Kan Kristian Nun leh Rawngbâwlna Inkhâwm Atâna Kaihhruainate

A Chhûnga Thu Awmte

1. He lehkha ziaka kaihhruainate hian Kan Kristian Nun leh Rawngbâwlna inkhâwma chanvo nei zawng zawngte chu a ṭanpui ang. Anni chuan an chanvote an inbuatsaih hmain Kan Kristian Nun leh Rawngbâwlna Inzirna Lehkhabu leh he lehkha ziaka târ lan an chanvo tâna kaihhruainate chu an ennawn tûr a ni. Thuchhuahtu zawng zawng chu zirlai chanvote nei tûra sâwm tûr an ni a. Kohhran bêl tlat mi dangte chu Bible zirtîrnate an pawm a, Kristian thu bulte mila an nun chuan an tel thei ang. Nun leh Rawngbâwlna Inkhâwm Overseer chuan thuchhuahtu la ni lo; mahse, chanvo nei ve duhtu chu chanvo atâna thil phutte sawipuiin, a tlin leh tlin loh a hriattîr ang. Chutianga an tih hunah amah Bible zirpuitu (a nih loh leh, ringtu a nu leh pate) an tel ve tûr a ni a. Thil phutte chu baptisma chang lo thuchhuahtua pawm ni tûrte tân nên a inang reng a ni.—od bung. 8 par. 8.

INKHAWM HMELHRIATTIRNA

2. Minute khat. Chawlhkâr tina a ṭanna hla leh ṭawngṭai zawhah, Nun leh Rawngbâwlna Inkhâwm chairman chuan ngaithlatute chu thusawi tûrte ngaihthlâk châkna a neihtîr ang. Kohhranin a hlâwkpui ber tûr thute chu a ngai pawimawh tûr a ni.

PATHIAN THU AṬANGA RO HLUTE

3. Thusawi: Minute sâwm. Nun leh Rawngbâwlna Inzirna Lehkhabu-ah hian a thupui tûr leh thupui tê pahnih thum vêl chu pêk a ni ṭhîn a. He chanvo hi upa emaw, kohhranho rawngbâwltu nih tling tak emaw pêk tûr a ni. Chawlhkâr tina Bible chhiara Bible bu thar chhiar ṭan a nih hunah, hmêlhriattîrna video chhuah a ni ang. Thusawitu chuan a thusawi tûr thupui leh video chu a thlunzawm ang. Nimahsela, inzirna lehkhabu-a chuang thu pawimawhte chu a sawi kim ngei tûr a ni. Chu bâkah, thusawi tûr tibikimtu atâna siam inzirna lehkhabua milem leh Bible thute chu a hmang ṭangkai hle tûr a ni a. Outline-a thu pawimawhte tichangtlungtu a nih phawt chuan reference danga thute pawh a telh thei bawk ang.

4. Thlarau Lam Lunghlute: Minute sâwm. Hei hi hmêlhriattîrna leh tihtâwpna awm lo zawhna leh chhânna hmanga tih tûr chanvo a ni. Upa emaw, kohhranho rawngbâwltu nih tling tak emaw kaihhruai tûr a ni a. Thusawitu chuan zawhna pahnihte chu ngaithlatute chu a zâwt tûr a ni. Chu bâkah, Bible châng târ lante chhiar a ngaih leh ngaih loh chungchângah thu tlûkna a siam ang. Chhânna petute chuan second 30 emaw, a aia tlêm emaw chhûngin an chhâng fel tûr a ni.

5. Bible Chhiar: Minute li. He chanvo hi zirlai mipa pêk tûr a ni. Zirlai chuan a chhiar tûr chu thuhmahruai leh tihtâwpna awm lovin a chhiar chhuak tawp ang. Inkhâwm chairman chuan zirlai chu dik tak leh hriatthiamna nêna chhiar tûr te, nâl tak, uar thiam tak, thlûk thiam taka chhiar a, inâwm taka chawlh lawkna a hman bâkah, pângngai taka chhiar thiam tûra ṭanpui chu a tum ber ang. Bible chhiarna chanvo ṭhenkhat a tâwi a, a ṭhen a sei avângin, Nun leh Rawngbâwlna Inkhâwm overseer chuan hêng chanvote a siam hunah zirlaite theihna chu a ngaihtuah tel tûr a ni.

