Tun Laia “Biak In” Leh “Lal”

“An luh chuan lal chu an zîngah a lût ve ang a, an chhuah chuan a chhuak ve tûr a ni.”—EZEKIELA 46:10.

1, 2. Ezekiela biak in inlârna awmze tam tak hawng tûrin eng thutak chabi-in nge min ṭanpui?

HMAN lai Juda sakhaw dân zirtîrtu ṭhenkhatte chu Ezekiela lehkhabu-ah an lungawi chiah lo a. Talmud sawi dânin, an zînga ṭhenkhat phei chuan Pathian Lehkhabu Thianghlim thu ziak dik tak ata paihchhuah an tum hial a ni. Anni chuan a bîk takin biak in inlârna hrilhfiahnaah hârsatna an tâwk a, chu chu mihring hriatthiam phâk loh thilah an puang a ni. Bible zirtu dangte chu Ezekiela hmuh Jehova biak in inlârna hian a tibuai hle hlawm bawk. Eng nge keini ve chu?

² Biakna thianghlim din thar leh aṭangin, Pathian thlarau lam biak in​—biakna thianghlim atâna Jehova biak in ang ruahmanna​—engnge ni tih hriathran theihna huam telin, Jehova chuan thlarau lam hriat thiamna êng tam takin a mite chu mal a sâwm a ni.a He thutak chabi hian Ezekiela biak in inlârna awmze tam tak hawng tûrin min ṭanpui a ni. He inlârna hrang hrang chilî​—biak in, puithiamna te, lal te, leh ram te​—i lo bih chiang lehzual ang u. Tûn laia hêngte awmzia chu eng nge ni?

Biak In leh Nangmah

3. Biak in luhna kawngkaa bang ker mawite leh a chung khuhna sâng tak aṭangin eng nge kan zir?

³ He inlârna biak in hi kan fang vêl angah inngai la. Kan pan hnaih a, luhna kawngka zaute zînga pakhat lama kailâwn pasarihah kan lâwn a ni. He luhna chhûngah, mak ti takin kan hawi vêl a. A pindan chung khuhnate chu kan chung meter 30 aia sângah a awm a! Chutiang chuan biakna atâna Jehova ruahmannaa luhna tûr teh fung sâng takte chu hriatnawntîr kan ni. Tukverh aṭanga êng lo lût chuan banga inkêr tûm thing, Pathian Lehkhathu-a felna entîr nâna hman chu a chhun êng a ni. (Sâm 92:12; Ezekiela 40:​14, 16, 22.) He hmun thianghlim hi thlarau lam leh rilru lama mi dikte tân a ni. Chumi nêna inmilin, kan biakna chu Jehova pawmtlâk ni tûrin dik taka awm zêl kan duh a ni.​—Sâm 11:7.

4. Biak ina lût thei lote tute nge ni a, hei hian eng nge min zirtîr?

⁴ Chu kaltlangna kawng sîr lehlam lehlamah chuan, vênna pindan pathum ve ve a awm a. Vêngtu chuan biak in chhûnga kan luh a phal ang em? Jehova chuan Ezekiela hnênah ram dang mi ‘thinlunga serhtan loh’ tumah luhtîr lo tûrin a hrillh a ni. (Ezekiela 40:10; 44:9) Chu mi awmzia chu eng nge ni? Pathian chuan a dânte hmangaiha chu mi mila nungtute chauh chu amah chibai bûk tûrin a pawm a ni. (Jeremia 4:4; Rom 2:29) Chutiang mite chu a biakna in, thlarau lam puan inah chuan a lâwm a ni. (Sâm 15:​1-5) 1919-a biakna thianghlim din thar leh aṭangin, Jehova lei lam inawpna pâwl chuan a nungchang dân chu a thlâwpin zawi zawiin a fiah chho zêl a ni. Duh vâng rênga a thu zâwm lotute chu a mite nêna inkâwm tûra lawm an ni tawh lo. Tûn laiah, Bible ṭanchhan inlamlêt lo thilsual titute hnawhchhuahna chu kan biakna vawng thianghlimtu leh tifaitu-ah a ṭang a ni.​—1 Korinth 5:13

5. (a) Thu Puan 7:​9-15-a ziah Ezekiela inlârna leh Johana inlârnaah eng inanna nge awm? (b) Ezekiela inlârnaa hnam 12-te hungchhûng pâwn zâwka rawngbâwlna hian tute nge a entîr?

