Zirtîrin Hriatthiam Theihna leh Rilru Hnehna Lantîr Rawh
“Mi fing thinlung chuan a kâ a zirtîr ṭhîn a, a hmuiah thiamna a belhchhah ṭhîn.”—THUFINGTE 16:23.
1. Eng vangin nge Pathian Thu zirtîrna chuan tluangmâwl taka hriattîrna mai aia tam a kaihhnawih?
PATHIAN Thu zirtîrtu kan nih angin zirlaite rilru chauh ni lo, an thinlung pawh tihvâr chu kan tum ber a ni. (Ephesi 1:18) Tichuan, zirtîrna chuan tluangmâwl taka hriattîrna pêk mai bâk thil tam zâwk a kaihhnawih a ni. Thufingte bung 16:23 chuan: “Mi fing thinlung chuan a kâ a zirtîr ṭhîn a, a hmuiah thiamna a belhchhah ṭhîn,” tiin, a sawi a ni.
2. (a) Thlêmthlûk tih awmzia chu eng nge ni? (b) Kristian zawng zawng te tân mi thlêmthlu thiam zirtîrtu nih chu engtin nge a theih?
2 Tirhkoh Paula chuan a zirtîrnaah he thu bul hi a hmang ngei ngei a ni. Korinth khua a awm laiin, “chawlhni apiangin inkhâwmna inah khûn takin thu a hril ṭhîn a, Judate leh Grikte chu thlêm thlûk a tum ṭhîn a.” (Tirhkohte 18:4) Mi thiam pakhat sawi dânin, heta Greek thumal “thlêm thlûk” tih awmzia hi “engemaw vâng emaw chhia leh ṭha hriatna ngaihtuahna mi hnehna hmanga ngaihtuahna thlâk danglam tîrna” tiin, a hmang a ni. Thu sawi mi hneh thei tak hmangin Paula chuan mi te ngaihtuahna hrang hrang a thlâktîr thei a ni. A thlêm thlûk theihna chu a mak êm avângin a hmêlmate chuan amah chu an hlau hial a. (Tirhkohte 19:24-27) Nimahsela, Paula zirtîrna chu mihring theihna lantîrna a ni lo. Korinth mite hnênah: “In rinna chu mihring finnaa innghat lovin, Pathian thiltihtheihnaa innghata a awm theih zâwkna tûrin, ka ṭawngka chhuak leh ka thu hrilhte chu thu finga thlêmna thuin a ni lo va, Thlaurau leh thiltihtheihnaa hriattîrin a nih zâwk kha,” tiin, a hrilh a ni. (1 Korinth 2:4, 5) Kristian zawng zawngten Pathian Jehova thlarau ṭanpuina an neih aṭang chuan, an za-in mi hneh thei tak zirtîrtu an lo ni thei ang. Mahse engtin nge ni ang? Zirtîr dân hmang ṭangkai ṭhenkhatte i lo en ang ho ang u.
Ngaithlatu Ṭha ni Rawh
3.Mi dangte zirtîr laiin engvângin nge hriat thiamna mamawh a nih a, engtin nge Bible zirlaite rilru kan man theih ang?
3 Zirtîr dân hmangin a a kaihhnawih hmasa ber chu sawi mai ni lovin ngaihthlâk pawh a ni. Thufingte bung 16:23-a chhinchhiah angin, thlêmthlu thei ni tûr chuan hriatthiamna kan nei tûr a ni a, Isua chuan a zirtîr mipuite chungchângah hriatthiamna a nei a ni. Johana 2:25 chuan: “Amahin mihring chhûnga awm apiang chu a hre si a,” tiin, a sawi a ni. Mahse, kan zirtîrte thinlunga thil awm chu engtin nge kan hriat theih ang? Hriat theihna kawng khat chu ngaithlatu ṭha nihna hmangin a ni. Jakoba bung 1:19 chuan: “Mi tinin ngaihthlâk chuh sela, thusawi chuh lo sela,” tiin, a sawi a ni. A dik a ni, mi zawng zawngin an ngaihtuahnate an sawi chhuak nghâl mai lo. Kan Bible zirlaite an mahnia kan tuina tak taka hmina an lo awm tawh chuan, an vei zâwng dik tak sawichhuah chu an lo châk sawt mai thei a ni. Ngilnei tak leh zawhna hriat thiam awl takte chuan thinlung thleng thei tûrin leh chutiang sawifiahna chu ‘phawrh chhuak’ thei tûrin min ṭanpui fo ṭhîn.—Thufingte 20:5.
