I Zirtîrnaah Ding Nghet Tlat Rawh

“Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute i chhandam dâwn zuk nia.”—1 TIMOTHEA 4:16.

1, 2. Engvângin nge tûn laiah zirtîrtu ṭha­hnêm­ngai takte mamawh hle an nih?

“KAL u la . . . hnam tina mi zirtîrahte siam ula, . . . thu ka pêk zawng zawng che u pawm tûr­in zirtîr rawh u.” (Matthaia 28:19, 20) He Isua Krista thu pêk hmang hian, Kristian dik zawng zawngte chu zirtîrtu an ni tûr a ni. Mi thinlung ṭhate chu a tlai lutuk hmaa Pa­thian hriatnaa lo kal tûra ṭanpui tûrin zirtîrtu ṭha­hnem­ngai takte chu mamawh hlê an ni. (Johana 17:3; Rom 13:11) Tirhkoh Paula chuan: “Thu chu hril rawh; a hun­ah te, a hun lovah te pawh bei zêl rawh,” tiin, a ngên a. Hei hian kohhran chhûng leh pâwna zirtîrna a phût a ni. Dik takin, thuhrilhna hnaah chuan Pathian chanchin puanna mai aia tam a kaihhnawih a. Tuina neite zirtîr lo ni tûr chuan zirtîrna ṭangkai chu a pawimawh a ni.

² “Hun khirh tihven harsa takah” kan chêng a. (2 Timothea 3:1, NW) Mite chu zirtîrna dik lo leh khawvêl finna hmangin an ngaih dân thlâk luihtîrin an awm mêk a ni. Mi tam takte chu “an hriatnaah chuan an lo thim a” tin, ‘inhriat chhuah theihna rêng rêng an nei tawh lo’ a ni. (Ephesi 4:18, 19) Ṭhenkhat chuan thinlung hliam nâ tak an nei a bawk. A dik a ni, mipuite chu ‘vêngtu nei lo berâmte anga hreawm leh darhin an awm’ a ni. (Matthaia 9:36) Nimahsela, “zirtîr thiamna” hmangin mi thinlung ṭhate chu thlâkthleng an mamawhte siam tûrin kan ṭanpui thei a ni.

Kohhran Chhûnga Zirtîrtute

3. (a) Zirtîr tûra Isua thupêk chuan eng nge a huam tel? (b) Kohhran chhûnga zirtîr tûra mawh­phurh­na bul tuin nge nei?

³ In lama Bible zirpui remruatna hmangin mi nuai têlte chuan mimal zirtîrna an dawng a ni. Tichuan, baptisma a chan hnuah mi thar chu “zung kai leh nghahchhan neia” lo awm tûrin ṭanpuina nasa zâwk an mamawh a. (Ephesi 3:17) Isua thupêk Matthaia 28:​19, 20 a chhinchhiah kan hlenna leh mi tharte Jehova inawpna-a kan khaihhruai chuan, kohhran chhûnga zirtîr nihna aṭangin hlâwkna an nei a ni. Ephesi 4:​11-​13 sawi angin mite chu “rawngbâwl hna thawk tûra a mi thianghlimte tihfamkim nân Krista taksa siam ṭha tûrin kohhran châwmtu leh zirtîrtu atân te” thawk tûra thlan an ni. A châng chuan, an zirtîr thiamna chuan ‘dawhthei taka zirtîr chunga an thiam loh hriattîr te, zilh te, fuih tûr te-a’ mamawh chu a huam tel bawk a ni. Zirtîrtute hna chu a pawimawh êm êm avângin, Korinth mite hnêna lehkha a ziah khân, Paula chuan zirtîrtute chu tirhkohte leh zawlneite dawttu chiahah a dah a ni.​—1 Korinth 12:28.