⁵ Kaltlangna kawng chuan mite’n Jehova an biakna leh an fakna hung chhûng pâwnta zâwk a pawh a ni. Hei hian tirhkoh Johana hmuh inlârnaa ‘achhûn azâna biak ina’ Jehova chibai bûktu ‘mipui nasa takte’ min hriatnawntîr a ni. Tûm thing chu inlârnaah chiang taka sawi a ni ve ve a. Ezekiela hmuh inlârnaah chuan chûngte chuan luhna kawngka bangte chu a cheimawi a. Johana hmuh inlârnaah chuan Jehova chibai bûktuten tûmkau an keng a, chu chuan Jehova faknaa an hlimna leh Isua Krista an Lal anga an lawmna a entîr a ni. (Thu Puan 7:​9-15) Ezekiela hmuh inlârna thu-a Israel hnam 12-te chuan ‘berâm dangte’ an entîr a ni. (Johana 10:16. Luka 22:​28-30, khaikhin rawh.) A Lalram puanchhuahna hmanga Jehova faknaa hlimna hmutute zînga mi i ni ve em?

6. Hung chhûng pâwn zâwka eina pindan thil tum chu eng nge ni a, hei hian eng chanvo nge berâm dangte a hriatnawntîr theih?

⁶ Hungchhûng pâwnta zâwk kan fanin, mite’n an duh thua thilpêkte an eina pindan 30 kan hmu a ni. (Ezekiela 40:17) Tûn laiah, berâm dangte chuan rana inthawina chu an hlân lo va; mahse, thlarau lam biak inah chuan kut ruakin an kal lo. (Exodus 3:​15, khaikhin rawh.) Tirhkoh Paula chuan: “Tichuan [Isua] zârah chuan faka inthawina hi Pathian hnêhah i hlân fo vang u, chu chu a hming ṭanna hmuite rah chu a ni. Nimahsela thil tihṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a,” tiin, a ziak a ni. (Hebrai 13:​15, 16; Hosea 14:2) Chutiang inthawina Jehova hnêna hlân chu chanvo ropui tak a ni.​—Thufingte 3:​9, 27.

7. Biak in tehna hian eng nge min hriattîr?

⁷ Ezekiel-a chuan vântirhkoh pakhatin he inlârna biak in a teh lai chu a thlîr reng a. (Ezekiela 40:3) Chutiang chiah chuan, tirhkoh Johana pawh: “Tho la, Pathian biak in, maichâm nên a chhûnga betute nên teh rawh,” ti a hrilh a ni. (Thu Puan 11:1) He tehna awmzia hi eng nge ni? Chûng thu pahnihah chuan hei hi biakna thianghlim chungchânga a thiltumte tihfamkimna ata Jehova chu engmahin a dang thei lo tih tichiangtu a ni. Chutiang bawkin tûn laiah pawh, biakna thianghlim dintharlehna chu engmahin​—sawrkâr chak takte hnên ata nunrawng taka dodâlna pawhin​—a ti tâwp thei lovang tih kan chiang thei a ni.

8. Hung chhûngnung kawngkaah tunge lût a, hêng hian eng nge min hriatnawntîr?

⁸ Hungchhûng pâwnta zâwk kan kal tlangin, hung chhûngnung luhna tûr kawngka pathum kan hmu a ni; chhûngnung kawngka intlarte chu pâwnta zâwk kawngka nên a intiat chiah a ni. (Ezekiela 40:​6, 20, 23, 24, 27) Puithiamte chauh chu hung chhûngnungah chuan an lût thei a ni. Hriak thihte chuan vân lam tehna leh dânte an tlin tûr a ni a; mahse, chutiang tehna leh dânte chuan Kristian dik zawng zawng a kaihruai tûr a ni tih chhûngnung kawngkate chuan min hriatnawntîr a ni. Mahse, puithiamte hna chu eng nge ni a, tûn laiah eng awmzia nge a neih?

Puithiam Rinawmho

9, 10. Ezekiela hmuh inlârnaa puithiamhoin an lo entîr tawh “lal puithiamho” ten thlarau lam châwmna zirtîrna engtin nge an neih?

⁹ Kristian hun hmain, puithiamte chuan biak inah hna hahthlâk tak an lo thawk ṭhîn a. Inthawina ran talh, maichâma hlân, leh an puithiampuite leh mipuite ei tûr chhawpsak hi hna hahthlâk tak a ni. Mahse, hna pawimawh dang an nei. Jehova’n puithiamte chungchângah thu a pe a: “Ka mite chu thil serh leh serh lo danglamzia an zirtîr tûr a ni, thil thiang leh thiang lo an thliar hrantîr tûr a ni,” tiin.​—Ezekiela 44:23; Malakia 2:7.

