Pathian Biakna Hmunte Atâna Ruahmannate

JEHOVA betu dikte chuan kaihhruaina dawng tûr leh intichak tawn tûrin inkhâwm ṭhîn tûra thupêk an dawng a. (Heb. 10:23-25) Pathian mi thlan, Israel mite tâna Pathian biakna hmun hmasa ber chu “inbiakna puan in biak buk” a ni. (Ex. 39:32, 40) A hnuah, Davida fapa Solomona chuan Pathian ropuina tûrin in, a nih loh leh biak in a sa a. (1 Lal. 9:3) B.C.E. 607-a chu biak in tihchhiat a nih hnuah Judate chuan Pathian be tûrin inkhâwmna in tia an kohvah chuan inhmuhkhâwm zai an rêl a. A hnuah, biak in chu sak ṭhat a ni a, biakna dik hmunpui a lo ni leh ta a ni. Isua chuan inkhâwmna inah leh biak inah a zirtîr a. (Lk. 4:16; Joh. 18:20) Tlâng chungah pawh inkhâwmna a neihpui bawk a ni.—Mt. 5:1–7:29.

² Isua thih hnuah, Kristiante chu Pathian Lehkha Thu zirtîr tûr leh an Kristian unaute nêna inkâwmho tûrin vântlâng hmunah leh mi mal inahte an kalkhâwm ṭhîn a. (Tirh. 19:8, 9; Rom 16:3, 5; Kol. 4:15; Phil. 2) Tiduhdahtute’n an hriat loh nân, Kristian hmasate tân hmun fianrialah inhmuhkhâwm a ngaih châng a awm bawk. Hmân laia Pathian chhiahhlawh rinawmte chuan ‘LALPA zirtîra awm’ tûrin Pathian biakna hmuna kalkhâwm châkna an nei a ni.—Is. 54:13.

³ Tûnlaiah pawh vântlâng hmun leh mi mal inte chu Kristian inkhâwm nâna hman a la ni reng a. Mi mal inahte chuan thu hrila chhuah hmain inhmuhkhâwmna neih a ni ṭhîn a. Chutiang atâna an in hmantîrtute chuan chanvo hluah an ngai a. Mi tam takte chuan chutiang kawnga an in hmantîrna chu thlarau lamah an hlâwkpui niin an inhria a ni.

KINGDOM HALL

⁴ Jehova Thuhretute inhmuhkhâwmna hmun ber chu Kingdom Hall a ni a. A tlângpuiin, hmun lei a, Kingdom Hall thar sak, a nih loh leh in dingsa chu cheiṭhat a ni ṭhîn. A theih hunah, sênso tihtlêm nân leh kan hmun neihte a ṭangkai thei ang bera hman a nih theih nân, kohhran tam takin Kingdom Hall pakhat an inhman ṭâwm thei a. Hmun ṭhenkhatah chuan, luah hawh pawh a ngai thei. Kingdom Hall tharte leh nasa taka thawmṭhatte tân Pathian hnêna hlanna hun neih chu a inâwm a ni. Amaherawhchu, Kingdom Hall neihsa tlêm azâwnga thawmṭhat mai a nih chuan chutiang hun chu neih a ngai lo.

⁵ Kingdom Hall chu mi dangte hîp nâna ropui lutuka sak tûr a ni lo. A sak dân chu hmun tinah a inang lo thei a; mahse, remchâng taka hman theih a nih chu a pawimawh a ni. (Tirh. 17:24) Tualchhûng dinhmun azirin, Kristian inkhâwmnate neih nâna hmun nuam leh remchâng tak a ni tûr a ni.

⁶ Jehova Thuhretute kohhran zawng zawngte hian an lawina Kingdom Hall hmanna, enkawlna, leh thawmṭhatna atân thawhlâwm an thawh a. Mahse, thawhlâwm khawn a ni lo va, inphûtna lah a awm hek lo. Thawhlâwm bâwm hûn a ni a, inkhâwma telte chuan hall hmanna nêna inkûngkaih sênso phuhrûk nân thawhlâwm an thawh thei a. Inhuam tak leh thinlung tak aṭangin an thawh a ni.—2 Kor. 9:7.

⁷ Kohhrana mi tinte chuan sum leh paia Kingdom Hall ṭanpui leh a tihfaina leh vawn ṭhatna lama tha leh zung hmanga ṭanpui chu chanvo hluah an ngai a. Kohhran upa, a nih loh leh kohhranho rawngbâwltu pakhat chu ruahmanna siam tûra ruat a ni ṭhîn. A tlângpuiin, rawngbâwlna group ang zêla tihfaina neih a ni a, group overseer emaw, amah ṭanpuitu emaw chuan hma a hruai ṭhîn. Kingdom Hall chhûng lam leh pâwn lam chuan Pathian Jehova leh a inawpna pâwl ṭha takin a chawimawi reng tûr a ni.