4. Engvângin nge Kristian upate chu ngaihthlatu ṭha an nih ang?
4 Kristian upate ngaithlatu ṭha nih chu a bîk taka pawimawh a ni. Chutiang a nih chauh chuan ‘Mitin engtia chhân ṭheuh tûr nge ni tih an hre thei’ dâwn a ni. (Kolossa 4:6) Thufingte 18:13 chuan, “Ngaihthlâka hmâa chhân chu a tân âtthlâk nihna leh mualphona a ni,” tiin, a vaukhân a ni. Unaupa ṭhahnemngai tak pahnih chuan unaunu pakhat chu inkhâwm ṭhenkhata a tel loh avângin Pathian thu ṭanchhan lovin vawikhat an zilh a. Unaunu chuan inkhâwma a tel loh chhan an zawh loh avâng chuan a rilru a na êm êm mai a, tûn hnaia a inzai chu a ṭha chho leh ṭan chauh a ni si a. Chuvângin, zilhna neih hmaa ngaihthlâk hmasak chu a va pawimawh êm!
5. Engtin nge upate’n unaute zînga inhnialna chu an enkawl ang?
5 Upate tân, zirtîra chuan mi dangte zilhna pêk pawh a kaihhnawih fo ṭhîn. Hetah pawh hian ngaithlatu ṭha nih chu thil pawimawh tak a ni. Kristian puite inkâra buaina a awmin ngaihthlâk chu a bikin a pawimawh. Chutiang dinhmunah chuan thinlung a thawh dân a nasa fo ṭhîn a, upate chuan Thufingte 18:17-a zilhna thu: “A thiamna thu sawi hmasatu chu felin a lang ṭhîn a, mahse, a ṭhenawmte an lo kal a, an rawn tilang ṭhîn.” hi an rilru-a an vawn reng a ngai a ni. Zirtîrtu ṭangkai chuan pâwl lehlam lehlam chu a ngaithla tawn ang. Ṭawngṭaia hlanin, boruak muanawm siam tûrin a ṭanpui a ni. (Jakoba 3:18) Thinlung chu a sosân viau chuan an pahniha inhnial aiin unaute chu a mal ṭheuhvin a tel ve dân chiang tak a hnêna hrilh tûrin a rawn thei a ni. Zawhna zawh âwm tak te hmangin, upa chuan thil ngaihtuah fel tûr chu a tichiang thei mai thei bawk. Thil thleng tam takah chuan inhuatna hrim hrim aiin inbiak pawhna tlêm avângin buaina a lo thleng ṭhîn a ni. Mahse, Bible dân bul bawhchhiat a nih chuan, hmangaihna nei zirtîrtu chuan ngaithla tawn ve ve-in hriatthiamna nên tûnah chuan a zirtîr thei a ni.
Tluangmâwl Taka Nun Hlutna
6. Paula leh Isua khân tluangmâwl taka zirtîrna-ah engtin nge entawn tûr an lo siam?
6 Tluangmâwl taka thilte vawnna chu zirtîr thiamna hlu tak dang a ni. Ni e, Bible zirlai ‘mi thianghlim zawng zawng nên chuan a zuazia te, a seizia te, a sânzia te, a thûkzia te hrechiang thei’ nih chu kan duh a ni. (Ephesi 3:14-19) Bible thu rin hrang hrang chona ni fo ṭhîn leh mi hîp tak tak a awm a. (Rom 11:33) Nimahsela, Paula’n Greek-a thu a hrilh chuan ‘Krista khenbeh’ thu tluangmâwl takah chuan a rilru a dah a ni. (1 Korinth 2:1, 2) Chutiang bawkin, Isua pawhin mi hîp tûr zâwng, fiah takin thu a hril ṭhîn. Tlâng chunga a Thu sawiah pawh khân thu mal hriat awlsam tak a hmang a; mahse, thutak kulmût ber ber ṭhenkhatte pawh a huam tel vek tho a ni.—Matthaia, bung 5-7.