4. Engtin nge zirtîr tûra theihna chuan Hebrai 10:​24, 25 a chhinchhiah Paula fuihna thu zawm tûra min ṭanpui?

⁴ A dik a ni, Kristian zawng zawngte chu upa-ah te, a nih loh leh enkawltu-ah te an ṭang lo. Nimahsela, mi zawng zawngte chu “hma­ngaih leh thil ṭha tiha” inchawk tho tawn tûra fuih an ni. (Hebrai 10:​24, 25) Chutianga inkhâwmna-a tihnaah chuan ṭha taka inpuahchah te, midangte fuih thei leh tichak thei thinlung taka a chhânna pêk te a tel a ni. Thil tawn ngah Lalram thuchhuahtute chuan thlawhhma rawngbâwlna-a mitharte nên an kal hovin, an hriatna leh an thiltawnte an ṭawmpuina hmangin ‘thil ṭha ti a inchawktho’ tûrin an ṭanpui thei bawk ang. Chutiang hunah leh hun remchâng tawn chawp hunah te kaihhruaina hlu tak chu pêk theih a ni. Entîr nân, hmeichhe puitlingte chu “ṭha lam zirtîrtute” ni tûrin fuih an ni.​—Tita 2:3-5.

Ring Tûra Hmin

5, 6. (a) Engtin nge Kristianna dik chu biakna dik lo nên a inkalh? (b) Engtin nge upate’n mi tharte chu thutlûkna fing siam tûrin an ṭanpui ang?

⁵ Kristianna dik chu sakhaw dik lo, an pâwla mite thinlung thunun tuma zawngtu mi tam takte nên chuan a inkalh tlat a ni. Isua leia a awm lai khân sakhaw hruaitute chuan mihring siam thuro chhiah hleih nei takte hmangin mi­hring nun dân kawng tin rêng deuhthaw chu thunun tumin an bei nasa hle a. (Luka 11:46) Chutiang bawk chuan Kristianna ram sakhaw hruaitute chuan an ti fo ṭhîn a ni.

⁶ Nimahsela, biakna dik kan “rawngbâwlna âwm rêng” kan hlan chu “inthawina thiang­hlim” a ni. (Rom 12:1) Jehova chhiahhlawhte chu an ‘thu hriatah an awm reng’ a ni. (2 Timothea 3:​14, 15) Eng emaw châng chuan, hma­hruaitute chuan kohhran hnathawhna tluang taka a kal nân thurâwn ṭhenkhat leh thil tih dân phung chu an ṭan hmasak a ngai mai thei a ni. Kristian puite tâna thutlûkna siam tûra zawn aiin, upate chuan “chhia leh ṭha fiah tûrin” an zirtîr a ni. (Hebrai 5:​14) Upate chuan “rinna leh zirtîrna ṭha” hmanga kohhran chawmna chu an thawk hmasa ber a ni.—1 Timothea 4:6.

I Zirtîrnaah Awm Reng Rawh

7, 8. (a)Engtin nge theihna tâwk zêlin miten zirtîrtu hna an thawh theih? (b) Mimal beihna chu zirtîrtu ṭangkai tak lo ni tûrin a pawimawh a ni tih engin nge entîr?

⁷ Tichuan, zirtîr tûra thu min pêk tlângpuiah khân i lo kîr leh ila. He hnaa chanvo nei tûr hian thil eng emaw thiam bîk, lehkha thiam, a nih loh leh theihnate phût a ni em? A ṭul ber lo. A pawi­mawh ber chu, he khawvêl pumpuia zirtîrna hna hi mimal tinte theihna tâwk zêla pang­ngai taka thawh a ni. (1 Korinth 1:​26-29) Paula chuan: “Nimahsela thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni,” tiin, a sawifiah a ni. (2 Korinth 4:7) Khawvêl pumpuia-thuhrilhna hna hlawhtlinna nasa tak hlimawm tak hi Jehova thiltihtheihna nemnghehna a va ni em!

⁸ Nimahsela, ‘hna thawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûra ṭhahnem ngai’ mi lo ni tûrin inhuam taka mimal beihna a ngai a ni. (2 Timothea 2:​15) Paula chuan: “Nangmah leh i zirtîrnaah chuan fîmkhur la; chung thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia,” tiin, Timothea chu a ngên a ni. (1 Timothea 4:​16) Kohhran chhûngah ani emaw, kohhran pâwnah ani emaw engtin nge mi a zirtîrnaah a awm reng theih ang? Chutiang tihna chuan thiamna chungchuang bîk emaw thiam taka thil tihdân hmanga zirtîrna chu a kaihhnawih ṭûl tak a ni em?

