Thu Belhna

Kristian Nu leh Pate Hnêna Thuchah:

Nu leh pa in nih angin, in ngainat tak in fate chu Jehova hmangaiha a hnêna inpumpêk tûrin in duh a. Anni chu baptisma chang thei tûra buatsaih tûrin eng nge in tih theih? He rahbi pawimawh tak tân hian, eng hunah nge an inpeih ang?

Isua chuan a hnungzuitute hnênah: “Hnam tina mi zirtîrahte siam ula, . . . baptis ula,” tiin kaihhruaina a pe a. (Mt. 28:19) Hemi aṭang hian, baptisma chang thei tûra tlin ngai bul ber chu Krista zirtîrnate hre thiama ringtu mai ni lovin, nunpui tlattu a zirtîr nih hi a ni. Hei hi kum lama naupangte pawhin an ti thei a ni.

I fate tân entawn tûr ṭha siam la, Jehova zirtîrnate chu anmahni thinlungah tuhsak ang che. (Deut. 6:6-9) Hetah hian Bible thutak zirtîr nân leh Bible thu bulte chhûta nunpui tûra ṭanpui nâna Chatuanin I Hlim Thei! tih lehkhabu hman a tel a ni. I fate chu an thurinte mahni ir-âwm chhuaka hrilhfiah thei tûrin ṭanpui rawh. (1 Pet. 3:15) I hnên aṭanga an dawnte bâkah, mahnia inzirna, chhûngkuaa Pathian biakna, kohhran inkhâwmte, leh an ṭhian ṭhate hnên aṭanga an dawn hriatna leh fuihnate chuan anni chu baptisma an chan hnu lam thlenga ṭhang chho zêl tûrin a ṭanpui ang. Hêng thlarau lam thiltumte hi an tân chhawpchhuahsak ang che.

Thufingte 20:11 chuan: “Naupang takngial pawh a thiltihin a intilang ṭhîn, a thiltih chu a thianghlim leh a dik emawin,” a ti a. A nih leh, mipa naupang emaw, hmeichhe naupang emaw pawh ni se, naupang chu Isua Krista zirtîr a ni tawhin, baptisma chang tûrin a inpeih tawh tih eng ang thiltihin nge tilang ang?

Baptisma chang tûra hmasâwn chho naupang chuan a nu leh pate thu a âwih tûr a ni. (Tirh. 5:29; Kol. 3:20) Kum 12 mi Isua chungchângah Bible chuan: “[A nu leh pate] thu zâwmin a awm a,” a ti. (Lk. 2:51) I fa chu ṭha famkim tûr chuan i beisei thei lo ngei mai a. Mahse, baptisma chang duh naupang chuan Isua entawn a tum tlat ang a, a nu leh pate thu âwihtu niin hming a nei ang.

Bible thutak hriat châkna a nei tûr a ni bawk. (Lk. 2:46) I fa chuan inkhâwm nuam a tiin, chhânnate a pe ṭhîn em? (Sâm 122:1) A hun taka Bible chhiar leh mahnia inzirna neih nuam a ti em?—Mt. 4:4.

Baptisma chang thei tûra hmasâwntu naupang chuan Lalram hmakhua a dah hmasa tûr a ni a. (Mt. 6:33) A rinna mi dangte hrilh chhâwng tûra a mawhphurhna chu a pawm tûr a ni. Rawngbâwlna pêng hrang hrangah a inhmang ang a, zirtîrtute leh school naupang dangte hnêna Jehova Thuhretute zînga mi pakhat anga inhriattîr chu a hreh lo vang. Nun leh Rawngbâwlna Inkhâwma a chanvo neihte chu a ngai pawimawh hle a ni.

Nungchang lama thianghlim taka awm tûrin ṭhian sualte chu a kâwm lo vang. (Thuf. 13:20; 1 Kor. 15:33) Chu chu rimawi te, film te, TV program te, video games te, leh Internet a hmannaahte hian a lang tûr a ni.

Naupang tam tak chuan nu leh pate ṭan lâkna chu an chhâng lêt a, thutak mahni ta nihtîrin, an naupan laia baptisma chang tûrin an tling thei a ni. Jehova chuan i fate’n amah nêna an inlaichînnaa he rahbi pawimawh tak thleng thei tûra i ṭanpuina chu malsâwm rawh se.

Baptisma La Chang Lo Thuchhuahtu Hnêna Thuchah:

Kohhrana baptisma chang lo thuchhuahtu anga rawngbâwl chu chawimawina chanvo ṭha tak a ni a. Thlarau lama i hmasâwnna avângin fak tlâk i ni. Pathian Thu zirin amah hriatna i nei tawh a, a thutiamte chu i ring tawh bawk a ni.—Joh. 17:3; Heb. 11:6.

Jehova Thuhretute nêna Bible i zir ṭan hma chuan, sakhaw pâwl dang nên kawng engemaw takin inzawmna i nei pawh a ni thei a, a nih loh leh sakhua nêna inzawmna i nei hauh lo pawh a ni thei. Bible thu bulte nêna inmil lo thiltih dangah i tel pawh a ni thei bawk. Mahse, tûnah chuan i rinna chu simna, a awmzia chu tûn hmaa i thilsual tihte chu pawi tihzia lantîrna hmangin i târ lang tawh a; chu bâkah, inlehna, a awmzia chu tûn hmaa thil sual tihna kawng hnâwla Pathian hmuha thil dik tih tum tlatna hmangin i târ lang tawh bawk a ni.—Tirh. 3:19.

