Jehova Duh Zâwng Ti Tûra Kan Inrêlbâwl Dân

KHAWVEL pumah hian sakhaw lam, politics lam, sumdâwnna lam, leh mipui vântlâng thil lama inzawm khâwmna pâwl tam tak a awm a; chûng chuan kalphung te, thlîr dân te, leh thiltum hrang hrangte an nei a ni. Mahse, chûng pâwlte laka danglam bîk tak pâwl pakhat a awm a. Chu chu Jehova Thuhretute an ni tih Pathian Thu chuan chiang takin a târ lang a ni.

² Jehova inawpna pâwla i tel chu a lâwmawm hle. Pathian duh zâwngte i hriat chian hnuah, tûnah hian i ti mêk a ni. (Sâm 143:10; Rom 12:2) Hmangaihna nei khawvêl puma unaute rualin rawng i bâwl a ni. (2 Kor. 6:4; 1 Pet. 2:17; 5:9) Chu chuan Pathian Thu-in min tiam angin, malsâwmna leh hlimna nasa tak a neihtîr che a. (Thuf. 10:22; Mk. 10:30) Tûna Pathian duh zâwng rinawm taka tiin, chatuan daih hma lam hun ropui tak atân hian i inbuatsaih a ni.—1 Tim. 6:18, 19; 1 Joh. 2:17.

³ Min Siamtu Ropui chuan a kaihhruaina anga kal khawvêl pum huap inawpna pâwl danglam bîk tak a nei a. A awmzia chu engkim chunga Lû ber, Pathian Jehova rorêlna hnuaiah a awm tihna a ni a, amah chu kan ring pumhlûm a ni. Ani chu kan chunga Rorêltu, Dân min Petu, leh kan Lal a ni. (Is. 33:22) Fel taka remruattu Pathian a nih avângin, a thiltum tihhlawhtlinna kawnga ‘amah thawhpui’ tûrin ruahmanna min siamsak a ni.—2 Kor. 6:1, 2.

⁴ Khawvêl tâwp a hnaih tawlh tawlh rual hian, Lal atâna a ruat, Isua Krista kaihhruaina hnuaiah hma lam kan pan zêl a. (Is. 55:4; Thup. 6:2; 11:15) A hnungzuitute chuan leia a rawngbâwl aia ropui zâwk an thawk ang tih sawi lâwktu chu, tu dang ni lovin, amah Isua ngei hi a ni. (Joh. 14:12) A sawi ang ngeiin, Isua hnungzuitute chuan thu hrilhna hun rei zâwk an neih a, thu hriltu an tam zâwk dâwn avângin, thu hrilhna bial zau tak an fang chhuak ang a. Lalram chanchin ṭha chu kawlkil thlengin an puang chhuak bawk ang.—Mt. 24:14; 28:19, 20; Tirh. 1:8.

⁵ Hei hi a thleng famkim tawh a. Mahse, Isua’n chiang taka a lo sawi tawh angin, chanchin ṭha puan chhuahna chu Jehova hun ruatah a tâwp ang. Pathian hrilh lâwkna Thu zawng zawng chuan Jehova ni ropui leh hlauhawm tak chu a hnai tawh tih a târ lang a ni.—Joel. 2:31; Zep. 1:14-18; 2:2, 3; 1 Pet. 4:7.

⁶ He hun hnuhnûnga Jehova duh zâwng kan hriat avângin, a thil phûtte tihna kawnga ṭan kan lâk lehzual a ngai a ni. Chutianga ti tûr chuan, Pathian inawpna pâwl hnathawh dân kan hriat chian a, kan thlâwp tlat a ngai a. Inawpna pâwl hnathawh dân chu Bible thu bulahte a innghat a, chutah chuan Pathian Thu-a dân te, thupêk te, kaihhruainate, leh zirtîrnate a tel a ni.—Sâm 19:7-9.

⁷ Jehova mite’n chutiang Bible ṭanchhan kaihhruainate an zawm avângin, inrem tak leh lungrual taka chênghovin, hna an thawkho a ni. (Sâm 133:1; Is. 60:17; Rom 14:19) Hmun tina kan unaute inzawmna chu engin nge tinghet? Hmangaihnain a ni. Hmangaihnain kan inthuam a, chu chuan min chêttîr bawk. (Joh. 13:34, 35; Kol. 3:14) Chu Pathian duh zâwng kawng chu zawhin, Jehova inawpna pâwl vân lam pêng nên pheikhai rual takin kan kal a ni.

