“Pathian Ropuina Tûr Hlîrin Ti Rawh U”

PATHIAN chhiahhlawh inpumpêk tawhte kan nih angin, kan thusawi leh thiltih apiangah Jehova ropuina kan târ lang tûr a ni. Tirhkoh Paula chuan: “In ei pawhin, in in pawhin, in tih apiangah pawh, Pathian ropuina tûr hlîrin ti rawh u,” tia a sawi hian min kaihruaitu thu bul a sawi a ni. (1 Kor. 10:31) Hetah hian Jehova mize ṭha famkimte târ langtu, a tehna felte kan zawmna a tel a. (Kol. 3:10) A mi thianghlimte kan nih angin, Pathian awm dân latute kan ni ngei tûr a ni.—Eph. 5:1, 2.

² Hemi chungchâng hi Kristiante ngaihventîrin, Paula chuan: “Fa tihâwihte angin inhriat loh laia in hmân lai châknate anga awm lovin; a kotu che u a thianghlim angin nangni pawh in chêtzia zawng zawngah lo thianghlim zâwk rawh u; ‘Nangni in thianghlim tûr a ni, kei ka thianghlim si a,’ tih ziak a nih kha,” tiin a sawi a ni. (1 Pet. 1:14-16) Hmân lai Israel hun lai ang bawkin, Kristian kohhrana awm zawng zawngte chu an thianghlim tûr a ni a. Chu chu, sualin a tihbawlhhlawhna leh khawvêl lak ata bawlhhlawh kai lo leh thianghlimin an awm reng tûr a ni, tihna a ni. Chutiang chuan, rawngbâwlna thianghlim atâna serh hran an ni.—Ex. 20:5.

³ Thianghlimna chu Pathian Lehkhabu Thianghlima chiang taka târ lan, Jehova dânte leh thu bulte zawmna aṭanga neih reng theih a ni a. (2 Tim. 3:16) Bible zirna hmangin Jehova chanchin leh a kawngte kan zir a, a lamah hîpin kan awm a ni. Chutianga kan zirna aṭangin Pathian Ram zawn hmasak leh Jehova duh zâwng tihna kan nuna dah pawimawh ber a ngai tih rinnghehna kan nei a. (Mt. 6:33; Rom 12:2) Chutianga ti thei tûr chuan, mihring thara kan inthuam a ngai a ni.—Eph. 4:22-24.

THLARAU LAM LEH NUNGCHANG LAMA THIANGHLIMNA

⁴ Jehova tehna felte zawm chu a awlsam reng lo. Kan hmêlma, Diabol-Setana chuan thutak hawisantîr min tum reng a. He khawvêl suaksual thununna leh thil sual tih duhna kan neih hian a châng chuan thil a tiharsa ṭhîn. Kan inpumpêkna mila nung tûr chuan thlarau lama kan beih nasat a ngai a. Bible chuan dodâlna emaw, fiahna emaw kan tawh huna mak ti lo tûrin min hrilh a ni. Felna avânga hrehawm kan tawrh a ngai ang. (2 Tim. 3:12) Fiahna kan tawh hian Pathian duh zâwng kan tihzia finfiahna a nih avângin, kan hlim thei a ni.—1 Pet. 3:14-16; 4:12, 14-16.

⁵ Isua chu ṭha famkim mah ni se, a hrehawm tawrh aṭangin thuâwih a zir a. Setana thlêmnaah a tlâwm ngai lo va, khawvêl thil lam chawisân a tum ngai hek lo. (Mt. 4:1-11; Joh. 6:15) Isua chuan a rinna phatsan chu vawi khat tê pawh a ngaihtuah lo. A rinawmna avângin khawvêl huat hlawh mah se, Jehova tehna felte chu a vawng tlat a. Isua chuan a thih hma lawkin a zirtîrte hnênah anni pawh khawvêlin a haw dâwn tih a vaukhân a. Chumi hnu aṭang chuan Isua zirtîrte chuan hrehawm an tuar a; mahse, Pathian Fapa chuan khawvêl a ngam tih an hriat avângin huaisen takin an awm a ni.—Joh. 15:19; 16:33; 17:16.