7. Bible zirna kaihhruai laiin engtin nge thilte tluangmâwl takin kan vawn theih ang?
7 Keini pawh Bible zirlaite kan zirtîr-in chutiang chiah chuan thilte kan vawng tluangmâwl thei a ni. Engtin? “Thil pawimawh bîk” a rilru pêkna hmangin. (Philippi 1:10, NW) Zirlai ril tak kan hrilhfiahin, ṭawngkam mawlmang taka sawichhuah kan tum ang. Lehkhabu-a Bible bung leh châng târlan zawng zawng chhiar leh sawifiah vek tum ai chuan a thu ziak pawimawh lai takah kan ngaihtuahna kan pe ang. Hei hian kan chanvo-ah chuan inpuahchahna ṭha a mamawh a ni. Thil pawimawh lo zâwk thu hmanga kan thu sawi lai pensan lovin, a kipkawi lutuka zirlai sawipui chu kan pumpelh a ngai a ni. Zirlai-in zirlai thu nêna inzawmna neilo zawhna a neih chuan, zirlai zawh huna sawiho tûrin thiam takin kan râwn thei a ni.
Zawhnate Hman Ṭangkai
8. Isuan engtin nge zawhnate ṭangkai taka a hman?
8 Zirtîrna thiam thil ṭangkai tak dang chuan zawhna ṭangkai tak zawh pawh a huam tel a ni. Isua Krista chuan a zirtîrna-ah zawhna zau zâwkin a zâwt ṭhîn a ni. Entîr nân, Isuan: “‘Simon engtin nge i ngaih? Lei a lalten chhiah emaw, sum neih man emaw tu lakah nge an lâk ṭhîn? An fate lakah nge, mi hrang lakah? ‘Mi hrang lakah,’ tia a sawi veleh, Isuan: ‘chuti a nih si chuan fate chu an âwl a ni ang chu,’” tiin, a hrilh a. (Matthaia 17:24-26) Biak ina an biak Pathian Fapa mal neihchhun a ni nâin, Isua chuan biak in chhiah pêk chu a thlahthlam ngai lo. Mahse, Isua chuan he thutakte chu zawhna ṭangkai tak hmangin a awmzia a lantîr ṭhîn a ni. Tichuan Isua’n Petera chu a lo neih tawhsa hriattîrna ṭanchhanin thu tâwp siamna dik tak hre tûrin a ṭanpui a ni.
9. Bible zirpui chhûngin engtin nge zawhna kan hman ang?
9 Bible zirpui chhûngin zawhnate ṭangkai takin kan hmang thei a ni. Zirlaiin a chhân dik loh chuan, a dik hrilh chu a châk awm mai thei a; mahse, ani chuan chu hriattîrna chu a vawng tak tak em? Zawhnate zâwtin zirlaite chu thutlûkna dika hruai tum chu a ṭha ber fo. Entîr nân, chung lam hming a hmanna tûr chhan hriatthiamnaah harsatna an neih chuan, ‘I hming hian nangmahah pawimawhna a nei em? . . . Engvâng nge? . . . Mi tuin emaw i hming hman tûr chu lo hnâwl se engtin nge i ngaih ang? . . . A mimal hming kan hman phût a nih chu Pathian tân awmze nei tak a ni lâwm ni?
10. Thinlung lama natna veite ṭanpuina-ah engtin nge upaten zawhna an hman theih?
10 Upate’n berâmte an enkawlin hman ṭangkai tûr zawhnate an siam thei bawk. Kohhrana mi tam takte chu Setana Khawvêl-in thinlung lama hliam leh sawisakin an awm mêk a; tin, ngainatawm lo leh thlarau lama thianghlim lo-ah an inngai mai thei bawk. Upate chuan chûng mite hnênah: ‘Thlarau lama thianghlim lovah i inngai nâ a, Jehova’n engtiang nge a ngaih che? Vâna kan pa chuan tlanna pe tûr chein a Fapa a thihtîr phal a, chu chu Pathianin a hmangaih che tihna a ni lo vem ni? ti a sawiin, an hrilhfiah thei a ni.—Johana 3:16.