JEHOVA INAWPNA PAWL VAN LAM PENG

⁸ Zâwlnei Isaia te, Ezekiela te, leh Daniela te chuan Jehova inawpna pâwl vân lam pêng chu inlârnaah an hmu a. (Is., bung 6; Ezek., bung 1; Dan. 7:9, 10) Chutiang bawkin, tirhkoh Johana pawhin chu vân lam pêng inruahman dân chu inlârnaah a hmu a, Thu Puan bu-ah a ziak a ni. Ani chuan Jehova chu a lalṭhutthlêng ropui taka ṭhua, vântirhkohte’n: “Lalpa Pathian, Engkimtitheia, awm tawha leh awm mêka leh lo la awm tûra chu, a thianghlim e, a thianghlim e, a thianghlim e,” tia puang chhuakin a hmu a. (Thup. 4:8) Tin, ‘lalṭhutphah leh thil nung palite laia Berâm No,’ Isua Krista ding chu a hmu bawk a ni.—Thup. 5:6, 13, 14; Joh. 1:29.

⁹ He inlârnaa Jehova lalthutthlênga a thutna chuan, ani chu inawpna pawla Hotu ber a nihzia a târ lang a. Amah leh a dinhmun chungnunzia chungchângah 1 Chronicles 29:11, 12 chuan: “Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; lei leh vâna awm zawng zawng hi i ta a ni si a; aw LALPA, ram chu i ta a ni a, mi zawng zawnga chungnung ber i ni. Hausakna leh chawimawina te hi i hnêna mi a ni a, engkim chungah thu i nei a; tin, thiltihtheihna i kutah a awm a; i kutah hian mi zawng zawng tihropuina leh chakna pêk theihna a awm,” tiin a sawi a ni.

¹⁰ Jehova hnathawhpui a nih angin, Isua Krista chuan vânah dinhmun sâng tak a chelh a, thuneihna tam tak pêk a ni. Pathian chuan “thil engkim a ke hnuaiah a dah a, amah chu engkim zawng zawng chungah lû atân kohhranho hnênah chuan a pe” a ni. (Eph. 1:22) Tirhkoh Paula chuan Isua chungchângah: “Isua hmingin mi tin—vâna mite, leia mite, lei hnuaia mite nên—an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a,” tiin a sawi. (Phil. 2:9-11) Chuvângin, Isua Krista kaihhruaina fel chu kan ring pumhlûm thei a ni.

¹¹ Zâwlnei Daniela chuan inlârnaah Hmâkhawsânga chu vân lalṭhutthlênga ṭhu a, vântirhkoh “a sânga sângin rawng an bâwlsak a, a hmâah chuan sîng hmun sîng an ding” chu a hmu a. (Dan. 7:10) Bible chuan chûng vântirhkoh rualte chu “rawngbâwlna thlaraute, chhandamna rochungtu tûrte tân rawngbâwl tûra tirh chhuah” an nih thu a sawi. (Heb. 1:14) Hêng thlarau thil siam zawng zawngte hi ‘lalṭhutphahte, rorêlnate, lalnate, thuneihnaahte’ chuan an inzawmkhâwm vek a ni.—Kol. 1:16.

¹² Jehova inawpna pâwl vân lam pêng hmêlhmangte ngun taka kan han chhût hian, Isaia’n inlârnaa ‘Lalpa chu lalṭhutphah sâng taka a ṭhu a, a kianga serafte an ding’ a hmuh laia a awm dân chu kan hre thiam thei a ni. Isaia chuan heti hian a sawi: “Hmui bawlhhlawh pu mi ka nih a, hmui bawlhhlawh pu mite zînga awm ka nih avângin ka chung a va pik êm! ka boral ta a nih hi; ka mitin Lal, sipaihote LALPA chu a hmu ta si a,” tiin. Jehova inawpna pâwl zauzia a han hriat chian chuan Isaia chuan mak a tiin, tlâwm a inti hliah hliah mai a. Chu a thiltawn chuan a rilru a khawih êm avângin, Jehova rorêlna chungchâng puang chhuak tûra sâwmna tihchhuah a nih pawh khân, “Kei heta hi ka awm, mi tîr ta che,” tiin a chhâng hial a ni.—Is. 6:1-5, 8, 9.