⁶ Khawvêl mi ni lo tûr chuan kan Hotupa angin Jehova tehna felte kan vawn tlat a ngai a. Khawvêl politics leh khawtlâng buainaahte kan tel loh mai bâkah, a nungchang ṭhat lohnate pawh kan do a ngai a ni. Jakoba 1:21-naa fuihna: “Bawlhhlawh zawng zawng leh sual khat liam chu dah bo ula, thu tuh, in thlarau chhandam thei chu thuhnuairawlh takin pawm rawh u,” tih chu kan ngai thutak hle. Bible zirna leh inkhâwmna aṭangin kan rilru leh thinlungah ‘thu kan tuh’ a, khawvêl thil min pêk tumte duhna chhe tê pawh kan nei ṭan lo vang. Tirhkoh Jakoba chuan: “Khawvêl ṭhian nihna hi Pathian hmêlma nihna a ni tih in hre lo vem ni? Chutichuan tupawh khawvêl ṭhian nih duh apiang chuan Pathian hmêlmaah a insiam ṭhîn,” tiin a ziak a. (Jak. 4:4) Hei vâng hian, Jehova tehna felte zâwm tûr leh khawvêl laka inlahrang zawm zêl tûrin thununna khauh tak Bible-ah a chuang a ni.

⁷ Pathian Thu chuan nungchang zahthlâk leh bawlhhlawha tel lo tûrin min vaukhân a. “Mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se,” tiin min hrilh a ni. (Eph. 5:3) Chuvângin, thil zahmawh te, thil zahthlâk te, a nih loh leh thil zahawm lote kan ngaihtuah reng lo vang a, chûng thilte chu kan titinaah pawh kan telh lo vang. Chutiang chuan, nungchang lama Jehova tehna thianghlim leh felte zawm kan duhzia kan târ lang a ni.

TISA LAMA THIANGHLIMNA

⁸ Thlarau lam leh nungchang lama thianghlimna bâkah tisa lama thianghlimna hi a pawimawh tih Kristiante chuan an hria a. Hmân laia Israelte hunah khân, thianghlimna Pathian chuan an riahhmun chu vawng fai tûrin a phût a. Keini pawh, Jehova’n kan ‘zînga thil bawlhhlawh a hmuh lohna’ tûrin kan invawng thianghlim tûr a ni.—Deut. 23:14.

⁹ Bible-ah hian thianghlimna leh faina, a nih loh leh tisa lama thianghlimna hi a inkûngkaih hnai hle a. Entîr nân, Paula chuan heti hian a ziak a ni: “Duh takte u, chûng thutiam chu kan neih avângin, tisa leh thlarau bawlhhlawhna zawng zawngah i intifai ang u, Pathian ṭih dêk chunga thianghlimna tifamkimin,” tiin. (2 Kor. 7:1) Kristian a hmei a pate chu an inbual ṭhînin leh an thawmhnawte su ṭhînin, tisa lama invawn thianghlim chu an tum tlat tûr a ni. Ram hrang hrangte dinhmun chu a inang lo va; mahse, keimahni leh kan fate inbualna tûr tui leh sahbawn chu kan nei thei tlângpui ṭhîn.

¹⁰ Kan thu hrilh rawngbâwlna avângin, kan awmna vêng chhûngah chuan hriat kan hlawh hle ṭhîn. Kan in chhûng leh pâwn lam felfai taka kan vawnna ringawt pawh chu ṭhenawmte hnêna thu hrilhna chi khat a ni. Chu chu chhûngkuaa mi tinte tih theih thil a ni a. In leh a vêl felfai tak leh ṭha taka vawnna chuan mi dangte chungah nghawng ṭha tak a nei tih hriain, a bîk takin unaupate chuan in leh a vêl chu an ngaihsak tûr a ni. Chutianga tihna leh thlarau lama hma an hruaina chuan chhûngkaw lute chu mahni in chhûng khawsak rêl fel thiam mi an nihzia a târ lang. (1 Tim. 3:4, 12) Unaunute pawhin, a bîk takin in chhûng enkawlna lamah mawhphurhna an nei a. (Tit. 2:3-5) Ṭha taka zirtîrna dawng naupangte pawhin, anmahni bâkah an pindante felfai leh thianghlim takin an enkawl bawk. Chutiang chuan, chhûngkua chuan Pathian Ram rorêlna khawvêl thara awm tlâk thianghlimna nei tûrin an thawkho a ni.

¹¹ Tûn laia Jehova chhiahhlawh tam takte chuan inkhâwm kal nân lîrtheite an hmang a. Hmun ṭhenkhatah chuan rawngbâwlnaah loh theih lohvin motor hman a ngai ṭhîn. Motor chu fai tak leh ṭha taka enkawl tûr a ni a. Kan in leh lîrtheite chuan Jehova mi, fai leh thianghlim takte kan nihzia a târ lang tûr a ni. Chutiang bawkin, thu kan hrilhna bag leh Bible pawh a thianghlim tûr a ni bawk.

