw zât a ral hnuah, Paula chuan Timothea chu Thessalonika khuaa kîr leh a, unaute dinhmun enfiah tûrin a hrilh a. Chu khawpui hlauhawm taka kîr leh tûr chuan huaisen a ngai ngawt ang le! Mahse, Timothea chu chuta awm unaute a ngaihtuah avângin a kal a. Thessalonika khuaa unaute an ṭhat thu chanchin lâwmawm tak kengin Paula hnênah chuan a lo kîr leh a ni.

Timothea chuan Paula kiangah kum tam tak chhûng rawng a bâwl a. Ṭum khat chu Paula chuan Timothea chu kohhrante ṭanpui tûra a tirh chhuah theih mi ṭha ber a ni tih a ziak a ni. Ani chuan Jehova leh mi dangte a hmangaih hle si a.

Mite i hmangaihin, Jehova chanchin zir tûra anni ṭanpui chu i duh em?— I duh chuan, Timothea ang bawkin, nun hlimawm leh phûrawm tak i nei thei tihna a nih chu!