THLAWHHMA RAWNGBAWLNAAH INHMANG RAWH

6. Minute sâwm leh panga. Inkhâwma hemi section hi, mi tinte’n tîtîna, rawngbâwlna leh, zirtîrna lama an thiamna tihmasâwn tûra tihchhinna hun an neih nâna siam a ni a. A ṭûl dân azirin, upate pawhin hêng zirlai chanvote hi an dawng ang. Zirlai tinte chuan Nun leh Rawngbâwlna Inzirna Lehkhabu-a târ lan chanvo hnunga kual khung chhûnga Zirtîrna a nih loh leh, Mite Hmangaih tih brochure-a zir tûr pawimawh chu an thawk tûr a ni. A châng chuan, sawiho tûr atâna tih chanvo pakhat chu pêk a ni dâwn a. Chutiang chanvo chu upa emaw, kohhranho rawngbâwltu nih tling tak emaw kaihhruai tûr a ni.—Sawiho tûr chanvo tih dân tûr chungchângah paragraph 15-na en rawh.

7. Tîtî Ṭanna: He chanvo hi zirlai mipa emaw, hmeichhia emaw pêk theih a ni a. Ṭanpuitu chu neih inang emaw, chhûngkaw zînga mi emaw a ni tûr a ni. An pahnihin an ṭhu emaw, an ding emaw thei a.—He chanvo atâna thusawi tûrte leh a tih dân tûrte hriat belh nân, paragraph 12 leh 13-na en rawh.

8. Bawhzui Rawh: He chanvo hi zirlai mipa emaw, hmeichhia emaw pêk theih a ni a. Ṭanpuitu chu neih inang a ni tûr a ni. (km 5/97-E p. 2) An pahnihin an ṭhu emaw, an ding emaw thei a. Zirlai chuan tîtîna hmasa a bawhzui huna sawi tûrte chu a târ lang tûr a ni.—He chanvo atâna thusawi tûrte leh a tih dân tûrte hriat belh nân, paragraph 12 leh 13-na en rawh.

9. Zirtîrahte Siam Rawh: He chanvo hi zirlai mipa emaw, hmeichhia emaw pêk theih a ni a. Ṭanpuitu chu neih inang a ni tûr a ni. (km 5/97-E p. 2) Chanvo neitu leh in neitu chu an ṭhu emaw, an ding emaw thei ang. He chanvo hian Bible zirna kal tluang lai a târ lang tûr a ni. Chanvo neitu tân thuhmahruai hman dân leh tihtâwp dân a thawk mêk a nih chauh loh chuan, thuhmahruai leh tihtâwpna neih a ngai lo. Zir tûra pêk thute chu chhiartîr theih ni mah se, chutianga chhiar chhuah vek kher a ngai lo.

10. I Rinna Hrilhfiah Rawh: Thusawi atâna tih a nih chuan, he chanvo hi zirlai mipa pêk tûr a ni a. Lemchan atâna tih a nih chuan, zirlai mipa emaw, hmeichhia emaw thawh theih a ni. Ṭanpuitu chu neih inang emaw, chhûngkaw zînga mi emaw a ni tûr a ni. Zirlai chuan thu lâk chhuahnaa thute chu hmangin, thupui zawhna chu fiah tak leh thiam takin a chhâng tûr a ni. Zirlai chuan a chanvo a tih laiin, a thu lâk chhuahna lehkhabute a sawi lan dâwn leh dâwn loh chungchângah thu tlûkna a siam ang.

11. Thusawi: He chanvo hi zirlai mipa chan tûr a ni a, kohhran hmaa thusawi anga sawi tûr a ni. Thusawi chu Mite Hmangaih tih brochure thu belhna A chhûnga thute ṭanchhan a nih chuan, thusawitu chuan Bible châng(te) chu rawngbâwlnaa hman a nih theih dânte a târ lang tûr a ni. Entîr nân, Bible châng hman theih hun te, Bible châng awmzia te leh, inneitu chhûtpui theih dânte chu a hrilhfiah thei a ni. Thusawi chu Mite Hmangaih tih brochure-a zirlaite zînga pakhat ṭanchhan a nih chuan, thusawitu chuan chûng thute chu rawngbâwlnaa hman a nih theih dân a târ lang tûr a ni. Zirlaia point 1-a entîrna târ lante chu a sawi thei a, a nih loh leh a ṭangkai nia a hriat chuan, zirlaia awm Bible châng dangte pawh a hmang thei bawk.

