Pathianin Kût Nîte A Lâwm Vek Em?

Jehova chuan hlim taka nung tûr leh a châng chuan hun hlimawm takte hmang tûrin min duh a. Mahse, kût nîte leh ni serhte hi a lâwm vek em? Engtin nge hemi chungchângah Jehova kan hmangaihzia kan lantîr theih?

1. Engvângin nge kût nî tam takte hian Jehova a tihlâwm loh?

Kût nî tam takte hi Bible zirtîrna nên a inmil lo va, milem biate hnên aṭanga lo kal a ni tih i hriat chuan mak i ti mai thei. Chûng kût nîte chuan sakhaw dik lo nên inkûngkaihna a nei thei a. Chu bâkah, dawithiamna nên a inzawm thei a, thlarau thi thei lo ngaih dân a ṭanchhan thei bawk. Kût nî ṭhenkhatte chu puithuna emaw, vânneihna pathian rinna emaw aṭanga lo chhuak pawh a ni thei. (Isaia 65:11) Jehova chuan amah betute chu: “A hrangin awm rawh u, thil bawlhhlawh rêng rêng pawh dek suh u,” tiin a vaukhân a ni.—2 Korinth 6:17.a

2. Engtin nge Jehova chuan a lutuka mihringte chawimawina kût nîte chu a ngaih?

Jehova chuan ‘mihring rinchhanna’ thanga âwk lo tûrin min vaukhân a. (Jeremia 17:5 chhiar rawh.) Kût nî ṭhenkhat chuan ram hruaitute emaw, hnam pasalṭhate emaw a chawimawi a. A dangte chuan hnam chhinchhiahna flag leh zalênna nîte chu a chawimawi a ni. (1 Johana 5:21) A dang lehte chuan politics pâwl leh khawtlâng pâwlte a chawimawi bawk. Jehova chuan a bîk takin, A thiltumte kalha thil titu mi emaw, pâwl pakhat emaw a lutuka kan chawimawi chuan engtin nge a ngaih ang?

3. Eng thiltihte’n nge kût nîte chu pawm tlâk loh nihtîr thei?

Bible chuan ‘uain hehna te, zu hmun hlimna te, zu inhona te’ a dem a ni. (1 Petera 4:3) Kût nî ṭhenkhatah chuan mite chu insûm miah lo leh nungchang bawlhhlawh takin an awm a. Jehova ṭhian ni reng tûr chuan chutiang nungchang bawlhhlawhnate lakah kan inthiar fihlîm tûr a ni.

ZIR BELHIN HMUH BELH RAWH

4. Jehova chawimawi lotu kût nîte chu hnâwl rawh

Ephesi 5:8-10 chhiarin, hêng zawhnate hi sawiho vang che u:

• Kût nî kan hman dâwn leh dâwn loh chungchânga thu tlûkna kan siam hunah eng nge kan chian ngai?

• I chênna hmunah eng kût nîte nge lâr?

• Chûng kût nîte chuan Jehova a tihlâwm i ring em?

Entîr nân, piancham lawm chungchânga Pathian ngaih dân hi i ngaihtuah ngai em? Bible chuan Jehova betuin piancham a lawm thu a sawi ngai lo va; mahse, a rawngbâwl lotu mi pahnihte piancham lawm thu erawh a chhinchhiah a ni. Genesis 40:20-22 leh Matthaia 14:6-10 chhiar rawh. Tichuan, hêng zawhnate hi sawiho vang che u:

• Chu piancham lawmna pahnihah chuan eng thil inang nge thleng?

• Hêng Bible-a thilthlengte ṭanchhanin, engtin nge Jehova’n piancham lawm chungchâng a ngaiha i rin?

Chutichung pawhin, heti hian i la ngaihtuah mai thei, ‘Pathian Jehova chuan piancham emaw, Bible thu nêna inmil lo kût ni dang emawa ka tel leh tel loh chu a ngai pawimawh tak tak em?’ tiin. Exodus 32:1-8 chhiar la. Tichuan, VIDEO chu chhuahin, a hnuaia zawhnate hi sawiho vang che u.

VIDEO: Pathian Tilâwm Lotu Kût Nî leh Ni Serhte (5:07)

• Engvângin nge Jehova pawm tlâk thilte kan chian a ngaih?