¹² Kan thawmhnaw leh inchei dânte chu Pathian thu bulte nên a inmil tûr a ni. Mi zahawm tak hmaa kan inlan dâwn chuan, in awm thawmhnaw leh khaw lai lên thawmhnaw ang chu kan ha ngai lo vang. Thu hrilhna leh inkhâwmnaa Jehova aiawha thu kan sawi hunah phei chuan kan fîmkhur lehzual tûr a va ni êm! Kan incheina leh thawmhnaw ṭhui dânte chuan mite’n Jehova biakna an thlîr dân chungah nghawng a nei thei a. Thawmhnaw zahawm lo hâk emaw, mi dangte rilru tûr ngaihtuah tel loh emaw chu a ṭha miah lo vang. (Mik. 6:8; 1 Kor. 10:31-33; 1 Tim. 2:9, 10) Chuvângin, rawngbâwla chhuak tûr te, inkhâwm tûr te, bial leh regional inkhâwmpuia kal tûrtea kan insiam hian Bible-in tisa lam thianghlimna leh lan dân mawi chungchâng a sawite chu rilruah kan vawng reng tûr a ni. Engtik lai pawha Jehova fak leh chawimawi chu kan duh si a.

¹³ Jehova Thuhretute world headquarters emaw, branch office emaw te kan tlawh hunah pawh chutiang tho chu a ni. Bethel tih awmzia chu “Pathian In” tihna a ni tih hre reng ang che. Chuvângin, Kingdom Hall-a kan inkhâwm huna kan inthuam dân tûr anga inthuam leh awm dân tûr anga awm a ngai a ni.

¹⁴ Kan awm âwl hunah pawh, kan thawmhnaw hâk leh inchei dâna fîmkhur chu kan duh a. ‘Ka inchei dân avângin, tawnchawpa thu hrilh ka hreh ang em?’ tiin kan inzâwt thei ang.

INTIHHLIMNA ṬHA

¹⁵ Hrisêlna ṭha leh nun inbûk tâwk nei tûr chuan chawlhhahdam leh intihhlimna neih a ngai a. Ṭum khat pawh Isua’n a zirtîrte chu hmun fâla a ruala kal a, “châwl rih” tûrin a sâwm a ni. (Mk. 6:31) Chawlhhahdamna bâkah, intihhlimna ṭha chuan a ṭha zâwngin rilru a la pêng thei a. Kan hnathawh pângngai thawk zawm thei tûrin min tihahdam thei a ni.

¹⁶ Tûn laiah hian intihhlimna chi hrang hrang hmuh tûr a tam tawh avângin a, Kristiante tân Pathian min pêk finna hmanga thlan uluk a ngai a ni. Intihhlimna neih a ngaih laiin, nuna thil pawimawh ber erawh a ni lo. “Ni hnuhnûngahte” hian mite chu “Pathian hmangaih aia mahni lâwmna mai hmangaih zâwktu te an ni dâwn” tia vaukhân kan ni. (2 Tim. 3:1, 4) Jehova tehna fel zawm tumtute tân chuan intihhlimna a tam zâwk chu hnâwl chi a ni.

¹⁷ Kristian hmasate tân an chhehvêla nawmsip bâwlna khawvêl thununna ṭha lote chu hnâwl a ngai a. Rom mite circus chhuahnaah chuan, thlîrtute chuan mi dangte na tuar lai chu nuam ti takin an lo thlîr ṭhîn a. Tharum thawhna, thisen chhuahna, leh nungchang bawlhhlawhnate chu mite duh tak intihhlimna ni mah se, Kristian hmasate chuan chutiang chu an lo hnâwl a ni. Tûn laiah pawh, khawvêl intihhlimna tam tak chu chutiang lam hawi a ni a, mihring châkna ṭha lote a chhawm nunsak a ni. Kan kal dâna kan “fîmkhur” a, nungchang tichhe thei intihhlimna kan hawisan a ngai a ni. (Eph. 5:15, 16; Sâm 11:5) A intihhlimna hrim hrima chu a sual lo a nih pawhin, a chhehvêl boruak chu pawm theih loh chi a ni thei bawk.—1 Pet. 4:1-4.

¹⁸ Tûn laia Kristiante tel theihna intihhlimna ṭha a awm a. Mi tam tak chuan Bible leh kan thu leh hla chhuaha rawtna inbûk tâwk takte zawm chu an hlâwkpui a ni.

