Mihringte Tâna Pathian Thiltum Chu Eng Nge Ni?

Bible chuan mihringte nun hi ‘a rei lovin, buainain a khat’ tih a sawi a. (Joba 14:1) Chutianga nun chu Pathianin kan tâna min duhsak nun dân tûr a ni em? A ni lo a nih chuan, kan tâna a thiltum chu eng nge ni? Chu chu a thleng famkim ngai ang em? Bible pêk chhânna thlamuanthlâk takte lo ngaihtuah ta ila.

1. Jehova chuan eng ang nun nge nei tûra min duh?

Jehova chuan nun ṭha ber nei tûrin min duh a. Mihring hmasa ber Adama leh Evi a siam khân, anni chu paradis mawi tak, Eden huanah a dah a ni. Tichuan, “Pathianin anmahni mal a sâwm a; Pathian vêkin an hnênah, ‘Chi tam tak thlaha lo pungin, leilung hi luah khat ula, in thû thûin awmtîr rawh u,’” tiin a hrilh a ni. (Genesis 1:28) Jehova’n anni chu fate nei a, lei pumpui paradis-a siam tûr leh ramsate enkawl tûrin a duh a. A thiltum chu mi zawng zawngte’n hrisêlna ṭha famkim nei a, chatuana an nun hi a ni.

Chutiang chuan thil chu thleng lo mah se,a Pathian thiltum chu a inthlâk danglam chuang lo. (Isaia 46:10, 11) Thuâwih mihringte chu dinhmun ṭha famkima chatuana nung tûrin a la duh reng tho va ni.—Thu Puan 21:3, 4 chhiar rawh.

2. Engtin nge tûnah nun awmze nei tak kan neih theih ang?

Jehova chuan ‘thlarau lam mamawh’ neiin min siam a; chu chu amah hria a, biak duhna neiin min siam tihna a ni. (Matthaia 5:3-6 chhiar rawh.) Ani chuan amah nêna inṭhianna hnai tak nei tûr te, “a kawng zawng zawng chu zawh a, amah hmangaih” tûr te, leh ‘kan thinlung zawng zawnga’ a rawng bâwl tûrtein min duh a ni. (Deuteronomy 10:12; Sâm 25:14) Chutianga kan tih chuan, buainate nei mah ila, hlimna dik tak kan nei thei ang. Pathian Jehova kan biakna chuan nun awmze nei tak leh thiltum nei tak min pe a ni.

3. Jehova’n mihringte tân thiltum ṭha tak a nei

VIDEO chu chhuah la, a hnuaia zawhna hi sawiho vang che u.

VIDEO: Engvângin Nge Pathianin He Lei Hi A Siam?—A Lâk Tawi (1:41)

• Engvângin nge Pathianin kan leilung mawi tak hi a siam?

Thuhriltu 3:11 chhiarin, he zawhna hi sawiho vang che u:

• Hei hian Jehova chungchâng eng nge a zirtîr che?

4. Jehova thiltum chu a inthlâk danglam lo

Sâm 37:11, 29 leh Isaia 55:11 chhiarin, he zawhna hi sawiho vang che u:

• Engtin nge kan tâna Jehova thiltum chu a inthlâk danglam lo tih kan hriat?

5. Jehova kan biakna chuan nun awmze nei tak min pe

VIDEO: Nunin A Tum Ka Hre Ta (5:03)

• Engtin nge Terumi-i chuan nunin a tum zirna chu a hlâwkpui?

Thuhriltu 12:13 chhiarin, he zawhna hi sawiho vang che u:

• Jehova chuan thil tam tak min tihsak avângin, a chunga eng tihlêt nge kan bat?

KHAIKHAWMNA

Jehova chuan he leia dinhmun ṭha famkim hnuaia chatuana nun kan chen chu a duh a. Thinlung zawng zawnga amah kan biak hian, tûnah ngei pawh kan nun hian awmze dik tak a nei a ni.

Ennawnna

• Adama leh Evi te tâna a tîra Jehova thiltum chu eng nge ni?

• Engtin nge mihringte tâna a tîra thiltum chu a inthlâk danglam lo tih kan hriat?

• Engtin nge nun awmze nei tak i neih theih ang?

HRIAT BELH NAN

Eden huan a awm tak tak tih kan rin theih chhan ngaihtuah rawh.

“Eden Huan—Thawnthu Nge, Hmun Awm Tak Tak?” (Vênnainsâng, February 1, 2011)

Leilung hi chatuanin a awm reng ang tih kan rin theih chhan chhiar rawh.

“Leilung Hi Tihchhiat A Ni Ang Em?” (Website thuziak)

Nun awmze nei tak i neih theih dân chungchânga Bible sawi chu bih chiang rawh.

“Nun Awmzia Chu Eng Nge Ni?” (Website thuziak)

Engkim nei nia inngai pa pakhatin a nuna thil kim lo a hmuh chhuah dân en ang che.

Ka Nunin Thiltum A Nei Ta (3:55)