TITI ṬANNA
ZIRLAI 6
Huaina
Thu bul: “Pathian chanchin ṭha in hnêna sawi tûrin kan Pathianah chuan kan lo huai tâk zâwk kha.”—1 Thes. 2:2.
Isua Tih Dân
1. VIDEO chu en la, a nih loh leh Luka 19:1-7 chhiar rawh. Chumi hnuah, a hnuaia zawhnate hi ngaihtuah ang che:
Engvângin nge mi ṭhenkhatin Zakaia chu an biak hreh mai theih?
Engin nge Isua chu Zakaia thu hrilh tûra chêttîr?
Isua Hnên Aṭangin Eng Nge Kan Zir?
2. Lalram thuchah chu thlei bîk nei lo leh huai taka kan hrilh a ngai.
Isua Entawn Rawh
3. Jehova rinchhan rawh. Pathian thlarauvin Isua chu thu hril tûrin a tichak a, nang pawh a tichak thei che a ni. (Mt. 10:19, 20; Lk. 4:18) Thu i hrilh ngam vak lohte hnêna huai taka thu hril tûrin Jehova hnênah ṭanpuina dîl ang che.—Tirh. 4:29.
4. Mite chungah ngaih dân siam lâwk suh. An lan dân te, khawtlânga an nihna te, an hausakna te, an nun dân te, leh an sakhaw thurinte avângin mi ṭhenkhat hnêna thu hrilh chu i hreh deuh pawh a ni mai thei. Mahse, hei hi hre reng ang che:
Jehova leh Isua chauhvin thinlung an hre thei, keini chuan kan hre thei lo.
Jehova ṭanpui theih loh tu mah an awm lo.
5. Huai tak; mahse, rem hre tak leh fîmkhur tak ni rawh. (Mt. 10:16) Inhnial chu pumpelh la. Miin chanchin ṭha chu a pawm duh loh hunah emaw, him lo nia i inhriat hunah emaw tîtîna chu hawihhâwm takin titâwp ang che.—Thuf. 17:14.