9. Pianken theihnate aia pawimawh zâwk chu eng nge ni?

⁹ Isua’n Tlâng chunga a Thu sawi hmingthang takah zirtîrna dân hriatthiam awl mak chungchuang takin a lo lantîr tawh ngei a ni. Thu a sawi zawh chuan, “mipuiten a thu zirtîr chu mak an ti hle a.” (Matthaia 7:​28) Dik takin, kan zînga tumahin Isua tih anga ṭha chuan kan zirtîr thei lo va; mahse, zirtîrtu ṭangkai tak ni tûr chuan thu sawi thiam tak kan nih a ṭûl chuang lo a ni. Joba 12:​7-a sawi anga, “rante” leh “chunglêng savate” tak ngial pawhin ngawi renga an zirtîr theih avângin! Pianken theihna emaw, themthiamna emaw aia pawimawh zâwk kan neih ngei tûr chu “mi eng ang nge” kan nih ​—eng ang ṭhatnate nge kan neih tih leh zirlaiin a entawn theih thlarau lam thil chîn chhawm eng nge kan neih tih chu a ni.—2 Petera 3:​11; Luka 6:​40.

Pathian Thu Zirlaite

10. Pathian Thu zirlai a ni tih entawn tûr ṭha tak engtin nge Isua’n a lo siam?

¹⁰ Pathian Lehkhathu thutak zirtîrtu ṭangkai tak chu Pathian Thu zirlai a ni ngei tûr a ni. (Rom 2:​21) He mi chungchângah hian Isua Krista chuan entawn tûr ṭha chungchuang a lo siam a. A rawngbâwl hun chhûngin, Isua khân Hebrai Pathian Lehkhathute bu chanve vêl chu a thu chângin a tum te sawiin emaw, a lanchhuahtîr emaw ṭhîn a ni.a A Pathian Thu hriatzia chu kum 12 chiah a nih laia, “zirtîrtute zînga ṭhua an thu lo ngaithlaa lo zâwtin” amah hmuh a nih khân a chiang a ni. (Luka 2:​46) A lo puitlin pawh­in, Pathian Thu chhiarna hmun in­khâwmna ina kal chu Isua tihdân pângngai a ni.​—Luka 4:16.

11. Eng chîn dân ṭha zir nge zirtîrtuin a chhawm ang?

¹¹ Pathian Thu thlahlel taka chhiartu i ni em? Taima taka hetianga i tihna hmangin “LALPA ṭih nachâng i lo hria ang a, Pathian hriatna chu i chhar chhuak ang.” (Thufingte 2:​4, 5) Chu­vâng­in, thil chîn ṭha zirna chu tihmasawn rawh. Nitin Pathian thu ṭhenkhat chhiar tum ang che. (Sâm 1:2) Vênnainsâng (English) leh Harh Rawh! (English) chhuak apiangte hi i dawn veleha chhiar chu chin ṭhanah nei la. Kohhran in­khâwm­na­ah­te te i rilru pe la, hriat chhuah tumin fîmkhura chhuiin zir ang che. Zirna hmangin ‘engkim fel takin chhui’ la; tichuan, i zirtîrin thil a nihna bâka sawi leh dik lo taka sawite i pumpelh thei a ni.​—Luka 1:3.

Zirlaite Hmangaihna leh Zahna

12. A zirtîrte chunga Isua rilru put dân eng nge?

¹² Ṭhatna pawimawh dang leh chu i zirtîrte chunga rilru put dân dik a ni. Pharisaite chuan Isua thu ngaithlatute chu an hmusit hle a. “Hêng dân hre lo mipuite tehchai hi ânchhe dawng an ni asin,” tiin, an sawi a ni. (Johana 7:​49) Mahse, Isua chuan a zirtîrte chu hmangaihna thûk tak leh zahna a nei a ni. A ni chuan: “Bâwih ka ti leh tawh lo vang che u; a pu thiltih bâwihin a hre si lo; ṭhiante ka ti tawh zâwk ang che u; Pa hnêna thil ka hriat zawng zawng in hnênah ka puang tawh si a,” tiin, a sawi a ni. (Johana 15:15) Hei hian Isua zirtîrte’n zirtîrna hna an thawh dân tûr a entîr a ni.