• Engtin nge kan chian theih?

Pathian tilâwm lotu kût nîte kan hriat theih dân

• Chu chuan Bible nêna inkalh zirtîrna a ṭanchhan em? A chhânna hriat nân, a lo chhuahna chhui rawh.

• Chu chuan mihringte, pâwlte, a nih loh leh hnam chhinchhiahna flag-te chu a lutukin a chawimawi em? Eng dang zawng aiin Pathian Jehova kan chawimawi a, khawvêl buainate chingfel tûrin amah kan rinchhan a ni.

• Chûng kût nîa thiltihte chu Bible tehnate nên a inkalh em? Nungchang lama kan thianghlim reng a ngai a ni.

5. Mi dangte chu i thurin zah tûrin ṭanpui rawh

VIDEO: I Thurinte Thiam Takin Hrilhfiah Rawh (2:01)

Matthaia 7:12 chhiarin, hêng zawhnate hi sawiho vang che u:

• He châng ṭanchhan hian, ring lotu i chhûngte hnênah kût nî hmang lo tûrin i hrilh tûr a ni em?

• I chhûngte chu kût nî i hmanpui lo chung pawhin, anmahni i hmangaihin i ngaihlu a ni tih lantîr nân eng nge i tih theih?

6. Jehova chuan hlim tûrin min duh

Jehova chuan kan chhûngte leh kan ṭhiante nêna hun hlimawm tak hmang tûrin min duh a. Thuhriltu 8:15 chhiarin, he zawhna hi sawiho vang che u:

• Engtin nge he châng hian Jehova’n hlim tûrin min duh tih a târ lan?

Jehova chuan a mite chu intihlim tûr leh hun hlimawm tak hmangho tûrin min duh a. Chu chu kan international inkhâwmpuia chiang taka a lan dân hriat nân, VIDEO chu chhuah rawh.

VIDEO: International Inkhâwmpuia Khual Chhâwn Thiamna Lantîrna (5:40)

Galatia 6:10 chhiarin, hêng zawhnate hi sawiho vang che u:

• Mi dangte chunga “thil ṭha” ti tûrin kût nîte kan lawm kher a ngai em?

• Engin nge tihlim zâwk dâwn che—kût nîa loh theih lohva thilpêkin nge ni a, mahni duh thua thilpêkin?

• Thuhretute tam tak chuan an fate chu hun hlimawm takte an buatsaihsaka, beisei loh takin thilpêkte an pe bawk ṭhîn. Fanau nei i nih chuan, i fate tân eng ang hun hlimawmte nge i buatsaihsak theih?

KHAIKHAWMNA

Jehova chuan kan chhûngte leh ṭhiantea nêna hun hlimawm tak hmang tûrin min duh a. Mahse, amah tilâwm lo kût nîte hmang lo tûrin min duh bawk.

Ennawnna

• Kût nî pakhatin Jehova a tihlâwm leh lâwm loh hriat nân eng zawhnate nge kan inzawh theih?

• Engtin nge kan chhûngte leh kan ṭhiante chu kût nîte chungchânga kan thu tlûkna siamte hre thiam tûra kan ṭanpui theih?

• Engtin nge Jehova chuan hlim tûr leh intihlim tûrin min duh tih kan hriat?

HRIAT BELH NAN

Kristiante lawm loh kût nî ṭhenkhat ngaihtuah rawh.

“Engvângin nge Jehova Thuhretute’n Kût Nî Ṭhenkhat An Lawm Loh?” (Website thuziak)

Piancham lawmnain Pathian a tilâwm lo tih kan rin nachhan pali chhiar rawh.

“Engvângin Nge Jehova Thuhretute’n Piancham An Lawm Loh?” (Website thuziak)

Jehova hmangaihtu naupangte’n kût nîte a lo thlen huna Jehova an tihlâwm theih dân en ang che

Jehova Tân I Hlu (11:35)

Kristian maktaduai tam takte chuan Krismas hman loh an thlang a. An thu tlûkna siam chu engtin nge an ngaih?

“Thil Ṭha Zâwk An Chhar Chhuak” (Vênnainsâng thuziak)