Kawng lehlamah chuan, lehkha thianghlimte chu “i naupan têt ata” i hre tawh pawh a ni thei a. Chuvângin, Kristian nunchang ni lo leh sual nasa tak tihna lak ata vênhim i ni a. (2 Tim. 3:14, 15) Ṭhiante nêksâwrna leh Jehova mita sual thiltih dangte do dân chu i zir tawh a ni. Biakna dik vawn tlatna hmangin leh Kristian rinna chu mi dangte hnêna hrilhna hmangin i rinna chu i târ lang tawh bawk. Thlawhhma rawngbâwlnaah zirtîrna i dawng a. Tûnah chuan kohhrana baptisma chang lo thuchhuahtu nia Jehova rawngbâwl tûrin mi mal thu tlûkna i siam tawh a ni.

Jehova kawngte chu i puitlin hnuah i hria emaw, i naupan lai aṭangin i zir tawh emaw pawh ni se, tûnah chuan i thlarau lam hmasâwnna tûr rahbi pahnih—inpumpêkna leh baptisma—chu i ngaihtuah tawh ngei ang. Ṭawngṭaia amah panin Jehova hnênah i inpumpêk a, chatuan atâna a rawng chauh bâwl tûra i thu tlûkna chu i hrilh a ni. (Mt. 16:24) Tichuan, chu inpumpêkna chhinchhiah nân tuia inhnimphûmin baptisma i chang a ni. (Mt. 28:19, 20) Inpumpêkna leh baptisma channa hmangin, Pathian Jehova rawngbâwl tûra nemngheh i lo ni ta a. Chanvo ropui a va ni êm!

Mahse, i Bible zirnain a târ lan angin, he thiltih hian harsatna tam tak a thlen dâwn che a. Isua’n baptisma a chan zawh hnu lawk khân, “Diabola thlêma awm tûrin thlalêrah thlarau hruai luhin a awm,” tih hre reng ang che. (Mt. 4:1) Krista zirtîr anga baptisma i chan zawh hnuah, fiahna hmachhawn zui zêl i inbeisei thei a. (Joh. 15:20) Chûng chu kawng chi hrang hrangin a lo thleng ang. Chhûngkua aṭanga dodâlna te i tâwk mai thei a. (Mt. 10:36) I school kalpuite, i hnathawhpuite, leh i ṭhian hluite nuihzabûr i ni mai thei bawk. Mahse, Marka 10:29, 30-a Isua thute hi hre reng rawh: “Tih tak meuhvin ka hrilh a che u, tupawh keimah avâng leh chanchin ṭha avânga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, tûn dam chhûng la la hian, inte, unaupate, farnute, nute, fate, ramte a leh zain, tihduhdahnate nên, hmu lo tûr tumah an awm lo; hun lo la thleng tûra chatuana nunna nên,” tih hi. Chuvângin Jehova hnaih tûr leh a felna tehnate mila nung tûrin thawk rim zêl rawh.

Baptisma chan duhna i neih hunah kohhrana upate râwn khâwmtu, coordinator hriattîr rawh. He thuchah zawha awm zawhnate hian upate’n baptisma chang tûra i tlin leh tlin loh thu tlûkna siam tûra sawihona ṭanchhan tûr thute a pe a ni. Nangmaha mi mal Bible zirna i neih hunah hêng zawhnate hi i ennawn ṭan thei ang.

Hêng sawiho tûrte atâna i inpuahchah hian, Bible châng lâk chhuahte chhiar nân leh ngaihtuah nân hun hmang rawh. He lehkhabu-ah emaw, lehkha phêk dangah emaw mahnia chhinchhiahna insiam chu i duh mai thei a. Upate nêna in sawiho laiin chûng i chhinchhiahte leh he lehkhabu hi keuvin i en thei ang. Zawhna hriatthiam harsa tih i neih engpawh chu, Bible zirpuitu che hnênah emaw, upate hnênah emaw zâwt hreh suh ang che.

Upate nêna in sawiho laiin, zawhnate chhânna chu sei tak emaw, kimchang tak emawa pe tûrah inngai suh. Chhânna tluangtlam tak, nangma ir-âwm chhuak chu a ṭha ber ṭhîn. Zawhna tam takah chuan i chhânnain Bible a ṭanchhanzia târ lan nâna Bible châng pakhat emaw, pahnih emaw sawi chu a ṭangkai bawk a ni.

Bible zirtîrna thu bulte i la hre tâwk lo a nih chuan, upate chuan Bible hre thiama nangma ir-âwm chhuaka i sawi chhuah theih nân leh nakina baptisma chang tûra i tlin theih nâna ṭanpuina dawng tûrin ruahmanna an siamsak ang che.

[Kohhran upate hnêna thuchah: Baptisma chang tûrte nêna sawihona kaihhruai dân tûr chu phêk 208-212-ah a chuang a ni.]