11. Zawhna mi hneh thei takin eng thil tum nge a thawh a, vântlâng thusawina-ah engtin nge hman theih a nih?
11 Zawhna mi hnehthei takte chu zirtîr thiamna hmanraw ṭangkai tak dang a ni. Ngaithlatute chu hêng zawhna chhâng tûr hian beisei an ni lo va; mahse, thil awmdân hriatthiam nâna ṭanpuina a ni. Hmân lai zawlneite’n chutiang zawhna chu an thu ngaithlatute ngaihtuahna thûk tak man theih nân an lo hmang fo ṭhîn. (Jeremia 18:14, 15) Isua pawhin zawhna mi hnehthei takte chu ṭangkai takin a hmang bawk. (Matthaia 11:7-11) Chutiang zawhna chu a bîk takin vântlang thu sawina-ah a ṭangkai a ni. Ngaithlatute chu Jehova tihlâwm nân thinlung zawng zawngin kan titûr a ni tih tluangmâwl taka hrilh mai ai chuan, ‘kan rawngbâwlna-ah thinlung zawng zawnga dik taka kan tih lohvin, Jehova a lâwm ang em?’ ti a zawh chu a ṭangkai zâwk mai thei a ni.
12. .Zawhna pawimawh zual zawh hlutna chu eng nge ni?
12 Bible zirlaiin a zirlaite chu a ring tak tak nge tak tak lo hriat nân zawhna pawimawh zualte zawh chu thil ṭang kai tak a ni. (Matthaia 16:13-16) Zirlai chuan inngaihna chu sual a ni tih chu dik takin a chhâng thei a. Chûng zawhna chu, Pathian tehna nunphûng ṭha chu nangman engtin nge i ngaih? A khirh lutuk niin i ngai em? Pathian tehna chu i zawm emaw, zawm lo emaw thil pawimawh tak zet a ni tiin i sawi ang em? tiin, engvângin nge kan zawh zui lovang.
Thinlung Thleng Ngei Tehkhin Thute
13, 14. (a) Thil enge maw tehkhin thu chu enge a awmzia? (b) Tehkhin thu ṭha chu engvângin nge a ṭangkai?
13 Bible zirlaite leh ngaithltute thinlung thlenna kawng dang leh chu tehkhin thu ṭangkai tak hmangin a ni. Greek hrilhfiahna chuan “tehkhin thu” awmzia chu ‘a teuh bertu emaw, a rual emaw a târlanna’ tiin, a sawi a ni. Thil i tehkhinin, thil eng emaw inang êm êm ‘a teuh bertu târlanna’ hmangin thil eng emaw i hrilhfiah a ni. Entîr nân, Isua’n: “Pathian ram chu engtin nge kan tehkhin ang? a nih loh leh, eng tehkhin thuin nge kan tehkhin ang?” tiin, a zâwt a, a chhân nân, Isua chuan hriat ṭhan tak anṭam chi a sawichhuak a ni.—Marka 4:30-32.
14 Pathian zawlneite chuan tehkhin thu thiltithei tak tam tak an lo hmang ṭhîn a. Assuria hun laiin, Israelte hremnaa Pathian hmanrua ang thawk, nunrâwnna thiltih nâna hmangṭangkaitute chu Isaia chuan an pâwngpawrhna chu tehkhin thu nên hetiang hian: “Hreipui hian thil cheh nâna hmangtu chu a uankhum dâwn em ni? Thingzaina hian a hrûttu chu a hnuaichhiah dâwn em ni?” tiin, a târ lang a ni. (Isaia 10:15) Mi dangte zirtîrnaah, Isua’n hetiang chiah tehkhin thu huam zau takin a hmang ṭhîn. “Tehkhin thu lovin an hnênah thu a sawi ngai lo,” tih sawilan a ni. (Marka 4:34) Thinlung leh ngaihtuahna chu an thunun ve ve avângin, tehkhin thu ṭhate chu a ṭangkai a ni. Thil an lo hriat ṭhan tawh nêna khaikhinna hmangin ngaithlatute chu thu hriattîr tharte rangtaka seng lût tûrin an pawmpui a ni.
