Pathian Ram Chu Eng Nge Ni?

Bible-a thu pawimawh ber chu Pathian Ram chungchâng a ni a. Jehova chuan chu Lalram chu a tîra leilung atâna a thiltum hlen chhuah nân a hmang ang. A nih, Lalram chu eng nge ni? Tûnah ro a rêl mêk a ni tih engtin nge kan hriat? Eng nge a hlen chhuah tawh? Eng nge a la hlen chhuah dâwn? Zirlai 31-33-ah chûng zawhnate chu chhân a ni ang.

1. Pathian Ram chu eng nge ni a, a Lal chu tu nge ni?

Lalram chu Pathian Jehova din sawrkâr a ni. A Lal chu Isua Krista a ni a, vân aṭangin ro a rêl a ni. (Matthaia 4:17; Johana 18:36) Isua chungchângah Bible chuan: “Chatuanin a lal ang,” tiin a sawi. (Luka 1:32, 33) Isua chuan Pathian Rama Lal a nih angin, leia mi zawng zawng chungah ro a rêl dâwn a ni.

2. Isua rualin tute’n nge rorêl ang?

Isua chuan amah chauhvin ro a rêl lo. “Chi tina mi te, ṭawng tina mi te, mi tina mi te, hnam tina mite [chuan] . . . leiah chuan ro an rêl” ang. (Thu Puan 5:9, 10) Krista rualin mi eng zâtin nge rorêl dâwn? Isua leia a lo kal aṭang khân, Kristian maktaduai tam takte chu a hnungzuitu an lo ni a. Mahse, mi 1,44,000-te chauh chu Isua rorêlpui tûrin vânah an kal ang. (Thu Puan 14:1-4 chhiar rawh.) Leia Kristian dang zawng zawngte chu Lalram khua leh tuite an lo ni ang.—Sâm 37:29.

3. Engvângin nge Pathian Ram chu mihring sawrkârte aia a ṭhat zâwk?

Mihring rorêltute chuan thil ṭha tih an tum hunah pawh, an duh anga ti tûrin thiltihtheihna an nei lo va. A hnuah anni chu an khua leh tuite ṭhatna tûr ngaihtuah lo rorêltu dangtea thlâk an ni ṭhîn. Mahse, Pathian Rama Rorêltu, Isua chu tumahin an thlâk ngai lo vang. Pathian ‘din ram chu a chhe ngai tawh dâwn si lo va.’ (Daniela 2:44) Isua chuan lei pum puiah duhsak bîk nei lovin ro a rêl ang. Ani chu hmangaihna nei tak, ngilnei tak, leh dik tak a ni a, mite chu hmangaihna, ngilneihna, leh dikna nêna incheibâwl tawn tûrin a zirtîr ang.—Isaia 11:9 chhiar rawh.

4. Sawrkâr thiltithei takin lei pum puiah ro a rêl ang

Isua Krista chuan rorêl tûrin mihring chanchina rorêltute aiin thil a tithei zâwk a. Matthaia 28:18 chhiarin, he zawhna hi sawiho vang che u:

• Engtin nge Isua thuneihna chu mihring rorêltute thuneihna aia a chungnun zâwk?

Mihring sawrkârte hi a inthlâk fo ṭhin bâkah, rorêltu pakhatin lei hmun khawi emaw lai chauhvah ro a rêl ṭhîn. Pathian Ram chungchâng hi eng nge ni ve? Daniela 7:14 chhiarin, hêng zawhnate hi sawiho vang che u:

• Engvângin nge Pathian Ram “tihchhiat rual a ni lo” tûr chu thil ṭha tak a nih?

• Engvângin nge lei pum puia ro a rêl tûr chu thil ṭha tak a nih?

5. Mihring rorêlna chu thlâk ngei a ngai

Engvângin nge Pathian Ramin mihring sawrkârte a thlâk ang? VIDEO chu chhuah la, a hnuaia zawhna hi sawiho vang che u.

VIDEO: Pathian Ram Chu Eng Nge Ni?—A Lâk Tawi (1:41)

• Mihring rorêlnain eng nge a rah chhuah?

Thuhriltu 8:9 chhiarin, hêng zawhnate hi sawiho vang che u:

• Pathian Ramin mihring sawrkârte a thlâk ngai niin i hria em? Engvângin nge?

6. Pathian Ram chuan min hre thiamtu rorêltute a nei

Kan Lal Isua chuan mihring anga a lo nun tawh avângin, “kan chak lohnate min hriatpui thei” a. (Hebrai 4:15) Isua rorêlpui tûr mi rinawm a hmei a pa 1,44,000-te chu Jehova ngeiin hnam tin, chi tin, ṭawng tin, leh mi tinte aṭangin a thlang a ni.—Thu Puan 5:9, 10.

• Isua leh a rorêlpui tûr zawng zawngte’n mihring nun awmzia an hria chu a thlamuanthlâk i ti em? Engvângin nge?

7. Pathian Ram chuan dân ṭha ber a nei

Sawrkârte chuan an khua leh tuite hlâwkpui tûr leh vênghimtu tûr dânte an zam a. Pathian Ram pawhin a khua leh tuite zawm ngei tûr dânte a nei a ni. Korinth thawn khat 6:9-11 chhiarin, hêng zawhnate hi sawiho vang che u:

• Mi tinin Pathian dânte an zawm hunah khawvêl chu eng ang nge a nih i rin?a

• Jehova’n Lalram khua leh tuite hnêna hêng dânte zâwm tûra a beisei chu a inâwmin i hria em? Engvângin nge?

• Hêng dânte zâwm lotute pawh an inthlâk danglam thei tih engin nge finfiah?—Châng 11 en rawh.

KHAIKHAWMNA

Pathian Ram chu lei pum pui chunga rorêltu tûr vâna awm sawrkâr tak tak a ni.

Ennawnna

• Pathian Rama rorêltu tûrte chu tute nge an nih?

• Engtin nge Pathian Ram chu mihring sawrkârte aia a ṭhat zâwk?

• Jehova’n Lalram khua leh tuite laka a beisei thil ṭhenkhat chu engte nge ni?

HRIAT BELH NAN

Lalram awmna hmun chungchânga Isua zirtîrna chu ngaihtuah rawh.

“Pathian Ram Chu Thinlunga Awm A Ni Em?” (Website thuziak)

Engvângin nge Jehova Thuhretute chuan mihring rorêlna chunga rinawm aiin Pathian Ram chunga rinawm chu an thlan zâwk?

Pathian Ram Tâna Inpêkna (1:43)

Jehova’n Isua rorêlpui tûra a thlan mi 1,44,000-te chungchâng Bible sawi chu bih chiang rawh.

“Tute Nge Vân Ram Kai Ang?” (Website thuziak)

Engin nge lung in tâng nu pakhat chu Pathian Ram chauhvin dikna khawvêl a awmtîr thei tih rinnghehtîr?

“Dik Lohna Chinfel Dân Tûr Ka Hmuh Chhuah Dân” (Awake!, November 2011)