¹⁹ A châng chuan, chhûngkaw tam takte chu Kristian inkawmna nei tûrin in pakhata sâwm an ni thei a. A nih loh leh, unaute chu inneih ruai ṭhehnaah emaw, chutiang chi thiltih khâwmnaah emaw tel tûra sâwm an ni thei bawk. (Joh. 2:2) Chutiang hunah in neitu chuan thilthleng engkimah mawhphurhna a la tûr a ni. Mi tam tham tak an intihhlimnaah chuan fîmkhur a ngai tih a chiang hle. Chutiang boruak zâng takah chuan ṭhenkhat chuan Kristian awm dân pângngai pêlin, a lutukin an eiin an in thei a, thil sual pawi tak dang pawh an tih phah hial thei a ni. Chu chu rilrua vawng rengin, Kristian thil ngaihtuah thiamte chuan chutiang intihhlimnaa mihring tam zâwng leh a hun rei zâwngah bithliah chin an nei ṭhîn a. Zu chhawp a nih chuan, a âwm tâwk chauhvin an in tûr a ni. (Phil. 4:5) Intihhlimna chu ṭha tak leh thlarau lama mi tichak thei tak ni tûra theihtâwp chhuaha ruahman a nih chuan, ei leh in tûr chu thil ngaih pawimawh ber a ni lo vang.

²⁰ Khualchhâwn thiam hi thil ṭha tak a ni a. (1 Pet. 4:9) Kristian dangte kan ina chaw ei tûr te, thil engemaw eikhâwm tûr te, intihlim tûr te, châwl hahdam tûrte, inkâwm tûrtea mi kan sâwm hunah, dinhmun chhe zâwka ding pachhiate chu rilruah kan dah reng tûr a ni. (Lk. 14:12-14) Chutiang huna sâwmte zînga kan tel chuan, kan nungchang chu Marka 12:31 thu nên a inmil tûr a ni a. An ngilneihna avânga kan lâwmzia kan lantîr reng tûr a ni.

²¹ Kristiante chu Pathian thilpêk tam takte avâng leh “ei leh in leh an thawhrimna zawng zawnga hlim taka an awm” theih avângin an lâwm a. (Thur. 3:12, 13) Engkim ‘Pathian ropuina tûr hlîra’ kan tih chuan, a sâwmtu leh a mi sâwmte chuan thlarau lama mi tihahdam tak an intihhlimna chu lungawi takin an hre chhuak leh thei ang.

SCHOOL-A THILTIHTE

²² Jehova Thuhretu naupangte chuan school-a lehkha zir chu an hlâwkpui a ni. School-ah chuan ziak leh chhiar chu an zir a. School-a an zir subject dangte chu thlarau lam thiltum nei naupangte tân a ṭangkai thei a ni. School an kal chhûng chuan, thlarau lam thilte dah pawimawh hmasain, ‘an vânglaia siamtu hre reng’ tûrin theihtâwp an chhuah duh ngei ang.—Thur. 12:1.

²³ School kal lai Kristian naupang i nih chuan, khawvêl mi ṭhalaite ṭûl lo taka kawm chu pumpelh rawh. (2 Tim. 3:1, 2) Jehova chuan a ṭûl anga vênhimna min pêk avângin, khawvêl thununnate hnâwl tûrin tih theih tam tak i nei a ni. (Sâm 23:4; 91:1, 2) Chuvângin, mahni invênghim tûr chuan Jehova châwmnate chu hmang ṭangkai ang che.—Sâm 23:5.

²⁴ Thuhretu naupang a tam zâwkte chu khawvêl ata an inlâkhran theih nân, school an kal laiin zirlaia tel lo tihtih dangahte chuan an tel lo va. Chu chu an school kalpuite leh zirtîrtute tân chuan hriatthiam a har mai thei. Mahse, Pathian tihlâwm chu a pawimawh zâwk a ni. Chumi awmzia chu, Bible ṭanchhan i chhia leh ṭha hriatna chu i sawizawi ang a, khawvêl inelna, a nih loh leh hnam âtchilhna thiltihahte tel loh i tum tlat dâwn tihna a ni. (Gal. 5:19, 26) Pathian ṭihtu nu leh pate pêk Bible ṭanchhan fuihnate zâwm a, kohhran chhûnga ṭhian ṭhate kawmna aṭangin, nangni ṭhalaite hian Jehova tehna felte chu in vuan tlat thei a ni.