¹⁰ Hriak thihten “lal puithiamho” khat anga biakna thianghlim atâna an thawhrimna leh an inngaitlâwm rawngbâwlna chu i ngaisâng em? (1 Petera 2:9) Hmân lai Levia puithiamte angin, thlarau lam inkaihhruainaah hma an hruai a, Pathian mithmuhah eng nge thianghlim leh pawm tlâk ni a, eng nge ni lo tih hrethiam tûrin mite an ṭanpui a ni. (Matthaia 24:45) Bible ṭanchhan thuchhuahte leh Kristian inkhâwmnate leh inkhâwmpuite kal tlanga lo kal chûng zirtîrnate chuan mi maktaduai tam takte chu Pathian nêna lo inrem tûrin a ṭanpui a ni.​—2 Korinth 5:20

11. (a) (a)Puithiamte chanvo-a faina pawimawhzia engtin nge uar takin Ezekiela’n a sawi? (b) Hun hnuhnûngah engtin nge hriak thihte thlarau lam hriatnaa tihfai an nih?

¹¹ Nimahsela, puithiamte chuan mi dangte fai tûra zirtîr mai ni lo; anmahni pawh an thianghlim ngei tûr a ni. Chuvângin, Ezekiela’n Israel puithiamho atâna then thianghlim dân a lo hmu lâwk a ni. (Ezekiela 44:10-16) Chutiang chiahin, thil thleng chanchin chuan 1918-ah Jehova chu a thlarau lam biak inah “tithianghlimtu angin” a ṭhu a, hriak thih puithiamho a endik a ni tih a lantîr a ni. (Malakia 3:​1-5) Thlarau lama faia ngaihte emaw, inlamlêt tûn hmaa milem betute emaw chu a thlarau lam biak ina an rawngbâwlna chanvo chelh chhunzâwm zêl phalsak a ni. Chutichung pawhin, mi dangte ang bawkin, hriak thih mimalte pawh an thianghlim lo thei a ni​—thlarau lamah leh nungchang lamah chuan. (Ezekiela 44:​22, 25-27) “Khawvêl bawlhhlawh kai lova” awm reng tûrin an thawhrim a ngai a ni.​—Jakoba 1:27. Marka 7:​20-23, khaikhin rawh.

12. Engvângin nge hriak thihte hnathawh kan ngaihsân ang?

¹² Mi tin kan inzâwt thei ang, ‘Hriak thihten rinawm taka an rawngbâwlna kum tam tak chhûnga entawn tûr an lo siam chu ka ngaisâng em? An rinna ka entawn em?’ tiin. Mipui nasa tak zînga mite chuan hriak thihte chu he leiah, an zîngah an awm reng dâwn lo tih hriat reng a ṭha a ni. Ezekiela hmuh inlârnaah puithiamte chungchâng chu Jehova’n: “Israel-ah chuan engmah in pe tûr a ni lo, an chan chu keimah ka nih hi,” tiin, a sawi a ni. (Ezekiela 44:28) Chutiang chiah chuan, hriak thihte chuan leiah hian hmun nghet an nei lo. Vân lam rochan an nei a; tin, mipui nasa takte chuan he leia an awm chhûnga anmahni ṭanpui leh fuih chu chanvo hlu takah an ngai a ni.​—Matthaia 25:​34-40; 1 Petera 1:​3, 4.

Lal—Tu nge A Nih?

13, 14. (a) Engvângin nge lal chu berâm dang a nih? (b) Tu nge lal chuan a entîr?

¹³ Tûnah zawhna tuiawm tak a lo piang ta. Chuti anih chuan, lal chuan tu ai nge a awh? Mimal ang leh pâwl anga a sawi ve ve avângin, ani hi mihring pâwlho pakhat aiawh angin kan pawm thei ang. (Ezekiela 44:3; 45:​8, 9) Mahse, tu nge? Chiang takin, hriak thihte chu an ni lo. Inlârnaah hian, puithiamho nên inhnaih takin rawngbâwl mah se, an zînga mi a ni lo. Puithiamho ang lo takin, ani chu ram rochan pêk a ni a; chuvângin, vânah ni lo, he leiah hmabâk a nei a ni. (Ezekiela 48:21) Chu bâkah, Ezekiela 46:10 chuan: [Puithiam hnam ni lote biak in hungchhûng pâwnta zâwka] “an luh chuan lal chu an zîngah a lût ve ang a, an chhuah chuan a chhuak ve tûr a ni,” a ti a. Ani chu hung chhûngnung zâwkah chuan a lût lo va; mahsela, hungchhûng pâwnta zâwkah chibai bûkin, mipuite rualin a lûtin a chhuak ve a ni. He thilte hian fiah takin lal chu mipui nasa tak, berâm dangte zîngah a dah ta a ni.