15, 16. Engin nge tehkhin thu chu ṭangkai bera siam ang? Entîrnate pe rawh.
15 Thinlunga thleng ngei tehkhin thute chu engtin nge kan hman ang? A hmasa berin, tehkhin thu chu thil hrilhfiah nên hriatthiam theih takin a in ang tûr a ni. Thu khaikhin a in an loh chuan, ngaithlatu tihvârna aiin mahin an rilru a tibuai zâwk ang. Vawi khat chu thu sawitu lâr tak pakhatin hriak thih la bângte Isua Krista-a an intukluhna chu Ui rinawm tak nêna tehkhinin sawifiah a tum a. mahse, chu tehkhinna chu a in hmeh chiah em? Bible chuan a sawi tum tho chu nasa taka mi hîp zâwngin leh zahawm zâwkin a sawichhuak a ni. A ni chuan Isua zuitu hriak thihte mi 1,44,000-te chu “mo a pasal ela a inchei” angin a khaikhin a ni.—Thu Puan 21:2.
16 Mite nunna nêna a inkungkaih chuan tehkhin thute an ṭangkai ber a ni. Berâm talh tehkhin thu Nathana sawi chuan Lal Davida rilru chu a khawih hle a, a chhan chu berâm a hmangaih a, a tleirawl laiin berâm vêngtu hna a lo thawk tawh bawk a ni. (1 Samuela 16:11-13; 2 Samuela 12:1- 7) Tehkhin thu chuan bawngpa chung châng sawi nise chu, a ṭangkai tûr angin a ṭangkai hauh lovang le. Chutiang chiah chuan, tehkhin thu chu thil bul chhûtna dang dai tak emaw, hriat ngai loh hmân lai thil thlengte emaw chuan ngaithlatute-ah pawimawhna tlêm tê chauh a nei mai thei a ni. Isua chuan a tehkhin thute chu nitin nun aṭangin a siam ṭhîn a ni. A ni chuan khâwnvâr te, chunglêng sava te, leh ram tûktinpâr ang chi thil hriat lârte a sawi ṭhîn. (Matthaia 6:26, 28; 6:26, 28) Isua ngaithlatute chuan chûng thilte chu awlsam takin an hrethiam thei ṭhîn a ni.
17. (a) Kan tehkhin thute ṭanchhan chu engah nge ni thei? (b) Kan zirlaite dinhmun hrang hrang kan thuchhuah a tehkhin thu a hmante engtin nge kan pawm ang?
17 Kan Rawngbâwlnaah, tluangmâwl tak; mahse, tehkhin thu ṭangkai tak ni bawk si hmanna hun remchâng tam tak kan nei a. Ngaihtuah thiam tak mi ni ang che. (Tirhkohte 17:22, 23) Tehkhin thu chu a ngaithlatu naupang, in, hna, a nih loh leh ngainat zâwngte ṭanchhanin a siam theih mai thei a. Chu bâkah, kan zirlai bu-a tehkhin thu min pêk sa belhchhah nân Bible zirlai a mimal taka kan hriatna chu kan hmang thei bawk ang. Entîr nân, Chatuan Nunnaa Hruaitu Hriatna (English) lehkhabu bung 8 thuchângkim 14-na a tehkhin thu ṭangkai tak chu la chhuak ang che la, chu chuan hmangaihnaa khat nu leh pa chu ṭhenawmten dâwta an puh thu a târ lang a. Bible zirlai nu leh pate hnênah tehkhin thu chu engtin nge kan pawm theih tih chung chângah ngaih dân ṭha tak kan pe thei a ni.