HNATHAWH LEH ṬHIANTE

²⁵ Chhûngkaw lûte chuan an chhûngkua châwm tûrin Pathian Lehkha Thu aṭangin mawhphurhna an nei a. (1 Tim. 5:8) Chuti chung pawhin, rawngbâwltu an nih angin, Lalram chu an hnathawh aiin a pawimawh zâwk tih an hria a ni. (Mt. 6:33; Rom 11:13) Pathian ngaihsakna nei a, ei tûr leh silh tûr neia lungawiin, lungngaihna leh hausak âtchilhna thangte chu an pumpelh a ni.—1 Tim. 6:6-10.

²⁶ Hnathawh nei Kristian inpumpêk tawh zawng zawngte chuan Bible thu bulte chu an rilruah an vawng reng tûr a ni a. Rinawm taka ei zawnna hna thawk tih chu Pathian dânte emaw, ram dânte emaw dodâl zâwnga thil tih loh hi a ni. (Rom 13:1, 2; 1 Kor. 6:9, 10) Ṭhian sual kawm a hlauhawmna chu rilruah kan vawng reng a. Krista sipaite kan nih angin, Pathian tehnate bawhchhetu sumdâwnna thil te, kan Kristian tualdâwihna tichhe thei thil te, leh kan thlarau lam nun tâna hlauhawm thei thilte lak ata kan inthiar fihlîm a ni. (Is. 2:4; 2 Tim. 2:4) Chuan, sakhaw lama Pathian hmêlma, “Babulon Khaw Ropui” nêna inkûngkaihna neih chu kan duh lo bawk.—Thup. 18:2, 4; 2 Kor. 6:14-17.

²⁷ Pathian tehna felte zawmna chuan unaute nêna kan inhmuhkhâwmna chu sumdâwnna theh lâr nân emaw, kan mi mal hlâwkna tûr atân emawa hmang lo tûrin min vêng ang. Kristian inkhâwmte, bial leh regional inkhâwmpuite chu Pathian Jehova biak nân liau liau a ni a. A thlarau lam dawhkân chu kîlin, kan ‘inthlamuan tawn’ a ni. (Rom 1:11, 12; Heb. 10:24, 25) Chutianga inkawmna chu thlarau lam thil atân chauh a ni tûr a ni.

KRISTIAN INPUMKHATNA NEIIN

²⁸ Jehova tehna fel chuan a mite chu “remna phuarnaah chuan thlarau inpumkhatna chu vawng” tûrin a phût bawk. (Eph. 4:1-3) Mahni lâwmna zawn aiin, mi tinin mi dangte tâna ṭha tûr an ngaihtuah zâwk tûr a ni. (1 Thes. 5:15) I lawina kohhranah hetiang rilru put hmang i hmu ang tih rinhlelh rual a ni lo. Kan hnam, ram, khawtlâng, hausak dân, leh lehkha thiam chen chu eng pawh ni se, kan vai hian tehna fel thuhmun hnuaiah kan awm vek a. Pâwn lam mite pawhin hetianga Jehova mite chêtzia ṭha tak hi an hmu a ni.—1 Pet. 2:12.

²⁹ Kan inpumkhatna chhan ber chu sawi belhin, tirhkoh Paula chuan: “Taksa pakhat leh thlarau pakhat chauh a awm a; Lalpa pakhat, rinna hmunkhat, baptisma hmun khat, engkim Pathian leh Pa pakhat chauh a awm a; ani chu engkim chungah a awm a, engkim fang chhuakin a awm a, engkim chhûngah chuan a awm bawk a ni,” tiin a sawi. (Eph. 4:4-6) Hetiang ni thei tûr hian Bible thu bulte bâkah, Jehova lal chungnunna pawm a, Bible zirtîrna sâng lehzualte hriat thiamna thuhmun neih pawh a ngai a. Dik takin, Jehova chuan a mite chu thutak thu, ṭawng thianghlim a pe a; chu chuan thu khat vuain rawng a bâwl tlântîr a ni.—Zep. 3:9.

³⁰ Kristian kohhrana inpumkhatna leh inremna chu Jehova betu zawng zawngte tâna hahdamna petu a ni a. Jehova thutiam: “Berâm angin ka dah khâwm ang a: ran rual an hlobet hmuna awm ang maiin,” tih thlen famkimna chu kan tawng a. (Mik. 2:12) Jehova tehna felte vuan tlatin inrem taka inpumkhatna chu vawn zêl kan duh a ni.

³¹ Jehova kohhran thianghlim taka awmte chu an va hlim êm! Jehova hming putu nih hi engkim chân phahna tlâk a ni. Jehova nêna kan inlaichînna hlu tak kan vawn lai hian, a tehna felte zawm kan tum tlat ang a, mi dangte pawh zâwm tûrin kan fuih bawk ang.—2 Kor. 3:18.