12. A Chhûnga Thu Awm: He paragraph leh a dawta paragraph-a thute hi “Tîtî Ṭanna,” leh “Bawhzui Rawh,” tih chanvo neite tân a ni a. Kaihhruaina dang a awm loh chuan, chanvo neite thiltum chu a mi biakte tâna pawimawh Bible thu pângngai tak hrilh leh tîtîna dang nei leh tûra ruahmanna siam a ni a. Zirlai chuan a hun azira tualchhûng dinhmun nêna inâwm tak leh ṭha tak thupui pakhat a thlang tûr a ni. Ani chuan kan Zirtîrna Hmanraw Bâwm aṭanga lehkhabu emaw, video emaw a hmêlhriattîr dâwn leh dâwn loh chungchângah thu tlûkna a siam ang. Zirlai chuan thusawi dân tûr by-heart sa ni lovin, mi mal ngaihsakna lantîr leh pângngai taka thusawi dân ang chi tîtî thiamnate chu a zir zâwk tûr a ni.

13. Tih Dân Tûrte: Zirlai chuan tualchhûng dinhmun nêna inmila a tlângpui thua siam tih dân tûrte chu a zui tûr a ni. Entîr nân:

(1) In Tin: He tih dân tûrah hian in tina thu hrilhna—hmaichhan a ni emaw, phone leh lehkha thawn hmangin a ni emaw—leh, in tin kal rawngbâwlnaa kan mi tawh, tîtîpui tawh bawhzuina a tel a ni.
(2) Tawnchawpa Thu Hrilhna: He tih dân tûr hian tîtîna pângngai tak chu thu hrilhnaa chantîr tûra hun remchâng lâk dân a târ lang a. Chutah chuan hnathawhnaah te, school-ah te, ṭhenawmah te, vântlâng veivahna lîrtheiah te, a nih loh leh nî tin thiltiha kan kal chhuahna hmuna kan mi tawhte hnêna ngaihtuah tûr Bible châng pakhat hrilh a tel a ni.
(3) Vântlâng Hmuna Thu Hrilhna: He tih dân tûrah hian nawrlirh hmanga thu hrilhna te, sumdâwnna hmuna mite biak te, kawtthlêra thu hrilhna te, a nih loh leh park-ah te, motor dahna hmunahte leh, mite kan hmuhna apianga thu hrilhte a tel thei a ni.

14. Video-te leh Lehkhabu Hman Dân: Dinhmun azirin, zirlai chuan video nge lehkhabu a hmang dâwn tih chungchângah thu tlûkna a siam ang. Zirlai chanvoah video a tel a nih chuan, a nih loh leh zirlaiin video hman a tum a nih chuan, video chu chhuah kher lovin, hmêlhriattîrin a sawipui tûr a ni.

KRISTIANTE ANGIN NUNG RAWH

15. Hla sak zawha he section-a minute 15 hi ngaithlatute Pathian Thu nunpui tûra ṭanpuitu atâna siam chanvo pakhat emaw, pahnih emaw a ni a. Târ lan a nih kher loh chuan, hêng chanvote hi upa emaw, kohhranho rawngbâwltu nih tling tak emaw pêk tûr a ni a; tualchhûng mamawhte erawh chu upate chauh pêk tûr a ni. Chanvo chu sawiho tûr a nih chuan, thusawitu chuan zawhna awm sate bâkah, zawhna dangte pawh a zâwk thei ang. Hmêlhriattîrna chu tâwi têa sawiin, thu pawimawh laite sawi nân leh unaute’n chhânna an pêk nân, hun tam zâwk a hmang tûr a ni tih hriat reng tûr a ni. Biangbiakna a tel a nih chuan, a biangbiaka chuan, a theih chuan, a ṭhutna aṭang ni lovin, stage chung aṭanga a chhân chu a ṭha zâwk a ni.

16. Kohhrana Bible Zirna: Minute sawm thum. He chanvo hi upa tling tak hnêna pêk tûr a ni. (Upa nei tam lo kohhrante chuan a ṭûl ang angin kohhranho rawngbâwltute an hmang thei ang.) Upate chuan Kohhrana Bible Zirna kaihruai tûrin tu nge tling tih an ngaihtuah ang. Zirna kaihruai tûra pawmte chuan zirna a hun taka zawh nân, Bible châng pawimawhte sawi uar nân, leh kan thu zirte hlutna hre thiam tûra mi zawng zawngte ṭanpui nân awmze nei takin an kaihruai thei tûr a ni. Anni chuan zawhna leh chhânna kaihhruai dân chungchângah tihchhuah tawh kaihhruainate ennawn chu an hlâwkpui ang. (w23.04 p. 24, bâwm) Chawlhkâr khat chhûnga zir tûr thute ṭha taka zir zawh a nih chuan, zirna chu pawh sei vak a ngai lo. A theih hunah chawlhkâr tinin kaihruaitu leh chhiartu hran zêl hman tûr a ni a. Nun leh Rawngbâwlna Inkhâwm chairman chuan zirna chu kaitawi tûra kaihhruaina a pêk chuan, zirna kaihruaitu chuan a remhriat dân azirin a kaitâwi ang. Paragraph ṭhenkhat chu chhiartîr loh a thlang thei a ni.