13. A thu ngaithlatute chungchâng Paula’n engtin nge a ngaih?

¹³ Entîr nân, Paula chuan a zirlaite nên an inlaichînna-ah sumdâwnna ang mai, nêl­awm­loh­na chu a chhawm nung lo va. A ni chuan Korinth mite hnênah: “Kristaah chuan zirtîrtu sîngkhat nei mah ula, pa zawng tam tak in nei si lo a ni; keiin Krista Isuaah chuan Chanchin Ṭhain ka hring che u a nih kha,” tiin, a sawi a ni. (1 Korinth 4:​15) Paula chuan a thu ngathlatute a zilhnaah mittui vawi engemaw zât a sêng hial a! (Tirhkohte 20:31) Tin, a pangngai bâk chhamin dawhtheihna leh ngilneihna a lantîr bawk a ni. Chuvângin Thessolonika mite hnênah: “Nu nau pawmin ama fate a duat angin in zîngah nunnêm takin kan awm zâwk kha,” tiin, a sawi thei a ni.​—1 Thessalonika 2:7.

14. Engvângin nge kan Bible zirlaite a mimal taka tuipui a pawimawh êm êm? Sawi fiah rawh.

¹⁴ Isua leh Paula i entawn em? Kan zirlaite tihtak zeta hmangaihna chuan theihna keimahnia awmsa ai pawhin tlâkchham engpawh a siam ṭha zâwk thei a ni. Kim lohna engpawh theihna aia ṭha zâwkin a siam thei a ni. Kan Bible zirlaite chuan anmahni mimal ṭheuhah tihtakzeta tuina kan neih chu an hria em? Anmahni hriatna nei thei tûrin hun kan inpe em? Kristian hmeichhe pakhatin a zirlai thlarau lama hmasâwn tûra ṭanpuinaah harsatna a neihin: “Thil engin emaw a tilungngai che em ni?” tiin, ngilnei takin a zâwt a. Nu chuan a rilru tâwtna zawng zawng leh a thil vei tam takte chu a sawi chhuak ṭan ta a ni. Chu hmangaih taka inkawmna chuan chu hmeichhe tân chuan thil ṭha a thlentîr a ni. Chutiang dinhmunah chuan, Pathian lehkhathu ngaihtuah leh thlamuanna thu te leh fuihna thu te a inhmeh a ni. (Rom 15:4) Fuih a ni chung pawh­in, Bible zirlai chuan muangchângin hma a sâwn mai thei a; mahse, insumzawhloh avâng­in kristian ni lo nun kawng ṭhenkhat chu a la chîng reng mai thei a ni. Chutiang mite nêna hnaih taka inkawm lutuk chu a finthlâk lovang. Kristian dik tak ramri chu vawn tlat tûr a ni.​—1 Korinth15:33.

15. Engtin nge kan Bible zirlaite hnênah zahna kan lantîr theih ang?

¹⁵ Kan zirlaite zahna chuan an mimal nun thunun tumna a huam tel lo a ni. (1 Thessalonika 4:​11) Entîr nân, hmeichhia innei si lo va mipa nêna khawsa kan zirpui mai thei a, naupangte pawh an nei a ni mahna. Pathian hriatna dik a lo neih chuan, nu chuan thilte chu dik taka Jehova nêna ruahman a duh ta a ni. (Hebrai 13:4) Chu pa chu a nei ang nge a lak aṭangin a inthiarfihlîm ang? Thlarau lam tuina nei lo emaw tuina chhete chauh nei pasala neih chu a hmasâwnna dâltu a ni dâwn tiin kan ngai bur mai thei a ni. Kawng leh lamah chuan, a fate hma khua ngaihtuahna avângin a neih chu a ṭha zâwk ang tiin, kan ngaihtuah mai thei bawk. Eng thil thlengah pawh, zirlaite nuna inrawlh leh chutiang thila keimahni ngaih dân kengkawh tûra tum chu hmangaihlohna leh zah lohna a ni. A tâwpah chuan, amah chauh chu thutlûknain a nghawng chhuaha nung tûr chu a ni. Chuvângin, chutiang zirlai chu a “hriat theihnate” chu hmang tûrin leh atân eng nge a tih ang tih titlu tûra zirtîr chu a ṭha ber mai lovang maw?​—Hebrai 5:14.