¹³ Jehova inawpna pâwl hriat chianna leh ngaihhlutna chuan A mite chu chutiang bawka chhâng lêt tûr chuan a chêttîr a. He inawpna pâwl hian hma lam a pan zêl ruala pheikhai rual taka pên ve zêl chu kan tum tlat a. Tûn laia Jehova inawpna pâwl kan rin nghehzia lantîr chu kan tum tlat a ni.

JEHOVA INAWPNA PAWL CHUAN HMA LAM A PAN ZEL

¹⁴ Ezekiela hrilh lâwkna bung khatnaah chuan Jehova chu vân tawlailîr hrawl tak khalh anga sawi a ni. He tawlailîr ropui tak hian Jehova inawpna pâwl hmuh theih loh pêng chu a entîr a. Ani chuan chu tawlailîr chu ngilnei taka kaihruaiin leh a thiltum nêna inmila hmangin a khalh kan ti thei a ni.—Sâm 103:20.

¹⁵ He tawlailîr kête hian an chhungah ke dang an nei leh ṭheuhva—an len zâwng chu a inang a, a ke pakhat kawkalh chiahin a invuah a ni. Chuvâng chuan a kête chu “khawi lam hawi pawhin an che sawn” thei a ni. (Ezek. 1:17) A kête chuan a kalna kawng a thlâk zung zung thei a. Mahse, thunun loh leh finna nei kaihruaitu awm lova kal mai erawh a ni lo. Jehova chuan a inawpna pâwl chu a duh ang angin a kaltîr mai mai lo. Ezekiela 1:20 chuan: “Thlarau duhna lam lamah an kal,” tiin a sawi a ni. Chuvângin, a thlarau duhna hmun apianga a inawpna pâwl kaltîrtu chu Jehova a ni. Zawhna kan inzawh ngei tûr chu, ‘Chumi rual chuan kê ka pên em?’ tih hi a ni.

¹⁶ Jehova inawpna pâwl ruala ke pênnaah chuan inkhâwmna leh rawngbâwlnaa tel mai a tâwk lo. A bul berah chuan, hmasâwnna leh thlarau lama ṭhan chhohna kawnga pheikhai ruala ke pên hi a ni. ‘Thil pawimawh zâwkte fiahin’ leh thlarau lam châwmna thar ber berte chu kan ei tûr a ni. (Phil. 1:10, 11, NW; 4:8, 9; Joh. 17:3) Inawpna pâwl a awm rêng rêngin ruahmanna ṭha leh thawhhona ṭha a awm ṭhîn tih kan hre reng tûr a ni bawk. Chuvângin, Jehova’n a hna hlen chhuah nâna thlarau lam leh tisa lama thil hlu tak min pêkte hi a ṭangkai thei ang bera hman a pawimawhzia kan hriat a ngai a. Jehova vân lam tawlailîr ruala kê kan pên hian kan thu hrilh nêna inmilin kan nung ṭhîn a ni.

¹⁷ Jehova inawpna pâwl ṭanpuinain, Pathian duh zâwng tihna kawngah hma lam kan pan zêl a. He vân lam tawlailîr Khalhtu hi Jehova a ni tih hre reng ang che. Chuvângin, a vân lam tawlailîr ruala kê kan pênna chuan Jehova kan zahzia leh kan Lungpuia kan rinzia a târ lang a ni. (Sâm 18:31) Bible chuan: “LALPA chuan a mite hnênah chakna a pe ang a, LALPA chuan a mite chu thlamuannain mal a sâwm ang.” tiin min tiam a. (Sâm 29:11) Tûn laia Jehova inawpna pâwl zînga telin, fel taka inrêlbâwl a mite hnêna a pêk chakna leh remna chu kan chên a ni. Ni e, tûn aṭanga chatuan thlenga Jehova duh zâwng kan tih zêl chuan, a malsâwmna nasa tak chu kan dawng zawm zêl ang.