INKHAWM TLIPNA

17. Minute thum. Nun leh Rawngbâwlna Inkhâwm chairman chuan a bîk takin inkhâwm aṭanga thu ṭangkai takte chu a ennawn ang. Kâr leh inkhâwma tel tûr thute thlîr lâwkna a nei tûr a ni bawk. Hun a awm chuan, kâr leha chanvo neitu tûrte hming chu hriatnawntîrna ang rengin a puang thei ang. Kaihhruaina dang a awm loh chuan, thu puanchhuah ngai leh lehkha thawn chhiar ngaite chu chairman chuan he inkhâwm tlipna hun chhûngah a puangin, a chhiar tûr a ni. Chanchin pângngai, thlawhhma rawngbâwlna atâna ruahmannate leh hall tihfaina lam ang chite chu platform aṭanga puang lovin, hriattîrna board-ah târ mai tûr a ni. Inkhâwm tlipna hun chhûnga thu puanchhuah tûr emaw, lehkha thawn chhiar tûr emawte tih hman a nih dâwn loh chuan, chairman chuan Kristiante Angin Nung Rawh tih section-a thusawi neitute hnênah a ṭûl anga an hun titâwi tûrin a ngên tûr a ni. (Paragraph 16 leh 19-na en rawh.) Inkhâwm chu hla leh ṭawngṭainaa tihtâwp a ni ang.

FAKNA LEH ZILHNA

18. School chanvote a zawh apiangin, Nun leh Rawngbâwlna Inkhâwm chairman chuan zir tûr pawimawh pêk ṭanchhana fakna leh zilhna pêk nân minute khat vêl a hmang ang. Chairman-in school chanvo neite a hmêlhriattîr hian, zirlaiin a thawh mêk chu a puang lo vang. Nimahsela, thu a sawi zawha inâwm taka fakna thu a sawi zawhah chuan, chairman chuan zirlai thawh mêk chu puangin a tihṭhat chhan emaw, tihṭhat lehzual a ṭûl dân emaw chu ngilnei takin a sawi thei ang. Chairman chuan chanvo neitu leh ngaithlatu dangte’n an hlâwkpui dâwna a hriat chuan, thusawia hmêlhmang dangte pawh a sawi lang thei bawk ang. Mite Hmangaih brochure leh Zirtîrna brochure emaw, Ministry School lehkhabu emaw ṭanchhanin mi siam ṭha thei zilhna dangte chu inkhâwm bânah emaw, hun dangah emaw pêk theih a ni ang a; chu chu a thawh mêk zirlai number chungchângah emaw, zirlai number dang chungchângah emaw a ni thei ang.—Nun leh Rawngbâwlna Inkhâwm chairman leh auxiliary counselor-te mawhphurhna chungchâng hriat belh nân, paragraph 19, 24, leh 25 en rawh.

A HUN

19. Chanvo a engah mah hun hman chuan tûr a ni lo va, Nun leh Rawngbâwlna Inkhâwm chairman pawhin a hmang chuang tûr a ni lo. Nun leh Rawngbâwlna Inzirna Lehkhabu chuan chanvo tin atân hun ruat nei mah se, thusawi tûr ṭha taka sawi zawh a nih chuan hun hnawhkhah nân mai atân thu dang a belh vak a ngai lo. Inkhâwma chanvo chelhtute’n hun an hmang chuang a nih chuan, Nun leh Rawngbâwlna Inkhâwm chairman, a nih loh leh auxiliary counselor-in a hrangin zilhna a pe tûr a ni a. (Paragraph 24 leh 25-na en rawh.) Hla leh ṭawngṭaina pawh tiamin, inkhâwm chhûng zawng chu dârkâr 1 leh minute 45-a rei a ni.