16. Pathian pâwlho chungah engtin nge upaten hmangaihna leh zahna an lantîr theih?

¹⁶ Hmangaihna leh zahna nêna pâwlho cheibawl chu kohhrana upate tân a pawimawh zual a ni. Paula chuan: “Chuvângin a âwm tâwk chu ti tûrin thu pêk che Kristaah chuan ngam êm êm mah ila, hmangaihna avângin (Paula putar meuh ka ni a, tûnah Krista Isua mi tâng ka lo ni ta na a) a ngenin ka ngen zâwk a che,” tiin, Philemona hnêna a lehkha ziakah a sawi a ni. (Philemona 8, 9) Engemaw châng chuan, kohhran chhûngah beidawnna dinhmun a lo awm mai thei a. Nghehna chu thil tûl tak tûr a ni. Paul­a chuan Tita hnênah: ‘thutak hawisan ṭhînte chu rinnah chuan an dik theihna tûra na taka zilhhau tûrin’ a ngên a ni. (Tita 1:​13,14) Chutiang a nih pawhin, enkawltute chuan kohhranah ngilnei lo taka ṭawng lo tûrin an fimkhur a ngai a ni. Paula chuan: “Lalpa bawih chuan do tûr a ni si lo va, mi zawng zawng chungah zai­dam­in, zirtîr thiamin, sual chungah dawh­theiin,” tiin, a ziak a ni. ​—2 Timothea 2:​24; Sâm 141:3.

17. Mosia’n eng nge a tihsual a, chutaṭang chuan upaten eng nge an zir theih?

¹⁷ Enkawltu chuan “Pathian pâwlhote” (haw­rawp kan tih âwn a ni) nêna an inzawmna chu an mahni leh anmahni an inhriatnawntîr ṭhîn tûr a ni. (1 Petera 5:2) Inngaitlâwm tak a ni chung­in, Mosia chuan tawitêin he thlîrna hi a hlauh a ni. Israel mite chu “a thlarau chung­ah an hel a, a hmuia ṭha lo taka a sawi avângin. (Sâm 106:33) An ni pawh demkai lo an ni lo chungin, Pa­thian chu A mite enkawllohnaah chuan nasa takin a thinur a ni. (Numbers 20:​2-12) Tûn laiah chutiang chiah chona hma­chhawn a nihin, upate’n hriattihiamna leh ngilneihna nêna zirtîr leh kai hruai tûrin an bei tûr a ni. Kan unaute chuan mimal taka ṭanpui an ngaihna ngaihtuahna leh enkawl an nihin, siamṭhat leh rual loh anga ngai lovin a ṭha thei ang berin an chhâng lêt a ni. Paula’n: “Thu kan pêk apiang che u kha in zâwm ṭhîn a, in la zâwm leh zêl pawh Lalpaah chuan kan ring a ni,” tia a sawi tawh angin upate chuan a ṭha lam zâwnga thlîrna chu ṭan tlat a ngai a ni.​—2 Thessalonika 3:4.

An Mamawhte Chhan Theih

18, 19. (a) Theihna chin tâwk nei Bible zirlaite mamawh chu engtin nge kan chhânlêt ang? (b) Thil enge maw bîk chungchânga harsatna nei zirlaite chu engtin nge kan ṭanpui theih?

¹⁸ Zirtîrtu ṭangkai chuan a zirlaite theihnate leh tlintâwk pawm chu a duh a. (Johana 16:12 khaikhin rawh.) Isua talent tehkhin thuah chuan, hotu chuan “an tih theih tâwk tûr ang zêl ṭheuhvin” chanvo a sem a ni. (Matthaia 25:15) Bible zir kan kaihhruainaah chutiang chiah tih dân chu kan zui thei a ni. Matheilovin, hriatthiam theih taka hun tawi takah hian Bible ṭanchhana thuchhuah chu thlanawm a ni. Mi zawng zawngin ṭha taka chhiar thiamna emaw rang taka ngaih dân thar seng lût tûra theihna emaw an nei vek lo a nih pawhin, pawm ngei a ni tih a chiang tûr a ni. Chuvângin, thu pa­khat aṭang­a thu danga kai dâwnin mimal chhânglêt ten chak taka ke pênnaah harsatna an neih chuan hriatthiamna a ngai a ni. Hun bithliah huna zawh mai aia pawimawh zâwk chu zirlaiten an thil zir awmzia man tûra ṭanpui a ni.​—Matthaia 13:51.

