ṬHEN 2

Rinawm Tawn Rawh U

“Pathianin a zawm tawh chu mihringin ṭhen suh se.”—Marka 10:9

Jehova chuan ‘khawngaihna ngaina’ tûrin min phût a. (Mika 6:8) Bible chuan he khawngaihna hi mi pahnih nghet taka zawmtu hmangaihna aṭanga lo awm a ni tih min zirtîr a ni. Hetiang khawngaihna tel lo hian nupa inkârah rinawmna a awm theih loh avângin, hei hi thil pawimawh tak a ni a. Tin, hmangaihna pârvul tûr chuan chutiang rinawmna neih chu a pawimawh hle.

Tûn laiah, nupa inkâra rinawmna chuan beih a tâwk mêk a. In inneihna vênghim tûrin, thil pahnih tih i tum tlat tûr a ni.

1 IN INNEIHNA CHU DAH PAWIMAWH BER RAWH

BIBLE SAWI DAN CHUAN: “Mi fing lote anga awm lovin mi fingte anga awm zâwkin.” (Ephesi 5:15, 16) In inneihna chu thil pawimawh berte zînga mi anga thlîr chu a finthlâk a. Chu chuan dah pawimawh ber a phu a ni.

Jehova chuan i kawppui ngaihsak a, amah nêna “nun nuam” tak hmang dûn tûrin a duh che a. (Thuhriltu 9:9) I kawppui i ngaihthah ngai tûr a ni lo va, intihhlim tawn dân kawng in dap reng tûr a ni zâwk tih chiang takin a sawi a ni. (1 Korinth 10:24) I kawppui chu i mamawhzia leh ngaihsânzia hriattîr reng rawh.

Pasal chuan a nupui hnênah thingpui a pe; ina a hawn chuan pasalin a nupui ei rawngbâwlin a rawn hmu

I TIH THEIH CHU:

Hun hmang dûn fo ula, i kawppui chu ngaihsakna pumhlûm pe ang che
I ngaihtuahna chu “ka” tih aiah “kan” tihzâwngin thlâk ang che

Nupa tuak khat chuan picnic kalin hun an hmang dûn

2 I THINLUNG VENG ṬHA RAWH

BIBLE SAWI DAN CHUAN: “Tupawh ngaih châka hmeichhe melh apiang chu, a thinlungah a uirê tawh reng a ni.” (Matthaia 5:28) Mi tuemawin nungchang bawlhhlawhna a ngaihtuah reng chuan, a kawppui chungah a rinawm lo a tih theih a ni.

Jehova chuan ‘i thinlung i vên ṭhat’ a ngai tih a sawi a. (Thufingte 4:23; Jeremia 17:9) Chu mi atân i mit i vên ṭhat a ngai a ni. (Matthaia 5:29, 30) Ngaih châkna nêna nula melh lo tûra a mit atâna thuthlung siamtu, hmân lai mi Joba hi entawn ang che. (Joba 31:1) Saruak lem leh thuziakte en miah loh chu tum tlat rawh. Tin, i kawppui ni lo mi dang tumah ngaihzâwn loh chu tum tlat bawk ang che.

Pasal chuan a hnathawhna dawhkânah a nupui nêna an thlalâk a târ

I TIH THEIH CHU:

I kawppui tân i inpe pumhlûm tih mi dangte hmuh theihin târ lang rawh
I kawppui rilru veizâwng chu ngaihtuahin, a awm tinuam lo thei inlaichînna engpawh chu titâwp nghâl ang che