BIAL KANTU TLAWH HUNAH

20. Bial kantuin kohhran a rawn tlawh hunah, a hnuaia thlâk danglamna tih lohvah chuan Nun leh Rawngbâwlna Inzirna Lehkhabu-a ruahmanna anga kalpui tûr a ni: Kristiante Angin Nung Rawh tih section hnuaia Kohhrana Bible Zirna aiah minute 30 awh bial kantu rawngbâwlna thusawi neih tûr a ni a. Chu thusawi neih a nih hmain, Nun leh Rawngbâwlna Inkhâwm chairman chuan inkhâwm neih tawha tel thute ennawnna neiin, kâr leha inkhâwm tûr thlîr lâwkna leh thil ṭûl dangte a puan bâkah, lehkha thawnte a chhiar ang; chumi zawhah chuan bial kantu a hmêlhriattîr ang. Bial kantu chuan thu a sawi zawhah a duh thlan hla pakhat nên inkhâwm chu a titâwp ang. Tihtâwp ṭawngṭaina hmang tûrin unaupa dang a sâwm thei ang. Bial kan kâr chhûngin ṭawng thuhmun hmang zirna pindan dang a awm tûr a ni lo. Ṭawng dang hmang group erawh chuan an beina kohhranin bial kan kâr a hman hunah pawh inkhâwm chu an ṭawngin an nei tho vang a. Amaherawhchu, bial kantuin rawngbâwlna thusawi a neih hunah chuan an va fin tûr a ni.

BIAL INKHAWM LEH INKHAWMPUI CHAWLHKAR

21. Bial inkhâwm leh inkhâwmpui neihna chawlhkâr chhûng hian kohhran inkhâwm neih a ni lo va. Chutiang hunah chuan unaute chu a mi mal ang leh chhûngkua anga in lama lo en tûra hriattîr tûr a ni.

HRIATRENGNA CHAWLHKAR

22. Hriatrengna chu chawlhkâr chhûnga neih a nih chuan, Nun leh Rawngbâwlna Inkhâwm chu neih a ni lo vang.

NUN LEH RAWNGBAWLNA INKHAWM OVERSEER

23. Upate thlan upa pakhat chu Nun leh Rawngbâwlna Inkhâwm overseer a ni ang a. He inkhâwm hi felfai tak leh he kaihhruainate mila neih ni ngei tûrin mawhphurhna a nei a ni. Auxiliary counselor nên inbiak pawhna ṭha a nei tûr a ni a. Nun leh Rawngbâwlna Inzirna Lehkhabu neih theih a nih ve leh, Nun leh Rawngbâwlna Inkhâwm overseer chuan zirlaite chanvo tûr chu thla hnih chhûng atân a siam lâwk tûr a ni. Chutah chuan zirlai ni lo chanvo te, kohhran upate pawm zînga chawlhkâr chhûng inkhâwm chairman-te leh, zirlai chanvote a tel a ni. (Paragraph 3-16 leh 24-na en rawh.) Zirlai chanvote a siam hunah, an kum te, thiltawn te leh, an chanvo dawnah zalên taka thusawi theihna an neih leh neih lohte a ngaihtuah tel tûr a ni. Inkhâwm tâna chanvo dangte a ruat hunah pawh chûngte chu a ngaihtuah tel ṭhîn tûr a ni. Zirlai chanvote chu a lo berah a hun hma chawlhkâr thumah pêk tûr a ni a. Zirlai chanvote pêk hunah Kan Kristian Nun leh Rawngbâwlna Inkhâwm Chanvo Pêkna (S-89) form chu hman tûr a ni. Nun leh Rawngbâwlna Inkhâwm overseer chuan inkhâwm zawng zawng tâna chanvo hun duan chu hriattîrna board-ah a târ chhuak tih a chian tûr a ni. Kohhran upate chuan amah ṭanpuitu atân upa dang emaw, kohhranho rawngbâwltu pakhat emaw an ruat thei a. Mahse, zirlai ni lo chanvote chu kohhran upate chauh pêk tûr a ni.