¹⁹ Bible zirlai thil enge maw bîk Trinity emaw sakhaw chawlhnite emaw angah te harsatna neite tân chutiang bawkin sawi theih a ni. Kan zirnaah Bible-behchhaha beihna hmanrua telh chu a pawimawh lêm loh lai chuan, hei hi a ṭangkai dâwn chiang a nih chuan enge maw chângin chutiang chuan kan ti thei ang. Ṭûl lo taka zirlai hmasâwnna tlahniam tûr vên nân remruatna ṭha hman tûr a ni.

Thatho Tak Ni Rawh!

20. Paula khân a zirtîrnaah thathona leh thiltihtheihna lantîrin engtin nge entîrna a siam?

²⁰ “Thlarau kawngah chuan ṭhahnemngai ula,” tiin, Paula chuan a sawi a ni. (Rom 12:11) Ni e, in lamah Bible zirna kan kaihruai emaw kohhran inkhâwmnaah chanvo ṭhenkhat kan nei emaw pawh ni sela, taimâkna leh phûrna nên kan ti ang. Paula’n Thessalonika khuaa mite chu: “Khatia kan chanchin Ṭha chu thu chauhva in hnêna thleng lova, thiltihtheihna leh Thlarau Thianghlim leh nasa taka rin tlatna nên a lo thlen theih zâwk kha,” tiin, a hrilh a ni. (1 Thessalonika 1:5) Tichuan, Paula leh a ṭhiante chuan ‘Pathian Chanchin Ṭha chauh ni lovin, anmahni nun pawh pêk hial an peih’ thu an hriattîr a ni. ​—1 Thessalonika 2:8.

21. Kan zirtîrna chanvo lamah engtin nge tha­tho­na rilru kan vawn ang?

²¹ Thathona dik tak chu kan Bible zirlaiten sawi tûr kan neiha hriat an mamawh nghet taka hrilhhriatna aṭanga lo kal a ni. Zirtîrna chanvo engpawh hi hun bi nei angin i thlîr ngai lovang u. Hemi chungchângah hian dân zirtîrtu Ezra chuan a zirtîrnaah chuan a rilru a pe hlê a. “LALPA dân chu hriaa zawm tûr leh Israel-hote chu thuruatte leh rorêlte zirtîr tûrin a thinlung a siam tlat a,” ni. (Ezra 7:10) Nguntaka inbuatsaihna leh a hmanraw pawimawh laite ngaihtuahna hmangin chutiang bawk chuan kan ti ve tûr a ni. Rinna leh thiltihtheihna kan khah theih nân Jehova hnênah i ṭawngṭai ang u. (Luka 17:5) Kan thathona chuan Bible zirlaite chu thutak hmangaihna dik tak ti ṭhang lian tûrin a ṭanpui thei a ni. Matheilovin, kan zirtîrnaa rilru pêkna chuan zirtîrna kal hmang bîk riau hmanna pawh a huam tel a ni. Kan zir leh tûrah chûng ṭhenkhatte chu kan sawiho ang.

[Footnote]

I Hre Chhuak Thei em?

◻ Engvangin nge tûn laiah Kristian zirtîrtu thiamte mamawh an nih?

◻ Eng chîn dân ṭha zirna nge kan chhawm theih?

◻ Kan thu ngaithlatute zahna leh hma­ngaih­na chu engvângin nge a pawimawh êm êm?

◻ Kan Bible zirlaite mamawh chu engtin nge kan chhân lêt ang?

◻ Mi dangte kan zirtîrin engvângin nge thothona leh thurin ngheh a pawimawh êm êm?

[Phêk 10-naa milem]

Zirtîrtu ṭhate chu Pathian Thu zirlai an ni.

[Phêk 13-naa milem]

Bible zirlaite-ah mimal tuina nei rawh.