¹⁴ Chiang takin, lal chuan Pathian mite zîngah mawhphurhna ṭhenkhat a nei a ni. Ani chu hungchhûng pâwnta zâwk, Khaw Chhak lam Kawngkâ sumhmunah a ṭhu a ni. (Ezekiela 44:2, 3) Hei hian enkawlna dinhmun, Israel rama khawpui kulh kawngkaa ṭhua rorêltu upate neih ang chu a kâwk a ni. (Ruthi 4:​1-12; Thufingte 22:22) Berâm dangte zînga tuten nge tûn laiah enkawlna hna chelh? Thlarau thianghlima ruat lei lam beiseina nei upate an ni. (Tirhkohte 20:28) Chuvângin, lal pâwlho chu khawvêl tharah enkawlna dinhmun chelha rawngbâwl beiseina nên tûn aṭanga buatsaih an ni.

15. (a) Ezekiela inlârna hian mipui nasa tak zînga tel upate leh hriak thih puithiamte inkâr inlaichîn dân engtin nge a tihchian? (b) Hriak thih upa ten Pathian lei lam inawpnaah eng hma hruai tûr nge an neih?

¹⁵ Chuti a nih chuan, tûn laia hriak thih puithiamho leh mipui nasa tak zînga tel, enkawlna dinhmun chelh upate inlaichînna chu eng nge ni? Ezekiela hmuh inlârna chuan hriak thihten thlarau lamah hma an hruai laiin, mipui nasa tak zînga upate chuan ṭanpui theihna leh intukluhna chanvo an nei a ni tih a kawhhmuh a ni. Engtin maw? Inlârnaa puithiamte chu thlarau lam thila mipuite zirtîr tûrin mawhphurhna pêk an ni tih hre reng ang che. Thubuai-te rêltu anga ṭang tûra hrilh an ni bawk. Chu bâkah, Levia chite chu biak in kawngkhârte “vêng” tûra chanvo pêk an ni bawk a ni. (Ezekiela 44:​11, 23, 24) Chiang takin, lal chu thlarau lam rawngbâwlnaah leh puithiamte kaihruainaah a intulût tûr an ni. Chutichuan, tûn laia biakna thianghlimah hriak thihten hma an hruai hi thil inâwm tak a ni. Entîr nân, Jehova Hriatpuitute Awptu Pâwla mite chu an zîng ata thlan a ni. Chûng hriak thih rinawm upate chuan insiam mêk lal pâwlho chu kum sâwm rual tam tak an zirtîr tawh a, he pâwlho zînga mi lo ni tûrte chu lo thleng tûr Pathian khawvêl thara an thuneihna a kima hlan a nih hun atân an buatsaih a ni.

16. Isaia 32:​1, 2 sawi angin, upa zawng zawngte chu engtianga thawk tûr nge an nih?

¹⁶ Lal pâwlho anga mawhphurhna zau zâwk atâna intlar, he pâwlho zînga mi lo ni tûrte chu eng ang enkawltute nge an nih? Isaia 32:​1, 2-a hmuh hrilh lâwkna chuan: “Ngai teh, . . . dik taka tiṭhîn hotute an lo chhuak bawk ang. Thlipui laka bîkna hmun ang leh thlihrâng laka inhumhimna ang a ni ang; thlalêra lui luang ang leh ramrova lungpui lian tak hlim ang mai chu,” a ti a. He hrilh lâwkna hi tûn laiah a thleng famkim a ni​—Kristian upate, hriak thih leh berâm dangten chutiang lunghnualna leh tihduhdahna ‘thlihrângte’ lak ata an berâm rualte vênghim tûra hna an thawhin.