Thiam Taka Pathian Lehkha Thu Chhiar
18. Engvângin nge chhiartu nâl ni tûra kan beih ang?
18 Paula chuan Timothea chu: “Chhiar te, thu hrilh te, zirtîr te bei uar rawh,” tiin, a fuih a ni. (1 Timothea 4:13) Bible hi kan zirtîrna bulpui a nih avângin nal taka chhiar theih chu a ṭangkai a ni. Levia chi te chuan Mosia dân chu Pathian mite hma-a chhhiarna chanvo an nei a. Chutiang chhiarna emaw, an chhiar rengnaah emaw chuan an bahlah em? Bahlah lo, Bible-in Nehemia 8:8-ah chuan: “Tin, Pathian dân bua mi chu fiah takin an chhiar; a awmzia an hrilhfiah a, tichuan an chhiar chu an hriat chiantîr zêl a,” tiin, a sawi a ni.
19. Engtin nge Pathian lehkha thute chhiarah hma kan sâwn theih ang?
19 Kristian mipa ṭhenkhat thu sawi nal takte pawn an chhiar hunin an chhiar ṭha tâwk ṭhîn lo va, chûng chuan engtin nge hmasâwnna an siam theih? Beih chhinna hmangin. Ni e, nal taka an tihtheih thlenga a ri a chhiar nawn chhiar nawnna hmangin a ni. In ṭawnga Bible Cassette hmuh tûr a awm chuan, a chhiartu-in a awmzia uar a duh leh a thlûk danglam dânte ngaihthlâk leh hmingte leh thu mal hriatṭhan lohte lam dân ziah chu a finthlâk a ni. New World Translation mahni hman ṭawnga neite chuan lam rîk dân puitu atân remchângah an hmang thei bawk ang.a Tihchhinna nên chuan, Maʹher-shalʹal-hash-baz hming ang te pawh harsa lo takin kan chhiar thei dâwn a ni.
20. Engtin nge ‘Kan zirtîrna kan fimkhur’ theih ang?
20 Jehova mite zirtîrtu anga hman tûr chu kan nihlawh bîkna a va ni êm! Chuvângin kan zâ-in chu mawhphurhna chu tihtakzetin i la ang u. ‘keimahni leh kan zirtîrnaah chuan kan fimkhur’ ang. (1 Timothea 4:16) Ngaithlatu ṭha nihna hmangin, thilte tluangmâwl taka vawngin, thiam taka zawhna zâwtin, tehkhin thu ṭangkai tak hmangin, leh thiam taka pathian lehkhathute chhiarna hmangin zirtîrtu ṭha kan lo ni thei a ni. Jehovan a inâwpna pâwl kaltlanga min pêk zirtîrna a ṭangin kan vaiin hlawkna kan nei a, hei hian “zirtîrte lei” nei tûrin min ṭanpui thei a ni. (Isaia 50:4) Kan rawngbâwlna atâna hmanrua min pêk zawng zawng brochures, cassettes, leh videocassettes te pawh tiam vekin, hêng hi ṭangkaitaka hmanna aṭangin, remhriatna leh rilru hnehtheihna nêna zirtîr kan thiam thei a ni.
[Footnote]
a Hming bîkte chu a rîk dân a darh a, a ri zât tinte hi thai phei emaw, aw phawi chhinchhiahna emaw hmanga ṭhen hrang a ni ṭhîn. Uarna chu lam rîk dân hmangin thumal lam rîk zât chhinchhiahna-ah dah a ni a, thu mal lam rîk chu vowel-a a tawp chuan lam rîk sei a ni ṭhîn. Tin, consonant-a a tawp chuan vowel chu lam rik tawi a ni thung.
I Hre Chhuak Thei Em?
◻ Engtin nge ngaithlatu ṭha nihna chuan kan zirtîrnaah min ṭanpuina theih?
◻ Tluangmâwl taka zirtîrnaah engtin nge Paula leh Isua kan entawn theih?
◻ Mi dangte kan zirtîrin eng ang chi zawhnate nge kan hman theih?
◻ Eng ang tehkhin thu nge ṭangkai ber?
◻ Mipui hmaa lehkha chhiartu kan nihin engtin nge hma ka sâwn theih?
[Phêk 16-naa milem]
Zirtîrtu ṭha chuan hmuhthiamna nei tûrin a ngaithla ṭhîn
[Phêk 18-naa milemte]
Isua chuan nitin nun aṭangin tehkhin thu a siam ṭhîn