⁸ Kohhran pakhat aia tamin hall an inhman ṭâwm chuan, chûng kohhrana awm upate chuan Kingdom Hall Operating Committee an din ang a, chu chuan a in leh a vêl ngaihsakna kawngah hma a hruai ang. Kohhran tina upaho chuan unaupa pakhat chu operating committee coordinator atân an thlang ang. Upate kaihhruaina hnuaiah operating committee chuan hall tihfaina chu a endik ang a, ṭha taka enkawl leh tihfaina hmanrua vêl a awm tih an chian ang. Hemi atân, chuta inkhâwm kohhrante inkârah thawhhona ṭha a awm a ngai a ni.

⁹ Kohhran tam takin Kingdom Hall pakhat an inhman ṭâwm chuan, an inkhâwm hun pawh an thlâk kual a ngai thei a. Upate chuan inkhâwm hunte chu mi dangte ngaihtuah chung leh unau inhmangaihna lantîr chungin an rêl tûr a ni. (Phil. 2:2-4; 1 Pet. 3:8) Kohhran pakhat chuan kohhran dangte tân thu tlûkna a siamsak tûr a ni lo. Chu hall hmangtu zînga kohhran pakhat bial kantuin a tlawh hun chuan, kohhran dangte chuan an chawlhkâr chhûng inkhâwm chu a ṭûl angin an siamrem ang.

¹⁰ Kohhran Service Committee phalnain Kingdom Hall chu inneihna leh mitthi vuina atâna hman theih a ni a. Chûng upate chuan thil dîl chu ngun takin an ngaihtuah ang a, branch office kaihhruaina pêk ṭanchhanin thu tlûkna an siam ang.

¹¹ Chûng thilte atâna Kingdom Hall hman phalsakte chu Kristian dikte nungchang mila awm tûra beisei an ni a. Kingdom Hall-ah chuan kohhran duh loh zâwng leh Jehova leh kohhran hming ṭha tichhe thei thil engmah tih phal a ni lo. (Phil. 2:14, 15) Branch office kaihhruaina hnuaiah, Kingdom Ministry School leh Pioneer Service School ang chi thlarau lam thiltihte atân Kingdom Hall chu hman theih a ni bawk.

¹² Kohhrana mite chuan inkhâwmna hmunte chu zah takin an cheibâwl reng tûr a ni a. Silhfên leh incheinate bâkah, kan awm dân pawhin Jehova biakna nêna inkûngkaihin zahawmna a lantîr tûr a ni. (Thur. 5:1; 1 Tim. 2:9, 10) Hemi chungchânga rawtnate zâwmin, kan Kristian inkhâwmte ngaihhlutna kan lantîr a ni.

¹³ Inkhâwm laia engkim fel taka a kal a pawimawh a. Naupangte tân an nu leh pate bula ṭhut a ṭha a ni. Fa la naupang tak nei nu leh pate chu inkhâwm laia fate thunun tûr emaw, an mamawh thil dang buaipui tûr emawa chhuah a ngaih pawha mi dangte an tihbuai tam lohna tûr hmuna ṭhu tûra fuih an ni.

¹⁴ Unaupa tling takte chu Kingdom Hall-a inkhâwmte enkawltu, attendant ni tûra ruat an ni a. Anni chu harhvâng tak, nêlawm tak, leh vengva tak an ni tûr a ni. An mawhphurhnaah chuan mi tharte lo lawm leh lawm nia inhriatna neihtîr te, kal tlaite ṭhutna tûr kawhhmuh te, inkhâwm zât chhinchhiah te, leh hall chhûng lum zâwng leh boruak fîm luhtîrna enkawlte a tel a ni. A ṭûl hunah chuan, attendant-te chuan nu leh pate chu an fate inkhâwm ṭan hma leh bân hnua tlân kual lo tûr leh platform-a infiam lo tûra ṭha taka enkawl tûrin an hrilh ang. Naupang thuâwih lo chu ngaithlatu dangte a tihbuai lutuk loh nâna pâwna chhuahpui tûrin ngilnei leh remhre takin an hrilh mai thei a. Attendant-te hnathawh chuan mi tinte chu inkhâwm nuam tak nei tûrin a ṭanpui a. Hemi atân hian upate leh kohhranho rawngbâwltute ni thei se a duhawm a ni.