17. Kriatian berâm vêngtuten engtin nge an inthlîr ang a, engtin nge an berâm ten an mahni an thlîr ang?

¹⁷ Hebrai ṭawnga awmze inang nei thumal “hotute” leh “lal” tih hi, mihring nihna chawisân nâna hman a ni lo. Chûngte chuan, Pathian berâmte enkawlnaa hêng mite mawhphurhna a hrilhfiah mah zâwk a ni. Jehova chuan khauh takin: “Aw, Israel lalte u, tâwk tawh rawh se, pâwngnêkna leh inramna chu bân daih ula, fel taka rêl leh dik taka tih chîng tawh ula,” tiin, a vaukhân a ni. (Ezekiela 45:9) Tûn lai upa zawng zawngte tân hetiang fuihna chu rilrua vawn tlat a ṭha a ni. (1 Petera 5:​2, 3) Berâm rualte chuan, Isua’n a pêk berâm vêngtute chu, ‘mihringte hnêna thilpêkte’ angin an pawm ve thung a ni. (Ephesi 4:8) An miziate chu Pathian thâwkkhum Thu-ah dah luh a ni a. (1 Timothea 3:​1-7; Tita 1:​5-9) Chuvângin, upate kaihhruaina chu Kristiante’n an zui a ni.​—Hebrai 13:7.

18. Tûnah, nghahfâk lalhote mawhphurhna ṭhenkhatte chu eng nge ni a, an hmaah eng mawhphurna nge an neih bawk ang?

¹⁸ Bible hun laiin, lal ṭhenkhatte chuan thuneihna tam tak an nei a, ṭhenkhatte erawh chuan an nei tlêm a ni. Tûn laiah, mipui nasa taka upate chuan mawhphurhna chi hrang hrang zau takin an nei a ni. Ṭhenkhat chuan kohhran pakhatah rawng an bâwl a; a dangte erawh chuan bial kantu angin kohhran tam takah rawng an bâwl a; a dang lehte erawh chu Branch Ngaihtuahtu Pâwl zînga mi niin ram pumpuiah rawng an bâwl a; a dangte chuan Awptu Pâwl-a ngaihtuahtu pâwl chi hrang hrangah ṭanpuina tlang takin an pe a ni. Khawvêl tharah, Isua chuan leia Jehova chibai bûktute hruai tûrin, ‘leichung zawng zawnga milianho’ a dah ang. (Sâm 45:16) Rinhlelh rual lovin, tûn lai upa rinawmte zîng ata tam tak a thlang ang. A chhan chu hêng mite hi tûnah an infinfiah mêk a, ani chuan khawvêl thara lal pâwlho chanvo a hriattîr hunah hma lam huna chanvo ropui zâwk kawltîr tûr mi tam tak a thlang ang.

Tûn Laia Pathian Mite Ram Chu

19. Ezekiela hmuh inlârnaa ramin engnge a entîr?

¹⁹ Ezekiela hmuh inlârna hian din thar leh Israel ram thu a sawi bawk a ni. He inlârna hmêlhmang hian eng nge a entîr? Dintharlehna hrilhlâwkna dangte chuan ram, Israel, chu Eden huan ang paradis a nih tûr thu a sawi lâwk a ni. (Ezekiela 36:​34, 35) Tûn laiah din thar leh “ram” chu kan chên a, kawng khatah chuan hei hi Eden huan ang a ni bawk. Chutiang bawkin, kan thlarau lam paradis chungchâng kan sawi fo a ni. Vênnainsâng chuan kan “ram” chu Pathian mi thlante “rawngbâwlna ram” tiin, a hrilhfiah a ni.b Jehova chhiahhlawh chu khawi hmunah pawh awm se, chu ram din tharah a awm a ni: Isua Krista hniakhnung zuina hmanga biakna dik vuan tlat tûra a beih hrâm hrâm phawt chuan.​—1 Petera 2:21.

20. Ezekiela hmuh inlârnaa “ram zuat serh tawh” aṭangin thu bul eng nge kan zir theih a, engtin nge he thu bul hi kan hman ang?

²⁰ “Ram zuat serh tawh” tia vuah ram chanpual chungchâng chu eng nge ni? Hei hi khawpui leh puithiamho ṭanpui nâna mipuite ram zuat a ni. Chutiang bawkin, “rama mi zawng zawngte” chuan lal tân ram hmun khat an zuat tûr a ni. Hei hian tûn laiah eng awmzia nge a neih? Pathian mite chuan sakhaw hruaitu pâwlhote hlawh avânga rit an phur tûr a ni lo rêng rêng a. (2 Thessalonika 3:8) Upate hnêna pêk ṭanpuina chu a bul berah chuan thlarau lam thilah a ni mah zâwk a ni. Hei hian a rawngbâwlna chelh mêka ṭanpuina te, thawhho duhna leh intukluhna rilru lantîr te a huam tel a ni. Chutichung pawhin, Ezekiela hun lai angin, he thil hlan hi mihring tumah hnênah ni lo, “LALPA hnêna” pêk a ni.​—Ezekiela 45:​1, 7, 16.