NUN LEH RAWNGBAWLNA INKHAWM CHAIRMAN

24. Chawlhkâr tinin, upa pakhat chu Nun leh Rawngbâwlna Inkhâwm hun chhûng zawng atâna chairman a ni ang a. (Upa an tam lohna hmunah chuan, kohhranho rawngbâwltu tling takte chu a ṭûl dân azirin he chanvo hi pêk theih a ni.) Inkhâwm hmêlhriattîrna leh a tlipna sawi tûrte sawihopui tûrin a inbuatsaih tûr a ni. Inkhâwma thusawitu tûr zawng zawngte chu a hmêlhriattîrin, kohhran upa an tlêmna hmunah, inkhâwma thusawi dangte, a bîk takin sawiho ngai lova video hmêlhriattîrna chhuah ringawt ang chite chu a chang ang. Thusawite inkâra a hmêlhriattîrna thusawi chu a tawi fel hle tûr a ni. Upate chuan upate zînga tute’n nge he chanvo hi chelh thei ang tih an rêl thlu ang. Chutianga an thlan upate chuan a khât tâwkin chairman nihna an chelh ang a. Tualchhûng dinhmun azirin, Nun leh Rawngbâwlna Inkhâwm overseer chuan upa dangte aiin chairman nihna a chelh zing zâwk pawh a ni thei. Upa pakhat chu Kohhrana Bible Zirna kaihruai tûra a tlin chuan, inkhâwm chairman ni tûr pawha a tlin ngei a rinawm. Nimahsela, chairman-a ṭang upa chuan chanvo nei zirlaite hnênah, fakna leh a ṭûl chuan, zilhna thu ṭangkai tak chu ngilnei taka a pêk a ngai dâwn tih hre reng rawh u. Chairman chuan inkhâwm chu a hun taka tihtâwp ni tûrin mawhphurhna a nei a ni. (Paragraph 17 leh 19-na en rawh.) Chairman-in a duh a, hmun a âwl phawt chuan, platform-a awm microphone ding dang pakhat aṭangin a dawta sawi tûrte chu a ko chhuak thei ang. Chutih chhûng chuan chanvo nei unaupa chu a thusawina tûrah a lo ding sa thei ang. Chutiang bawkin, chairman chuan Bible chhiar leh Thlawhhma Rawngbâwlnaah Inhmang Rawh tih section-a chanvo nei zirlaite a koh chhuah hunah leh zilhna a pêk hunah, platform-a dawhkânah a ṭhu thei bawk ang. Hei hian hun a ti hek lo deuh vang.

AUXILIARY COUNSELOR

25. A theih phawt chuan, he mawhphurhna chelh tûr hian tawnhriat nei upa hman chu a ṭha a. Auxiliary counselor mawhphurhna chu a ṭûl huna upate leh kohhranho rawngbâwltute hnêna Nun leh Rawngbâwlna Inkhâwm te, vântlâng thusawi te, leh Vênnainsâng Zirna leh Kohhrana Bible Zirna inkhâwm an kaihhruai dân leh an chhiar dân pawh tiamin, an chanvo engpawh an tih dân chungchânga zilhna pêk hi a ni. (Paragraph 19-na en rawh.) Kohhranah thusawi leh zirtîrna lama thiltawn nei upa ṭhahnem tak an awm chuan, anni chuan auxiliary counselor chanvo chu kum khat zêlin an inchelh chhâwk ang. Auxiliary counselor tân chanvo nei apiangte hnêna zilhna pêk ziah a ngai lo.

ZIRNA PINDAN DANGTE

26. Zirlai an tam dân azirin, kohhran chuan zirlai chanvote atân zirna pindan dangte an hmang ang. Chutiang pindante chu counselor tling tak, upa pakhatin kaihruai se a duhawm a ni. A ṭûlna hmunah chuan, kohhranho rawngbâwltu tling tak pakhat kaihhruaitîr theih a ni ang. Kohhran upate chuan tu nge hetiang atâna hman theih ang tih leh chanvo inchelh chhâwk tûr a nih leh nih loh chungchângah thu tlûkna an siam tûr a ni a. Chuta counselor chuan paragraph 18-naa tih dân târ lan chu a zâwm tûr a ni. Chutiang pindan dangte neih a nih chuan, Pathian Thu Aṭanga Ro Hlute tih section hnuaia Thlarau Lam Lunghlute tih zawhah zirlaite chu pindan danga kal tûra hriattîr an ni ang. Anni chu inkhâwma zirlai chanvo hnuhnûng ber zawhah an rawn lût leh ang.

VIDEO-TE

27. He inkhâwm nêna inkûngkaihin video thlan bîk ṭhenkhat chu hman a ni dâwn a. Chawlhkâr chhûng inkhâwm tâna video-te chu mobile leh tablet aṭanga hman theih, JW Library^® app aṭangin a hmuh theih ang.

S-38-LS 11/23