KINGDOM HALL SAKNA

¹⁵ Kum zabi khatnaah khân, Kristian ṭhenkhat chu mi dangte aiin an hausa zâwk a, chuvângin tirhkoh Paula chuan an hnênah heti hian a ziak a ni: “Inchawhrual nân, in neih liam chu tûn lai hian an tlâkchham phuhrûkna a lo nih a, an neih liam pawh in tlâkchham phuhrûkna a lo la nih ve thung theihna tûrin ka ti zâwk a ni; chutichuan chawhrualna a lo awm thei ang,” tiin. (2 Kor. 8:14) Tûn laiah pawh hian chutianga “chawhrualna” chu a thleng a. Khawvêl puma kohhran thawhlâwmte chu Kingdom Hall thar sakna leh thawm ṭhatna ṭanpui nâna hman a ni a. Khawvêl puma unaute’n phal taka an ṭanpuina chu inawpna pâwl leh lo ṭangkaipuitu kohhrante chuan an ngaihlu tak zet a ni.

¹⁶ Bial chhûng ruahmanna ṭanchhanin, branch office chuan kohhrante chu an lawina tûr Kingdom Hall a ruatsak a. Branch office pawhin branch huam chhûnga Kingdom Hall thar sak hun leh hmun tûr bâkah, hall awmsa thawm ṭhat hun tûr chungchângah thu tlûkna a siam ṭhîn. Chhiatna a thlen hunah a ṭûl anga Kingdom Hall chhia siam ṭhatna leh a châng chuan unaute in siam ṭhatna pawh a ruahman ṭhîn bawk.

¹⁷ Branch office chuan a hmun neih theih nâna hma la tûr te, Kingdom Hall design tûr te, in sak phalna la tûr te, leh a sakna leh enkawlna thawk tûrtein mahnia inpête chu a huaihawt ṭhîn. Ram tam takah Kingdom Hall mamawhna a nasat avângin, mahnia inpe tam tak kan mamawh a ni. Ṭanpui duhna nei thuchhuahtu tling takte chu dîlna ziak khat a, tualchhûng Kohhran Service Committee hnêna pe tûra fuih an ni. Baptisma la chang lo thuchhuahtute pawhin an Kingdom Hall thawm ṭhatna chu an ṭanpui thei ang.

ASSEMBLY HALL-TE

¹⁸ Kristian hmasate chu tlêm tê têin an inhmukhâwm tlângpui ṭhîn a. Mahse, “mi tam tak” kalkhâwm châng an nei bawk ṭhîn. (Tirh. 11:26) Chutiang bawkin, tûn laia Jehova mite chuan bial leh regional inkhâwmpuite an nei ṭhîn a. Hêng inkhâwmpuite atân hian tualchhûnga hall-te chu hawh a ni fo va; chutiang hawh tûr a awm lo emaw, a ṭha tâwk lo emaw a nih chuan, Pathian biakna tûr hmun, Assembly Hall chu neih a ngai ṭhîn a ni.

¹⁹ A châng chuan in ding sa lei a, chei ṭha a, Assembly Hall atâna hman a ni. A tam zâwkah chuan a hmun lei a, hall thar sak a ni a. Assembly Hall-te chu tualchhûng mamawh dân azirin, a len zâwng a inang lo. A man ngun taka chhût a, sum hman zât tûra thu tlûkna siam hnuah chauh branch office chuan hall chu lei tûr nge, a thar sak tûr tihah thu tlûkna a siam ṭhîn.

²⁰ Branch office chuan hêng Assembly Hall-te enkawl tûr atân unaute chu a ruat ṭhîn a. A hunbi ang zêla tifai tûr te, thla ruka vawi khat tifai tûr te, leh a chhe tûr vên nâna siam ṭhatnate atân chuan ruahmanna siam a ni. He hna thawk tûra inpêk hi unaute tân a ṭangkai hle. Chuvângin, kohhrante chu he ruahmannate hi thinlung taka thlâwp tûra fuih an ni.—Sâm 110:3; Mal. 1:10.

²¹ A châng chuan, Assembly Hall chu theocratic thiltih, Bible School leh bial kantute inkhâwm nântea hman a ni thei bawk. Kingdom Hall ang bawkin, Assembly Hall hi Pathian biakna atâna hlan a ni a. Pathian be tûra Kingdom Hall-a kan kal ang chiahin, Assembly Hall-a kan inkhâwm hunah kan nungchang, thuamhnaw hâk leh inchei dân chu a zahawm tûr a ni.

²² Hêng ni hnuhnûng tâwpna hunah hian mi thar tam takte chu Jehova inawpna pâwlah hmanhmawh takin an rawn lût a. Hei hian Jehova malsâwmna a târ lang. (Is. 60:8, 10, 11, 22) Chuvângin, Pathian biakna hmun nei a, fai leh nuam taka enkawlna ṭanpui chu kan duh a ni. Chutianga thlâwpin, Pathian Jehova nî a hnai tawlh tawlh tih kan hriat avânga infuih tawn nasa lehzual sauh tûra min ṭanpuitu hêng hmunte kan ngaihhlutna chu kan târ lang a ni.