21. Ezekiela hmuh inlârnaa ram ṭhendarhna aṭangin eng nge kan zir theih?

²¹ He ram din thar lehah lal leh puithiamhote chauh hi hmun ruat nei an ni lo va. Ram ṭhendarhna chuan hnam 12 zînga mi tin ten rochun him an nei ṭheuh tih a lantîr a ni. (Ezekiela 47:​13, 22, 23) Chuvângin, mipui nasa takte chuan tûnah thlarau lam paradis-a awm hmun an neih mai bâkah lei lam Pathian Lalram an rochun hunah pawh ram ruat bîk an dawng bawk ang.

22. (a) Ezekiela inlârnaa khawpuiin eng nge a entîr? (b) Khawpui sîr tina kawngka nei aṭang chuan eng nge kan zir theih?

²² A tâwpah chuan, inlârnaa khawpui hian eng nge a entîr? Ram “bawlhhlawh” zînga a din avângin vân lam khawpui chu a ni lo. (Ezekiela 48:​15-17, NW) Chuvângin, lei lam thil engemaw a ni ngei tûr a ni. Awle, khawpui chu eng nge ni? Hei hian mite ho khat anga lo kal khâwma inawpna pâwl engemaw an din tih ngaih dân a keng tel lo vem ni? Keng tel e. Chuvângin, khawpui chuan lei lam mipui fela insiam tûr zawng zawngte ṭangkaipui, lei lam inawpna a entîr niin a lang a ni. Chu chuan “leithar” lo awm tûrah chuan a theih tawpin a thawk ang. (2 Petera 3:13) Khawpui sîr tina kawngka, hnam tin tâna pakhat zêlte chuan a inhawnna chu ṭha takin a tehkhin a ni. Tûn laiah, Pathian mite chu thurûk duh, a rûka inawpna hnuaiah an awm lo. Mawhphurtu unaute chu nêlawm tak an ni tûr a ni a; anni kaihruaitu thu bulte chu mi tin hriat a ni. Hnam zawng zawnga miten khawpui ṭanpui nâna lei an lehna chuan berâm dangten khawvêl pumpuia Pathian mite tâna inawpna ruahmanna chu sum leh pai thlenga an ṭanpuina min hriatnawntîr a ni.​—Ezekiela 48:​19, 30-34.

23. Zir leh tûrah eng nge kan ngaihtuah tûr?

²³ Nimahsela, biak in hungchhûng aṭanga lui luang chungchâng chu eng nge ni? Chu chuan tûn laiah leh hun lo thleng tûrah eng nge a entîr tih chu he thu ziak inzawma a pathumna leh a tâwpna ni bawkah chuan sawiho a ni ang.

[Footnote-te]

Ennawnlehna

◻ Ezekiela hmuh inlârnaa biak in khân eng nge a entîr?

◻ Biak ina puithiam rawngbâwlnain tunge a entîr?

◻ Lalhote chu eng nge an nih a, an mawhphurhna ṭhenkhat te eng nge ni?

◻ Ezekiela hmuh inlârnaa ram chu eng nge ni a, eng kawngin nge hnam 12-te hnêna pêk a nih?

◻ Khawpuiin eng nge a entîr?

[Diagram/Map on page 15]

(A lan dân tûr dik tak hriat nân, a lehkhabu en rawh)

Ezekiela inlârnaa entîr anga ram pêkchhuahte

HNAM SAWM PAHNIHTE

NAPHTALIA

MANASEA

EPHRAIMA

Jehova biak in

Puithiam chanpual

Tuipui

Zau

DANA

ASERA

REUBENA

JUDA

LAL CHU

BENJAMINA

SIMEONA

ISAKARA

ZEBULUNA

GADA

[Diagram]

Levia chanpual

A. “Jehova ngei chu chutah chuan a awm” (Jehova-Sama); B. khawpui chu ram ṭha tak a ni

Galili tuipui

Jordan Luipui

Tuipui Al

B A B